• “Ya sinti yo que dol bira-bira ya comete adulterio el de mio marido.”

• “Ya sinti yo huya, nuay valor y dol nuay quien ta ama conmigo.”

• “Nuay yo con quien yan cuento acerca con este. Ya sufri yo y ya sinti que solo-solo yo.”

• “Ya sinti yo que dol nuay queber conmigo si Jehova.”

El maga comento arriba ta dale mira si cosa ta sinti el un mujer si ta mira pornografia el de suyu marido. Y si ta hace le se pa-secreto, posible por cuanto meses o año ya, baka sinti el mujer que dol gendeh mas le puede confia con el de suyu marido. El un mujer ya habla, “Ya sinti yo que dol no conoce yo con el de mio marido. Ya pensa yo, ‘Tiene pa gaha le otro cosas que ta esconde conmigo?’”

Ya prepara con este articulo para na un mujer que el marido ta mira pornografia. a Hay discuti este maga principio na Biblia que puede dale comforta con ele, asigura con ele que suporta con ele si Jehova y ayuda con ele para tene paz y esta cerca con Ele. b

Maskin pa gendeh tu puede controla con el todo cosas que ta hace el de tuyu marido, tiene maga cosas que puede tu hace para tene tu mas paz na pensamiento. Considera con el siguiente.

No disculpa con el de tuyu mismo cuerpo. Posible pensa el un mujer que culpa de suyu si porque ta mira pornografia el de suyu marido. Ya sinti si Alice c que tiene cosa falta con ele como un mujer. Ya pensa le, ‘Porque mas quierre el de mio marido que mira con el otro maga mujer contra conmigo?’ El cuanto mujer ta disculpa con el diila mismo cuerpo. Ta pensa sila que ya queda mas grabe el situacion por causa na diila reaccion na cosa ya sucede. Si Danielle ya habla, “Cay ya queda yo bien rabiao, ya sinti yo que dol iyo mismo el ta destroza con el diamon matrimonio.”

Si ta sinti tu igual ansina, acorda que para con Jehova, gendeh tu responsable na cosa ta hace el de tuyu marido. El Santiago 1:14 ya habla: “El ta tenta con el gente amo el maga mal deseo del  disuyo mismo cuerpo.” (Roma 14:12; Fil. 2:12) Gendeh contigo ta disculpa si Jehova sino ta aprecia le con el de tuyu lealtad.—2 Cron. 16:9.

Posible, puede tambien ayuda con el mujer si entende le que si ta mira pornografia el de suyu marido, gendeh este quierre decir que tiene cosa falta con ele como un mujer. El maga experto ya habla que el pornografia ta causa con el un persona para tene maga sexual deseo que nuay maskin quien mujer el puede satisfecha.

Evita sobra man lingasa. Si Catherine ya habla que gendeh ta perde na de suyu pensamiento que el de suyu marido ta mira pornografia. Si Frances ya habla: “Ta queda yo bien malingasa cada vez no sabe yo si onde el de mio marido.” El otro maga mujer ya habla que ta tiene sila huya si tan junto na maga hermano y hermana quien posible sabe acerca na problema del diila marido. El otro ya admiti que ta sinti sila solo cay ta pensa sila que nuay quien ta entende con el diila situacion.

Natural lang se maga sentido. Pero si pirmi tu pensa con ese, hay queda lang tu mas malingasa. En vez de hace se, pricura man focus na de tuyu relacion con Jehova. Ayuda se contigo para puede aguanta na de tuyu situacion.—Sal. 62:2; Ef. 6:10.

Baka puede tambien ayuda contigo si le tu y medita acerca con el maga mujer na Biblia quien ya sinti comforta cay ya reza sila con Jehova. Gendeh na todo ocasion que ya quita le con el diila maga problema pero ya dale le kanila paz. Por ejemplo, “triste gayot” si Ana na de suyu situacion. Pero despues le “reza . . . con Jehova por largo tiempo,” ya tiene le paz maskin pa no sabe le si cosa sucede con ele na futuro.—1 Sam. 1:10, 12, 18; 2 Cor. 1:3, 4.

Pidi ayuda con el maga anciano na de ustedes congregacion. Puede kanila compara na “un lugar que donde puede esconde desde na viento, un lugar que donde puede man hulao desde na fuerte ulan.” (Isa. 32:2) Baka refiri sila contigo un hermana con quien tu puede man cuento y quien puede dale comforta contigo.—Prov. 17:17.

Puede ba tu ayuda con el de tuyu marido que descanza mira pornografia? Posible. El Biblia ya habla que si ta solva problema o si tiene un poderoso enemigo, “el dos mas bueno que con el uno.” (Ecl. 4:9-12) Ya puede discubri el maga experto que si tan ayudajan el man maridable, mas mucho, ta puede quita el marido con el de suyu adiccion  na pornografia y ta puede con ele aprende confia otravez el de suyu mujer.

