ARTICULO 31
CANCION 12 Great God, Jehovah
Si Cosa Ya Hace si Jehova Para Salva con el Maga Gente
“Cay ansina gayot de grande el amor del Dios para con el mundo: que ya dale Le su Unico Anak.”—JUAN 3:16.
SI COSA PUEDE APRENDE
Si cosa esfuerzo ya hace si Jehova para ayuda kanaton ganá contra na pecado y si paquemodo le ya hace posible para tene kita esperanza que vivi hasta para cuando.
1-2. (a) Cosa el pecado y paquemodo kita ganá contra con ese? (Mira tambien con el “Si Cosa Quierre Decir.”) (b) Cosa kita hay discuti na este articulo y na otro pa maga articulo na este issue del El Torre de Guardia? (Mira tambien con el “Omento Informacion” na este issue.)
QUIERRE ba tu sabe si paquemodo de grande el amor de Dios Jehova para contigo? Puede tu sabe el contestacion si estudia tu si cosa le ya hace para salva contigo na pecado y muerte. El pecado a amo igual na un contrario que gendeh tu puede ganá si etu lang solo. Todo gente tiene pecado y por causa con ese, ta muri kita. (Roma 5:12) Mas pa, tan kamali tambien kita cada dia. Pero alegre kita cay si Jehova puede gayot kanaton ayuda para ganá kita contra na pecado. Puede le kanaton salva na pecado y muerte!
2 Maga 6,000 año ya ta ayuda si Jehova con el maga gente para ganá contra na pecado. Porque le se ta hace? Cay ta ama le kanaton. Nuay cambia el de suyu amor para kanaton desde na principio y ya hace le manera para ayuda kanaton. Sabe le que muerte el resulta del pecado. No quierre le que muri kita sino quierre le que vivi kita hasta para cuando. (Roma 6:23) Ese el cosa le quierre para contigo. Na este articulo, hay discuti kita con el tres pregunta: (1) Cosa esperanza ya dale si Jehova para na maga imperfecto gente? (2) Paquemodo el maga imperfecto gente na tiempo del Biblia ya puede obtene el favor de Jehova? (3) Cosa ya hace si Jesus para salva con el maga gente?
COSA ESPERANZA YA DALE SI JEHOVA PARA NA MAGA IMPERFECTO GENTE?
3. Porque ya comete pecado el diaton primer mayores?
3 Cuando ya crea si Jehova con el primer hombre y mujer, quierre le que queda sila alegre. Por causa con ese, ya dale le kanila un bonito lugar para onde queda, el regalo de matrimonio y un bonito assignment. Proposito de suyu que tene sila maga anak hasta llena el entero tierra y hace con este un paraiso igual na jardin de Eden. Pero tiene lang un simple cosa que ya habla kanila el Dios que no hace. Ya habla le que si gendeh sila obedece con el cosa le ya manda, hay muri sila. Pero sabe ya kita si cosa ya sucede. Tiene un espiritu creatura quien ya entra na ecsena. Nuay le amor para con Dios y para kanila. Ya influencia le con Adan y Eva para comete serioso culpa. En vez confia con Jehova como el diila amable Tata, ya iscuji sila desobedece con ele. Como cosa kita sabe, ya sucede gayot el cosa ya habla kanila si Jehova. Desde aquel tiempo, ya cosecha sila con el consequencia del diila pecado. Ya queda sila de edad y na uliji, ya muri.—Gen. 1:28, 29; 2:8, 9, 16-18; 3:1-6, 17-19, 24; 5:5.
4. (a) Porque si Jehova ta odia con el pecado? (b) Porque el Dios quierre ayuda kanaton que ganá contra na pecado? (Roma 8:20, 21)
4 Ya manda si Jehova escribi con ese maka-triste istoria na Biblia para puede kita entende si porque le ta odia gayot con el pecado. El pecado ta hace kanaton lejos con Jehova y muerte el resulta de ese. (Isa. 59:2) Ese el razon si porque si Satanas ta continua engaña con el maga gente hasta ahora para comete pecado. Pensaba le ya puede le sangga con el proposito de Jehova por causa na cosa le ya hace na Eden. Alli le yan kamali! Un amable Tata si Jehova y nuay cambia el de suyu proposito para na maga anak de Adan y Eva. Ta ama le con el maga gente poreso ya dale le dayun kanila esperanza. (Le con el Roma 8:20, 21, NWT.) Ta confia si Jehova que el cuanto kanila hay iscuji ama con ele y acepta con el de suyu ayuda para ganá sila contra na pecado. Como el diila Tata y Creador, ya hace le manera para queda sila librao na pecado y tene buen relacion con ele. Paquemodo?
5. Cuando si Jehova ya dale idea que tiene esperanza el maga imperfecto gente? Explica. (Genesis 3:15)
5 Le con el Genesis 3:15. El maga palabra de Jehova cuando ya sentencia le con Satanas ya dale kanaton idea que tiene esperanza el maga gente. Ya predicta el Dios que tiene un “descendiente” quien hace posible con ese esperanza. Na uliji, ese descendiente hay machaca con Satanas. Por medio con ese, hay puede compone con el todo problema que ya causa si Satanas. (1 Juan 3:8) Pero para cumpli se, hay experiencia sufrimiento ese descendiente. Si Satanas hay hace iri con el descendiente que hay causa de este muerte. Hay sinti gayot duele si Jehova por causa con ese. Pero conforme le se experiencia para lang salva con el maga gente na pecado y muerte.
