1. Porque tu ta aprecia con el maga paciencioso gente?

 TODO kita ta aprecia con el maga paciencioso gente. Ta gusta kita con aquellos quien sabe espera que gendeh ta consumi. Ta aprecia kita si el otro tan paciencia kanaton si ta hace kita maga kamali. Y ta rindi kita gracias con el quien yan Bible study kanaton cay yan paciencia le cuando ya tormenta kita entende, acepta o aplica con el un enseñanza na Biblia. Mas pa, ta rindi gayot kita gracias con Dios Jehova cay yan paciencia le kanaton!—Roma 2:4.

2. Na cosa maga situacion posible man dificil kita queda paciencioso?

² Maskin pa ta aprecia kita que paciencioso el otro, posible que kita mismo tan dificil queda paciencioso. Por ejemplo, baka dificil para kanaton que esta calmao si bien traffic, especialmente si atrasao ya kita. Posible, queda kita bien rabiao si ya consumi kita na cosa ya hace el otro. Y tiene vez, baka tan dificil kita que continua espera con el nuevo mundo que ya promete si Jehova. Quierre ba tu queda mas paciencioso? Na este articulo, hay considera kita si cosa quierre decir que queda paciencioso y si porque este bien importante. Hay discuti tambien kita si cosa puede ayuda kanaton para cultiva mas paciencia.

3. Cosa ta hace el un paciencioso persona si ta manda con ele consumi el otro?

³ Considera cuatro manera que puede kita dale mira paciencia. Una, el un paciencioso persona gendeh pronto rabia. Ta pricura  le esta calmao y gendeh tan balus si hace con ele consumi el otro y si tan stress le. El expresion “gendeh pronto rabia” ya aparece primer vez na Biblia cuando ya menciona este que si Jehova amo “un Dios lastimoso y tiene compasion, gendeh pronto rabia y abundancia de amor leal y verdad.”—Ex. 34:6.

4. Cosa ta hace el un paciencioso persona si necesita le espera?

⁴ Ika-dos, el un paciencioso persona calmao mientras ta espera. Si nuay pa sucede el un cosa que ta expecta le, el un paciencioso persona ta pricura evita queda iritable. (Mat. 18:26, 27) Manada situacion que donde necesita kita calmao espera. Por ejemplo, necesita kita oi con paciencia mientras tan cuento el otro y gendeh man sabat kanila. (Job 36:2) Posible necesita tambien kita paciencia si ta ayuda con el un estudiante que entende un enseñanza na Biblia o para quita con el un mal practica.

5. Cosa el otro manera que puede kita dale mira paciencia?

⁵ Ika-tres, el un paciencioso persona gendeh apurao. Deverasan, tiene maga situacion que donde necesita kita apura. Pero, si tiene un importante cosa que necesita hace el un paciencioso persona, gendeh le ta apura principia hace con ese o hace dayun con ese acaba. Sino, ta dale le bastante tiempo para plaña con el cosa le hace. Y despues, ta asigura le que puede le se hace enbuenamente.

6. Cosa ta hace el un paciencioso persona si ta enfrenta dificultad?

⁶ Ika-cuatro, el un paciencioso persona ta pricura aguanta na dificultad que gendeh ta reclama. Siempre, gendeh malo que habla na diaton close amigo si cosa ta pasa kanaton. Pero, el un paciencioso persona ta hace si cosa le puede para continua aguanta mientras ta mentena un positivo mirada. (Col. 1:11) Como maga Cristiano, necesita kita dale mira con ese todo aspeto de  paciencia. Porque? Considera kita con el cuanto razon.

7. Asegun na Santiago 5:7, 8, porque bien importante el paciencia? (Mira tambien con el letrato.)

⁷ Importante el paciencia para salva kita. Igual con el maga fiel siervo de antes, necesita kita con paciencia espera con Dios para cumpli con el de suyu maga promesa. (Heb. 6:11, 12) Ya compara kanaton el Biblia na un siembrador. (Le con el Santiago 5:7, 8.) Ta trabaja enbuenamente el un siembrador para siembra y rega con el cosa le ya siembra. Pero no sabe le exacto si cuando este hay crici. Poreso, con paciencia ta espera el siembrador y ta confia le que hay cosecha le con el cosa le ya siembra. Na igual manera, ta esta kita ocupao na maga espiritual actividad maskin pa “no sabe [kita] si cosa dia ay llega el [diaton] Señor.” (Mat. 24:42) Con paciencia kita ta espera y ta confia que na justo tiempo de Jehova, hay cumpli le con el todo cosa le ya promete. Si perde el diaton paciencia, posible hay cansa kita espera y principia kita hinay-hinay deja con Jehova. Posible, hay principia tambien kita hace maga cosas que dale dayun kanaton alegria. Pero si paciencioso kita, puede kita aguanta hasta na fin y salva.—Miq. 7:7; Mat. 24:13.

