1. Porque si Jesus ya pidi con Jehova que vicia con el de suyu maga siguidores?

 NA NOCHE antes le muri, tiene un cosa que ya pidi si Jesus con el de suyu Tata na cielo. Ya pidi le con Jehova que vicia con el de suyu maga siguidores. (Juan 17:15, 20) Siempre, si Jehova ta vicia ya​—ta cuida y ta protege—​con el de suyu maga siervo. Pero, sabe si Jesus que el de suyu maga siguidores hay enfrenta grabe oposicion estaba con Satanas. Sabe tambien si Jesus que necesita sila el ayuda de Jehova para resisti con el maga ataque del Diablo.

2. Asegun na Salmo 33:18-20, porque kita debe gendeh tene miedo si ta enfrenta kita maga problema?

² El sistema de Satanas ta causa manada maga problema con el maga verdadero Cristiano ahora. Puede se hace luya kanaton o pone pa gane na probanza con el diaton lealtad con Jehova. Pero como cosa kita mira na este articulo, gendeh kita debe tene miedo. Ta vicia kanaton si Jehova​—ta puede le mira con el maga problema que ta experiencia kita y preparao ele ayuda kanaton. Examina kita dos ejemplo na Biblia donde ta dale mira si paquemodo si Jehova “ta vicia con aquellos quien ta tiene miedo con ele.”​—Le con el Salmo 33:18-20.

3. Cuando kita posible sinti solo?

³ Maskin manada kita maga hermano y hermana na congregacion, posible siempre kita sinti solo tiene vez. Por ejemplo, el maga jovenes posible ta sinti solo si ta defende sila con el diila creencia na diila maga classmate o si ta cambia sila na un nuevo congregacion. El cuanto kanaton posible ta sinti triste o depress, y ta pensa que solo lang kita na ese problema. Siguro man  alang-alang kita habla con otro el cosa kita ta sinti cay baka gendeh sila kanaton entende. Y tiene vez, posible pensa kita que baka nuay queber kanaton el otro. Maskin cosa man el razon si porque ta sinti kita solo, puede se causa kanaton que man lingasa o pensa que dol nuay quien puede ayuda kanaton. No quierre gayot si Jehova que sinti kita ansina. Porque se kita puede habla?

4. Porque si profeta Elias ya habla: “Iyo ya lang el ya queda”?

⁴ Considera con el ejemplo del un fiel siervo que si Elias. Si Jesabel quierre mata con ele poreso mas de 40 dia ya le ta esconde. (1 Rey 19:1-9) Na uliji cuando solo le na un cueva, ya habla le con Jehova: “Iyo ya lang el [profeta] ya queda.” (1 Rey 19:10) Pero, tiene pa otro maga profeta. Por ejemplo, si Abdias ya puede salva con el 100 profeta que mata era si Jesabel. (1 Rey 18:7, 13) Si ansina, porque si Elias ya sinti solo? Ya pensa ba le que ya acaba ya muri el todo maga profeta que ya salva si Abdias? Ya sinti ba le solo cay nuay el otro sigui con ele para adora con Jehova despues el probanza na Monte de Carmel? Ya pensa ba le que nuay quien sabe si paquemodo de grabe el peligro que ta enfrenta le o ya sinti ba le que nuay con ele queber el otro? El istoria nuay dale todo detalle acerca na sentido de Elias. Pero, asigurao kita que ta entende si Jehova si porque si Elias ya sinti solo y sabe gayot Le si paquemodo ayuda con ele.

5. Paquemodo si Jehova ya asigura con Elias que gendeh le solo?

⁵ Ya ayuda si Jehova con Elias na manada manera. Ya anima le con Elias que man cuento. Dos beses le ya pregunta con Elias: “Cosa tu ta hace aqui?” (1 Rey 19:9, 13) Na dos ocasion que ya contesta si Elias y ya habla el cosa gayot le ta sinti, ya oi si Jehova. Gane, ya dale mira si Jehova que talla Le y bien poderoso Ele. Ya asigura tambien le con Elias que tiene pa manada Israelita quien ta sirvi con Ele. (1 Rey 19:11, 12, 18) Asigurao, ya sinti gayot alivio si Elias despues le habla con Jehova el cosa le ta sinti y mira con el De Suyu contestacion. Ya dale si Jehova con Elias cuanto importante assignment. Ya manda le con este que iscuji con  Hazael para queda rey de Siria, con Jehu para queda rey de Israel y con Eliseo para queda un profeta. (1 Rey 19:15, 16) Por medio na este maga assignment, ya ayuda si Jehova con Elias que man focus na maga positivo cosas. Ya dale tambien con ele el Dios un buen uban, si Eliseo. Paquemodo tu puede ricibi el ayuda de Jehova si ta sinti tu solo?

