1. Porque ya puede nota el maga de Babilonia con profeta Daniel?

 JOVEN pa si profeta Daniel cuando ya queda le cautivo na Babilonia que bien lejos na diila lugar. Pero ya puede nota con ele el maga oficial de Babilonia. Ya mira sila que si Daniel “nuay defecto, enbuenamente el ichura” y estaba na un prominente familia. (1 Sam. 16:7) Por causa con ese, el maga de Babilonia yan train con ele para sirvi na palacio.—Dan. 1:3, 4, 6.

2. Cosa el mirada de Jehova con Daniel? (Ezequiel 14:14)

² Ta ama si Jehova con Daniel, gendeh por causa na de suyu ichura o na de suyu estado na vida, sino cay ya iscuji le esta leal con Jehova. Gane, posible que maga 20 año pa lang si Daniel cuando ya considera con ele si Jehova que igual con Noe y Job quien fiel ya sirvi con Ele por manada decada. (Gen. 5:32; 6:9, 10; Job 42:16, 17; le con el Ezequiel 14:14. b) Y ya continua ama si Jehova con Daniel na de suyu entero vida.—Dan. 10:11, 19.

3. Cosa kita hay considera na este articulo?

³ Na este articulo, hay examina kita dos calidad de Daniel que ya hace con ele precioso con Jehova. Una, hay discuti kita con el cada calidad y mira si cuando le ya dale mira con ese. Acabar, mira kita si cosa ya ayuda con Daniel para cultiva con este maga calidad. Y na uliji, hay discuti kita si paquemodo kita puede imita con ele. Maskin pa ya escribi con este articulo para na maga jovenes, todo kita puede aprende na ejemplo de Daniel.

4. Paquemodo ya dale mira coraje si Daniel? Dale un ejemplo.

⁴ El maga gente quien tiene coraje posible siempre sinti miedo pero gendeh sila ta permiti con ese que sangga kanila para hace  si cosa el justo. Ya dale mira coraje si Daniel maskin joven pa lang le. Considera dos ocasion que ya dale le se mira. El una posible ya sucede maga dos año despues destroza el Babilonia con el Jerusalem. Si Rey Nabucodonosor de Babilonia ya tiene un maka-miedo sueño acerca na un grande imagen. Ya amenaza le que mata con el todo sabio hombre, incluido con Daniel, si gendeh sila puede habla con ele si cosa el de suyu sueño y el interpretacion de este. (Dan. 2:3-5) Necesita actua dayun si Daniel cay si gendeh, manada gente hay muri. Poreso, si Daniel “ya anda con el rey y ya pidi que dale con ele tiempo para puede le habla el interpretacion del sueño.” (Dan. 2:16) Necesita quel coraje y fe. Nuay menciona el Biblia que si Daniel ya puede dale interpretacion na maga sueño antes ese tiempo. Ya pidi le con el de suyu maga uban que si Sadrac, Mesac y Abednego c “que reza para tene lastima el Dios de cielo y manda sabe kanila este secreto.” (Dan. 2:18) Ya contesta si Jehova con el diila maga rezo. Na ayuda del Dios, ya puede habla si Daniel si cosa quierre decir del sueño de Nabucodonosor. Ya salva el vida de Daniel y del de suyu maga uban.

5. Cuando otravez ya pone na probanza con el coraje de Daniel?

⁵ Cuanto tiempo despues habla si Daniel si cosa quierre decir del sueño acerca na grande imagen, ya pone otravez na probanza con el de suyu coraje. Ya tiene otravez maka-miedo sueño si Nabucodonosor. Ya suña le acerca na un bien grande pono. Con coraje ya explica si Daniel con el rey si cosa quierre decir del sueño. Ya habla pa gane le que hay queda loco el rey y gendeh este rula por cuanto tiempo. (Dan. 4:25) Posible pensa el rey que tan contra con ele si Daniel y puede le manda mata con este. Pero, ya dale mira coraje si Daniel y ya explica siempre con el sueño.

