1. Paquemodo el un persona dale mira que ta arripinti le?

 SI TA puede kita comete culpa, bien importante que arripinti kita. El Biblia ta habla que ta arripinti el un persona si ta cambia le el de suyu mirada acerca na un conducta, ya descanza ya le hace con ese y determinao gendeh repiti con ese.—Mat. 3:8; Act. 3:19; 2 Ped. 3:9.

2. Porque kita todo necesita aprende acerca na arripintimiento? (Nehemias 8:9-11)

² El todo gente necesita aprende acerca na arripintimiento. Importante se cay todo kita tan kamali cada dia. Como maga descendiente de Adan y Eva, todo kita ya hereda con el pecado y muerte. (Roma 3:23; 5:12) Nuay ni uno kanaton el quien puede habla que gendeh kita ta culpa. Maskin el maga siervo del Dios quien tiene fuerte fe, igual con apostol Pablo, yan dificil tambien por causa con este. (Roma 7:21-24) Debe ba kita pirmi sinti miserable por causa na diaton maga culpa? Gendeh. Lastimoso si Jehova y quierre le que queda kita alegre. Considera con el ejemplo del maga Judio na tiempo de Nehemias. (Le con el Nehemias 8:9-11.) No quierre si Jehova que queda sobra de triste el maga Judio por causa na diila maga culpa de antes. Sino, quierre le que adora sila con ele con alegria. Sabe le que el arripintimiento puede ayuda para queda alegre el maga gente. Amo se el razon si porque le ya enseña kanaton acerca na arripintimiento. Si arripinti kita, puede kita asigura que hay perdona kanaton el diaton lastimoso Tata.

3. Cosa kita considera na este articulo?

³ Para aprende mas acerca na arripintimiento, considera kita tres cosas na este articulo. Una, sabe kita si cosa ya enseña si Jehova na nacion de Israel acerca na arripintimiento. Despues, hay discuti kita si cosa ya hace si Jehova para ayuda  con el maga ya comete serioso culpa que arripinti. Na ultimo, hay considera kita si cosa ya aprende el maga siguidores de Jesus acerca na arripintimiento.

SI COSA YA ENSEÑA SI JEHOVA NA NACION DE ISRAEL ACERCA NA ARRIPINTIMIENTO

4. Cosa ya enseña si Jehova na nacion de Israel acerca na arripintimiento?

⁴ Cuando ya hace un nacion si Jehova con el maga Israelita, ya hace le un contrata kanila. Ya habla le que si continua sila sigui con el de suyu maga ley, hay protege le y bendici kanila. Acerca con ese maga ley, ya dale le asiguranza kanila: “Este mandamiento que ya dale yo con ustedes ahora gendeh bien dificil para con ustedes y gendeh tambien este lejos con ustedes.” (Deut. 30:11, 16) Pero si desobedece sila con ele o si adora sila na otro maga dios, gendeh mas le bendici kanila y hay sufri sila. Pero maskin pa sucede se, puede sila otravez tene el favor del Dios si ‘bira sila con Jehova, el diila Dios y oi con el de suyu voz.’ (Deut. 30:1-3, 17-20) Entonces si arripinti sila, hay queda cerca kanila si Jehova y hay bendici le otravez kanila.

5. Porque kita puede habla que nuay descanza ayuda si Jehova con el maga Israelita? (2 Rey 17:13, 14)

⁵ El iscujido nacion de Jehova manada beses yan rebelde con ele. Puera que ya adora sila maga dios-dios, ya hace tambien sila maga maka-asco cosas. Como resulta, ya sufri sila. Pero nuay descanza ayuda kanila si Jehova maskin pa maga duro cabeza sila. Gane, manada beses le ya imbia maga profeta para anima kanila que arripinti y bira con ele.—Le con el 2 Rey 17:13, 14.

6. Paquemodo ya usa si Jehova con el de suyu maga profeta para enseña con el de suyu maga siervo que debe sila arripinti? (Mira tambien con el letrato.)

⁶ Ya usa si Jehova con el de suyu maga profeta para dale aviso y corecta con el de suyu maga siervo. Por ejemplo, por medio con Jeremias, el Dios ya habla: “Bira, O rebelloso nacion de Israel . . . Gendeh mas yo rabiao con ustedes cay leal yo . . . Gendeh yo tene agrabio con ustedes hasta para cuando. Admiti lang que ya culpa ustedes, cay yan rebelde  ustedes contra con Jehova.” (Jer. 3:12, 13) Por medio con Joel, si Jehova ya habla: “Bira conmigo con todo el de ustedes corazon.” (Joel 2:12, 13) Por medio con Isaias, ya declara Le: “Limpia de ustedes mismo cuerpo; quita na de mio presencia el de ustedes maga mal trabajo; descanza hace cosas malo.” (Isa. 1:16-19) Y por medio con Ezequiel, ya pregunta si Jehova: “Alegre ba yo si muri el un gente malo? . . . Gendeh ba mas quierre yo si arripinti le y continua vivi? Gendeh yo alegre na muerte del maskin quien . . . poreso, bira ustedes y vivi.” (Eze. 18:23, 32) Alegre mira si Jehova si ta arripinti el maga gente cay quierre le que continua sila vivi, gendeh lang ahora sino hasta para cuando! Poreso, antes pa arripinti el un persona, ta ayuda ya con ele si Jehova. Mira pa kita otro maga ejemplo de este.

