1. Cosa el maga buen cosas que ya puede ya hace el manada maga jovenes?

 CADA año, miles de maga jovenes el ta bautiza. Ya puede ya ba tu hace con este? Si ansina, alegre el de tuyu maga espiritual hermano y hermana, y alegre tambien si Jehova! (Prov. 27:11) Pensa con el maga buen cosas que ya puede ya tu hace. Ya estudia tu enbuenamente con el Biblia, posible por cuanto año. Por causa con este, ya queda tu convincido que el Biblia amo el Palabra del Dios. Pero mas pa con ese, ya puede tu conoce y ama con el Autor de ese sagrao libro. Ya queda bien hondo el de tuyu amor para con Jehova poreso ahora, un dedicao y bautizao siervo ya tu de suyu. Justo gayot el decision que ya hace tu!

2. Cosa kita discuti na este articulo?

 ² Asigurao, ya puede ya tu enfrenta manada probanza na de tuyu fe antes pa el de tuyu bautismo. Pero mientras ta pasa el tiempo, hay enfrenta tu maga nuevo probanza. Si Satanas hay pricura hace maga manera para descanza tu ama y sirvi con Jehova. (Ef. 4:14) Gendeh tu debe permiti que sucede se. Cosa puede ayuda contigo para esta leal con Jehova y cumpli con el cosa tu ya promete con ele? Debe tu “continua” progresa para queda un mature Cristiano. (Heb. 6:1, El Nuevo Testamento) Pero, paquemodo tu puede hace con este? Ese el cosa kita discuti na este articulo.

3. Cosa debe hace el todo maga Cristiano despues sila bautiza?

³ Despues del bautismo, todo kita necesita sigui con el consejo que ya dale si apostol Pablo na maga hermano y hermana  na Efeso. Ya anima le kanila que queda maga mature Cristiano. (Ef. 4:13) Quierre decir, necesita sila continua progresa. Ya compara si Pablo con el progreso del maga Cristiano na manera si paquemodo ta engranda el un bata. Alegre el maga mayores si ya nace el un baby y ta ama gayot sila con ele. Pero, gendeh le puede esta como baby hasta para cuando. Llega el tiempo, necesita le gendeh mas sigui con “el maga modo [o manera] de bata.” (1 Cor. 13:11) Ansina tambien el maga Cristiano. Despues del bautismo, debe kita continua progresa. Considera kita cuanto sugestion que puede ayuda kanaton para hace con ese.

4. Cosa calidad el puede ayuda contigo para progresa na espiritual? Explica. (Filipo 1:9)

⁴ Hace mas hondo el de tuyu amor para con Jehova. Asigurao, ta ama ya tu con Jehova. Pero, puede pa queda mas hondo ese amor. Paquemodo? Si apostol Pablo ya menciona con el un manera na Filipo 1:9. (Le.) Ya reza si Pablo que ojala el amor del maga de Filipo “ay sigui pa crici.” Entonces, puede pa queda hondo el diaton amor. Puede kita hace con ese si tene kita justo “saber y buen juicio.” Si mas ta conoce kita con Jehova, mas ta ama kita con ele y mas ta aprecia con el de suyu personalidad y si paquemodo le ta hace con el maga cosas. Hay queda mas grande el diaton deseo para hace alegre con ele y gendeh kita hace con el maskin cosa que puede hace triste con ele. Ta hace kita esfuerzo para entende si cosa el de suyu voluntad y ta vivi harmonia con ese.

5-6. Cosa kita puede hace para queda mas hondo el diaton amor para con Jehova? Explica.

⁵ Hay queda mas hondo el diaton amor para con Jehova si mas conoce kita con el de suyu Anak, quien ya puede gayot imita con el personalidad del de suyu Tata. (Heb. 1:3) El de con todo buen manera que puede kita conoce con Jesus amo si estudia kita con el cuatro Evangelio. Si gendeh pa tu ta le con el Biblia cada dia, puede tu principia ahora y le con el maga istoria acerca con Jesus. Mientras ta le tu con ese, observa con el de suyu maga calidad. Facil con ele atraca y amable le con el maga diutay bata. (Mar. 10:13-16) Comfortable con ele man junto el de suyu maga dicipulo y gendeh sila ta tiene miedo habla si cosa sila ta pensa. (Mat. 16:22) Na ese maga manera, ya imita gayot si Jesus con el de suyu Tata na cielo. Bien facil tambien atraca con Jehova. Puede kita hace con ese por medio na rezo. Si ta reza kita, puede kita habla con ele el maskin cosa que ta sinti kita. Puede kita asigura que gendeh le juzga kanaton. Ta ama le y bien interesao kanaton.​—1 Ped. 5:7.

