1-2. (a) Cosa el jubileo? (Mira con el cajon “ Cosa el Jubileo?”) (b) Cosa ya menciona si Jesus na Lucas 4:16-18?

NA CUANTO nacion, tiene especial celebracion para na ika-50 año rulanza del rey o del reina. Ese ika-50 año ta llama como el año de jubileo del quien ta rula. Ese celebracion posible ta tarda por un dia, un semana o mas largo pa. Pero, acaba siempre este y ulvida lang dayun el maga gente.

² Examina kita con el un mas buen clase de jubileo. Mas bueno pa este que con el un año celebracion que ta hace el maga Israelita de antes cada 50 año. Ese Jubileo ya dale libertad con el maga Israelita. Porque kita debe aprende acerca con ese? Cay ta manda este acorda kanaton con el amable arreglamiento que ya hace si Jehova para kanaton. Dale este kanaton libertad que hay esta hasta para cuando y ta beneficia ya kita con ese ahora. Ya menciona si Jesus acerca con ese libertad.​—Le con el Lucas 4:16-18.

3. Asegun na Levitico 25:8-12, paquemodo ya beneficia el maga Israelita na Jubileo?

³ Mas puede kita entende si cosa quierre decir de Jesus cuando ya menciona le acerca na libertad si considera kita una con el Jubileo que ya hace el Dios para na de suyu maga siervo de antes. Ya habla si Jehova con el maga Israelita: “Hace ustedes sagrao el ika-50 año y proclama que tiene ya libertad el todo quien ta queda na tierra. Hay queda este un Jubileo para con ustedes y el cada uno hay bira na de suyu propiedad y el cada uno hay bira na de suyu familia.” (Le con el Levitico 25:8-12.) Del ya pasa articulo, ya considera kita  si paquemodo el maga Israelita ya beneficia na Sabbath cada semana. Pero, paquemodo sila ya beneficia na Jubileo? Pone kita que el un Israelita bien grande el debe. Como resulta, necesita le vende con el de suyu tierra para paga de suyu debe. Na año del Jubileo, ese tierra hay debolbe con ele otravez. Entonces, ese gente puede “bira na de suyu propiedad” y el de suyu maga anak hay hereda con el tierra. O posible, bien grande el debe del un Israelita poreso necesita le queda esclavo o el de suyu anak para puede paga con el debe. Na año del Jubileo, el esclavo puede “bira na de suyu familia.” Poreso, nuay ni uno quien queda permanente esclavo! Bien amable gayot si Jehova!

4-5. Porque importante que aprende kita acerca na Jubileo del maga Israelita?

⁴ Cosa el otro beneficio del Jubileo? Si Jehova ya habla: “Nuay ni uno con ustedes el queda pobre cay asigurao que bendici con ustedes si Jehova na tierra que ta dale con ustedes si Jehova, el de ustedes Dios, que hereda ustedes.” (Deut. 15:4) Bien diferente este na cosa ta sucede na mundo ahora, donde el rico mas ta queda rico y el pobre mas ta queda pobre!

⁵ Como maga Cristiano, gendeh kita bajo na Ley de Moises. Quierre decir de este que gendeh kita ta sigui na ley de Jubileo acerca na debe, librada de maga esclavo y debolbida de tierra. (Roma 7:4; 10:4; Ef. 2:15) Pero maskin pa ansina, importante para kanaton que aprende acerca na Jubileo. Porque? Cay ta hace este acorda kanaton con el cosa ya hace si Jehova para libra kanaton na pecado.

6. Na cosa el maga gente necesita queda librao?

⁶ Todo kita necesita libertad cay todo kita maga esclavo​—esclavo na pecado. Cay tiene kita pecado, ta queda kita viejo, ta enferma y ta muri. Ta puede se realiza el manada gente si ta mira sila na espejo o ta anda na doctor cay enfermo sila. Tan luya tambien kita si ta comete kita pecado. Si apostol Pablo ya admiti que “el pecado na [de suyu] cuerpo amo el que ta controla [con ele].” Ele ya omenta:  “Que miserable gayot este di mio vida! Quien gaja puede salva conmigo?”​—Roma 7:23, 24, El Nuevo Testamento.

