ARTICULO 33
CANCION 130 Be Forgiving
Tene Igual Mirada de Jehova na Maga Ya Comete Serioso Culpa
“Si algunos ya comete pecado, tiene kita el representante quien ta suplica con el Dios.”—1 JUAN 2:1, El Nuevo Testamento.
SI COSA PUEDE APRENDE
Maga leccion na cosa ya sucede na congregacion de Corinto del primer siglo cuando tiene quien ya comete serioso culpa.
1. Cosa quierre si Jehova para con el todo maga gente?
CUANDO ya crea si Jehova con el maga gente, ya dale le kanila libertad para decidi. Ta usa tu con ese regalo si ta hace tu maga decision. El de con todo importante decision que puede hace el un persona amo que dedica el de suyu vida con Jehova y queda parte del De Suyu familia. Quierre si Jehova que hace se el todo maga gente. Porque? Cay ta ama le kanila y quierre le el de con todo bueno para kanila. Quierre le que queda sila de suyu amigo y vivi sila hasta para cuando.—Deut. 30:19, 20; Gal. 6:7, 8.
2. Cosa quierre si Jehova para con aquellos quien ya comete serioso culpa? (1 San Juan 2:1)
2 Gendeh ta forza si Jehova con el maga gente para sirvi con ele. Sino, ya permiti le con el cada uno kanila para decidi si cosa sila quierre hace. Paquemodo si el un bautizao Cristiano ya desobedece con el ley del Dios y ya comete un serioso culpa? Si gendeh le arripinti, debe con ele quita na congregacion. (1 Cor. 5:13) Maskin pa ansina, bien quierre si Jehova que arripinti ese persona y bira con Ele. Gane, el un razon si porque si Jehova ya dale con el rescate amo para puede le perdona con el culpa de aquellos quien ya arripinti. (Le con el 1 San Juan 2:1, El Nuevo Testamento.) El diaton amable Dios ta apela con aquellos quien ya comete serioso culpa que arripinti sila.—Zac. 1:3; Roma 2:4; Sant. 4:8.
3. Cosa kita discuti na este articulo?
3 Quierre si Jehova que tene kita el igual mirada de suyu na maga serioso culpa y con aquellos quien ya comete con ese. Ayuda kanaton este articulo para hace se. Mientras ta le tu con este articulo, nota (1) si cosa ya hace el congregacion de Corinto del primer siglo con el un persona quien ya comete serioso culpa, (2) si cosa direccion ya dale si apostol Pablo cuando ya arripinti ese persona y (3) si cosa este ta enseña kanaton acerca na mirada de Jehova con aquellos quien ya comete serioso culpa.
SI COSA YA HACE EL CONGREGACION CON EL QUIEN YA COMETE SERIOSO CULPA
4. Cosa ya sucede na congregacion de Corinto del primer siglo? (1 Corinto 5:1, 2)
4 Le con el 1 Corinto 5:1, 2. Durante el de suyu ika-tres viaje, ya puede oi un noticia si Pablo acerca na congregacion de Corinto. El un hermano na ese congregacion ya tiene sexual relacion na de suyu madrasta. Gendeh maka-creé que puede hace ansina el un siervo del Dios y gane, “maskin el maga pagano gendeh ta hace” con ese. Pero ya consinti con ese el congregacion y posible con orgullo pa ya suporta con ese. Baka pensaba sila ta imita lang sila con el lastima del Dios na maga imperfecto gente. Pero gendeh ansina si Jehova. Nunca le consinti con el maga serioso culpa que ta hace el de suyu maga siervo. Na cosa ya hace este hombre, asigurao que ta hace le malo con el reputacion del congregacion. Posible que ta influencia tambien le con el otro maga Cristiano quien tan junto con ele. Por causa con ese, tiene direccion ya dale si Pablo con el congregacion. Cosa se direccion?
5. Cosa ya habla si Pablo que hace el congregacion y cosa quel quierre decir? (1 Corinto 5:13) (Mira tambien con el letrato.)