7. Por medio na ejemplo de profeta Oseas y de suyu mujer, cosa ya enseña si Jehova con el de suyu maga siervo?

⁷ Nota si cosa ya enseña si Jehova con el de suyu maga siervo por medio con Gomer, el mujer de profeta Oseas. Despues comete adulterio, ya deja le con Oseas y ya sigui na otro maga hombre. Imposible ya ba con ele puede ayuda? Ta puede le si Jehova con el corazon y ya habla le con Oseas: “Ama otravez con el mujer con quien ta ama el otro hombre y ta comete adulterio, igual si paquemodo si Jehova ta ama con el maga Israelita maskin pa ta adora sila na otro maga dios.” (Os. 3:1; Prov. 16:2) Nota que el mujer de Oseas ta comete siempre un serioso culpa. Pero, ya habla si Jehova con Oseas que anda con el de suyu mujer, perdona y man birajan sila. a Na igual manera, nuay abandona si Jehova con el de suyu maga siervo maskin duro cabeza sila. Maskin ta continua pa sila hace maga mal trabajo, ta ama siempre le kanila y gendeh ta descanza pricura ayuda kanila para arripinti y cambia el diila manera de vida. Este ba quierre decir que si Jehova, “el quien ta examina con el maga corazon,” hay ayuda con el un persona para arripinti maskin ta comete siempre le serioso culpa? (Prov. 17:3) Mira kita.

SI PAQUEMODO SI JEHOVA TA AYUDA CON EL MAGA GENTE PARA ARRIPINTI

8. Cosa ya hace si Jehova para ayuda con Cain que arripinti? (Genesis 4:3-7) (Mira tambien con el letrato.)

⁸ El primer anak de Adan y Eva amo si Cain. Ya hereda le na de suyu mayores el tendencia que hace cosa malo. Mas pa, el Biblia ya habla acerca con ele: “El disuyo maga trabajo malo.” (1 Juan 3:12) Posible, amo se el razon si porque “nuay [si Jehova] gusta con Cain ni con el de suyu ofrecimiento.” En vez de cambia el de suyu conducta, “si Cain ya queda bien rabiao y consumido.” Cosa sunod ya hace si Jehova? Ya converza le con Cain. (Le con el Genesis 4:3-7.) Nota que ya pricura con ele ayuda si Jehova. Ya dale con ele oportunidad el Dios para cambia y ya habla con ele si cosa el resulta si comete le culpa. Pero maka-triste, nuay oi si Cain. Nuay le permiti con Jehova que ayuda con ele para arripinti. Despues quel suceso, ya descanza ya ba si Jehova ayuda con el otro maga pecador para arripinti? Nuay gayot!

9. Cosa ya hace si Jehova para ayuda con David que arripinti?

⁹ Ta ama gayot si Jehova con Rey David. Gane, ya habla Le, “ya gusta gayot yo con ele.” (Act. 13:22) Pero ya queda envuelto si David na maga serioso culpa. Ya comete le adulterio y matanza. Base na Ley de Moises,  conviene con ele mata. (Lev. 20:10; Num. 35:31) Pero tiene cosa ya hace si Jehova para ayuda con David. b Maskin nuay pa le arripinti, ya imbia si Jehova con profeta Natan para visita con ele. Ya usa ilustracion si Natan para ayuda con ele entende si paquemodo de serioso el de suyu culpa. Ya alcanza se na corazon de David y ya arripinti le. (2 Sam. 12:1-14) Claro se puede mira na salmo que ya escribi le. (Sal. 51, superscripcion) Ese salmo ya dale comforta con el manada individual quien ya comete serioso culpa y ya manda se move kanila para arripinti.

10. Cosa tu ta sinti cay paciencioso y ta perdona kanaton si Jehova?

¹⁰ No quierre si Jehova con el todo clase de pecado y gendeh le ta consinti con ese. (Sal. 5:4, 5) Pero, sabe le que pecador kita todo y por causa na de suyu amor, quierre le que ayuda kanaton ganá contra na pecado. Pirmi le ta pricura ayuda maskin con aquellos quien ya comete bien serioso culpa para arripinti y queda cerca con ele. Ta dale gayot kanaton comforta cay ansina el diaton Dios! Si ta pensa kita acerca na paciencia y perdon de Jehova, mas determinao kita esta fiel con ele y arripinti dayun si ya culpa kita. Hay considera kita ahora si cosa ya enseña si Jesus na de suyu maga dicipulo acerca na arripintimiento.

SI COSA YA APRENDE EL MAGA SIGUIDORES DE JESUS ACERCA NA ARRIPINTIMIENTO

11-12. Paquemodo ya enseña si Jesus que bien quierre perdona si Jehova con el maga gente? (Mira con el letrato.)

