1. Asegun na Maga Hebreo 12:1, cosa kita necesita hace para puede hace acaba con el carrera de vida?

 EL Biblia ya compara na un carrera con el diaton vida como maga Cristiano. Aquellos quien hay puede hace acaba con este carrera hay ricibi vida eterna. (2 Tim. 4:7, 8) Necesita kita hace grande esfuerzo para continua corre especialmente cay bien cerca ya acaba este carrera. Si apostol Pablo, quien ya puede hace acaba con el de suyu carrera de vida, ya menciona si cosa puede ayuda kanaton para hace tambien se. Ya habla le que “abandona kita todo el maga cosas que ta sirvi de carga canaton . . . y continua gayot kita corre con paciencia este carrera.”—Le con el Maga Hebreo 12:1, El Nuevo Testamento.

2. Cosa quierre decir que ‘abandona todo el maga cosas que ta sirvi de carga kanaton’?

² Cuando ya escribi si Pablo que debe kita ‘abandona todo el maga cosas que ta sirvi de carga kanaton,’ quierre decir ba de este que nuay debe cosa carga el un Cristiano? Gendeh se el cosa le quierre decir. Sino, ta habla le kanaton que debe kita buta con el maskin cosa carga que gendeh kita necesita. Este maga carga puede sangga kanaton y causa para cansa kita na diaton corrida. Para puede kita continua, debe kita sabe si tiene ba kita ese maga carga y buta dayun con ese. Pero mientras ta hace se, no quierre tambien kita abandona con el maga cosas que debe kita carga. Cay si hace kita se, gendeh kita puede esta na carrera de vida. (2 Tim. 2:5) Cosa el maga cosas que debe kita carga?

3. (a) Asegun na Galacia 6:5, cosa kita debe carga? (b) Cosa kita considera na este articulo y porque?

³ Le con el Galacia 6:5, NWT. b Ya menciona si Pablo si cosa kita debe carga. Ya escribi le que “el cada uno hay lleva con el  de suyu mismo carga.” Ta refiri si Pablo aqui con el maga cosas que quierre el Dios que hace kita y nuay otro gente el quien puede hace con ese para kanaton. Na este articulo, hay considera kita si cosa el incluido na diaton “carga” y si paquemodo kita puede carga con ese. Hay discuti tambien kita maga cosas que posible ta carga kita pero gendeh necesita y si paquemodo kita puede buta con ese. Si lleva kita con el diaton mismo carga y buta con el maga carga que gendeh kita necesita, ayuda se para puede kita hace acaba con el diaton carrera de vida.

4. Porque gendeh un pesades el cosa kita ya promete na diaton dedicacion? (Mira tambien con el letrato.)

⁴ El cosa kita ya promete na diaton dedicacion. Cuando ya dedica kita con el diaton vida con Jehova, ya promete kita que adora con ele y hace el de suyu voluntad. Debe kita cumpli con ese promesa. Un grande responsibilidad el cosa kita ya promete con Jehova pero gendeh este un pesades. Gane, ya crea kanaton si Jehova para hace con el de suyu voluntad. (Rev. 4:11) Ya crea le kanaton na de suyu imagen y tiene espiritual necesidad.  Como resulta, puede kita tene buen relacion con ele y queda alegre mientras ta hace con el de suyu voluntad. (Sal. 40:8) Mas pa, si ta hace kita con el voluntad del Dios y ta sigui con el ejemplo del de suyu Anak, ta tene kita alivio.—Mat. 11:28-30.

