1. Cosa puede ayuda kanaton para man enjoy estudia maga profecia na Biblia?

 “QUIERRE-QUIERRE yo estudia con el maga profecia na Biblia,” ya habla el un joven hermano que si Ben. Ansina ba tambien tu ta sinti? O para contigo, bien dificil entende con el maga profecia? Gane, baka ta sinti tu que boring estudia con ese. Pero, si sabe tu si porque si Jehova ya inclui con ese na de suyu Palabra, baka cambia el de tuyu mirada.

2. Cosa kita discuti na este articulo?

² Na este articulo, hay discuti kita gendeh lang si porque kita debe aprende acerca na maga profecia na Biblia sino si paquemodo tambien kita estudia con ese. Despues, hay examina kita dos profecia na libro de Daniel para mira si paquemodo el maga profecia na Biblia puede ayuda kanaton ahora si ta entende kita con ese.

3. Cosa kita necesita hace para entende con el maga profecia na Biblia?

³ Para puede kita entende con el maga profecia na Biblia, necesita kita pidi ayuda. Considera con este ilustracion. Imagina que ta visita tu na un lugar que gendeh familiar contigo. Pero junto contigo el de tuyu amigo quien bien lediao na ese lugar. Sabe le exacto si onde ustedes y si para onde el cada camino. Asigurao hay queda gayot tu alegre cay ya sigui contigo el de tuyu amigo! Igual con ese amigo si Jehova. Bien sabe le si cosa sucede kanaton na futuro. Poreso para entende con el maga profecia na Biblia, debe kita queda humilde y pidi el ayuda de Jehova.—Dan. 2:28; 2 Ped. 1:19, 20.

4. Porque si Jehova ya manda escribi maga profecia na de suyu Palabra? (Jeremias 29:11) (Mira tambien con el letrato.)

⁴ Igual na maga buen mayores, quierre si Jehova que tene alegre  futuro el de suyu maga anak. (Le con el Jeremias 29:11. b) Pero, solamente si Jehova el exacto puede habla si cosa sucede na futuro. Ya manda le escribi maga profecia na de suyu Palabra para puede kita sabe acerca na maga importante suceso antes pa este sucede. (Isa. 46:10) El maga profecia na Biblia amo maga regalo estaba na diaton amable Tata na cielo. Pero paquemodo tu puede asigura que hay sucede gayot el maga profecia na Biblia?

5. Cosa puede aprende el maga jovenes na experiencia de Max?

⁵ Na manada nacion, el diaton maga jovenes ta puede man junto na escuela con aquellos quien nuay respeto na Biblia. Tiene vez, tiene sila cosa ta hace o ta habla que ta causa con el un joven Testigo para man duda. Nota con el experiencia del un hermano que si Max. Ele ya habla, “Cuando teenager yo, ya principia yo man duda si deverasan ba gayot el religion que ta enseña conmigo el de mio mayores y si el Biblia inspirao ba gayot del Dios.” Cosa ya hace el de suyu mayores? Ele ya habla, “Calmao lang sila maskin pa sabe yo que malingasa sila acerca conmigo.” El mayores de Max ya contesta con el de suyu maga pregunta usando el Biblia. Tiene tambien cosa ya hace si Max. “Iyo mismo el ya estudia con el maga profecia na Biblia,” ya habla le, “y ya discuti yo con el cosa yo ya aprende na otro maga jovenes na diamon congregacion.” Cosa el resulta? Si Max ya habla, “Por causa na cosa yo ya hace, ya queda yo convincido que el Biblia inspirao gayot del Dios!”

6. Cosa tu necesita hace si tiene tu maga duda y porque se importante hace?

⁶ No tene huya, si igual con Max, ya principia tu man duda si verdad ba el cosa ta contene na Biblia. Pero, tiene tu cosa necesita hace. El duda puede compara na calawang. Si nuay tu cosa hace, puede este hinay-hinay destroza con el un cosa que valuable. Para quita con el maga duda que puede destroza con el de tuyu fe, necesita tu pregunta con el de tuyu mismo cuerpo, ‘Ta creé ba yo con el cosa ta habla el Biblia acerca na futuro?’ Si gendeh tu asigurao, necesita tu estudia con el maga profecia na Biblia que ya cumpli ya. Pero paquemodo tu con ese hace?

7. Cosa ya puede ayuda con Daniel para estudia maga profecia? (Daniel 12:10)

⁷ Un buen ejemplo si Daniel si paquemodo estudia maga profecia. Ya estudia le con este con justo motivo—para sabe el verdad. Humilde tambien si Daniel. Sabe le que si Jehova hay dale entendimiento con aquellos quien conoce con ele y quien ta sigui con el de suyu maga principio. (Dan. 2:27, 28; le con el Daniel 12:10. c) Ya dale le mira que humilde le cay ya confia le na ayuda de Jehova. (Dan. 2:18) Mas pa, ya estudia enbuenamente si Daniel con el maga profecia. Yan research le na maga parte del Escritura que tiene aquel tiempo. (Jer. 25:11, 12; Dan. 9:2) Paquemodo tu puede imita con Daniel?