¹¹ Del primer siglo C.E., ya usa si Jehova con Juan Bautista y con Jesucristo para enseña con el maga gente si paquemodo de importante que arripinti.—Mat. 3:1, 2; 4:17.

¹² Na entero ministerio de Jesus, ya enseña le que bien quierre perdona si Jehova con el maga gente. Por ejemplo, ya enseña le con ese importante leccion cuando ya relata le el istoria acerca na perdido anak. Este joven hombre ya iscuji hace maga mal cosas por cuanto tiempo. Pero, ya realiza le que gendeh justo el  cosa le ya hace y ya bira na diila casa. Cosa ya hace el tata? Si Jesus ya habla que “cuando lejos pa [el anak], su tata ya puede mira con ele y su corazon ya llena de lastima. Ya corre le y ya abraza con su anak y ya besa con ele.” Quierre lang era este anak que queda ayudante na casa del de suyu tata. Pero el de suyu tata ya llama con ele “dimio anak hombre” y ya acepta otravez con ele na familia. El tata ya habla: “Estaba . . . perdido [le] y ya encontra con ele.” (Luc. 15:11-32) Cuando nuay pa vene si Jesus na tierra, asigurao ya puede le mira si paquemodo ya dale mira compasion el de suyu Tata con el bien manada gente quien ya arripinti. Este istoria acerca na perdido anak ta dale mira si paquemodo de lastimoso el diaton Tata, si Jehova!

13-14. Cosa ya aprende si apostol Pedro acerca na arripintimiento y cosa le ya enseña con otro acerca con ese? (Mira tambien con el letrato.)

¹³ Ya aprende si apostol Pedro maga importante leccion acerca na arripintimiento y perdon. Manada kamali ya puede hace si Pedro pero ya perdona con ele si Jesus. Por ejemplo, cuando ya desconoce le tres beses con el de suyu Señor, ya queda gayot le bien triste. (Mat. 26:34, 35, 69-75) Pero despues resucita si Jesus, ya aparece le con Pedro na privado. (Luc. 24:33, 34; 1 Cor. 15:3-5) Asigurao na aquel tiempo, ya asigura si Jesus con este apostol que ya perdona ya le con este.—Mira con el Marcos 16:7 y el study note “and Peter.”

¹⁴ Cay ya experiencia le mismo con este, puede enseña si Pedro con otro acerca na arripintimiento y perdon. Cuanto tiempo despues del fiesta de Pentecostes, ya explica si Pedro con el un grupo de maga Judio que ya mata sila con el Mesias. Pero, amable le ya anima kanila: “Arripinti ustedes y cambia el de ustedes corazon [para] el de ustedes maga pecado ay perdona y para el Señor ay imvia el Tiempo de Consuelo.” (Act. 3:14, 15, 17, 19)  Ya enseña si Pedro que si ta arripinti el un persona, ta cambia le con el de suyu gendeh justo pensamiento y accion, y despues, ta principia hace si cosa quierre el Dios. Ya menciona tambien el apostol que completamente perdona si Jehova con el diila maga culpa que dol borra Le con este. Cuanto decada despues, si Pedro ya asigura con el maga Cristiano: “Ta hace [si Jehova] paciencia con ustedes, cay quiere Le que noay ni uno quien ay perde, sino todo ay arripinti.” (2 Ped. 3:9) Ta dale gayot este comforta con el maga Cristiano si ya comete sila culpa, maskin serioso pa este!

15-16. (a) Paquemodo si apostol Pablo ya aprende acerca na perdon? (1 Timoteo 1:12-15) (b) Cosa kita hay discuti na sunod articulo?

¹⁵ Manada maga mal cosas ya hace si Saul de Tarso. Ya persigui gayot le con el maga siguidores de Jesus. Por causa con ese, posible mayoria del maga Cristiano ya pensa que nunca le cambia. Pero, gendeh ansina el mirada de Jesus con Saul. Ele y el de suyu Tata ya mira con el maga buen calidad de Saul. Si Jesus ya habla: “Este amo el gente ya escuji yo como instrumento.” (Act. 9:15) Por medio na un milagro, ya ayuda si Jesus con Saul para arripinti. (Act. 7:58–8:3; 9:1-9, 17-20) Na uliji, ya llama con ele apostol Pablo. Despues queda un Cristiano, manada beses le ya menciona con el de suyu apresacion na pagka-bueno y lastima que ya dale mira con ele. (Le con el 1 Timoteo 1:12-15.) Gane, ya enseña si apostol Pablo con el maga hermano y hermana: “Ese lastima del Dios ta imvita [con ustedes] para arripinti.”—Roma 2:4.

¹⁶ Na un ocasion, ya puede oi si Pablo que tiene un serioso problema na congregacion de Corinto acerca na imoralidad. Cosa ya habla si Pablo que debe sila hace? Na cosa le ya habla, puede kita aprende acerca na amable disciplina de Jehova y si paquemodo de importante que dale mira lastima con aquellos ya arripinti. Hay discuti kita mas acerca con ese suceso na sunod articulo.