5. Cosa puede ayuda contigo para cumpli con el de tuyu dedicacion? (1 San Juan 5:3)

⁵ Paquemodo tu puede cumpli con el de tuyu dedicacion? Puede ayuda contigo el dos cosas. Una, continua hace hondo con el de tuyu amor para con Jehova. Puede tu se hace si medita tu con el todo buen cosas que ya hace le para contigo y el maga bendicion que hay dale le contigo. Si mas ta queda hondo el de tuyu amor para con Dios, mas facil para contigo que obedece con ele. (Le con el 1 San Juan 5:3.) Ika-dos, imita con Jesus. Ya puede le hace con el voluntad del Dios cay ya pidi le ayuda con Jehova na rezo y ya continua man focus na de suyu premio. (Heb. 5:7; 12:2) Igual con Jesus, pidi ayuda con Jehova na rezo y continua man focus na de tuyu esperanza de vida eterna. Si mas ta queda hondo el de tuyu amor para con Dios y ta imita tu con el de suyu Anak, puede se ayuda contigo para cumpli con el de tuyu dedicacion.

6. Porque kita debe cumpli con el diaton obligacion na familia? (Mira tambien con el letrato.)

⁶ Diaton obligacion na familia. Para puede continua na diaton carrera de vida, debe kita ama con Jehova y con Jesus mas pa na diaton maga pariente. (Mat. 10:37) Pero, gendeh este quierre decir que deja ya kita con el diaton obligacion na familia que dol ta sangga este kanaton para hace si cosa quierre el Dios y el Cristo. El deverasan, para queda aceptable con Dios y con el Cristo, necesita kita cumpli con el diaton responsibilidad na familia. (1 Tim. 5:4, 8) Si hace kita se, hay queda kita mas alegre. Gane, sabe si Jehova que hay queda alegre el familia si el man maridable tiene amor y respeto con uno y otro, si el mayores ta ama y tan train con el diila maga anak y si el maga anak ta obedece con el diila mayores.—Ef. 5:33; 6:1, 4.

7. Paquemodo tu puede cumpli con el de tuyu obligacion na familia?

⁷ Paquemodo tu puede cumpli con el de tuyu obligacion na familia? Maskin cosa man el de tuyu papel na familia, confia con el sabeduria que puede incuntra na Biblia en vez na de tuyu emocion, na de ustedes cultura o na cosa ta habla el “maga experto.” (Prov. 24:3, 4) Puede tambien tu usa con el diaton maga publicacion que base na Biblia. Ta contene este maga practical sugestion si paquemodo tu aplica con el maga principio na Biblia. Por ejemplo, el diaton website ta contene maga informacion acerca na maga especifico dificultad que ta experiencia ahora el maga man maridable, mayores y teenager. c Queda determinao que aplica si cosa ta habla el Biblia, maskin pa gendeh se ta hace el otro maga miembro del de tuyu familia. Si hace tu se, hay beneficia el de tuyu familia y hay ricibi tu el bendicion de Jehova.—1 Ped. 3:1, 2.

8. Paquemodo puede afecta kanaton el diaton maga decision?

⁸ Responsibilidad na maga decision que ta hace kita. Ta dale kanaton si Jehova el libertad para iscuji y quierre le que queda kita alegre cay ya hace kita maga buen decision. Pero si ta hace kita maga gendeh justo decision, ta permiti le que experiencia kita con el maga consequencia de este. (Gal. 6:7, 8) Poreso, ta acepta kita con el maga resulta del diaton maga gendeh justo decision o si ya habla y ya hace kita un cosa que gendeh bueno. Depende na cosa  kita ya puede hace, baka man conciencia kita. Pero, debe kita queda responsable na diaton maga decision y manda se move kanaton para habla el diaton maga culpa, corecta el diaton maga kamali y evita repiti con ese. Si hace kita se, puede se ayuda kanaton para esta na carrera de vida.

