1-2. (a) Cosa si Jehova ta sinti acerca con aquellos quien ta sigui comete serioso culpa? (b) Cosa quierre si Jehova que hace aquellos quien ya culpa?

 SI Jehova gendeh un Dios que ta consinti con aquellos quien ta comete serioso culpa. (Sal. 5:4-6) Ta expecta le que sigui kita con el de suyu maga principio que ya dale le kanaton por medio na Biblia. Siempre, gendeh se quierre decir que ta expecta si Jehova que queda perfecto el maga gente. (Sal. 130:3, 4) Pero, gendeh le ta consinti con aquellos quien “ta habla . . . que el . . . Dios ay perdona dao canila por medio del di suyo gran favor masquin cosa el maga pecado que ta comete sila, poreso ta sigui sila peca.” (Jud. 4, El Nuevo Testamento) Gane, ya habla el Biblia que hay “destroza con todo el maga pecador” na guerra del Dios que ta llama Armagedon.—2 Ped. 3:7; Rev. 16:16.

² Pero, no quierre si Jehova que tiene quien hay sale destrozao. Como cosa ya discuti na maga articulo que ya pasa na este serie, el Biblia claro ta habla que “quiere Le que . . . todo ay arripinti.” (2 Ped. 3:9) Igual con Jehova, con paciencia el maga anciano ta pricura ayuda con el quien ya culpa para hace maga cambio y tene otravez buen relacion con Jehova. Maskin pa ansina, el cuanto kanila gendeh ta arripinti. (Isa. 6:9) Sino, ta continua sila comete culpa maskin cuanto beses kanila  ya pricura ayuda el maga anciano. Cosa debe hace el maga anciano si ansina el situacion?

“MANDA SALE . . . CON AQUELLOS TA HACE MALO”

3. (a) Cosa el Biblia ta habla que debe hace con aquellos quien gendeh ta arripinti? (b) Porque kita puede habla que decision del quien ya comete culpa que quita con ele na congregacion?

³ Si no quierre arripinti el un persona, nuay cosa puede hace el maga anciano sino sigui con el direccion que puede le na 1 Corinto 5:13: “Manda sale . . . con aquellos ta hace malo.” Vene cae, el quien ya culpa amo el quien ya iscuji con ese consequencia; ta cosecha lang le con el cosa le ya siembra. (Gal. 6:7) Porque kita se puede habla? Cay maskin pa manada beses ya pricura con ele ayuda el maga anciano, nuay le siempre arripinti. (2 Rey 17:12-15) El cosa le ta hace ta dale mira que ya iscuji le que gendeh sigui con el maga principio de Jehova.—Deut. 30:19, 20.

4. Porque necesita anuncia que ya quita na congregacion con el persona quien nuay arripinti?

⁴ Si ya quita na congregacion con el un persona quien nuay arripinti, ta anuncia na congregacion que gendeh mas le uno del maga Testigo de Jehova. a Porque se necesita hace? Ta hace se gendeh para hace huya con el persona. Sino, para puede sigui el congregacion na direccion del Escritura que “no . . . man junto” con ese persona “maskin para come.” (1 Cor. 5:9-11) Hay beneficia kita si sigui kita con ese direccion. Ya escribi si apostol Pablo: “Un poco lang de levadura necesita para hace alza con el entero masa.” (1 Cor. 5:6) Si gendeh quita con ese persona na congregacion, posible pensa el otro que gendeh tambien sila necesita sigui con el maga principio de Jehova.—Prov. 13:20; 1 Cor. 15:33.

5. Cosa debe el diaton mirada con el persona con quien ya quita na congregacion y porque?

⁵ Entonces, cosa debe el diaton mirada con el un hermano o hermana con quien ya quita na congregacion? Deverasan, gendeh kita ta asocia con ele. Pero, gendeh kita debe mira con ele como un persona quien nuay mas esperanza sino como un perdido carnero. Entonces, tiene posibilidad que puede le bira. Posible se cay ya dedica le el de suyu vida con Jehova. Deveras, nuay le puede cumpli con el cosa le ya promete con Jehova y talli le ahora na peligro. (Eze. 18:31) Maskin pa ansina, mientras tiene pa oportunidad que perdona con ele si Jehova, tiene pa esperanza que ese persona puede bira na congregacion. Paquemodo el maga anciano dale mira que ansina tambien el cosa sila ta esperanza?

EL AYUDA QUE PUEDE DALE EL MAGA ANCIANO

6. Cosa puede hace el maga anciano para ayuda con el persona con quien ya quita na congregacion?

⁶ Si ya quita con el un persona na congregacion, ayuda siempre con ele el maga anciano para puede le bira con Jehova. Paquemodo? Despues informa el committee con el persona que hay quita con ele na congregacion, hay explica sila si cosa le necesita hace para puede bira. Pero gendeh lang se el cosa hace el maga anciano. Mas mucho, hay habla sila con el quien ya culpa que man cuento sila oleh con ele despues del cuanto meses para mira si tiene ba cambio na de suyu pensamiento y conducta. Si conforme le, hay hace esfuerzo el maga anciano para puede man cuento con ele otravez para apela con ele que arripinti y bira. Si por ejemplo nuay le hace maskin cosa cambio, hay man cuento  siempre con ele el maga anciano na otro tiempo para anima con ele que arripinti.