8. Porque el cuanto ta estudia maga profecia na Biblia pero cosa kita debe hace?

 ⁸ Examina con el de tuyu motivo. Ta estudia ba tu con el maga profecia na Biblia cay quierre gayot tu sabe el verdad? Si ansina, ayuda contigo si Jehova. (Juan 4:23, 24; 14:16, 17) Pero, porque el otro ta estudia maga profecia? El cuanto ta hace con ese cay quierre sila busca evidencia que el Biblia gendeh inspirao del Dios. Cay si ansina, ta sinti sila que tiene sila razon para sila mismo el decidi si cosa el bueno y malo. Pero, gendeh kita ansina. Debe que justo el diaton motivo si ta estudia. Y para entende con el maga profecia na Biblia, debe kita cultiva un importante calidad.

9. Cosa calidad kita necesita para entende con el maga profecia na Biblia? Explica.

⁹ Queda humilde. Ya promete si Jehova que ayuda le con el maga humilde. (Sant. 4:6) Poreso, necesita kita reza y pidi el de suyu ayuda para entende con el maga profecia na Biblia. Debe tambien kita realiza que necesita kita el ayuda del fiel esclavo para dale kanaton el diaton espiritual comida na justo tiempo. (Luc. 12:42) Si Jehova amo un Dios de orden poreso razonable para creé que con el fiel esclavo lang le ta usa para ayuda kanaton entende con el maga verdad na de suyu Palabra.—1 Cor. 14:33; Ef. 4:4-6.

10. Cosa tu ya aprende na experiencia de Esther?

¹⁰ Estudia enbuenamente. Iscuji un profecia que quierre tu aprende. Ese el cosa ya hace el un hermana que si Esther. Interesao le na maga profecia acerca na llegada del Mesias. “Cuando 15 año yo,” ya habla le, “ya principia yo busca maga evidencia que ya escribi con este maga profecia antes pa el tiempo de Jesus.” Ya queda le convincido despues ele le acerca na Dead Sea Scrolls. “Ya escribi con el cuanto de este maga rollo antes pa el tiempo del Cristo,” ya habla le, “poreso el maga profecia que escribido aqui asigurao estaba con Dios.” Si Esther ya admiti, “Manada beses yo ya le con este antes yo ya entende.” Pero alegre le cay ya hace le con ese. Despues estudia enbuenamente con el cuanto maga profecia na Biblia, ele ya habla, “Ahora convincido ya gayot yo que deverasan el cosa ta habla el Biblia!”

11. Cosa el beneficio si convincido kita que deverasan el cosa ta habla el Biblia?

¹¹ Si ta mira kita que ta cumpli ya el cuanto profecia na Palabra del Dios, ayuda se para confia gayot kita con Jehova y con el maskin cosa direccion que ta ricibi kita estaba con ele. Mas pa, el maga profecia na Biblia ta ayuda kanaton para esta positivo y mentena el diaton esperanza, maskin cosa probanza pa kita ta experiencia. Considera kita ahora dos profecia de Daniel que ta cumpli ya. Si ta entende kita con este maga profecia, puede kita hace maga justo decision.

12. Cosa ta representa el pies de “hierro que mezclao de lodo pandayan”? (Daniel 2:41-43)

¹² Le con el Daniel 2:41-43. d Na sueño de Rey Nabucodonosor, el pies del imagen amo hacido  de “hierro que mezclao de lodo pandayan.” Si compara kita con este profecia na otro maga profecia na libro de Daniel y Revelacion, puede kita entende que el pies ta representa con el alianza del United States y Britain—el maga de con todo poderoso gobierno na diaton tiempo ahora. Acerca na alianza de este dos nacion, ya habla si Daniel que “el reino tiene parte fuerte y tiene parte mahina.” Porque este tiene parte mahina? Cay el maga ordinario gente ta puede sangga con el poder de este maga gobierno. e

13. Cosa maga importante verdad kita puede aprende na este profecia?

¹³ Puede kita aprende manada importante verdad na imagen que ya menciona si Daniel, especialmente na pies de este. Una, ya puede dale mira el Anglo-American World Power que poderoso este na cuanto manera. Por ejemplo, incluido el United States y Britain na maga nacion que ya ganá na Guerra Mundial I y Guerra Mundial II. Pero, el diila alianza ya queda mahina y hay continua queda mahina cay el maga gente na este maga nacion tan contra con uno y otro, y con el gobierno. Ika-dos, este el ultimo de con todo poderoso gobierno que hay rula antes destroza el Reino del Dios con el todo gobierno del maga gente. Maskin pa el otro maga nacion tan contra con el Anglo-American World Power, gendeh sila ganá contra con este alianza. Sabe se kita cay “el piedra” que ta representa con el Reino del Dios amo el machaca con el pies del imagen que ta representa con el Anglo-America.—Dan. 2:34, 35, 44, 45.

14. Na cosa manera puede kita hace maga justo decision si ta entende kita con el profecia acerca na pies de hierro y lodo pandayan?

