1. Cosa el otro-otro mirada del maga gente na trabajo?

COSA el mirada na trabajo del mayoria del maga gente na de ustedes lugar? Na manada nacion, el maga gente mas ta hace grande esfuerzo y mas ta dale grande hora na trabajo si compara de antes. Aquellos quien sobra ta trabaja nuay mas tiempo para descanza, para man junto na diila familia o para continua aprende acerca con Dios. (Ecl. 2:23) Pero el otro maga gente, no quierre trabaja y ta busca pa gane razon para gendeh trabaja.​—Prov. 26:13, 14.

2-3. Cosa buen ejemplo ya dale mira si Jehova y si Jesus acerca na trabajo?

² Gendeh balance el mirada del mundo na trabajo pero considera con el mirada de Jehova y de Jesus con este. Sabe kita que quierre-quierre trabaja si Jehova. Ya hace se claro si Jesus cuando ya habla le: “El dimio Tata ta trabaja firmi y yo ta trabaja tamen.” (Juan 5:17) Pensa con el todo creacion del Dios igual como el miles de maga espiritu creatura y el universo. Ta puede tambien kita mira con el maga bonito creacion del Dios aqui na tierra. Poreso, el salmista ya habla: “Que bien manada el cosa tu ya hace, O Jehova! Na de uste sabeduria ya crea tu con este todo. El tierra lleno del maga cosas que ya hace tu.”​—Sal. 104:24.

³ Ya imita si Jesus con el de suyu Tata. Ya ayuda le cuando “ya prepara [el Dios] con el cielo.” Junto le con Jehova como un “buen trabajador.” (Prov. 8:27-31) Cuando taqui si Jesus na tierra, ya hace tambien le maga buen trabajo. Ese trabajo igual como de suyu comida y ya dale este mira que el Dios ya imbia con ele.​—Juan 4:34; 5:36; 14:10.

4. Cosa kita puede aprende con Jehova y con Jesus acerca na descanzo?

 ⁴ El ejemplo ba de Jehova y de Jesus acerca na trabajo quierre decir que gendeh mas kita debe descanza? Gendeh. Si Jehova gendeh ta cansa poreso gendeh le necesita descanzo. Pero el Biblia ta habla que despues si Jehova crea con el cielo y con el tierra, “ya para le trabaja y ya descanza.” (Ex. 31:17) Este quierre decir que si Jehova ya descanza y ya queda alegre na maga cosas que ya crea le. Y maskin pa ocupao si Jesus na de suyu trabajo mientras taqui le na tierra, ya dale le siempre tiempo para descanza y para come junto na de suyu maga amigo.​—Mat. 14:13; Luc. 7:34.

5. Na cosa tan lisud el cuanto siervo del Dios?

⁵ El Biblia ta anima con el maga siervo del Dios que trabaja. El de suyu maga siervo debe queda buen trabajador y gendeh plojo. (Prov. 15:19) Posible, ta trabaja tu para suporta con el necesidad del de tuyu familia. Y todo el maga dicipulo del Cristo tiene el responsibilidad para participa na trabajo predicacion del buen noticia. Pero, ta necesita tambien tu bastante descanzo. Tan lisud ba tu tiene vez queda balance na de tuyu tiempo na trabajo, ministerio y descanzo? Paquemodo kita sabe si paquemodo de largo kita trabaja y descanza?

6. Paquemodo ta dale mira el Marcos 6:30-34 que tiene balance mirada si Jesus acerca na trabajo y descanzo?

⁶ Importante que tiene balance mirada na trabajo. Si Rey Solomon ya escribi: “Tiene justo tiempo para na . . . todo trabajo.” Ya menciona le acerca na siembrada, construida, llurada, alegria, bailada y otro pa actividad. (Ecl. 3:1-8) Claro que importante parte del diaton vida el trabajo y descanzo. Tiene balance mirada si Jesus con ese. Na un ocasion, el maga apostoles ya bira estaba na predicacion. Bien ocupao sila poreso “noay mas sila tiempo maskin para come.” Si Jesus ya habla: “Vene ustedes, anda kita na un lugar silencio para descansa un rato.” (Le con el Marcos 6:30-34.) Maskin pa tiene vez lang sila ta descanza, sabe si Jesus que todo sila necesita descanzo.