8. Paquemodo el paciencia puede ayuda kanaton para tene buen relacion con otro? (Colosa 3:12, 13)

⁸ Necesita kita paciencia para tene buen relacion con otro. Si tiene kita este calidad, hay oi kita enbuenamente mientras tan cuento el otro. (Sant. 1:19) Ta ayuda tambien kanaton el paciencia para tene kita paz con otro. Ta ayuda este kanaton para gendeh dayun hace o habla un cosa que gendeh justo si ta sinti kita stress. Y si paciencioso kita, gendeh kita pronto rabia si ya hace sinti duele kanaton el otro. En vez de man balus, hay continua kita “aguanta y perdona con uno y otro.”—Le con el Colosa 3:12, 13.

9. Paquemodo el paciencia puede ayuda kanaton si necesita kita hace decision? (Proverbio 21:5)

⁹ Puede tambien kanaton ayuda el paciencia para hace maga buen decision. En vez de apura, hay dale kita tiempo para man research y examina si cosa el de con todo justo decision. (Le con el Proverbio 21:5. b) Por ejemplo, si ta busca kita trabajo, baka acepta kita dayun con el primer trabajo que ya ofrece kanaton, maskin pa puede este sangga con el diaton adoranza con Jehova. Pero si paciencioso kita, hay dale kita tiempo para considera con el locacion, hora y si cosa el efecto de este trabajo na diaton familia y espiritualidad. Si paciencioso kita, puede kita evita hace maga gendeh justo decision.

10. Paquemodo el un Cristiano puede cultiva y mentena paciencia?

¹⁰ Reza para tene mas paciencia. El paciencia amo un aspeto del fruta del espiritu. (Gal. 5:22, 23) Poreso, puede kita reza para na sagrao espiritu y pidi con Jehova que ayuda kanaton cultiva con el fruta de este. Si enfrenta kita un situacion que pone na probanza con el diaton paciencia, puede kita continua “pidi” sagrao espiritu para ayuda kanaton queda paciencioso. (Luc. 11:9, 13) Puede tambien kita pidi con Jehova que ayuda kanaton mira con el un cosa igual na de suyu mirada. Despues kita reza, debe kita hace esfuerzo para dale mira paciencia cada dia. Si mas ta reza kita para tene paciencia y ta pricura queda paciencioso,  hay ayuda kanaton si Jehova y hay queda este parte del diaton personalidad.

11-12. Paquemodo si Jehova ya dale mira paciencia?

¹¹ Medita con el maga ejemplo na Biblia. El Biblia ta contene manada ejemplo del maga gente quien ya dale mira paciencia. Si medita kita con ese maga ejemplo, hay aprende kita manada manera si paquemodo dale mira paciencia. Antes kita considera con el cuanto de este maga ejemplo, mira kita una con el de con todo buen ejemplo de paciencia—si Jehova.

¹² Na jardin de Eden, ya hace malo si Satanas con el nombre de Jehova y De Suyu reputacion. Ya hace le manera para man duda si Eva que gendeh amable si Jehova y gendeh bueno el De Suyu rulanza. En vez de destroza dayun con Satanas, ya aguanta y ya dale mira paciencia si Jehova cay sabe Le que necesita tiempo para dale prueba que el De Suyu rulanza amo el de con todo bueno. Y mientras ta espera, ya aguanta le na maga imbusterias acerca na de suyu nombre. Mas pa, con paciencia ya espera si Jehova para mas manada gente el tene oportunidad para obtene vida hasta para cuando. (2 Ped. 3:9, 15) Como resulta, millones de maga gente el ya puede conoce con ele. Si man focus kita con el maga beneficio del paciencia de Jehova, posible mas facil para kanaton que espera si cuando le destroza con este sistema.