6. Acerca na cosa tu puede reza si ta sinti tu solo? (Salmo 62:8)

⁶ Quierre si Jehova que reza tu con ele. Ta puede le mira con el cosa tu ta enfrenta y ta asigura le que oi le con el de tuyu maga rezo maskin cosa hora. (1 Tes. 5:17) Alegre le oi con el de suyu maga siervo. (Prov. 15:8) Acerca na cosa tu puede reza si ta sinti tu solo? Habla el todo cosa tu ta sinti con Jehova, igual como cosa ya hace si Elias. (Le con el Salmo 62:8.) Habla con ele el de tuyu maga lingasa y si cosa el efecto de ese contigo. Pidi con Jehova que ayuda contigo para sabe si cosa tu debe hace. Por ejemplo, si ta sinti tu solo y ta tiene miedo que predica na escuela, pidi con Jehova que dale contigo coraje para puede tu se hace. Gane, puede tu pidi sabeduria para puede explica con el de tuyu creencia na buen manera. (Luc. 21:14, 15) Si depress tu o tan luya, pidi con Jehova que ayuda contigo para man cuento na un mature Cristiano. Puede tu habla con Jehova que ayuda con este hermano o hermana para entende contigo. Habla el todo con Jehova, mira si paquemodo le ta contesta con el de tuyu maga rezo y acepta el ayuda del otro. Si hace tu se, gendeh mas tu tanto sinti solo.

7. Cosa tu ya aprende na ejemplo de Mauricio?

⁷ Ta dale kanaton todo si Jehova maga assignment. Puede tu queda asigurao que ta observa le y ta aprecia con el todo cosa tu ta hace na congregacion y na ministerio. (Sal. 110:3) Si ocupao tu na de tuyu assignment, paquemodo se puede ayuda contigo si ta sinti tu solo? Considera con el ejemplo del un joven hermano que si Mauricio. * Nuay dura despues le bautiza, el uno del de suyu maga amigo hinay-hinay ya deja con el verdad. “Cuando ya mira yo que ya deja le con Jehova, ya perde el de mio confianza na cuerpo,” ya habla si Mauricio. “Yan alang-alang yo si puede ba yo cumpli con el de mio dedicacion y esta na familia de Jehova. Ya sinti yo solo y dol nuay quien puede entende con el cosa yo ta sinti.” Cosa ya puede ayuda con Mauricio? “Ya hace yo mas na ministerio,” ya habla le. “Ya ayuda quel conmigo para gendeh yo man focus na de mio mismo cuerpo y sentido. Mientras tan junto yo con otro na ministerio, ya sinti yo alegre y gendeh mas tanto solo.” Deverasan, maskin gendeh kita ta puede predica junto con el diaton maga hermano y hermana na personal, ta queda kita fuerte si tan junto kita kanila na maga actividad igual na letter writing y telephone witnessing. Cosa pa ya puede  ayuda con Mauricio? Ya habla le: “Ya esta tambien yo ocupao na congregacion. Ya hace yo esfuerzo para prepara y dale con el de mio maga parte na miting. Por medio con este, ya sinti yo que ta aprecia conmigo si Jehova y el otro.”

8. Paquemodo el maga grabe probanza puede afecta kanaton?

⁸ Ta expecta kita que enfrenta maga probanza na este ultimo maga dia. (2 Tim. 3:1) Maskin pa ansina, no sabe kita si cosa clase de probanza hay llega y si cuando. Posible, bigla kita enfrenta problema na financial, grabe enfermedad o muerte del familia o amigo. Na ese tiempo, posible kita sinti bien triste y man luya, especialmente si dol sunod-sunod el probanza o junto-junto se ya sucede. Pero acorda que ta vicia kanaton si Jehova y na de suyu ayuda, puede kita con confianza enfrenta con el maskin cosa probanza.