⁶ Tiene lastima si Jesus con el maga gente. Si apostol Mateo ya escribi: “Cuando ya mira Le con el montonada del maga gente, ya tene Le lastima canila cay cansao sila y desanimao, igual sila como maga carnero noay pastor.” (Mat. 9:36) Y cosa tambien ta sinti si Jehova? Si Jesus ya habla: “Ansina tamen el de ustedes Tata na cielo, no quiere que ay perde ni uno de este maga diutay.” (Mat. 18:14) Ta ama gayot kanaton si Jehova. Mientras ta conoce kita mas con Jesus, mas ta queda hondo el diaton amor para con Jehova.

7. Cosa el beneficio si man junto tu con el maga mature Cristiano?

⁷ Puede tambien tu aprende queda mas amable y progresa como un Cristiano si mas conoce tu con el maga mature hermano y hermana na de ustedes congregacion. Observa si paquemodo sila de alegre. Nuay gayot sila arripinti con el diila decision que sirvi con Jehova. Pidi kanila que relata contigo el cuanto  maga experiencia que ya tiene sila na servicio con Jehova. Si necesita tu hace importante decision, pidi consejo kanila. Acorda que “tiene buen exito si manada el ta dale consejo.”​—Prov. 11:14.

8. Cosa tu puede hace si tan duda tu acerca na cosa ta habla el Biblia?

⁸ Quita con el de tuyu duda. Como cosa ya menciona na  parapo 2, hay pricura contigo sangga si Satanas para gendeh tu progresa na espiritual. El un manera que posible ta hace le con este amo ta causa le para man duda tu con el cuanto del maga enseñanza del Biblia. Por ejemplo, posible llega el tiempo que tiene contigo quien convinci que deverasan el teoria de evolucion. Siguro cuando bata tu, nuay tu pensa acerca con este. Pero ahora, posible ta discuti se ustedes na escuela. Dol justo y maka-creé el cosa ta habla el de tuyu maga maestra acerca na evolucion. Pero, posible que nuay sila considera enbuenamente con el maga evidencia que tiene Creador. Acorda con el principio na Proverbio 18:17: “Dol justo el quien una ta presenta con el de suyu caso, hasta llega el quien tan contra con ele y cuestiona con ele.” En vez de creé lang dayun con el maga idea que ta enseña contigo na escuela, considera enbuenamente con el maga verdad na Palabra del Dios, el Biblia. Man research na diaton maga publicacion. Man cuento con el maga hermano y hermana quien ta creé na evolucion de antes. Pregunta si cosa ya convinci kanila que tiene un Creador quien ta ama kanaton. Puede se ayuda contigo para examina con el maga evidencia.

9. Cosa tu ya aprende na experiencia de Melissa?

⁹ Ya beneficia gayot el un hermana que si Melissa cuando yan research le acerca na creacion. * Ele ya habla: “Na escuela, ta enseña con el evolucion na manera que dol deverasan gayot este. Del primero, no quierre yo man research cay ta tiene yo miedo que baka discubri yo que deverasan el evolucion. Pero, ya pensa yo que no quierre si Jehova que sirvi kita con ele maskin gendeh kita convincido na cosa kita ta creé. Poreso, ya principia yo man research. Ya le yo con el libro Is There a Creator Who Cares About You? y el brosyur Was Life Created? y The Origin of Life—Five  Questions Worth Asking. Este gayot el cosa yo necesita. Era del antes pa yo con este ya hace.”

