PUEDE ba tu habla que etu un persona quien pirmi ta rindi gracias? Este pregunta necesita contesta el cada uno kanaton. El Biblia ya habla que manada del maga gente na diaton tiempo el no sabe rindi gracias. (2 Tim. 3:2) Posible, tiene tu conoce quien ta pensa que conviene lang kanila hace buen cosas y dale maga cosa-cosa el otro gente. Ta pensa sila que gendeh mas sila necesita rindi gracias na cosas que ta ricibi sila. Posible, uyun tu que gendeh bonito man junto con ese clase de gente.

Pero ta anima con el maga siervo de Jehova: “Dale ustedes gracias.” Necesita kita ‘dale gracias maskin cosa el situacion.’ (Col. 3:15; 1 Tes. 5:18, El Nuevo Testamento) Gane, tiene manada razon si porque bueno para kanaton si sabe kita rindi gracias.

El un razon si porque necesita kita rindi gracias amo cay puede se ayuda para tiene kita positivo mirada na diaton mismo cuerpo. Si el un persona ta rindi gracias, posible le queda alegre y ansina tambien sinti el persona con quien le ya rindi gracias. Porque ta puede hace alegre kanaton y con otro si ta rindi kita gracias? Bueno, considera este ejemplo: Si ta puede tu sinti que el otro preparao hace cosas para contigo, gendeh ba ta dale este mira que valoroso tu para con aquel persona? Ta ama sila contigo. Y si ta puede tu se sinti, hay queda tu alegre. Puede kita imagina que amo se el cosa ya sinti si Rut cay bondadoso si Boaz. Poreso cuando ya mira si Rut que ta cuida con ele si Boaz, claro que ya sinti alegre si Rut.​—Rut 2:10-13.

Justo gayot si ta rindi kita gracias, especialmente con Dios. Asigurao que ya pensa tu con el manada espiritual y material regalo que ya dale le contigo y ta continua pa dale. (Deut. 8:17, 18; Act. 14:17) Pero en vez de pensa lang con este unrato, dale tiempo para medita con el manada bendicion que ya dale contigo el Dios y con el de tuyu familia. Si medita tu con el pagka-bondadoso del diaton Creador, hay hace este fuerte con el de tuyu apreciacion para con ele y convinci este contigo que ta ama y ta aprecia le contigo.​—1 Juan 4:9.

Pero, no lang basta pensa con el maga bendicion que ya puede tu ricibi sino rindi tambien gracias con Jehova. (Sal. 100:4, 5) Asegun con otro, “si ta rindi gracias el un persona, mas ta queda le alegre.”

El otro razon si porque bueno rindi gracias amo cay ta hace este fuerte con el relacion del dos persona. Todo kita quierre que aprecia kanaton el otro. Si sincero tu rindi gracias con el persona quien ta hace buen cosas contigo, hay queda ustedes cerca na uno y otro. (Roma 16:3, 4) Mas pa, grande el posibilidad que aquellos quien sabe aprecia amo tambien aquellos quien ta ayuda con otro. Ta nota sila el maga buen cosas que ta hace kanila y ta manda este move para hace tambien sila igual ansina. Si, hay queda gayot tu alegre si ayuda tu con otro. Amo tambien ese el cosa ya habla si Jesus: “Mas grande el alegria de aquel quien ta dale contra con el quien ta recivi.”​—Act. 20:35.

Si Robert Emmons, codirector de un study project acerca si paquemodo rindi gracias, na University of California, ya habla: “Para sabe kita rindi gracias, necesita kita entende que todo kita ta depende lang na uno y otro. Tiene vez ta dale kita y tiene vez ta ricibi kita.” El deverasan, para esta vivo y para tiene alegre vida, ta depende  kita na otro na manada manera. Por ejemplo, posible ta dale sila kanaton comida o medical necesidad. (1 Cor. 12:21) El persona quien sabe rindi gracias asigurao ta aprecia gayot con el cosa ta hace el otro para con ele. Poreso, anad ba tu rindi gracias na maga cosas que ya hace el otro para contigo?

El otro pa razon para cultiva con este calidad amo cay ayuda este contigo man focus na maga positivo cosas en vez na maga negativo. Igual este como tan sala con el diaton pensamiento. Ta ayuda este para puede tu concentra na un cosa mientras ta sangga con el otro cosas. Ta puede tu man focus na maga positivo cosas y gendeh con el maga problema. Si sabe tu rindi gracias, mas puede tu mira con el maga buen cosas y ayuda este para mas aprecia tu con este todo. Si man focus tu na maga cosas que ta aprecia tu, puede tu hace el cosa ya habla si apostol Pablo: “Alegra ustedes firmi unido con el Señor.”​—Fil. 4:4.

Ta puede ayuda con el persona para gendeh pensa negativo si ta rindi le gracias. Gendeh ba dificil queda triste, man selos o man sentimiento si ta rindi kita gracias na cosa kita tiene? Mas mucho, el maga gente quien sabe rindi gracias gendeh ta queda materialistico. Contento sila na cosa sila tiene y gendeh ta pricura tiene pa mas.​—Fil. 4:12.

Como un Cristiano, sabe tu que si Satanas quierre que queda tu triste y maluya na maga problema que ta enfrenta tu na este ultimo maga dia. Quierre le que queda tu negativo y reclamoso. Si tiene tu ese clase de custumbre, gendeh tu queda efectivo na ministerio. El deverasan, el custumbre que sabe rindi gracias conectao na fruta del sagrao espiritu del Dios. Por ejemplo, ta queda tu alegre si ta puede tu mira con el maga buen cosas que ya dale contigo el Dios y tiene tu fe na cosa le ya promete na futuro.​—Gal. 5:22, 23.

Como uno del maga siervo de Jehova, posible uyun tu na cosa ta discuti na este articulo acerca con el custumbre que rindi gracias. Pero, ya puede tu realiza que gendeh facil cultiva con este. No man luya. Puede tu cultiva y mentena con ese calidad. Paquemodo? Dale tiempo cada dia para pensa con el maga cosas na de tuyu vida que ta rindi gayot tu gracias. Si pirmi tu se hace, mas facil para contigo cultiva con ese calidad. Queda tu mas alegre si compara con aquellos quien tan focus na diila maga problema. Medita con el maga buen cosas que ya hace el Dios y el otro para anima y hace alegre contigo. Puede tambien tu principia hace journal. Puede tu escribi alli dos o tres cosas que ta aprecia tu cada dia.

Ya puede discubri el maga researcher que si pirmi kita ta rindi gracias con otro, puede este cambia con el manera si paquemodo trabaja el diaton utuk para mas facil para kanaton queda alegre na diaton vida. Mas alegre el un persona quien sabe rindi gracias. Poreso, cunta con el de tuyu maga bendicion, man enjoy con el maga buen cosas que ta sucede na de tuyu vida y pirmi rindi gracias! En vez de hace no vale nada con este, “rindi gracias con Jehova cay ele bueno.” Si, “dale kita gracias masquin cosa el situacion.”​—1 Cron. 16:34; 1 Tes. 5:18, El Nuevo Testamento.