6. Cosa posible ya ayuda con Daniel para dale mira coraje?

⁶ Cosa posible ya puede ayuda con Daniel para dale mira coraje na de suyu entero vida? Cuando joven le, asigurao que ya aprende si Daniel na ejemplo del de suyu tata y nana. Ya obedece sila con el maga instruccion de Jehova para na maga Israelita mayores y ya enseña con el diila anak acerca na Ley del Dios. (Deut. 6:6-9) Gendeh lang sabe si Daniel acerca el Diez Mandamiento sino el otro detalle  tambien del Ley. Por ejemplo, sabe le si cosa el un Israelita puede y gendeh puede come. d (Lev. 11:4-8; Dan. 1:8, 11-13) Sabe tambien le acerca na maga istoria del maga siervo del Dios y si cosa kanila ya sucede cuando nuay sila sigui con el maga principio de Jehova. (Dan. 9:10, 11) El cosa ya experiencia si Daniel na de suyu entero vida ya asigura con ele que maskin cosa sucede, si Jehova y el De Suyu maga poderoso angel hay ayuda con ele.—Dan. 2:19-24; 10:12, 18, 19.

7. Cosa pa ya ayuda con Daniel para tene coraje? (Mira tambien con el letrato.)

⁷ Ya estudia si Daniel con el maga cosa ya escribi el maga profeta del Dios, incluido el maga profecia de Jeremias. Na de suyu estudiada, ya sabe si Daniel na uliji que cerca ya libra con el maga Judio na Babilonia. (Dan. 9:2) Cay ta mira le que ta cumpli el maga profecia, asigurao que ya queda mas fuerte el confianza de Daniel con Jehova. Y aquellos quien tiene fuerte fe con Dios puede tene grande coraje. (Compara na Roma 8:31, 32, 37-39.) Y el mas importante, pirmi ta reza si Daniel con el de suyu Tata na cielo. (Dan. 6:10) Ta habla le el de suyu maga culpa con Jehova y si cosa le ta sinti. Ta pidi tambien le ayuda. (Dan. 9:4, 5, 19) Un gente le igual kanaton poreso nuay le nace que tiene ya daan coraje. Sino, ya cultiva le con ese calidad cay ya estudia le, ya reza y ya confia con Jehova.

8. Paquemodo kita puede cultiva coraje?

⁸ Cosa kita necesita hace para cultiva coraje? Puede anima kanaton el diaton maga mayores que tene coraje pero gendeh se un cosa que puede kita hereda kanila. Si ta cultiva kita coraje, igual se como ta aprende kita un nuevo skill. El un manera que puede tu aprende un skill amo si mira tu enbuenamente si cosa ta hace el quien ta enseña contigo y despues, copia con el de suyu ejemplo. Na igual manera, puede kita tene coraje si mira kita enbuenamente con otro quien ya dale mira este calidad y despues, copia con el diila ejemplo. Cosa kita ya aprende con Daniel? Igual con ele, necesita kita queda bien familiar na Palabra del Dios. Debe kita pirmi reza con Jehova y habla con ele si cosa kita exacto ta sinti para puede kita tene cerca relacion con ele. Necesita tambien kita confia con Jehova y queda convincido que pirmi le ayuda kanaton. Despues, si pone na probanza con el diaton fe, hay tene kita coraje para enfrenta con ese.

9. Paquemodo kita ta beneficia si tiene kita coraje?

⁹ Ta beneficia kita na manada manera si tiene kita coraje. Considera con el experiencia de Ben. Ya entra le na un escuela na Germany donde ta creé el todo na evolucion y ta sinti sila que gendeh deverasan el istoria de creacion na Biblia. Un dia, ya tiene oportunidad si Ben para explica na entero clase si porque le ta creé que ya crea con el vida. Con coraje le ya habla na todo si cosa le ta creé. Cosa el resulta? “Ya pone gayot atencion el de mio maestro,” ya habla si Ben, “y ya hace le maga copia del material que ya usa yo y ya dale se con el cada estudiante na clase.” Cosa el reaccion del maga classmate de Ben? “Manada kanila el ya oi con el cosa yo ya habla,” ya relata si Ben, “y ya habla sila que yan bilib sila conmigo.” El experiencia de Ben ta dale mira que aquellos quien ta dale mira coraje ta obtene el respeto del otro. Puede tambien sila ayuda con el cuanto para conoce con Jehova. Poreso, tiene gayot kita maga buen razon para cultiva coraje.