10-11. Cosa puede ayuda contigo para puede esta limpio na moral? (1 Tesalonica 4:3, 4)

¹⁰ Evita con el maga mal practica. Mientras joven tu, posible hay queda mas fuerte el de tuyu sexual deseo y baka man pressure contigo el otro que comete sexual imoralidad. Amo se el cosa quierre si Satanas que hace tu. Cosa puede ayuda contigo para esta limpio na moral? (Le con el 1 Tesalonica 4:3, 4.) Na de tuyu maga personal rezo, habla con Jehova si cosa tu ta sinti y pidi con ele que hace contigo fuerte. (Mat. 6:13) Acorda que quierre contigo ayuda si Jehova y gendeh le juzga contigo. (Sal. 103:13, 14) Puede tambien ayuda contigo el Palabra del Dios. Si Melissa que ya menciona enante yan dificil quita con el maga imoral cosas na de suyu pensamiento. Ele ya habla: “Cay ta le yo con el Biblia cada dia, ya puede este ayuda conmigo para continua resisti con el maga mal deseo. Ya hace este acorda conmigo que na lao yo de Jehova y quierre yo sirvi con ele.”​—Sal. 119:9.

¹¹ No pricura solva solo-solo con el de tuyu maga problema. Man cuento con el de tuyu mayores acerca con ese. Siempre, gendeh facil que man cuento kanila acerca con ese maga personal cosas pero importante que hace tu con ese. Si Melissa ya habla: “Ya reza yo que dale conmigo coraje y despues, yan cuento yo con el de mio tata acerca na de mio problema. Despues quel, mas enbuenamente ya yo ya sinti. Sabe yo que proud conmigo si Jehova.”

12. Paquemodo tu puede hace maga buen decision?

¹² Sigui con el maga principio na Biblia. Mientras ta pasa el tiempo, hay mas tene tu libertad para hace el de tuyu mismo decision. Pero, manada siempre maga cosas el no sabe tu. Paquemodo tu puede evita que hace un kamali que hay afecta con el de tuyu relacion con Jehova? (Prov. 22:3) El un hermana que si Kari ya explica si cosa ya ayuda con ele para hace maga buen decision. Ya puede le realiza que el maga mature Cristiano gendeh necesita ley para na todo situacion. Ele ya habla: “Necesita yo entende con el maga principio na Biblia y gendeh lang basta sigui maga ley.” Si ta le con el Biblia, pregunta na de tuyu mismo cuerpo: ‘Cosa este ta habla conmigo acerca na mirada de Jehova? Tiene ba aqui principio que puede yo usa para guia con el de mio vida? Si tiene, cosa el beneficio si aplica yo con este?’ (Sal. 19:7; Isa. 48:17, 18) Si le tu con el Biblia y medita con el maga principio de este, mas facil tu hace maga decision que ta hace alegre con Jehova. Mientras ta continua tu progresa, puede tu realiza que gendeh tu necesita ley na cada situacion cay ta entende tu con el mirada de Jehova acerca na maga cosas.

13. Paquemodo contigo puede ayuda el maga buen amigo? (Proverbio 13:20)

¹³ Iscuji maga amigo quien ta ama con Jehova. Como cosa ya menciona enante, el maga amigo que hay iscuji tu tiene gayot grande efecto na de tuyu progreso na espiritual. (Le con el Proverbio 13:20.) Ya perde el alegria del un hermana que si Sara. Pero, tiene cosa ya sucede que ya ayuda con ele para queda otravez alegre. Si Sara ya habla: “Ya tiene yo maga buen amiga na tiempo que bien necesita yo con ese. El un joven hermana tan junto conmigo cada semana para estudia con el El Torre de Guardia. El otro hermana ya ayuda conmigo para principia man comento na maga miting. Por causa na influencia del de mio maga amiga, mas enbuenamente ya yo ta  hace con el de mio personal estudiada y rezo. Ya tiene yo mas cerca relacion con Jehova y ya principia queda alegre otravez.”

14. Cosa ya hace si Julien para tene maga buen amigo?

¹⁴ Cosa tu hace para tene maga buen amigo quien puede tene buen influencia contigo? Si Julien que un anciano ya ahora ya habla: “Cuando joven yo, ya tiene yo maga buen amigo mientras ta participa na ministerio. Activo sila y ya ayuda sila conmigo para mira que maka-enjoy el ministerio. Por causa con ese, ya hace yo goal que sirvi full-time na ministerio. Ya puede tambien yo realiza que el razon si porque poco lang el de mio amigo amo cay tan junto lang yo con aquellos quien igual conmigo el edad. Na uliji, ya tiene yo maga buen amigo na Bethel. El diila ejemplo ya ayuda conmigo para iscuji maga buen entretenimiento y ya hace este conmigo mas cerca con Jehova.”