9. Cosa puede ayuda contigo si ya hace tu un gendeh justo decision? (Mira tambien con el letrato.)

⁹ Paquemodo tu puede cumpli con el de tuyu responsibilidad si ya hace tu gendeh justo decision? Si ya puede tu hace un gendeh justo decision, acepta con el de tuyu presente situacion. Acorda que gendeh tu puede cambia con el maga cosas que ya pasa ya. No hace usik con el de tuyu tiempo y fuerza para pricura dale mira que justo tu o disculpa con otro na maga gendeh justo decision que ya hace tu. Sino, admiti que yan kamali tu y hace el todo cosa tu puede hace na de tuyu presente circumstancia. Si ta sinti tu culpable na cosa tu ya hace, reza con Jehova, admiti el de tuyu kamali y pidi con ele que perdona contigo. (Sal. 25:11; 51:3, 4) Pidi perdon con aquellos con quien tu ya puede hace sinti duele y si necesita, pidi el ayuda del maga anciano. (Sant. 5:14, 15) Aprende na de tuyu maga kamali y pricura evita repiti con ese. Si hace tu se, puede tu asigura que hay dale mira contigo lastima si Jehova y dale le contigo el ayuda que necesita tu.—Sal. 103:8-13.

10. Porque kita man luya si expecta kita maga cosas que gendeh realistico? (Galacia 6:4)

¹⁰ Maga ta expecta kita que gendeh realistico. Puede kita man luya si compara kita con el diaton mismo cuerpo con otro. (Le con el Galacia 6:4, NWT. d) Si pirmi kita compara con el diaton mismo cuerpo con otro, posible kita queda envidioso y man competencia kanila. (Gal. 5:26) Si pricura kita hace con el cosa ya cumpli el otro, baka forza kita con el diaton mismo cuerpo maskin pa gendeh gayot kita con este puede hace. Y pensa este: Si “el cosa ta expecta que nuay porsigui ta hace triste con el corazon,” mas malo ya si expecta kita con el maga cosas que gendeh gayot realistico! (Prov. 13:12) Si hace kita con ese, posible kita cansa y queda hinay el diaton corrida na carrera de vida.—Prov. 24:10.

11. Paquemodo tu evita expecta maga cosas que gendeh realistico?

¹¹ Paquemodo tu puede buta con ese carga? No expecta mas na de tuyu mismo cuerpo contra na cosa ta pidi si Jehova. Nunca le ta expecta que dale tu el maga cosas que gendeh tu puede dale. (2 Cor. 8:12) Puede tu asigura que si Jehova gendeh ta compara con el cosa tu ta hace na cosa ta hace el otro. (Mat. 25:20-23) Ta aprecia gayot le con el de tuyu con todo corazon servicio, de tuyu pagka-fiel y de tuyu paciencia. Acepta que el de tuyu edad y circumstancia puede limita con el cosa tu ta puede hace ahora. Igual con Barzilai, queda modesto y no acepta maga privilegio si gendeh se ta permiti el de tuyu salud. (2 Sam. 19:35, 36) Igual con Moises, acepta ayuda y delega maga responsibilidad con otro si necesita. (Ex. 18:21, 22) Si sabe tu el de tuyu maga limitacion, gendeh tu expecta maga cosas que gendeh realistico que puede hace cansa contigo na carrera de vida.

12. Responsable ba kita na maga gendeh justo decision que ya hace el otro? Explica.

¹² Ta sinti responsable na maga gendeh justo decision que ya hace el otro. Gendeh kita puede hace decision para con otro y gendeh kita puede pirmi protege kanila na maga consequencia del maga mal decision que ya hace sila.  Por ejemplo, el un anak posible decidi na uliji que descanza sirvi con Jehova. Ese decision puede causa grabe dolor na maga mayores. Pero, el maga mayores quien ta disculpa con el diila mismo cuerpo na cosa ya hace el diila anak ta carga un pesades—un cosa que gendeh ta expecta si Jehova que carga sila.—Roma 14:12.

