1. Paquemodo kita ta beneficia si tan cuento kita con otro acerca si paquemodo kita ya guinda na verdad?

 “PAQUEMODO tu ya guinda na verdad?” Asigurao, manada beses ya tu con ese ya contesta. Uno se na cosa kita ta pregunta con el un hermano o hermana si quierre kita mas conoce con ele. Alegre kita oi si paquemodo el diaton maga hermano y hermana ya conoce y ya ama con Jehova, y alegre tambien kita habla kanila si paquemodo de precioso kanaton el verdad. (Roma 1:11) Si tan cuento kita kanila, ta ayuda tambien este kanaton para acorda si paquemodo kita ta aprecia que uno kita del maga Testigo de Jehova. Ta queda tambien kita mas determinao que “vivi comforme con el Verdad”​—quierre decir, continua vivi na manera que puede kita obtene el bendicion y favor de Jehova.​—3 Juan 4.

2. Cosa kita hay discuti na este articulo?

² Na este articulo, hay man repaso kita con el cuanto maga razon si porque kita ta ama con el verdad. Despues, hay considera kita si paquemodo kita puede continua dale mira que ta ama kita con este precioso regalo. Asigurao, hay hace este hondo con el diaton apresacion na cosa ya hace si Jehova para guinda kita na verdad. (Juan 6:44) Hay hace tambien este fuerte con el diaton deseo que habla con otro acerca con el verdad.

3. Cosa el de con todo importante razon si porque kita ta ama con el verdad?

³ Manada razon si porque kita ta ama con el verdad. El de con todo importante razon amo cay ta ama kita con Dios Jehova, el Tuburan del verdad. Por medio na de suyu Palabra, el Biblia, ya puede kita conoce con ele gendeh lang como el Creador del cielo y tierra sino como el diaton amable Tata na cielo, quien interesao gayot kanaton. (1 Ped. 5:7) Sabe kita  que el diaton Dios “lastimoso y tiene compasion, gendeh pronto rabia y abundancia de amor leal y verdad.” (Ex. 34:6) Ta ama si Jehova con el justicia. (Isa. 61:8) Ta queda le triste si ta mira le que ta sufri kita y preparao le​—gane, bien quierre le—​que quita con el todo diaton sufrimiento na justo tiempo. (Jer. 29:11) Bien bonito gayot se tiempo! Amo se el uno na maga razon si porque ta ama gayot kita con Jehova.

4-5. Porque ya compara si apostol Pablo con el diaton esperanza na ancla?

⁴ Cosa pa el otro razon si porque kita ta ama con el verdad? Manada beneficio este ta dale kanaton. Considera un ejemplo. Parte na verdad del Biblia el diaton esperanza para na futuro. Para ilustra si porque importante ese esperanza, si apostol Pablo ya escribi: “Este esperanza igual como un ancla asegurao para del diaton alma.” (Heb. 6:19) Igual si paquemodo el ancla ta aguanta con el barco para gendeh este man anud, el diaton esperanza puede ayuda kanaton para esta calmao y gendeh man anud na maga problema.

⁵ Na este contexto, si Pablo ta discuti acerca na esperanza na cielo del maga iscujido Cristiano. Pero, el de suyu maga palabra aplicable tambien na maga Cristiano quien tiene el esperanza que vivi hasta para cuando na paraiso tierra. (Juan 3:16) Cay ya aprende kita acerca na esperanza de vida eterna, asigurao ya tiene proposito el diaton vida.

6-7. Paquemodo ya beneficia si Yvonne cay ya aprende le con el verdad acerca na futuro?

⁶ Considera con el experiencia del un hermana que si Yvonne. Nuay le engranda na verdad y cuando bata le, ta tiene le miedo muri. Pirmi le ta acorda con el un frase que ya puede ele le: “El todo hay experiencia gayot muerte.” Ele ya habla: “Por causa na este maga palabra, gendeh yo ta puede durmi cay ta pensa yo acerca na futuro. Ya pensa yo, ‘Asigurao tiene proposito el vida. Porque yo taqui?’ No quierre yo muri!”