PAQUEMODO AQUELLOS NA TIEMPO DEL BIBLIA YA OBTENE EL FAVOR DE JEHOVA?
6. Cosa ya hace el cuanto, igual con Abel y Noe, para tene buen relacion con Jehova?
6 Adentro na manada siglo, hinay-hinay ya hace claro si Jehova si paquemodo el maga imperfecto gente puede tene buen relacion con ele. Despues del cosa ya sucede na Eden, el ika-dos anak de Adan y Eva que si Abel amo el primer gente quien ya demonstra fe con Jehova. Por causa cay ta ama le con Jehova y quierre tene buen relacion con Ele, ya ofrece le un sacrificio. Como un pastor, ya mata le cuanto maga carnero y ya ofrece se con Jehova. Cosa ya sinti si Jehova na cosa le ya hace? “Ya gusta si Jehova con Abel y con el de suyu ofrecimiento.” (Gen. 4:4) Ya gusta tambien si Jehova con el maga ofrecimiento que ya hace aquellos quien ta ama y ta confia con ele igual con Noe. (Gen. 8:20, 21) Por medio con ese, ya dale mira si Jehova que el maga imperfecto gente puede obtene con el de suyu favor y puede tene buen relacion con ele. b
7. Cosa kita puede aprende na cosa conforme hace si Abraham?
7 Si Abraham amo un siervo del Dios quien tiene fuerte fe. Ya pidi con ele si Jehova que hace un cosa que bien dificil—sacrificia con el de suyu mismo anak, si Isaac. Asigurao que ya sinti si Abraham que amo quel el de con todo duele cosa que hace le na de suyu entero vida. Maskin pa ansina, conforme le hace con ese. Pero cuando para hace ya le se, ya sangga con ele si Jehova. No quierre Le que experiencia si Abraham ese clase de dolor. Pero puede kita aprende un bien importante verdad na cosa ya hace si Abraham: Conforme si Jehova sacrificia con el de suyu unico Anak. Ansina de grande el amor de Jehova para na maga gente.—Gen. 22:1-18.
8. Cosa ta dale mira el maga sacrificio que ya hace el maga Israelita bajo na Ley? (Levitico 4:27-29; 17:11)
8 Manada siglo despues de ese, ya dale Ley si Jehova con el nacion de Israel. Bajo na ese Ley, necesita sila ofrece maga sacrificio para tapa con el diila maga pecado. (Le con el Levitico 4:27-29; 17:11.) Ese maga sacrificio que ya hace sila ta dale mira que llega el tiempo, hay tene mas buen clase de sacrificio que hay salva completamente con el maga gente na pecado. Por medio na guia del Dios, ya explica el maga profeta que experiencia sufrimiento y hay mata con el descendiente que ya promete le. Hay queda le igual na un carnero que ta sacrificia como un ofrecimiento. (Isa. 53:1-12) Pensa tu este: Ya promete si Jehova que hay sacrificia le con el de suyu unico Anak para salva con el maga gente na pecado y muerte—incluido ya tu!
COSA YA HACE SI JESUS PARA SALVA CON EL MAGA GENTE?
9. Cosa si Juan Bautista ya habla acerca con Jesus? (Maga Hebreo 9:22; 10:1-4, 12)
9 Del primer siglo C.E., cuando ya mira si Juan Bautista con Jesus de Nazaret, ya habla le: “Mira ustedes, taqui el Cordero del Dios que ta quita el pecado del mundo.” (Juan 1:29) Ese maga palabra ta dale mira que si Jesus amo el descendiente que ya predicta por largo tiempo ya. Hay ofrece le con el de suyu mismo vida como un sacrificio. Mas claro ya gayot na ese tiempo que tiene esperanza el maga imperfecto gente—hay queda ya sila librao na pecado.—Le con el Maga Hebreo 9:22; 10:1-4, 12.
10. Paquemodo ya dale mira si Jesus que ya vene le para ayuda con el maga pecador?
10 Ya dale tiempo si Jesus para ayuda con el maga gente, especialmente con aquellos quien tan conciencia por causa na diila maga culpa. Gane, ya invita le kanila para queda de suyu maga siguidores. Sabe le que el pecado amo el deverasan razon si porque el maga gente ta sufri. Poreso, ya pricura le ayuda con aquellos quien conocido como maga pecador. Por medio na un ilustracion, ya explica le: “El gente bueno el cuerpo gendeh necesita con el doctor, sino el gente emfermo.” Acabar, ya habla le: “Noay yo vene para llama con el maga noay culpa, sino con el maga pecador.” (Mat. 9:12, 13) Amo gayot se el cosa le ya hace! Ya converza le na amable manera y ya perdona con el maga culpa del mujer quien ya limpia de luha con el de suyu pies. (Luc. 7:37-50) Nuay le man alang-alang predica con el un Samaritana na pozo maskin pa sabe le que imoral este mujer. (Juan 4:7, 17-19, 25, 26) Mas pa, ya dale el Dios poder con Jesus para resucita con el maga gente—hombre, mujer, bata y adulto.—Mat. 11:5.