5 Le con el 1 Corinto 5:13. Ya guia si Jehova con Pablo para dale direccion por medio na carta que quita con aquel persona na congregacion. Paquemodo con ele debe trata el maga Cristiano? Ya habla si Pablo que “no [sila] man junto” con aquel persona. (1 Cor. 5:11) Cosa quel quierre decir? Gendeh sila debe man junto con aquel persona si gendeh necesita. Gane, ya habla si Pablo que gendeh sila debe “maskin para come” junto con ele. Si ta come junto el dos persona, grande el posibilidad que mas man junto sila na otro tiempo. Claro que el direccion que ya dale si Pablo hay protege con el congregacion na mal influencia. (1 Cor. 5:5-7) Mas pa, si evita sila asocia con aquel persona, posible se ayuda con ele para realiza que gendeh gayot justo el cosa le ya hace, sinti le triste na cosa le ya hace y arripinti.
Ya guia si Jehova con Pablo para dale direccion por medio na carta que quita na congregacion con el persona quien nuay arripinti (Mira con el parapo 5)
6. Paquemodo ya responde el congregacion y el quien ya comete serioso culpa na carta de Pablo?
6 Despues imbia si Pablo con el de suyu carta, posible que ya pensa le si paquemodo responde el congregacion na de suyu direccion. Despues de cuanto tiempo, ya habla con ele si Tito que ya sigui el congregacion con el de suyu direccion y ya hace se alegre con Pablo. (2 Cor. 7:6, 7) Mas pa, cuanto meses despues del cosa ya hace el congregacion, ya arripinti el persona quien ya comete serioso culpa. Ya cambia le con el de suyu conducta y ya principia sigui otravez na maga principio de Jehova. (2 Cor. 7:8-11) Cosa sunod ya habla si Pablo que hace el congregacion por causa con ese?
SI PAQUEMODO YA TRATA EL CONGREGACION CON EL HERMANO QUIEN YA ARRIPINTI
7. Cosa ya hace el hombre despues con ele quita na congregacion? (2 Corinto 2:5-8)
7 Le con el 2 Corinto 2:5-8. Ya habla si Pablo que “bastante ya el castigo ya dale” con el persona quien ya comete serioso culpa. Porque? Cay despues quita con el hombre na congregacion, ya puede le realiza que necesita le arripinti. Poreso, gendeh mas necesita que continua disciplina con ele.—Heb. 12:11.
8. Cosa sunod ya habla si Pablo que hace el congregacion?
8 Por causa con ese, ya habla si Pablo con el congregacion: “Perdona ustedes con ele y . . . dale animo” y “dale gayot con ele mira maga prueba del de ustedes amor.” Nota que nuay lang basta habla si Pablo que permiti sila que bira aquel hermano. Sino quierre le que dale sila mira, por medio na diila maga palabra y accion, que ya perdona y ta ama sila con aquel hermano quien ya arripinti. Si hace sila se, puede sila dale mira con el hermano que alegre sila que ya bira le.
9. Porque posible yan alang-alang el cuanto que perdona con el hermano quien ya arripinti?
9 Posible gaha que el cuanto na congregacion yan alang-alang acepta otravez con el hermano quien ya arripinti? Posible que ya sucede se. Puede se kita habla cay el cosa le ya hace ya causa problema na congregacion y ya lleva verguenza con el cuanto individual. Posible que el cuanto quien ya hace esfuerzo para esta fiel con Jehova ya sinti que gendeh propio que acepta otravez con aquel persona como un hermano por causa na serioso culpa que ya comete le. (Compara na Lucas 15:28-30.) Pero porque importante que dale mira deverasan amor el congregacion con aquel hermano?
10-11. Cosa posible sucede si gendeh perdona o dale mira amor con el hermano quien ya arripinti?
10 Cosa sucede si nuay permiti el maga anciano que bira na congregacion aquel hermano o si despues le bira, nuay con ele dale mira amor el congregacion? Posible, “sumi le por demas na tristeza” y sinti que nuay mas esperanza el de suyu situacion. Gane, baka gendeh mas le hace esfuerzo para queda otravez enbuenamente el de suyu relacion con Dios.
11 Puera con ese, si gendeh perdona el maga hermano y hermana con este hermano quien ya arripinti, posible sila pone na peligro con el diila relacion con Jehova. Porque? Cay gendeh mas sila ta imita con Jehova sino con Satanas, quien mal clase y nuay lastima. Puede kanila usa el Diablo para hace luya con el hermano y como resulta, gendeh mas le sirvi con Jehova.—2 Cor. 2:10, 11; Ef. 4:27.
