1. Cosa posible ta sucede con el cuanto quien ya comete serioso culpa?

 DEL ya pasa articulo, ya puede kita aprende si cosa direccion ya dale si apostol Pablo acerca si cosa hace con el quien ya comete serioso culpa na congregacion de Corinto. Cay nuay arripinti aquel persona, ya quita con ele na congregacion. Pero como cosa ta dale mira el texto donde yan base el tema de este articulo, puede ayuda con el cuanto quien ya comete serioso culpa para arripinti. (Roma 2:4) Paquemodo el maga anciano ayuda kanila para arripinti?

2-3. Cosa kita debe hace si ya sabe kita que el un hermano o hermana ya comete serioso culpa y porque kita se hace?

² Si no sabe el maga anciano que el un persona ya comete serioso culpa, gendeh sila puede ayuda con ele. Poreso, si ya sabe kita que el un hermano o hermana ya comete un serioso culpa, cosa kita debe hace? Debe kita anima con ele que atraca na maga anciano para pidi ayuda.—Isa. 1:18; Act. 20:28; 1 Ped. 5:2.

³ Paquemodo si no quierre le atraca na maga anciano? Si ansina, kita mismo avisa na maga anciano para puede asigura que puede ayuda con aquel persona. Si ta hace kita se, ta dale kita mira amor con ele cay quierre kita que continua le queda diaton hermano o hermana. Si continua le comete serioso culpa, mas queda malo el de suyu relacion con Jehova. Posible tambien que queda malo el reputacion del congregacion. Poreso, con animo kita hace el cosa necesita por causa na diaton amor con Jehova y con el quien ya comete culpa.—Sal. 27:14.

 SI PAQUEMODO EL MAGA ANCIANO AYUDA CON EL QUIEN YA COMETE SERIOSO CULPA

4. Cosa hay pricura hace el maga anciano con el quien ya comete serioso culpa?

⁴ Si tiene quien ya comete serioso culpa, el maga anciano hay iscuji tres cualificao hermano para sirvi como un committee. a Debe modesto y humilde ese maga hermano. Hay pricura ayuda el committee con el quien ya culpa para arripinti. Pero sabe sila que gendeh sila puede forza con ele para cambia. (Deut. 30:19) Sabe tambien sila que gendeh todo hay arripinti igual con Rey David. (2 Sam. 12:13) Posible que el cuanto kanila gendeh oi con el consejo que estaba con Jehova. (Gen. 4:6-8) Maskin pa ansina, el maga anciano hay hace esfuerzo para ayuda con ele arripinti. Cosa maga principio debe acorda el maga anciano si man cuento sila con el quien ya culpa?

5. Cosa maga calidad debe dale mira el maga anciano si man cuento sila con el quien ya comete serioso culpa? (2 Timoteo 2:24-26) (Mira tambien con el letrato.)

⁵ Ta mira el maga anciano con el quien ya comete serioso culpa como un precioso carnero quien ya perde. (Luc. 15:4, 6) Poreso, si man cuento sila con ese persona, gendeh sila hace sinti duele con ele na diila palabra y tratamiento. Gendeh tambien sila pensa que dol ta sigui lang sila un proceso na ese tiempo. Sino, hay dale sila mira con el maga calidad que puede le na 2 Timoteo 2:24-26. (Le.) Hay esta sila amable y calmao mientras ta pricura alcanza el corazon del persona.

6. Paquemodo el maga anciano prepara con el diila corazon antes sila man cuento con el quien ya culpa? (Roma 2:4)

⁶ El maga anciano ta prepara con el diila corazon. Ta pricura sila imita con Jehova na manera si paquemodo sila ta converza y ta trata con el quien ya culpa. Ta acorda sila con el maga palabra de Pablo acerca con Jehova: “El disuyo grande lastima . . . ta imvita contigo para arripinti.” (Le con el Roma 2:4.) Gendeh tambien sila ta ulvida que maga pastor sila quien necesita sigui con el direccion del Cristo. (Isa. 11:3, 4; Mat. 18:18-20) Antes man cuento con el quien ya culpa, el committee hay pidi el ayuda de Jehova para puede sila ayuda con el persona que arripinti. Hay busca sila maga texto, man research na diaton maga publicacion y pidi ayuda con Jehova para puede sila entende con el situacion del persona. Hay considera sila si cosa informacion sila necesita sabe acerca con ele que posible ya causa para pensa le y actua na aquel manera.—Prov. 20:5.

7-8. Paquemodo el maga anciano puede imita con el paciencia de Jehova si man cuento sila con el quien ya culpa?