7. Cosa ya predicta si Isaias acerca na libertad?

⁷ El Dios ya hace manera para salva o libra kanaton na pecado. Ya queda este posible por medio de Jesus. Mas de 700 año antes llega si Jesus aqui na tierra, si profeta Isaias ya predicta que hay libra con el maga gente na futuro. Este clase de libertad mas pa que con el cosa ya experiencia el maga Israelita durante el año de Jubileo. Ele ya escribi: “Taqui conmigo el espiritu del Soberano Señor Jehova, cay ya iscuji conmigo si Jehova para declara el buen noticia con el maga sumiso. Ya imbia le conmigo para cura con el maga dolorido el corazon, para proclama libertad con el maga cautivo.” (Isa. 61:1) Con quien ya cumpli este profecia?

8. Con quien ya cumpli el profecia de Isaias?

⁸ Ya principia cumpli este importante profecia despues principia si Jesus con el de suyu ministerio. Cuando ya anda le na sinagoga na Nazaret, si Jesus ya le con el profecia de Isaias na maga Judio quien talla. Ya aplica si Jesus na de suyu mismo cuerpo este maga palabra: “El Espiritu del Señor taqui conmigo, cay ya pasa Le comigo juntura. Ya imvia Le conmigo para anuncia el Buen Noticia con el maga pobre, para proclama el liberacion con el maga preso y el vista con el maga bulag, para libra con aquellos quien ta sufri injusticia y proclama de misericordia del Señor.” (Luc. 4:16-19) Paquemodo ya cumpli si Jesus con ese profecia?

9. Cosa clase de libertad el ta esperanza el maga gente na tiempo de Jesus?

⁹ Na tiempo de Jesus, el maga gente ya principia ricibi con el libertad que ya predicta si Isaias y el cosa ya le si Jesus. Ya confirma este si Jesus cuando ya habla le: “Este Escritura, que ya oi ustedes, ya cumpli este dia.” (Luc. 4:21) Manada del quien ya oi con el cosa ya le si Jesus posible ya esperanza que queda sila librao na gobierno de Roma. Posible, ya pensa sila igual con el dos gente quien ya habla: “Ya esperanza came cay ele amo el quien ay libra con Israel.” (Luc. 24:13, 21) Pero sabe kita que nuay manda si Jesus con el de suyu maga siguidores que man rebelde contra con el Roma. En vez, ya habla le kanila que paga “con Cesar el maga cosa-cosa de Cesar.” (Mat. 22:21) Entonces, paquemodo  ya libra si Jesus con el maga gente na aquel tiempo?

10. Na cosa ya libra si Jesus con el maga gente?

¹⁰ El Anak del Dios ya vene para libra con el maga gente na dos cosas. Una, si Jesus ya ayuda con el maga gente para queda librao na maga falso enseñanza del maga religioso lider. Ya forza con el manada Judio de antes que sigui con el maga tradicion y falso creencia. (Mat. 5:31-37; 15:1-11) Aquellos quien ta clama que ta ayuda sila con otro para sirvi con Dios gendeh ta sirvi enbuenamente con ele poreso como maga bulak sila. Cay nuay sila acepta con el Mesias y con el verdad que ya enseña le, nuay sila puede conoce con Dios y nuay perdona con el diila pecado. (Juan 9:1, 14-16, 35-41) Por medio na justo enseñanza y buen ejemplo de Jesus, ya dale le mira con el maga humilde si paquemodo queda librao na maga falso enseñanza.​—Mar. 1:22; 2:23–3:5.

11. Cosa el ika-dos manera que ya libra si Jesus con el maga gente?

¹¹ Ika-dos, si Jesus ya hace posible que el maga gente queda librao na pecado. Cay ya dale si Jesus el de suyu vida como un rescate, el Dios puede perdona con el pecado de aquellos quien tiene fe na rescate y ta demonstra con ese por medio na diila accion. (Heb. 10:12-18) Si Jesus ya habla: “Si el Anak ay dale el libertad con ustedes, entonces ay queda ustedes libre.” (Juan 8:36) Este libertad mas pa que con el cosa ya experiencia el maga Israelita durante el año de Jubileo. Por ejemplo, el un gente quien ya queda librao durante el Jubileo posible queda esclavo otravez y muri na uliji. Pero el libertad que ta dale si Jesus hay esta hasta para cuando.

