Ya escribi carta si Pablo na maga Cristiano na Tesalonica que donde ya habla le: “Si tiene quien gendeh ta obedece con el cosa kame ya habla na este carta, marca con ese gente.” (2 Tes. 3:14, NWT) De antes, ta habla kita que este direccion amo para na maga anciano. Si el un hermano o hermana ta continua ignora con el maga principio na Biblia maskin pa manada beses ya con ele ya conseja, el maga anciano posible dale un talk para dale aviso na congregacion. Despues, gendeh mas asocia con ele el maga publisher na congregacion.

Pero, necesita kita man adjust con el diaton entendimiento na este direccion. El consejo de Pablo amo para na maga individual Cristiano y debe sila este hace na cuanto maga circumstancia. Entonces, gendeh mas necesita dale talk el maga anciano acerca con este. Puede ayuda kanaton el contexto del consejo de Pablo para entende si porque necesita hace con este cambio.

Ya puede observa si Pablo que “falta disciplina” el cuanto na ese congregacion. (2 Tes. 3:6, NWT) Ta ignora sila con el maga consejo na Palabra del Dios. Del ya pasa visitada de suyu kanila, ya dale le este consejo: “Si tiene quien no quiere trabaja, no dale con ele come.” (2 Tes. 3:10-12) Pero el cuanto gendeh siempre ta trabaja para suporta con el diila mismo cuerpo, maskin pa puede se sila hace. Puera con ese, ta entra tambien sila mete na vida del otro. Paquemodo debe trata el maga Cristiano con ese maga persona?

Ya habla si Pablo kanila: “Marca con ese gente.” El Griego palabra para na ese expresion ta dale idea que necesita identifica con el un persona quien posible tene mal influencia con otro. Ya dale si Pablo ese direccion na entero congregacion y gendeh na maga anciano lang. (2 Tes. 1:1; 3:6) Poreso si ya puede observa el un individual que ta desobedece el un Cristiano con el maga consejo na Palabra del Dios, puede le decidi que “no asocia” con ese persona.

Quierre decir ba de este que trata con ele como un persona con quien ya quita na congregacion? Gendeh. Cay ya habla si Pablo: “Continua con ele conseja como un hermano.” Poreso, el cada individual puede siempre man junto na miting y na ministerio con el persona con quien ya marca. Pero puede sila decidi que gendeh man junto con ele na recreacion o na otro pa maga ocasion. Porque? “Para man huya le,” ya habla si Pablo. Si gendeh mas man junto con ele el otro maga Cristiano na cuanto ocasion, posible le man huya y realiza que necesita le hace maga cambio.—2 Tes. 3:14, 15, NWT.

Paquemodo puede aplica el maga Cristiano ahora con este consejo? Una, quierre kita asigura que el cosa ta hace el un Cristiano deverasan ta dale mira que “falta disciplina” le, como cosa ya habla si Pablo. Gendeh este ta refiri na un persona quien diferente el decision que kanaton por causa na de suyu conciencia o cay otro lang el cosa le quierre. Gendeh tambien este ta refiri con aquellos quien ya puede hace sinti duele kanaton. Sino, ta refiri si Pablo con aquellos quien intencional ta desobedece con el maga consejo na Biblia.

Si ya puede kita observa ahora que el un Cristiano ta continua desobedece a con el maga consejo na Biblia, gendeh kita asocia con ele na recreacion o na otro pa maga ocasion. Ciendo un personal decision este, gendeh kita debe man cuento acerca con este na otro que gendeh parte del diaton familia quien ta queda junto kanaton. Pero man junto siempre kita con ele na maga miting y na ministerio. Si ya hace ya le maga cambio, puede ya kita man junto con ele otravez na otro maga ocasion.