Na aquel articulo, ya aprende kita que uno lang el issue que ta enfrenta el todo maga gente y angel: el santificacion del nombre de Jehova. El issue de soberania—que el rulanza de Jehova amo el de con todo bueno—amo un aspeto de este grande issue. Na igual manera, el issue acerca na integridad del maga gente amo otro aspeto de ese grande issue.

Porque kita ta hace claro ahora que el de con todo importante issue amo acerca na nombre de Jehova y el santificacion de ese? Examina kita tres razon.

Una, ya hace malo si Satanas con el nombre o reputacion de Jehova na jardin de Eden. El pregunta de Satanas con Eva ya hace sale que si Jehova un canalla Dios y gendeh justo el maga restriccion que ya dale Le kanda Adan y Eva. Despues, ya habla si Satanas maga cosas que contra na cosa ya habla si Jehova. Ya clama le que el Dios imbustero. Na ese manera, ya hace le malo con el nombre de Jehova. Ya queda le el Diablo que quierre decir falso acusador. (Juan 8:44) Cay ya creé si Eva con el maga imbusterias de Satanas, ya desobedece le con Dios y yan contra na De Suyu soberania. (Gen. 3:1-6) Hasta ahora, ta hace malo si Satanas con el nombre del Dios y ta habla maga imbusterias acerca si cosa clase de Persona si Jehova. Grande posibilidad que aquellos quien ta creé con este maga imbusterias hay desobedece con Jehova. Poreso, para na maga siervo del Dios, un grande injusticia gayot que hace malo con el sagrao nombre de Jehova. Amo se el causa del todo sufrimiento y maldad na mundo.

Ika-dos, para na beneficio del todo creacion, determinao si Jehova que vindica con el de suyu nombre y quita con el todo imbusterias acerca con ele. Amo se el de con todo importante con Jehova. Poreso ya habla le: “Hay santifica yo con el de mio marvelloso nombre.” (Eze. 36:23) Y ya hace claro si Jesus que este debe el de con todo importante na maga rezo del maga fiel siervo de Jehova cuando ya habla le: “Santifica con el de uste nombre.” (Mat. 6:9, NWT) Manada beses ya hace claro el Biblia que importante que glorifica con el nombre de Jehova. Considera con el cuanto ejemplo: “Dale con Jehova el gloria que debe para na de suyu nombre.” (1 Cron. 16:29; Sal. 96:8) “Canta ustedes maga alabanza na de suyu glorioso nombre.” (Sal. 66:2) “Hay glorifica yo con el de tuyu nombre hasta para cuando.” (Sal. 86:12) El uno na maga ocasion que yan cuento mismo si Jehova estaba na cielo ya sucede na templo na Jerusalem, donde ya habla si Jesus: “Tata, dale gloria con el de Uste Nombre.” Despues, ya contesta si Jehova: “Ya dale ya Yo gloria, y ay dale pa yo otra vez.”—Juan 12:28. a

Ika-tres, el proposito de Jehova pirmi conectao na de suyu nombre o reputacion. Considera este: Cosa sucede despues del ultimo probanza na fin del Un Mil Año Rulanza del Cristo? Cosa sinti el todo maga angel y gente acerca na nombre de Jehova  na ese tiempo? Para ayuda kanaton contesta con ese pregunta, acorda kita con el dos aspeto de ese grande issue—integridad del maga gente y soberania na entero universo. El maga gente ba quien ya esta fiel hay continua siempre experiencia el maga probanza na diila integridad? Gendeh. Perfecto ya sila y ya dale ya sila prueba que fiel sila. Hay vivi ya sila hasta para cuando. El issue ba de soberania na entero universo hay continua queda issue na maga angel y maga gente? Gendeh. Ya puede ya dale prueba que el rulanza de Jehova amo el de con todo bueno. Pero, paquemodo si acerca na nombre de Jehova?

Na ese tiempo, el todo hay sabe el verdad acerca con Jehova y hay santifica ya completamente con el de suyu nombre. Maskin pa ansina, el nombre de Jehova hay continua queda el de con todo importante cosa na todo de suyu siervo na cielo y na tierra. Porque? Cay puede sila mira que hay continua si Jehova hace maga bonito cosas. Considera este: Cay hay debolbe si Jesus con el todo rulanza con Jehova, “el Dios ay reina gayot con todo.” (1 Cor. 15:28) Despues con ese, el todo maga gente na tierra hay queda alegre mientras ta participa “na gloria del maga anak del Dios.” (Roma 8:21) Y cumpli si Jehova completamente con el de suyu proposito que hace unido con el de suyu maga anak na cielo y na tierra como un familia.—Ef. 1:10.

Paquemodo ese maga suceso hay afecta con el familia de Jehova na cielo y na tierra? Asigurao, hay tene siempre kita el fuerte deseo para dale alabanza con el bonito nombre de Jehova. Ya guia con el salmista que si David para escribi: “Ojala alaba con Dios Jehova . . . Ojala alaba con el de suyu glorioso nombre hasta para cuando.” (Sal. 72:18, 19) Pirmi kita tiene razon para hace con ese hasta para cuando.

El nombre de Jehova ta representa con el todo cosas acerca con ele. Gane, si ta pensa kita acerca na nombre de Jehova, ta pensa kita acerca na de suyu amor. (1 Juan 4:8) Hay acorda kita pirmi que ya crea kanaton si Jehova por causa na de suyu amor, ya dale le con el rescate por causa na de suyu amor y recto el de suyu manera de rulanza por causa na de suyu amor. Pero, hay continua kita sinti el amor de Jehova para kanaton hasta para cuando. Como resulta, hay manda este move kanaton que queda mas cerca con ele como diaton Tata y canta maga alabanza para na de suyu glorioso nombre hasta para cuando.—Sal. 73:28.