¹⁴ Convincido ba tu que deverasan el profecia de Daniel acerca na pies de hierro y lodo pandayan? Si ansina, hay afecta se con el de tuyu vida y con el de tuyu maga decision. Gendeh tu pricura tene manada sen na este mundo que cerca ya destroza el Dios. (Luc. 12:16-21; 1 Juan 2:15-17) Si ta entende tu con este profecia, puede tambien se ayuda contigo para realiza que bien importante el trabajo predicacion y enseñada. (Mat. 6:33; 28:18-20) Despues kita man repaso con este profecia, pregunta con el de tuyu mismo cuerpo, ‘El maga decision que ta hace yo ta dale ba mira que convincido yo que bien cerca ya destroza el Reino del Dios con el maga gobierno del gente?’

15. Quien el “rey del norte” y “rey del sur” ahora? (Daniel 11:40)

¹⁵ Le con el Daniel 11:40. f Na Daniel capitulo 11, ya menciona acerca na dos rey o gobierno que tan contra con uno y otro. Si compara kita con este profecia na otro maga profecia na Biblia, puede kita entende que el “rey del norte” amo el Russia y el maga aliado de este, y el “rey del sur” amo el Anglo-American World Power. g

16. Paquemodo el “rey del norte” ta trata con el maga siervo del Dios?

¹⁶ El maga siervo del Dios quien ta queda na maga lugar que bajo na rulanza del “rey del norte” ta experiencia persecucion. Ya gulpia y ya pone na preso con el cuanto maga Testigo por causa na diila fe. Pero nuay tiene miedo el maga hermano sino mas ya queda pa fuerte el diila fe. Porque? Cay sabe sila que el persecucion que ta experiencia el maga siervo del Dios ta  cumpli con el profecia de Daniel. h (Dan. 11:41) Si sabe kita se, puede se ayuda para esta fuerte el diaton esperanza y esta kita leal con Jehova.

17. Paquemodo el “rey del sur” ta trata con el maga siervo del Dios?

¹⁷ Del antes, el “rey del sur” ya persigui tambien con el maga siervo de Jehova. Por ejemplo, durante el Guerra Mundial I y Guerra Mundial II, yan preso el manada hermano y ya quita na escuela con el cuanto maga anak del maga Testigo por causa na diila neutralidad. Pero na reciente maga año, ta enfrenta otro probanza de lealtad el maga siervo de Jehova quien ta queda na maga lugar que bajo na rulanza del rey del sur. Por ejemplo, si tiene maga campaña de eleccion, el un Cristiano posible tene el tendencia que suporta con el un partido o un candidato. Gendeh le ta vota pero na de suyu pensamiento y corazon, quierre le que ganá aquel politico. Pero para queda deverasan neutral, debe kita queda con cuidao gendeh lang na cosa kita ta hace sino na cosa tambien kita ta pensa y ta sinti!—Juan 15:18, 19; 18:36.

18. Cosa debe el diaton reaccion na pelea del “rey del norte” y del “rey del sur”? (Mira tambien con el letrato.)

 ¹⁸ Aquellos quien gendeh ta creé na maga profecia na Biblia posible queda bien malingasa si mira sila que “man curniajan” el “rey del sur” y el “rey del norte.” (Dan. 11:40, ftn.) Este dos rey tiene maga poderoso armas que puede destroza con el tierra. Pero sabe kita que gendeh permiti si Jehova que sucede se. (Isa. 45:18) En vez de man lingasa na pelea del “rey del norte” y del “rey del sur,” ta hace este fuerte con el diaton fe. Ta dale este prueba que cerca ya el fin de este sistema.

19. Cosa kita debe realiza acerca na maga profecia na Biblia?

¹⁹ No sabe kita si paquemodo cumpli el cuanto maga profecia na Biblia. Maskin si profeta Daniel nuay entende si cosa quierre decir del todo cosa le ya escribi. (Dan. 12:8, 9) Maskin pa gendeh kita completamente ta entende si paquemodo cumpli el un profecia, gendeh se quierre decir que gendeh ya se sucede. Puede kita asigura que si Jehova hay ayuda kanaton entende na justo tiempo si cosa kita necesita sabe, igual na cosa le ya hace de antes.—Amos 3:7.

20. Cosa maga profecia na Biblia el cerca ya cumpli y cosa kita debe continua hace?

²⁰ Gendeh dura, el maga nacion hay hace proclamacion “que tiene paz y seguridad.” (1 Tes. 5:3, El Nuevo Testamento) Acabar, el maga gobierno de este mundo hay ataca con el falso religion y destroza con este. (Rev. 17:16, 17) Despues, hay ataca sila con el maga siervo del Dios. (Eze. 38:18, 19) Este maga suceso hay guia para na ultimo guerra de Armagedon. (Rev. 16:14, 16) Puede kita asigura que cerca ya gayot sucede este maga cosas. Poreso mientras ta espera, ojala continua kita dale mira el diaton apresacion na diaton amable Tata na cielo, pone atencion na maga profecia na Biblia y ayuda con otro que hace tambien con ese.