 ⁷ Ta imita el maga anciano con el paciencia de Jehova. Pirmi sila ta acorda si paquemodo si Jehova ya trata con aquellos quien ya comete serioso culpa de antes. Por ejemplo, con paciencia si Jehova yan cuento con Cain y ya habla con ele si cosa el consequencia si comete le culpa y si cosa el resulta si obedece le. (Gen. 4:6, 7) Ya usa si Jehova con profeta Natan para conseja con David. Ya hace se si Natan por medio na un ilustracion que ya ayuda con el rey para arripinti. (2 Sam. 12:1-7) Y ya “continua [si Jehova] imbia” con el de suyu maga profeta para ayuda con el maga desobediente Israelita. (Jer. 7:24, 25) Nuay le espera que arripinti el de suyu maga siervo antes le ayuda kanila. Sino, ele mismo ya hace iniciativo para ayuda kanila que arripinti.

⁸ Ta imita el maga anciano con el ejemplo de Jehova na manera si paquemodo sila ta ayuda con aquellos quien ya comete serioso culpa. “Con paciencia” sila ta trata con el quien ya culpa, como cosa ta habla el 2 Timoteo 4:2. Poreso, necesita pirmi calmao y paciencioso el un anciano para puede le ayuda con el persona hace si cosa el justo. Si hay queda le rabiao o consumido, posible que gendeh oi el persona con el consejo y gendeh arripinti.

9-10. Paquemodo el maga anciano puede ayuda con el quien ya culpa para realiza que gendeh justo el cosa le ya hace?

⁹ Hay pricura determina el maga anciano si cosa posible el maga causa si porque el persona ya culpa. Por ejemplo, ya queda ba maluya el de suyu espiritualidad cay gendeh mas le ta estudia con el Biblia o ta sale na ministerio? Ralo ya lang ba le ta reza con Jehova y gendeh mas con todo corazon? Nuay mas ba le hace esfuerzo para resisti con el de suyu mal deseo? Con quien le ta iscuji man junto? Cosa clase de entretenimiento le ta iscuji? Paquemodo ese maga cosas ya afecta con el de suyu pensamiento y deseo? Sabe ba le si cosa si Jehova ta sinti na de suyu maga decision y accion?

¹⁰ El maga anciano puede usa maga pregunta que puede ayuda con ele para pensa acerca na cosa le ya hace. Pero, gendeh este quierre decir que puede sila pregunta maga privado cosas que gendeh sila necesita sabe. (Prov. 20:5) Mas pa, igual con Natan, puede sila usa maga ilustracion que puede ayuda con el persona para realiza que gendeh justo el cosa le ya hace. Posible que na primer miting pa lang, hay sinti le triste acerca na maga decision que ya hace le y baka arripinti pa gane le.

11. Cosa ya hace si Jesus con aquellos quien ya comete serioso culpa?

¹¹ Ta pricura el maga anciano imita con Jesus. Para ayuda con Saul de Tarso, ya pregunta si Jesus con ele: “Saul, Saul, por que man tu ta persigui Conmigo?” Por medio con este pregunta, ya ayuda si Jesus con ele para realiza que gendeh justo el cosa le ta hace. (Act. 9:3-6) Acerca con “Jesabel” que ya menciona na Revelacion, ya habla si Jesus: “Ya dale . . . yo tiempo con ele para arripinti.”—Rev. 2:20, 21.

12-13. Paquemodo el maga anciano dale tiempo con el quien ya comete culpa para arripinti? (Mira tambien con el letrato.)

¹² Igual con Jesus, gendeh dayun-dayun ta pensa el maga anciano que gendeh gayot arripinti el quien ya culpa. Posible que hay arripinti el cuanto na primer miting pa lang junto con el committee. Pero baka necesita mas tiempo el otro. Poreso, posible man schedule el maga anciano que man miting con ele gendeh lang una vez. Tiene posibilidad que despues del primer miting, el quien ya culpa hay pensa enbuenamente acerca con el cosa con ele ya habla. Despues, baka  atraca le con Jehova por medio na rezo para pidi perdon. (Sal. 32:5; 38:18) Como resulta, posible que cambia el de suyu custumbre na sunod miting compara del una.

¹³ El maga anciano hay dale mira empatia y hay trata enbuenamente con el quien ya culpa para ayuda con ele arripinti. Mas pa, hay reza sila que bendici si Jehova con el diila esfuerzo mientras ta esperanza que puede realiza el persona quien ya comete culpa que gendeh justo el cosa le ya hace y arripinti le.—2 Tim. 2:25, 26.

14. Si ya arripinti el quien ya comete culpa, con quien debe guinda el alabanza y porque?

¹⁴ Maka-alegre gayot si arripinti el un persona quien ya comete culpa! (Luc. 15:7, 10) Si sucede se, con quien debe guinda el alabanza? Na maga anciano ba? Acorda con el cosa ya habla si Pablo acerca con el maga quien ya comete culpa: “Baka hay dale el Dios kanila el oportunidad para arripinti.” (2 Tim. 2:25, NWT) Claro que si Jehova y gendeh el maskin quien gente el ya ayuda con el quien ya culpa para cambia el de suyu pensamiento y custumbre. Ya explica si Pablo que despues arripinti el un persona, hay tene le mas exacto saber acerca na verdad, hay bira de suyu buen pensamiento y puede le escapa na maga trampa de Satanas.—2 Tim. 2:26.