⁷ Cuando ya queda teenager si Yvonne, ya puede le conoce con el maga Testigo de Jehova. Ele ya habla: “Ya principia yo creé que puede yo tene el esperanza que vivi hasta para cuando na paraiso tierra.” Paquemodo el diaton hermana ya beneficia cay ya aprende le con el verdad? Ele ya omenta: “Gendeh mas yo ta esta dispierto bien denoche que tan lingasa acerca na futuro o muerte.” Claro que bien precioso con Yvonne el verdad y alegre tambien le habla con otro acerca el de suyu esperanza na futuro.​—1 Tim. 4:16.

8-9. (a) Na uno del maga ilustracion de Jesus, paquemodo de valuable para con el un gente el tesoro que ya incuntra le? (b) Paquemodo de valuable el verdad para contigo?

⁸ Parte tambien na verdad del Biblia el buen noticia acerca na Reino del Dios. Ya compara si Jesus con el verdad acerca con ese Reino na un escondido tesoro. Como cosa ya menciona na Mateo 13:44, si Jesus ya habla: “El Reino del Cielo igual como un tesoro escondido na un tierra, que un gente ya puede encontra y ya esconde le otra vez con ese. Na su alegria, ya anda le vende todo el que tiene le, y ya compra con ese tierra.” Nota que nuay busca el gente con el tesoro pero cuando ya incuntra le con este, ya hace le maga grande sacrificio para obtene con ese. Gane, ya vende le el todo cosa le tiene. Porque? Sabe le si paquemodo de precioso aquel tesoro. Mas valuable quel contra na maskin cosa le ya sacrificia.

⁹ Ansina ba tambien tu ta sinti acerca na verdad? Asigurao, ansina gayot! Sabe kita que nuay maskin cosa na este mundo que mas  valuable contra na alegria que tiene kita cay ta sirvi kita con Jehova ahora y tiene kita el esperanza de vida eterna na futuro bajo na rulanza del Reino. Gendeh sayang el maskin cosa sacrificio que ya hace kita para tene un cerca personal relacion con Jehova. El cosa kanaton ta dale grande alegria amo que “hace con Ele alegre.”​—Col. 1:10.

10-11. Cosa ya motiva con Michael para hace maga grande cambio na de suyu vida?

¹⁰ Manada kanaton el ya hace maga grande sacrificio para tene el favor de Jehova. El cuanto ya deja con el diila prestigioso trabajo na este mundo. El otro nuay mas pricura queda rico mientras el otro ya cambia gayot con el diila manera de vida cuando ya aprende sila acerca con Jehova. Amo se el cosa ya hace si Michael. Nuay le engranda na verdad. Cuando joven le, ya aprende le man karate. Ele ya habla: “Bien importante para conmigo que esta na condicion el de mio cuerpo. Tiene vez, ta sinti yo que mafuerza gayot yo.” Pero cuando ya principia le estudia con el Biblia, ya aprende si Michael si cosa el mirada de Jehova na violencia. (Sal. 11:5) Acerca na maridable Testigo quien ya estudia con ele, si Michael ya habla: “Nuay sila habla conmigo que descanza man karate; ya continua lang sila enseña conmigo el verdad na Biblia.”

¹¹ Mientras mas ta aprende si Michael acerca con Jehova, mas ta queda tambien grande el de suyu amor para con Ele. Grande gayot efecto con ele el compasion de Jehova na De Suyu maga siervo. Na uliji, ya realiza si Michael que necesita le hace un bien importante decision. “Sabe yo que man dificil gayot yo deja con el karate,” ele ya habla. “Pero, sabe tambien yo que hay hace este alegre con Jehova y convincido yo que gendeh sayang el maskin cosa sacrificio que hay hace yo para sirvi con ele.” Ya aprecia si Michael con el verdad que ya incuntra le y ese apresacion ya manda move con ele para hace maga grande cambio na de suyu vida.​—Sant. 1:25.

12-13. Paquemodo el verdad na Biblia ya ayuda con Mayli?

¹² Para dale mira el importancia del verdad, ya compara el Biblia con ese na un lampara que ta arde na iscuridad. (Sal. 119:105; Ef. 5:8) Si Mayli, de Azerbaijan, ya aprecia gayot con el ayuda que ya ricibi le estaba na Palabra del Dios. Otro-otro el religion del de suyu mayores. Muslim el de suyu tata y Judio el de suyu nana. Ele ya habla: “Maskin nuay yo man duda que ta existi el Dios, manada siempre yo maga pregunta. Ya pensa yo, ‘Porque ya crea el Dios con el maga gente y porque necesita el un persona sufri na de suyu entero vida y despues, castiga siempre con ele hasta para cuando na infierno?’ Ciendo ta habla el maga gente que querrer del Dios el todo cosa ta sucede, ya pensa yo, ‘Dol puppet lang ba kita del Dios quien alegre mira que ta sufri kita?’”