15. Cosa aviso ya dale si Pablo con Timoteo acerca na iscujida de maga amigo? (2 Timoteo 2:20-22)

¹⁵ Paquemodo si ya realiza tu que tiene na congregacion que gendeh buen amigo para contigo? Sabe si Pablo que el cuanto individual na congregacion del primer siglo gendeh ta pensa o ta actua como Cristiano. Poreso, ya habla le con Timoteo que desaleja kanila. (Le con el 2 Timoteo 2:20-22.) Bien precioso el diaton amistad con Jehova. Ya hace kita grande esfuerzo para queda cerca con el diaton Tata na cielo poreso gendeh kita debe permiti con maskin quien que destroza con ese relacion.​—Sal. 26:4.

16. Cosa clase maga goal tu debe iscuji?

¹⁶ Hace maga goal. Iscuji maga goal que puede hace fuerte con el de tuyu fe y ayuda contigo progresa. (Ef. 3:16) Por ejemplo, puede tu decidi que mas regular estudia y le con el Biblia. (Sal. 1:2, 3) O puede tu hace esfuerzo que reza estaba na corazon y mas manada beses. O baka necesita tu queda mas con cuidao na de tuyu entretenimiento y na de tuyu usada de tiempo. (Ef. 5:15, 16) Si puede mira si Jehova que ta hace tu esfuerzo para mas progresa, hay queda le alegre.

17. Cosa el beneficio si ayuda tu con otro?

¹⁷ Hay progresa tu na espiritual si ayuda tu con otro. Si Jesus ya habla: “Mas grande el  alegria de aquel quien ta dale contra con el quien ta recivi.” (Act. 20:35) Hay beneficia gayot tu si usa tu con el cuanto del de tuyu tiempo y fuerza para ayuda con otro. Por ejemplo, puede tu hace goal que ayuda con el maga de edad y con el maga tiene limitacion na cuerpo na de ustedes congregacion. Posible, puede tu ayuda cumpra con el cosa sila necesita o asisti kanila si paquemodo usa con el diila gadget. Si un hermano tu, hace goal que queda un siervo ministerial para puede tu sirvi con el de tuyu maga hermano y hermana. (Fil. 2:4) Puede tambien tu dale mira amor con otro maga gente si habla tu kanila el buen noticia acerca del Reino. (Mat. 9:36, 37) Si posible na de tuyu circumstancia, hace goal que sirvi con Jehova full-time.

18. Na cosa manera hay progresa tu na espiritual si ta sirvi tu full-time na ministerio?

¹⁸ Si sirvi tu full-time na ministerio, hay tene tu mas manada oportunidad para progresa na espiritual. Si pioneer tu, puede tu atende na School for Kingdom Evangelizers. Puede tambien tu sirvi na Bethel o na maga proyecto de construida del organizacion. El un joven hermana que si Kaitlyn ya habla: “Cay yan junto yo na ministerio con el maga experienciao hermano y hermana, ya puede este ayuda conmigo para progresa na espiritual despues del de mio bautismo. El diila ejemplo ya motiva conmigo para mas estudia pa con el Biblia y progresa na de mio enseñada.”

19. Cosa maga bendicion tu hay tene si continua tu progresa na espiritual?

¹⁹ Mientras ta continua tu progresa na espiritual, hay tene tu manada bendicion. Puede tu evita que man sayang el de tuyu fuerza na maga cosas que nuay valor. (1 Juan 2:17) Puede tambien tu evita con el dolor que resulta del maga gendeh buen decision. Mas pa, hay tene tu deverasan alegria. (Prov. 16:3) El de tuyu buen ejemplo puede anima con el de tuyu maga hermano y hermana, joven man sila o de edad. (1 Tim. 4:12) Y el mas importante, hay queda tu satisfechao cay sabe tu que ta hace tu alegre con Jehova y tiene tu cerca relacion con ele.​—Prov. 23:15, 16.