9. Menciona con el cuanto maga probanza que ya enfrenta si Job.

⁹ Considera si paquemodo si Jehova ya ayuda con el de suyu fiel siervo que si Job. Ya experiencia si Job manada maga grabe probanza adentro lang de corto tiempo. Na un dia lang, ya sabe le que ya ruba y ya mata con el todo de suyu maga animal y ya muri el de suyu maga ayudante y maga anak. (Job 1:13-19) Nuay dura despues quel, cuando bien dolorido pa gayot si Job, ya tiene le grabe enfermedad. (Job 2:7) Malisud gayot el de suyu situacion. Gane, ya habla le: “No quierre yo de mio vida; no quierre ya yo vivi.”​—Job 7:16.

10. Paquemodo si Jehova ya ayuda con Job para aguanta na maga probanza? (Mira con el letrato na cover.)

¹⁰ Ta vicia si Jehova con Job. Cay ta ama si Jehova con Job, ya dale le el cosa este necesita para puede este aguanta con el maga probanza. Ya converza si Jehova con Job y ya hace acorda con ele acerca el De Suyu incomparable sabeduria y amor para na De Suyu maga creacion. Ya menciona Le acerca con el manada animal que ya crea Le. (Job 38:1, 2; 39:9, 13, 19, 27; 40:15; 41:1, 2) Ya usa tambien si Jehova con el un fiel joven hombre que si Elihu para hace fuerte y dale comforta con Job. Ya asigura si Elihu con ele que pirmi ta premia si Jehova con el De Suyu maga siervo si ta aguanta sila. Pero, ya manda tambien move si Jehova con Elihu para dale amable consejo con Job. Ya ayuda si Elihu con Job para gendeh le man focus con el de suyu mismo cuerpo y para pensa el de suyu posicion si compara con Jehova, el Creador del universo. (Job 37:14) Tiene tambien si Jehova cosa ya manda con Job​—que reza para con el de suyu tres uban quien ya culpa. (Job 42:8-10) Paquemodo si Jehova ta ayuda kanaton ahora si ta enfrenta kita maga probanza?

11. Cosa comforta ta dale el Biblia si ta experiencia kita maga probanza?

¹¹ Gendeh kanaton directa tan cuento si Jehova igual na cosa le ya hace con Job sino tan cuento le kanaton por medio na de suyu Palabra, el Biblia. (Roma 15:4) Para dale kanaton comforta, ta dale le kanaton esperanza para na futuro. Considera con el cuanto maga texto na Biblia que puede dale kanaton comforta si ta experiencia kita probanza. Na Escritura, ta asigura kanaton si Jehova que nuay maskin cosa el “puede separta canaton na amor [de suyu],” maskin el maga grabe probanza. (Roma 8:38, 39) Ta asigura tambien le kanaton que ele “cerca con aquellos quien ta llama con ele” na rezo. (Sal. 145:18) Ta habla si Jehova que si confia kita con ele, puede kita aguanta con el maskin cosa probanza y esta pa gane alegre maskin ta sufri kita. (1 Cor. 10:13; Sant. 1:2, 12) El Palabra del Dios ta hace tambien acorda kanaton que el diaton maga problema temporario  lang y corto compara na maga bendicion que ta ofrece le. (2 Cor. 4:16-18) Ya promete si Jehova que hay destroza le con aquellos quien ta causa con el todo problema​—con Satanas Diablo y aquellos quien ta imita con ele. (Sal. 37:10) Ya puede ya ba tu memoria cuanto maga texto na Biblia que puede ayuda contigo para aguanta na maga probanza na futuro?

12. Para beneficia gayot na de suyu Palabra, cosa si Jehova ta expecta que hace kita?

¹² Ta expecta si Jehova que dale kita tiempo para regular estudia con el Biblia y pensa enbuenamente acerca con el cosa kita ta le. Si ta aplica kita con el cosa kita ta aprende, ta queda mas fuerte el diaton fe y ta queda kita mas cerca con el diaton Tata na cielo. Como resulta, ta puede kita aguanta con el maga probanza. Ta dale tambien si Jehova sagrao espiritu con aquellos quien ta confia na de suyu Palabra. Y ese espiritu puede dale kanaton “el grande poder” para puede kita aguanta con el maskin cosa probanza.​—2 Cor. 4:7-10.