13. Paquemodo puede enfrenta el mayores con el gendeh justo decision del diila anak?

¹³ Paquemodo tu puede buta con ese carga? Acorda que ya dale kanaton todo si Jehova el libertad para iscuji. Ya permiti le con el cada persona que hace con el de suyu mismo decision. Incluido alli el decision que sirvi con ele o gendeh. Sabe si Jehova que nuay perfecto mayores; quierre lang le que hace tu el todo cosa tu puede hace. Responsibilidad del de tuyu anak el decision que ya hace le, gendeh de tuyu. (Prov. 20:11) Pero, posible pirmi tu ta pensa con el maga kamali que ya hace tu como un mayores. Si ansina, habla con Jehova el cosa tu ta sinti y pidi de suyu perdon. Sabe le que gendeh tu puede hace bira el tiempo y cambia si cosa ya sucede ya. Mas pa, gendeh le ta expecta que sangga tu el maga consequencia del mal decision del de tuyu anak. Acorda que si hace esfuerzo el de tuyu anak para bira con Jehova, hay ricibi gayot Le otravez con ele.—Luc. 15:18-20.

14. Porque un carga que debe kita buta el sentido que sobra de culpable?

¹⁴ Ta sinti sobra culpable. Si puede kita hace culpa, normal lang que sinti kita culpable. Pero, no quierre si Jehova que sinti kita sobra de culpable. Un carga se que debe kita buta. Si ya admiti kita con el diaton culpa, ya arripinti y ya hace maga manera para evita repiti con ese, puede kita confia que ya perdona ya kanaton si Jehova. (Act. 3:19) Si ya puede ya kita se hace, no quierre si Jehova que continua kita sinti culpable. Sabe le que gendeh bueno el efecto de ese kanaton. (Sal. 31:10) Si queda kita sobra de triste, baka gendeh mas kita continua na carrera de vida.—2 Cor. 2:7.

15. Cosa puede ayuda contigo si ta sinti tu sobra de culpable? (1 San Juan 3:19, 20) (Mira tambien con el letrato.)

 ¹⁵ Paquemodo tu puede buta con ese carga? Si ta continua tu sinti culpable, acorda que el Dios “deverasan ta perdona.” (Sal. 130:4) Si ta perdona le con aquellos quien sincero ta arripinti, ele ta promete: “Gendeh mas yo acorda con el diila pecado.” (Jer. 31:34) Este quierre decir que gendeh mas pensa si Jehova con el maga culpa que ya hace tu de antes. Poreso, no pensa que nuay pa le perdona contigo si ta experiencia tu maga dificultad por causa na de tuyu maga culpa de antes. Y no sobra man triste si ya perde el cuanto del de tuyu maga privilegio na congregacion. Gendeh mas ta continua pensa si Jehova con el de tuyu maga culpa y debe ansina tambien tu.—Le con el 1 Juan 3:19, 20, NWT. e

16. Mientras ta corre na carrera de vida, cosa kita debe sabe?

¹⁶ Mientras ta continua kita corre na carrera de vida, debe kita ‘corre para ricibi el premio.’ (1 Cor. 9:24) Puede se kita hace si sabe kita con el maga cosas que debe kita carga y con el maga cosas que debe kita buta. Na este articulo, ya discuti kita cuanto ejemplo del maga cosas que debe kita carga y debe kita buta. Pero, tiene pa otro. Si Jesus ya habla que puede queda pesades el “maga borracherias y maga lingasa de este vida.” (Luc. 21:34) Este y el otro pa maga texto puede ayuda contigo para mira con el maga cambio que necesita tu hace para continua corre na carrera de vida.

17. Porque kita puede asigura que hay ganá kita na carrera de vida?

¹⁷ Puede kita asigura que hay ganá kita na carrera de vida cay si Jehova hay dale kanaton el fuerza que necesita kita. (Isa. 40:29-31) Poreso, continua corre! Imita con apostol Pablo quien ya hace gayot esfuerzo para ganá con el premio. (Fil. 3:13, 14) Nuay quien puede corre na este carrera para contigo pero na ayuda de Jehova, puede tu ganá. Puede ayuda contigo si Jehova que carga con el maga cosas que necesita y buta con el maga gendeh necesita pesades. (Sal. 68:19) Na de suyu ayuda, puede tu continua corre na de tuyu carrera y ganá!