11. Porque el maga pecador comfortable atraca con Jesus?
11 Ya dale mira si Jesus compasion y empatia maskin con aquellos quien ta hace maga mal cosas. Poreso, gendeh maka-estraña que comfortable sila atraca con ele. (Luc. 15:1, 2) Ya comenda le y ya premia con aquellos quien ya demonstra fe con ele. (Luc. 19:1-10) Por medio na de suyu perfecto ejemplo, ya dale le mira si paquemodo de lastimoso el de suyu Tata. (Juan 14:9) Por medio na palabra y accion, ya dale le mira que el de suyu lastimoso Tata ta ama con el maga gente y quierre ayuda kanila para ganá contra na pecado. Ya ayuda si Jesus con el maga imperfecto gente para cambia con el diila manera de vida y queda de suyu siguidores.—Luc. 5:27, 28.
12. Cosa si Jesus ya habla acerca na de suyu muerte?
12 Sabe si Jesus si cosa pasa con ele. Gendeh lang le una vez ya habla con el de suyu maga siguidores que hay traiciona con ele y muri le na un estaca. (Mat. 17:22; 20:18, 19) Maskin pa ansina, con animo le ya enfrenta con el de suyu muerte. (Juan 10: 17, 18) Sabe le que el de suyu sacrificio hay quita con el pecado del mundo, como cosa ya habla si Juan y el maga profeta. Y ya habla tambien si Jesus que despues le sacrificia con el de suyu vida, “ay causa [le] con todo el maga gente para atraca” con ele. (Juan 12:32, El Nuevo Testamento) El maga imperfecto gente puede hace alegre con Jehova si acepta sila con Jesus como el diila Señor y sigui con el de suyu ejemplo. Si hace sila se, hay queda sila librao na pecado.—Juan 8:32; Roma 6:14, 18, 22.
13. (a) Cosa ya sucede antes muri si Jesus? (b) Cosa ta enseña kanaton el muerte de Jesus acerca con Dios Jehova? (Mira tambien con el letrato.)
13 Ya traiciona con Jesus, ya arresta, ya ultraja, ya acusa, ya sentencia y ya manda sufri. Acabar, ya lleva con ele el maga soldao na lugar onde mata con ele y ya clava con ele na un estaca. Mientras ta aguanta le con el todo dolor, tiene pa otro quien ta sufri mas pa que con ele—si Dios Jehova. Nuay limitacion el poder de Jehova pero ya aguanta le y nuay usa con ese para sangga con el cosa ya sucede. Porque le se ya hace? Cosa ya manda move con el un amable Tata para deja muri con el de suyu Anak? Amor—amor para kanaton. Si Jesus ya habla: “Cay ansina gayot de grande el amor del Dios para con el mundo: que ya dale Le su Unico Anak para todo quien ta cree con Ele gendeh ay muri, sino ay tene Vida hasta para cuando.”—Juan 3:16.
Cuando ya permiti le que muri el de suyu Anak, ya aguanta si Jehova con el de con todo grabe dolor para libra kanaton na pecado y muerte (Mira con el parapo 13)
14. Cosa el sacrificio de Jesus ta dale mira contigo?
14 El sacrificio de Jesus amo el de con todo grande prueba que ta ama gayot si Jehova con el maga descendiente de Adan y Eva. Ta dale se mira si paquemodo de hondo el amor de Jehova para contigo. Bien grande el cosa le ya sacrificia y conforme le aguanta con el de con todo grabe dolor para salva contigo na pecado y muerte. (1 Juan 4:9, 10) Claro que quierre le ayuda con el cada uno kanaton para ganá contra na pecado!
15. Cosa kita debe hace para beneficia na rescate de Jesus?
15 El regalo del Dios, el rescate, ya hace posible para perdona con el diaton maga pecado. Pero para ricibi con el perdon del Dios, cosa kita debe hace? Puede kita sabe el contestacion na cosa ya habla si Juan Bautista y si Jesucristo mismo: “Arripinti ustedes cay el Reino del Cielo cerca ya.” (Mat. 3:1, 2; 4:17) Poreso si quierre gayot kita ganá contra na pecado y tene buen relacion con el diaton amable Tata, importante que arripinti kita. Pero cosa quierre decir que arripinti y paquemodo se puede ayuda kanaton para sirvi con Jehova maskin maga pecador kita? Hay contesta con ese el sunod articulo.
CANCION 18 Ta Aprecia Kame el Rescate
a SI COSA QUIERRE DECIR: El palabra “pecado” que ya menciona na Biblia puede refiri na mal conducta que donde el un persona nuay vivi o actua harmonia na maga principio de Jehova na moral. Pero puede tambien se refiri na imperfeccion que ya hereda kita con Adan. Ese el razon si porque kita todo ta muri.