13. Paquemodo el espiritual comida que ta dale “el fiel y sabio esclavo” puede ayuda kanaton para aguanta na maga probanza?

¹³ Por medio na ayuda de Jehova, “el fiel y sabio esclavo” ta produci abundancia de maga articulo, video y cancion que puede ayuda kanaton para tene fuerte fe y esta alerto na espiritual. (Mat. 24:45, NWT) Necesita kita usa enbuenamente con ese maga provision. El un hermana de United States ya menciona acerca el de suyu apresacion para na todo maga espiritual comida. Ele ya habla: “Durante el de mio 40 año servicio con Jehova, manada beses ya pone na probanza con el de mio integridad.” Ya enfrenta le maga grabe probanza​—ya muri el de suyu aguelo por causa na un tomao driver, ya tiene grabe enfermedad el de suyu mayores y ya muri, y ya tiene le cancer dos beses. Cosa ya ayuda con ele para aguanta? Ele ya habla: “Ya cuida gayot conmigo si Jehova. El espiritual comida que ya dale le por medio na fiel y sabio esclavo ya puede ayuda conmigo para aguanta. Por causa con aquel, igual con Job puede yo habla: ‘Hasta hay muri yo, gendeh yo hace perde el de mio integridad!’”​—Job 27:5.

14. Paquemodo si Jehova ta usa con el diaton maga hermano y hermana para suporta kanaton durante el maga dificultad? (1 Tesalonica 4:9)

¹⁴ Yan train si Jehova con el de suyu maga siervo para ama y dale comforta con uno y otro durante el maga dificil tiempo. (2 Cor. 1:3, 4; le con el 1 Tesalonica 4:9.) Igual con Elihu, preparao el diaton maga hermano y hermana que  ayuda kanaton para esta fiel si ta experiencia kita maga dificultad. (Act. 14:22) Por ejemplo, considera si paquemodo el congregacion de Diane ya anima con ele y ya ayuda para esta le fuerte na espiritual cuando ya tiene grabe enfermedad el de suyu marido. Ya habla le: “Dificil quel pero ya sinti kame el suporta y amor de Jehova durante aquel maga mes. El diamon congregacion ya hace manada cosas para suporta kanamon. Ya visita sila, ya llama y ya abraza kanamon. Amo gayot quel el cosa kame necesita. Ciendo no sabe yo maneja, el maga hermano y hermana ya hace manera para puede yo atende na maga miting y anda na predicacion si puede yo.” Un bendicion gayot que parte kita del un amable espiritual familia!

15. Porque kita convincido que puede kita aguanta con el maga dificultad?

¹⁵ Todo kita hay enfrenta maga probanza. Pero como cosa kita ya aprende, gendeh kita con ese enfrenta solo. Igual na un amable tata, ta vicia kanaton pirmi si Jehova. Cerca le kanaton, preparao oi si ta pidi kita ayuda y bien quierre suporta kanaton. (Isa. 43:2) Convincido kita que puede kita aguanta con el maga dificultad cay ta dale le kanaton el todo que necesita kita para aguanta. Ya dale le kanaton el regalo de rezo, el Biblia, abundancia de maga espiritual comida y maga amable hermano y hermana para ayuda kanaton.

16. Paquemodo kita puede esta na cuidada de Jehova?

¹⁶ Ta rindi gayot kita gracias cay tiene kita Tata na cielo quien ta vicia kanaton! “Alegre el [diaton] corazon por causa con ele.” (Sal. 33:21) Puede kita dale mira con Jehova que ta aprecia kita con el de suyu cuidada si ta usa kita con el todo de suyu maga provision para ayuda kanaton. Necesita tambien kita hace esfuerzo para esta na cuidada del Dios. Si continua kita hace el todo para obedece con Jehova y hace si cosa el justo na de suyu mirada, hay vicia le kanaton hasta para cuando!​—1 Ped. 3:12.