15. Paquemodo el maga anciano continua ayuda con el quien ya arripinti?

¹⁵ Si arripinti el quien ya culpa, el committee hay asigura que puede continua man shepherding con ele. Proposito diila amo para dale el necesita ayuda para puede le continua evita con el maga trampa de Satanas y hace si cosa el justo. (Heb. 12:12, 13) Siempre, gendeh habla el maga anciano maskin con quien si cosa ya hace el quien ya culpa. Pero, cosa sila debe informa con el congregacion?

“CORECTA NA PRESENCIA DEL TODO”

16. De quien “presencia” ta refiri si Pablo na 1 Timoteo 5:20?

¹⁶ Le con el 1 Timoteo 5:20, NWT. Ya escribi este si Pablo para con Timoteo que un  anciano tambien. Ya habla le que “corecta na presencia del todo” con aquellos quien ta practica culpa. Este ba quierre decir que corecta kanila na “presencia” del entero congregacion? Gendeh. Sino, ta refiri si Pablo con aquellos quien posible sabe ya acerca con el culpa que ya comete el persona. Posible que sila mismo el ya mira el cosa ya hace el persona o kanila le ya avisa el cosa le ya hace. Kanila lang habla el maga anciano que ya dale ya atencion con el problema y ya corecta ya con el quien ya culpa.

17. Si manada el quien sabe o posible que manada el quien hay sabe acerca con el serioso culpa, cosa debe anuncia y porque?

¹⁷ Na cuanto maga situacion, manada na congregacion el quien sabe acerca si cosa ya hace el quien ya culpa o posible manada el quien hay sabe acerca con ese. Si ansina, necesita con ele corecta na “presencia” del entero congregacion. Para hace se, el un anciano hay anuncia na congregacion que ya ricibi coreccion el hermano o hermana. Porque se necesita hace? Como cosa ya habla si Pablo, hay sirvi se como “aviso con otro” para gendeh sila comete serioso culpa.

18. Cosa hace el maga anciano si un bautizao menor de edad el quien ya comete serioso culpa? (Mira tambien con el letrato.)

¹⁸ Paquemodo si bautizao menor de edad—aquellos nuay pa llega 18 año—el quien ya comete serioso culpa? El maga anciano hay iscuji dos anciano para man cuento con el menor de edad junto con el de suyu Cristiano mayores. b Hay pricura sabe el maga anciano si  cosa ya el maga mayores ya puede hace para ayuda con el diila anak que arripinti. Si ya oi el anak con el consejo del mayores y ta hace le maga cambio, posible decidi el dos anciano que deja con el mayores que continua ayuda con el diila anak. Sabe sila que ya dale el Dios responsibilidad con el maga mayores que corecta con el diila maga anak. (Deut. 6:6, 7; Prov. 6:20; 22:6; Ef. 6:2-4) Tiene maga tiempo hay man quetal el maga anciano con el maga mayores para asigura que ta puede ricibi espiritual ayuda el menor de edad. Pero paquemodo si nuay le arripinti y ta continua comete serioso culpa? Si ansina el situacion, hay converza con ele el un committee de maga anciano junto con el de suyu Cristiano mayores.

“SI JEHOVA BIEN CARIÑOSO Y LASTIMOSO”

19. Paquemodo el maga anciano puede imita con Jehova mientras ta ayuda con el quien ya culpa?

¹⁹ Ya dale responsibilidad si Jehova con el maga anciano para asigura que esta limpio el congregacion. (1 Cor. 5:7) Pero hay hace tambien sila el todo esfuerzo para ayuda con el quien ya culpa que arripinti. Mientras ta hace sila se, ta esta sila positivo y ta esperanza que acepta le el ayuda. Porque? Cay quierre sila imita con Jehova, quien “bien cariñoso y lastimoso.” (Sant. 5:11, NWT) Ansina el cosa ya hace si apostol Juan. Nota con el cosa le ya escribi: “Di mio maga anak, ta escribi yo con ustedes este carta para ay evita ustedes masquin cosa clase de pecado. Pero si algunos ya comete pecado, tiene kita el representante quien ta suplica con el Dios Padre para canaton, y ele amo si Jesucristo.”—1 Juan 2:1, El Nuevo Testamento.

20. Cosa kita hay discuti na ultimo articulo de este serie?

²⁰ Maka-triste si el un Cristiano gendeh ta acepta ayuda y nuay arripinti. Maskin pa ansina, necesita con ele quita na congregacion. Pero cosa pa necesita hace el maga anciano? Hay considera kita se na ultimo articulo de este serie.