13. Paquemodo si Jesus ya puede gayot imita con el paciencia del de suyu Tata? (Mira tambien con el letrato.)

¹³ Ya imita gayot si Jesus con el paciencia del de suyu Tata y ya dale le mira con este calidad cuando taqui le na tierra. Asigurao, gendeh pirmi facil para con ele que dale mira paciencia especialmente con el maga escriba  y Fariseo que maga hipocrito. (Juan 8:25-27) Pero igual con el de suyu Tata, gendeh pronto rabia si Jesus. Nuay ele man balus cuando ya insulta con ele. (1 Ped. 2:23) Con paciencia ya aguanta si Jesus na maga dificultad y nuay le reclama. Poreso, el Biblia ya habla kanaton que “considera . . . con Ele quien ya aguanta con ese grande oposicion del maga pecador.” (Heb. 12:2, 3) Na ayuda de Jehova, puede tambien kita con paciencia aguanta na maskin cosa dificultad que hay enfrenta kita.

14. Cosa kita puede aprende na paciencia de Abraham? (Maga Hebreo 6:15) (Mira tambien con el letrato.)

¹⁴ Paquemodo si nuay pa sucede el cosa kita ta expecta acerca na fin? Posible, gendeh kita ta expecta que hasta ahora nuay pa llega el fin. O baka tan lingasa kita que gendeh kita alcanza con el tiempo que sucede se. Cosa puede ayuda kanaton para continua espera con paciencia? Considera con el ejemplo de Abraham. Cuando 75 año le y nuay anak, ya promete con ele si Jehova: “Hace yo contigo un grande nacion.” (Gen. 12:1-4) Ya puede ba mira si Abraham que ya cumpli ese promesa? Si, pero gendeh completamente. Despues cruza na Rio de Eufrates y espera por 25 año, ya puede mira si Abraham que ya nace el de suyu anak que si Isaac. Y despues de 60 año pa, ya nace el de suyu maga apu que si Esau y Jacob. (Le con el Maga Hebreo 6:15.) Pero nuay gayot puede mira si Abraham que ya queda un grande nacion el de suyu maga descendiente y ya hereda con el Tierra Prometido. Pero este fiel hombre ya tiene gayot cerca relacion con el de suyu Creador. (Sant. 2:23) Y si resucita con Abraham, hay sinti gayot le alegre si sabe le que por causa na de suyu fe y paciencia, ya bendici con el todo  nacion! (Gen. 22:18) Cosa el leccion? Posible, gendeh dayun kita puede mira que cumpli el todo promesa de Jehova. Pero si man paciencia kita igual con Abraham, puede kita asigura que hay bendici kanaton si Jehova—ahora y mas pa na nuevo mundo que ya promete le.—Mar. 10:29, 30.

15. Cosa kita puede considera durante na diaton personal study?

¹⁵ Manada ejemplo el puede kita le na Biblia del maga persona quien ya dale mira paciencia. (Sant. 5:10) Porque gendeh hace un study project para sabe acerca kanila? c Por ejemplo, maskin bien joven si David cuando ya iscuji con ele para queda el rey de Israel, ya necesita le espera por manada año antes le principia rula. Si Simeon y Ana fiel ya sirvi con Jehova mientras ta espera que llega el Mesias. (Luc. 2:25, 36-38) Mientras ta estudia tu con este maga istoria, contesta con este maga siguiente pregunta: Cosa posible ya ayuda con este persona para dale mira paciencia? Paquemodo le ya beneficia cay ya dale le mira paciencia? Paquemodo yo puede imita con ele? Puede tambien tu beneficia si aprende tu acerca con aquellos quien nuay dale mira paciencia. (1 Sam. 13:8-14) Puede tu pregunta: ‘Cosa posible ya causa kanila para perde paciencia? Cosa el maga mal resulta que ya experiencia sila?’

16. Cosa el cuanto beneficio si paciencioso kita?

¹⁶ Considera con el maga beneficio si paciencioso kita. Si paciencioso kita, mas alegre kita y calmao. Gane, bueno para na diaton mental y fisical salud el paciencia. Si paciencioso kita con otro, hay tene kita mas buen relacion kanila. Hay queda mas unido el diaton congregacion. Si hace kanaton consumi el otro, gendeh queda grabe el situacion cay gendeh kita pronto rabia. (Sal. 37:8, ftn.; Prov. 14:29) Mas pa na todo, si paciencioso kita, puede kita imita con el diaton Tata na cielo y queda mas cerca con ele.

17. Cosa kita debe determinao hace?

¹⁷ Bien bonito calidad gayot el paciencia! Gendeh pirmi facil queda paciencioso. Pero na ayuda de Jehova, puede kita continua cultiva con este calidad. Y mientras con paciencia kita ta espera con el nuevo mundo, puede kita asigura que “el ojos de Jehova ta vicia con aquellos quien ta tiene miedo con ele, aquellos quien ta espera con el de suyu amor leal.” (Sal. 33:18) Ojala todo kita queda determinao que continua tene paciencia.