¹³ Ya continua busca si Mayli con el maga contestacion del de suyu maga pregunta. Na uliji, ya acepta le un Bible study y ya queda uno del maga Testigo de Jehova. “El maga razonable enseñanza na Biblia ya ayuda conmigo para queda un mas alegre persona,” ele ya habla. “El maga explanacion que ya incuntra yo por medio na Palabra del Dios ya dale conmigo paz na pensamiento.” Igual con Mayli, ta alaba kita con Jehova, el “quien ya llama [kanaton] afuera del escuridad para na disuyo bien bonito luz.”​—1 Ped. 2:9.

14. Paquemodo kita puede hace hondo con el diaton amor para na verdad? (Mira tambien con el cajon “ Otro Cosas que Puede Compara na Verdad.”)

¹⁴ Cuanto ejemplo lang este que ta ilustra con el importancia del verdad. Asigurao,  manada pa tu ejemplo ta puede pensa. Porque gendeh hace con este un personal study project para sabe el otro pa maga razon si porque kita debe ama con el verdad? Si mas ta ama kita con el verdad, hay mas busca kita maga manera para dale mira el diaton amor para con este.

15. Cosa el un manera que puede kita dale mira el diaton amor para na verdad?

¹⁵ Ta puede kita dale mira que ta ama kita con el verdad si regular kita ta estudia con el Biblia y con el maga publicacion que base na Biblia. Maskin ya tarda ya kita na verdad, manada siempre kita cosa aprende. El primer issue de este magasin ya habla: “El verdad amo igual na un diutay flores que posible dificil tu incuntra por causa na maga sahbut de imbusterias alrededor de este. Para incuntra con este, necesita tu mira enbuenamente. . . . Para saca con este, necesita tu hace esfuerzo. No queda contento na un flores lang de verdad. . . . Pricura saca pa mas.” Necesita esfuerzo para estudia pero gendeh gayot se sayang.

16. Cosa manera de estudiada el efectivo para contigo? (Proverbio 2:4-6)

¹⁶ Gendeh todo kanaton el quierre-quierre  le y estudia. Pero, si Jehova ta anima kanaton que ‘continua busca’ para puede mas entende con el verdad. (Le con el Proverbio 2:4-6.) Si ta hace kita con este maga esfuerzo, pirmi kita ta beneficia. Acerca na de suyu lehida de Biblia, el un hermano que si Corey ya habla que tan focus le con el cada versiculo. Ele ya explica: “Ta le yo con el cada footnote, ta mira con el cada cross-reference y ta hace omento research. . . . Este manera ya ayuda conmigo para aprende manada cosas!” Ta usa man kita con este manera o otro pa, ta dale kita mira el diaton apresacion para na verdad si ta dale kita tiempo y esfuerzo para estudia con este.​—Sal. 1:1-3.

17. Cosa quierre decir que vivi harmonia na verdad? (Santiago 1:25)

¹⁷ Siempre, sabe kita que gendeh bastante que estudia lang con el verdad. Para beneficia gayot, necesita kita vivi harmonia na verdad, quierre decir, aplica con el cosa kita ta aprende na diaton vida. Na ese manera lang el verdad hay dale kanaton deverasan alegria. (Le con el Santiago 1:25.) Paquemodo kita puede asigura que ta vivi kita harmonia na verdad? El un hermano ya habla que puede kita examina si na cosa aspeto del diaton vida ta aplica kita con el verdad y si onde pa kita necesita hace maga cambio. Si apostol Pablo ya habla: “Sigui kita siempre corre na ese mismo camino.”​—Fil. 3:16.

18. Porque kita ta hace esfuerzo que continua “vivi comforme con el Verdad”?

¹⁸ Pensa con el maga beneficio si hace kita esfuerzo que continua “vivi comforme con el Verdad”! Gendeh lang mas ta queda enbuenamente el diaton vida sino ta dale tambien kita alegria con Jehova y na diaton maga hermano y hermana. (Prov. 27:11; 3 Juan 4) Tiene pa ba mas importante razon que con ese para ama kita con el verdad y vivi harmonia con ese?