10. Cosa el lealtad?

¹⁰ El Biblia manada beses ta menciona acerca na lealtad o amor leal de Jehova para na de suyu maga siervo. Ta menciona tambien este acerca na lealtad que el maga siervo del Dios ta dale mira con uno y otro. (2 Sam. 9:6, 7) Ta expecta tambien si Jehova que queda kita leal con ele. El diaton lealtad puede queda fuerte mientras ta pasa el tiempo. Considera si paquemodo se ya experiencia si Daniel.

11. Paquemodo ya pone na probanza el lealtad de Daniel cuando de edad ya le? (Mira con el letrato na cover.)

¹¹ Na de suyu entero vida, ya pone na probanza el lealtad de Daniel con Jehova. Pero el uno na de con todo dificil probanza amo cuando mas de 90 año ya le. Na ese tiempo, ya perde el Babilonia na maga de Medo y Persia, y si Rey Dario el ya rula na Babilonia. El maga oficial na palacio no quierre con Daniel y nuay respeto con el Dios que ta adora le. Poreso, ya hace sila plano para mata con Daniel. Ya manda sila aproba un ley para pruba si onde el lealtad de Daniel—na de suyu Dios ba o con el rey. El cosa lang hace si Daniel para dale mira que leal le con el rey y para gendeh con ele castiga amo que descanza le reza con Jehova por 30 dia. Pero nuay man compromiso si Daniel. Por causa con ese, ya buta con ele na cueva del maga leon. Pero cay leal si Daniel, ya salva si Jehova con ele na maga leon. (Dan. 6:12-15, 20-22) Paquemodo kita puede cultiva el clase de lealtad que ya dale mira si Daniel con Jehova?

12. Paquemodo ya puede esta leal si Daniel con Jehova?

¹² Para queda leal con Jehova, necesita kita tene grande amor para con ele. Ya puede esta leal si Daniel con Jehova cay ya ama gayot le con el de suyu Tata na cielo. Asigurao, ya tiene grande amor si Daniel con Jehova cay ya dale le tiempo para pensa acerca na maga calidad de Jehova y si paquemodo Le se ya dale mira kanila. (Dan. 9:4) Ya medita tambien si Daniel con el todo maga buen cosas que ya hace si Jehova para con ele y na De Suyu maga siervo.—Dan. 2:20-23; 9:15, 16.

13. (a) Cosa maga probanza ta enfrenta el diaton maga jovenes? Dale un ejemplo. (Mira tambien con el letrato.) (b) Como cosa ya dale mira na video, cosa tu hace si tiene quien pregunta si el maga Testigo de Jehova ba ta suporta con aquellos quien ya iscuji queda homosexual?

¹³ Igual con Daniel, el diaton maga jovenes ta puede man junto na maga gente quien nuay  respeto con Jehova y na de suyu maga principio. Este maga gente posible no quierre con aquellos quien tiene creencia o opinion que diferente kanila. Gane, el cuanto ta gangguia con el diaton maga jovenes para gendeh sila puede esta leal con Jehova. Por ejemplo, considera si cosa ya sucede con el un joven hombre que si Graeme, quien ta queda na Australia. Ya enfrenta le un dificil situacion cuando high school le. El maestra ya pregunta con el entero clase si cosa sila hace si el diila amigo ya habla que un homosexual le. Ya habla el maestra que junto para el todo quien suporta con el diila amigo na ese clase de vida y aquellos quien gendeh suporta hay para na otro parte del room. Si Graeme ya habla, “Junto ya para todo aquellos quien ta suporta con aquel clase de vida, puera conmigo y de mio uban Testigo.” El cosa sunod ya sucede ya pone gayot na probanza con el lealtad de Graeme con Jehova. “Un hora el diamon clase,” ele ya habla, “y durante na ese tiempo, el otro maga estudiante y maskin el diamon maestra ya gangguia y ya insulta kanamon. Ya hace yo el todo para defende con el de mio fe na calmao manera pero nuay sila oi conmigo.” Cosa el efecto de este experiencia con Graeme? Ele ya habla, “No quierre yo que ta insulta conmigo. Pero ya sinti yo bien alegre cay ya esta yo leal con Jehova y ya defende con el de mio creencia.” e