12. Cosa puede hace el congregacion para imita con Jehova?
12 Entonces, cosa hace el congregacion de Corinto para dale mira que ta imita sila con Jehova y gendeh con Satanas? Igual con Jehova, debe sila perdona con aquellos quien ya arripinti. Nota si cosa ya habla el cuanto escritor del Biblia acerca con Jehova. Asegun con David, “bueno y preparao perdona” si Jehova. (Sal. 86:5) Si Miqueas ya escribi: “Quien Dios el igual contigo quien ta perdona y ta ulvida con el culpa?” (Miq. 7:18) Y si Isaias ya habla: “Manda con el mal gente deja con el de suyu camino y con el malo cambia el de suyu pensamiento; manda con ele bira con Jehova, quien hay tene lastima con ele, na diaton Dios, cay ele hay perdona completamente.”—Isa. 55:7.
13. Porque justo que gendeh mas espera largo tiempo antes permiti con el hermano que bira na congregacion? (Mira con el cajon “ Paquemodo de Tarda Antes Ya Permiti con el Hombre que Bira na Congregacion?”)
13 Ya dale mira el congregacion de Corinto que “bien obediente” sila cuando ya sigui sila con el direccion de Pablo que acepta otravez con el hermano quien ya arripinti y dale mira amor con ele. (2 Cor. 2:9) Deverasan, cuanto meses pa lang el ya pasa desde ya quita con ele na congregacion pero ese disciplina ya ayuda con ele para arripinti. Poreso, gendeh mas necesita que espera pa largo tiempo antes con ele permiti bira na congregacion.
IMITA CON EL JUSTICIA Y LASTIMA DE JEHOVA
14-15. Cosa kita ya aprende na cosa ya sucede na congregacion de Corinto? (2 Pedro 3:9) (Mira tambien con el letrato.)
14 Ya inclui na Biblia con el cosa ya sucede na congregacion de Corinto “para enseña canaton hasta ahora.” (Roma 15:4, El Nuevo Testamento) Ya aprende kita que nunca consinti si Jehova con el de suyu maga siervo quien ya comete serioso culpa. Gendeh igual si Jehova con aquellos quien ta pensa que ta dale sila mira lastima si ta permiti sila que esta na congregacion con aquellos nuay arripinti. Lastimoso si Jehova pero gendeh le consintidor ni ta cambia con el de suyu maga principio. (Jud. 4) Cay si consinti le kanila, gendeh le ta dale mira deverasan lastima sino ta pone le na peligro con el todo na congregacion.—Prov. 13:20; 1 Cor. 15:33.
15 Pero ya aprende tambien kita que no quierre si Jehova que tiene quien hay sale destrozao. Quierre le que salva el maga gente. Ta dale le mira lastima con aquellos quien ya arripinti y quierre tene otravez buen relacion con ele. (Eze. 33:11; le con el 2 Pedro 3:9.) Poreso, cuando ya arripinti y ya descanza comete culpa el hombre na Corinto, ya usa si Jehova con Pablo para habla con el congregacion que debe sila perdona y acepta otravez con aquel hombre.
Cay ta imita sila con el amor y lastima de Jehova, alegre ta acepta otravez el congregacion con aquellos quien ya arripinti (Mira con el parapo 14-15)
16. Cosa tu ta sinti acerca con Jehova na cosa ya sucede na congregacion de Corinto?
16 El cosa ya sucede na congregacion de Corinto ya ayuda kanaton para mira con el amor, pagka-recto y justicia de Jehova. (Sal. 33:5) Asigurao, ya motiva gayot se kanaton para mas alaba con el diaton Dios. Ta rindi tambien kita gracias con Jehova cay ya dale le kanaton el rescate para puede perdona con el diaton maga culpa. Alegre gayot kita cay ta ama kanaton si Jehova y quierre le el de con todo bueno para kanaton!
17. Cosa kita discuti na siguiente maga articulo?
17 Si tiene quien ya comete serioso culpa ahora, paquemodo el maga anciano na congregacion puede imita con el amor de Jehova y ayuda con el persona para arripinti? Cosa debe hace el maga hermano y hermana si ya decidi el maga anciano que quita o hace bira otravez na congregacion con el un persona? Hay contesta con este maga pregunta na siguiente maga articulo.
CANCION 109 Love Intensely From the Heart