7. Si ya quita con el un persona na congregacion, paquemodo el maga anciano puede imita con el compasion de Jehova? (Jeremias 3:12)

⁷ Ta dale mira compasion si Jehova con aquellos quien ya comete serioso culpa. Por ejemplo, nuay le espera con el nacion de Israel de antes que arripinti antes ayuda kanila. Sino, ele mismo ya hace iniciativo. Como cosa ya discuti na segundo articulo de este serie, ya usa si Jehova con el ejemplo de Oseas para dale mira que tiene gayot Ele compasion na De Suyu maga siervo. Ya habla Le con Oseas que perdona con el de suyu mujer y man birajan sila, maskin pa ta continua siempre le comete culpa. (Os. 3:1; Mal. 3:7) Igual con Jehova, ta pricura el maga anciano dale mira compasion con el persona con quien ya quita na congregacion. Deverasan gayot sila quierre que bira ese persona y gendeh sila ta hace maskin cosa que puede causa para man dificil le hace con ese.—Le con el Jeremias 3:12.

8. Paquemodo el ilustracion de Jesus acerca na perdido anak ta ayuda kanaton para entende si paquemodo de lastimoso si Jehova? (Lucas 15:7)

⁸ El ilustracion de Jesus acerca na perdido anak, que ya discuti na segundo articulo de este serie, puede ayuda kanaton para entende si paquemodo de lastimoso si Jehova. Lejos pa cuando ya mira el tata con el de suyu anak, “ya corre le y ya abraza con su anak y ya besa con ele.” (Luc. 15:20) Nota que nuay espera el tata con el de suyu anak que pidi perdon con ele. Sino, igual na maskin quien amable tata, ele el quien ya hace iniciativo. Ansina tambien el cosa ta pricura dale mira el maga anciano con aquellos con quien ya quita na congregacion. Quierre sila que este maga perdido carnero bira ya con Jehova. (Luc. 15:22-24, 32) Si ya puede bira el un persona na congregacion, asigurao que bien alegre gayot el todo na cielo y el entero congregacion!—Le con el Lucas 15:7.

9. Cosa quierre si Jehova para con aquellos quien ya comete serioso culpa?

⁹ Base na cosa ya kita ya discuti, claro que gendeh ta permiti si Jehova que esta na congregacion aquellos nuay arripinti. Pero, gendeh se quierre decir que ya abandona ya le kanila sino quierre le que bira sila. Puede kita mira na Oseas 14:4 si cosa ta sinti si Jehova con aquellos quien ya arripinti. Este ta habla: “Hay cura yo kanila y gendeh mas sila queda traidor. Con todo voluntad yo ama kanila cay gendeh mas yo rabiao kanila.” Si ansina el cosa ta sinti si Jehova, tiene grande razon el maga anciano que hace dayun accion para ayuda con el persona si ta hace ya le maga cambio que indicacion que ta arripinti ya le. Tiene tambien grande razon aquellos quien ya deja con Jehova que bira ya dayun na congregacion.

10-11. Paquemodo el maga anciano pricura ayuda con aquellos con quien ya quita na congregacion de antes?

¹⁰ Quetal aquellos con quien ya quita na congregacion de antes, posible manada año ya el ya pasa? Baka ya descanza ya sila comete con el culpa diila de antes. El cuanto posible gendeh mas ta acorda si porque kanila ya quita na congregacion. Maskin onde man con ese el situacion del persona, el maga anciano hay pricura busca y visita con ele. Durante na ese maga visitada, puede el maga anciano ofrece que reza junto con el persona y apela con ele que arripinti y bira na congregacion. Si el un persona ya queda lejos na congregacion por largo tiempo, asigurao que bien maluya le na espiritual. Poreso, si quierre le bira na congregacion, el maga anciano hay iscuji un hermano o hermana para man Bible study con ele, maskin nuay pa le bira na congregacion.  Maskin cosa man el circumstancia del persona quien quierre bira, el maga anciano el quien debe decidi si quien man Bible study con ele.

¹¹ Cay ta pricura sila imita con el compasion de Jehova, el maga anciano hay pricura busca y ayuda con aquellos quien ya deja con Jehova para bira na congregacion. Si ya dale mira el un persona que ta arripinti le y ya descanza ya le comete culpa, puede dayun con ele permiti que bira na congregacion.—2 Cor. 2:6-8.

12. (a) Na cosa maga situacion debe queda con cuidao el maga anciano? (b) Porque kita gendeh debe pensa que imposible perdona si Jehova con el cuanto clase de culpa? (Mira tambien con el footnote.)