Siempre, depende se si sincero el de tuyu marido y quierre gayot le descanza mira pornografia. Ya pidi ba le ayuda con Jehova y na maga anciano? (2 Cor. 4:7; Sant. 5:14, 15) Ta hace ba le maga manera para evita con el tentacion—por ejemplo, ta pone ba le limitacion na usada del de suyu gadget y ta evita maga situacion que donde posible tiene tentacion? (Prov. 27:12) Conforme ba le acepta el de tuyu ayuda y queda honesto contigo? Si ansina, baka puede tu ayuda con ele.

Paquemodo tu con este hace? Considera un ejemplo. Casao si Felicia con Ethan, quien ya queda addict na pornografia cuando bata pa este. Ya hace manera si Felicia para mas facil con ele puede man cuento el de suyu marido si ta sinti este que dol quierre este mira otravez pornografia. Si Ethan ya habla: “Ta habla yo el todo con el de mio mujer. Ta ayuda le conmigo evita maga tentacion y regular ta pregunta si quetal yo. Y ta ayuda le conmigo que pone limitacion na de mio usada de Internet.” Siempre, ya sinti duele si Felicia cay quierre mira pornografia si Ethan. “Pero,” si Felicia ya habla, “si continua yo rabia y dale mira con ele que ta sinti yo duele, gendeh este puede ayuda con ele para evita con este mal vicio. Despues kame discuti con el de suyu maga dificultad, preparao le ayuda conmigo para menora el dolor que ta sinti yo.”

Si hace este el man maridable, puede este ayuda con el marido para evita mira pornografia y ayuda tambien este con el de suyu mujer para confia otravez con ele. Cay siempre, si ta habla el marido con el de suyu mujer acerca na de suyu maga deseo, si cosa le ta hace na entero dia y si onde le ta anda, mas facil para na de suyu mujer que confia con ele cay nuay le cosa ta esconde.

Ta sinti ba tu que puede ayuda este maga sugestion con el de tuyu marido? Si ansina, cosa gaha si le y discuti ustedes junto con este articulo? El de suyu goal amo que evita le mira pornografia y dale razon contigo para confia con ele. En vez de rabia contigo cay quierre tu man cuento acerca na este problema, debe le pricura entende si cosa el efecto de este contigo. El de tuyu goal amo que suporta con el de suyu esfuerzo que quita con este vicio y dale con ele el oportunidad que ganá otravez con el de tuyu confianza. Necesita ustedes dos entende si cosa ta causa con el maga gente para mira pornografia y si paquemodo puede quita con este problema. d

 Si ta tiene tu miedo cay baka gendeh ustedes puede esta calmao mientras ta discuti con este topico, puede ustedes pidi con el un anciano con quien ustedes comfortable que man junto con ustedes mientras ta discuti con este. Acorda que maskin pa ya puede ya quita el de tuyu marido con el de suyu adiccion na pornografia, posible que necesita siempre tiempo antes tu con ele puede confia otravez. No descanza hace esfuerzo. Nota con el maga bonito cambio na de ustedes matrimonio. Puede ustedes esperanza que si paciencioso ustedes, el de ustedes matrimonio hay queda otravez enbuenamente llega el tiempo.—Ecl. 7:8; 1 Cor. 13:4.

Si ya mira ya tambien pornografia el de tuyu marido despues le evita con este por cuanto tiempo, quierre decir ba de este que nuay le arripinti o nuay mas esperanza el de suyu situacion? Gendeh. Especialmente si addict le na pornografia, posible necesita le continua hace esfuerzo para evita con este na de suyu entero vida. Baka mira le otravez pornografia maskin pa cuanto año ya le ta evita con ese. Para gendeh se sucede, necesita le hace mas grande esfuerzo—posible necesita le esta alerto maskin pa dol ya perde ya el problema. (Prov. 28:14; Mat. 5:29; 1 Cor. 10:12) Necesita le hace ‘cambio na de suyu pensamiento’ y aprende “odia el cosa malo”—incluido aqui el pornografia y el otro pa maga mabuling practica igual na masturbacion. (Ef. 4:23; Sal. 97:10; Roma 12:9) Conforme ba le hace con este maga cosas? Si oo, tiene siempre esperanza el de suyu situacion. e

Pero paquemodo si el de tuyu marido no quierre descanza mira pornografia? Natural lang que sinti tu desmayao, rabiao y dol ya traiciona contigo. Habla el de tuyu maga lingasa con Jehova para puede tu tene paz na pensamiento. (1 Ped. 5:7) Continua queda cerca con Jehova por medio na estudiada, rezo y meditacion. Si hace tu se, puede tu asigura que hay queda tambien le mas cerca contigo. Como cosa ya habla na Isaias 57:15, junto le con aquellos “ta sufri y maga humilde,” y quierre le ayuda kanila queda alegre otravez. Hace esfuerzo que continua fiel sirvi con Jehova. Pidi ayuda na maga anciano y no perde el esperanza que baka na futuro, el de tuyu marido hay hace maga cambio.—Roma 2:4; 2 Ped. 3:9.