14. Cosa el un manera para puede kita esta leal con Jehova?

¹⁴ Igual con Daniel, puede kita esta leal con Jehova si tiene kita hondo amor para con Ele. Puede kita tene ese clase de amor si aprende kita acerca na maga calidad de Jehova. Por ejemplo, puede kita estudia con el maga cosas que ya hace le. (Roma 1:20) Si quierre tu hace mas hondo con el de tuyu amor y respeto con Jehova, puede tu le con el maga corto articulo na serie “Was It Designed?” o mira con el maga video. Puede tambien tu le con el maga brosyur Was Life Created? y The Origin of Life—Five Questions Worth Asking. Nota si cosa ya habla el un joven hermana de Denmark que si Esther acerca con aquel maga publicacion: “Bonito el argumento de aquel maga brosyur. Gendeh este ta habla contigo si cosa tu creé; ta presenta lang este el verdad y etu ya el hace decision.” Si Ben que ya menciona enante ya habla: “Este material ya puede gayot hace fuerte con el de mio fe. Ya convinci este conmigo que ya crea el Dios con el vida.” Despues tu estudia con este material, posible man uyun tu con el cosa ta habla el Biblia: “El diamon Dios y Señor, Uste lang conviene recivi el gloria, el honor y el poder, cay Uste amo el quien ya hace con el entero mundo.”—Rev. 4:11. f

15. Cosa el otro manera que puede kita cultiva un cerca relacion con Jehova?

¹⁵ El otro manera para tene kita hondo amor para con Jehova amo si estudia kita con el vida del de suyu Anak, si Jesus. Ese el cosa ya hace el un joven hermana que si Samira, quien ta queda na Germany. Ele ya habla: “Ya puede yo mas conoce con Jehova por medio con Jesus.” Cuando bata si Samira, yan dificil le entende que tiene sentido si Jehova. Pero ta puede le entende si cosa ta sinti si Jesus. “Ta gusta yo con el custumbre de Jesus cay friendly le y ta ama con el maga bata,” ele ya omenta. Cuando mas ta aprende le acerca con Jesus, mas ta queda le cerca con Jehova. Porque? Ele ya habla: “Hinay-hinay yo ya puede entende que ya puede gayot imita si Jesus con el de suyu Tata. Semejante gayot sila. Ya realiza yo que uno  este na maga razon si porque si Jehova ya imbia con Jesus na tierra—para queda posible na maga gente que conoce mas con Jehova.” (Juan 14:9) Si quierre tu hace fuerte con el de tuyu relacion con Jehova, puede ba tu dale tiempo para aprende acerca con Jesus? Si hace tu se, hay queda mas hondo el de tuyu amor para con Jehova y queda tu mas determinao que esta leal con ele.

16. Paquemodo kita ta beneficia si leal kita? (Salmo 18:25; Miqueas 6:8)

¹⁶ Si leal kita con otro, puede kita tene maga amigo quien leal kanaton. (Rut 1:14-17) Y si leal kita con Jehova, puede kita queda calmao y contento. Porque? Cay ya promete si Jehova que hay queda le leal con aquellos quien leal con ele. (Le con el Salmo 18:25; g Miqueas 6:8. h) Pensa este—el todopoderoso Creador quierre tene cerca relacion kanaton! Y si tiene le cerca relacion kanaton, nuay maskin cosa el puede destroza con ese—probanza man, contrario o maskin el muerte. (Dan. 12:13; Luc. 20:37, 38; Roma 8:38, 39) Poreso, bien importante que imita kita con Daniel y esta leal con Jehova!

17-18. Cosa pa kita puede aprende con Daniel?

¹⁷ Na este articulo, ya discuti kita dos calidad lang de Daniel. Pero mucho pa kita cosa puede aprende con ele. Por ejemplo, ya dale si Jehova con ele maga vision y sueño, y el abilidad para sabe si cosa quierre decir del maga profecia. Manada na aquel maga profecia el ya cumpli ya. El otro ta dale maga detalle acerca na maga suceso na futuro que tiene efecto na cada persona na tierra.

¹⁸ Na sunod articulo, hay mira kita dos profecia que ya escribi si Daniel. Si ta entende kita con este, puede este ayuda kanaton todo, joven man o de edad, para hace maga justo decision ahora. Puede tambien este ayuda kanaton para tene mas coraje y queda leal con Jehova para queda kita preparao enfrenta con el maga probanza que cerca ya sucede.