¹² Na cuanto maga circumstancia, necesita queda con cuidao el maga anciano antes sila permiti con el un persona que bira  na congregacion. Por ejemplo, si el persona ya comete child abuse o ya queda apostata o ya busca manera para termina con el de suyu matrimonio, debe asigura el maga anciano que deverasan le ta arripinti. (Mal. 2:14; 2 Tim. 3:6) Necesita sila protege con el congregacion. Pero, debe tambien kita acorda que hay acepta si Jehova con el un persona maskin cosa pa man el de suyu culpa basta deverasan le ta arripinti y ya descanza comete con ese culpa. Poreso, maskin pa necesita queda con cuidao el maga anciano na cuanto situacion, gendeh sila debe pensa que tiene maga clase de culpa que gendeh perdona si Jehova. b—1 Ped. 2:10.

SI COSA PUEDE HACE EL CONGREGACION

13. (a) Paquemodo debe trata con el un persona quien ya ricibi coreccion? (b) Paquemodo debe trata con el un persona con quien ya quita na congregacion?

¹³ Como cosa ya discuti del ya pasa articulo, si ya anuncia na congregacion que ya ricibi coreccion el un persona, puede siempre kita man junto con ele ciendo sabe kita que ya arripinti le y ya hace maga cambio. (1 Tim. 5:20) Parte siempre le del congregacion y grande ayuda si man junto le con el maga hermano y hermana cay puede sila anima con ele. (Heb. 10:24, 25) Pero otro el situacion si ya quita con el un persona na congregacion. Ta sigui kita con el consejo del Biblia que “no . . . man junto” con ele “maskin para come.”—1 Cor. 5:11.

14. Cosa puede decidi hace el un Cristiano acerca con aquellos con quien ya quita na congregacion? (Mira tambien con el letrato.)

¹⁴ Ese ba quierre decir que hay ignora ya kita completamente con el persona con quien ya quita na congregacion? Gendeh. Siempre, gendeh kita asocia con ele. Pero el un Cristiano puede decidi asegun na de suyu conciencia que harmonia na maga principio del Dios si invita ba le con ese persona para atende na miting. Posible, pariente se de suyu o close le con ese de antes. Paquemodo si ya atende ese persona? De antes, gendeh kita ta hace caso ansina clase de persona. Pero ahora, el cada  individual puede decidi si cosa le hace asegun na de suyu conciencia. El cuanto posible decidi que man greet con el persona o man welcome con ele si atende le. Pero gendeh se quierre decir que puede con ele man cuento por largo tiempo o asocia con ele.

15. Con quien ta refiri el cosa ta menciona na 2 San Juan 9-11? (Mira tambien con el cajon “ Na Igual Culpa Lang Ba Ta Refiri si Juan y si Pablo na Diila Carta?”)

¹⁵ Posible pensa el cuanto que gendeh justo que el un Cristiano man greet con ese clase de persona cay si hace le se, ta participa le na maga mal trabajo de ese persona, como cosa ta habla el 2 San Juan 9-11. (Le.) Pero, el contexto de este ta dale mira que ta refiri se con el maga apostata y con aquellos quien ta influencia con otro para hace si cosa el malo. (Rev. 2:20) Entonces, si el un persona ta enseña maga enseñanza de apostata o ta influencia con otro para hace mal cosas, gendeh con ele visita el maga anciano. Maskin pa ansina, tiene siempre esperanza que hay cambia ese persona. Pero mientras nuay pa se sucede, gendeh kita debe man greet con ese persona ni invita con ele para atende na maga miting.

IMITA CON EL COMPASION Y LASTIMA DE JEHOVA

16-17. (a) Cosa quierre si Jehova que hace aquellos quien ya comete serioso culpa? (Ezequiel 18:32) (b) Paquemodo el maga anciano suporta con el manera de Jehova para ayuda con aquellos quien ya culpa?

¹⁶ Cosa kita ya puede aprende na cinco articulo de este serie? No quierre si Jehova que tiene quien sale destrozao. (Le con el Ezequiel 18:32.) Quierre le que bira con ele aquellos quien ya comete serioso culpa. (2 Cor. 5:20) Ese el razon si porque desde antes, pirmi si Jehova ta pricura ayuda con el de suyu maga siervo quien ya deja con ele para arripinti y bira con ele. Tiene privilegio el maga anciano que suporta con el manera de Jehova para ayuda con aquellos quien ya culpa que arripinti.—Roma 2:4; 1 Cor. 3:9.

¹⁷ Imagina si paquemodo de alegre el todo na cielo si tiene un persona quien ya arripinti! Bien alegre si Jehova, el diaton Tata na cielo, si el uno na de suyu maga perdido carnero ya bira na congregacion. Asigurao que queda mas hondo el diaton amor con Jehova si continua kita medita con el de suyu compasion, lastima y incomparable pagka-bueno.—Luc. 1:78.