12. Quien el una puede beneficia na libertad que ya proclama si Jesus?

¹² Del Pentecostes 33 C.E., si Jehova ya iscuji con el maga apostoles y con el otro maga fiel hombre y mujer por medio de sagrao espiritu. Ya adapta le kanila como de suyu maga anak para puede kanila resucita y man junto rula con Jesus na cielo. (Roma 8:2, 15-17) Este sila el una quien puede beneficia na libertad que ya proclama si Jesus na sinagoga na Nazaret. Este maga hombre y mujer gendeh mas esclavo na maga falso enseñanza y practica del maga Judio religioso lider. El Dios ta considera tambien kanila que librao na pecado que ta resulta na muerte. El  arreglamiento de Jehova para hace bira con el libertad ya principia cuando ya iscuji le con el maga siguidores del Cristo del 33 C.E. y hay acaba na fin del Un Mil Año Rulanza de Jesus. Cosa hay cumpli adentro de aquel tiempo?

13-14. Puera na maga iscujido Cristiano, quien pa el puede beneficia na libertad que ya proclama si Jesus?

¹³ Ahora, millones de maga sincero gente na todo nacion el parte del “otro maga carnero.” (Juan 10:16) Nuay kanila iscuji el Dios para rula junto con Jesus na cielo. Sino, el Biblia ta habla que hay vivi sila na tierra hasta para cuando. Este ba el de tuyu esperanza?

¹⁴ Ahora pa lang, ta beneficia ya tu na cuanto cosas que ta experiencia el maga iscujido. Cay tiene tu fe na rescate de Jesus, puede tu pidi perdon con Jehova na de tuyu maga pecado. Como resulta, tiene tu el favor del Dios y un limpio conciencia. (Ef. 1:7; Rev. 7:14, 15) Pensa tambien con el de tuyu maga bendicion cay gendeh mas tu esclavo na maga falso enseñanza. Si Jesus ya habla: “Ay sabe ustedes si cosa el verdad, y el verdad ay hace con ustedes libre.” (Juan 8:32) Bien alegre kita cay tiene kita este libertad!

15. Cosa libertad y bendicion kita puede expecta na futuro?

¹⁵ Puede tu expecta mas grande libertad na futuro. Gendeh mas dura, si Jesus hay  destroza con el maga falso religion y mal gobierno. Protege el Dios con el “grande grupo” quien ta sirvi con ele y hay permiti le que ricibi sila bendicion na paraiso tierra. (Rev. 7:9, 14, NWT) Bien manada el quien hay resucita y tiene oportunidad para queda librao na todo mal efecto del pecado de Adan.​—Act. 24:15.

16. Cosa bonito libertad hay ricibi el maga gente na futuro?

¹⁶ Durante el Un Mil Año Rulanza, si Jesus y el quien junto con ele rula hay ayuda con el maga gente para tiene perfecto salud y buen relacion con Dios. Igual si paquemodo ya tiene libertad el maga Israelita durante el Jubileo, ansina tambien durante el Un Mil Año Rulanza. Todo el maga gente quien fiel ta sirvi con Jehova hay queda perfecto y nuay mas pecado.

17. Cosa ya habla el Isaias 65:21-23 que sucede con el maga siervo del Dios? (Mira con el letrato na cover.)

¹⁷ El Isaias 65:21-23 ta discuti si cosa el vida na tierra na futuro. (Le.) Gendeh kita queda plojo y nuay cosa hace. Sino, el Biblia ta habla que manada cosa hace el maga siervo del Dios na aquel tiempo. Na fin del Un Mil Año Rulanza, puede kita asigura que “queda [kita] libre na [diaton] situacion ahora, donde todo maga cosa-cosa ta man buluk, y para puede tamen participa na libertad y na gloria del maga anak del Dios.”​—Roma 8:21.

18. Porque kita puede asigura que queda kita alegre na futuro?

¹⁸ Igual si paquemodo ya asigura si Jehova que tiene tiempo para trabaja y descanza el maga Israelita, amo tambien se ele hace para con el de suyu maga siervo durante el Un Mil Año Rulanza del Cristo. Asigurao que tiene tiempo para na maga espiritual actividad. Importante ahora el adoranza con Dios para queda alegre y ansina tambien na nuevo mundo. Todo fiel gente hay queda alegre durante el Un Mil Año Rulanza del Cristo cay tiene kita bonito trabajo y todo kita ta sirvi con Dios.