7. Cosa kanaton puede ayuda hace si aprende kita acerca na ley de Sabbath?

⁷ Tiene vez, todo kita necesita descanza o cambia el diaton rutina. Puede se kita mira na arreglamiento que ya dale el Dios para na maga Israelita de antes​—el Sabbath cada semana. Gendeh kita bajo na Ley de Moises pero puede kita beneficia si considera kita si cosa este ta habla acerca na Sabbath. El cosa kita aprende puede ayuda kanaton para examina con el diaton mirada na trabajo y descanzo.

8. Asegun na Exodo 31:12-15, para na cosa el dia de Sabbath?

⁸ El Palabra del Dios ta habla que despues del seis dia de creacion, el Dios ya descanza crea maga cosas aqui na tierra. (Gen. 2:2) Maskin pa ansina, quierre-quierre trabaja si Jehova y ele “ta trabaja firmi.” (Juan 5:17) Semejante el provision de Sabbath na dia que ya descanza si Jehova que ya menciona na Genesis. El Dios ya habla que el Sabbath amo un señal entre con ele y na Israel. Este amo un “especial dia de descanzo” y “sagrao este con Jehova.” (Le con el Exodo 31:12-15.) Ta prohibi trabaja con el todo, incluido el maga bata, esclavo y maskin el maga animal na sementera. (Ex. 20:10) Ta ayuda este con el maga gente para puede dale mas atencion na maga espiritual cosas.

9. Cosa el gendeh justo idea acerca na Sabbath el ya existi na tiempo de Jesus?

⁹ Tiene beneficio el dia de Sabbath para na maga siervo del Dios. Pero manada religioso  lider na tiempo de Jesus el sobra de istricto acerca con ese. Ta clama sila que ta prohibi na ley de Sabbath maskin para saca cuanto grano de trigo o para cura con el un enfermo. (Mar. 2:23-27; 3:2-5) Pero, gendeh ansina el mirada del Dios y ya hace se claro si Jesus con aquellos ta oi con ele.

10. Cosa kita puede aprende na Mateo 12:9-12 acerca na mirada de Jesus na Sabbath?

¹⁰ Ta sigui si Jesus y el de suyu maga siguidores con el Sabbath cay bajo sila na Ley de Moises. * Pero, ya dale mira si Jesus por medio na de suyu palabra y accion que gendeh malo hace maga buen cosas para ayuda con otro na dia de Sabbath. Ele claro ya habla: “Permitido na Ley hace maga cosa-cosa bueno na dia de Sabado [“Sabbath,” NWT].” (Le con el Mateo 12:9-12.) Gendeh le ta pensa que malo hace buen cosas para con otro na dia de Sabbath. El maga cosas ya hace si Jesus ta dale mira un importante razon si porque el Dios ya habla con el maga gente que descanza na dia de Sabbath. Cay ta descanza el maga gente na diila trabajo, ta puede sila man focus na maga espiritual cosas. Ya engranda si Jesus na un familia que ta usa con el dia de Sabbath para queda cerca con Dios. Claro se na cosa kita puede le acerca con Jesus cuando talla le na Nazaret: “El dia de sabado [“Sabbath,” NWT] ya entra Le na sinagoga, como ta hace Le firmi. Ya levanta Le para lee.”​—Luc. 4:15-19.

11. Quien ya dale buen ejemplo con Jesus acerca na trabajo?

¹¹ Asigurao que igual el mirada de Jose con el mirada del Dios na trabajo mientras ya enseña le con Jesus si paquemodo queda carpintero. (Mat. 13:55, 56) Y posible, ya puede mira si Jesus con Jose que ta trabaja enbuenamente para puede sustene con el diila grande familia. Si Jesus ya habla con el de suyu maga dicipulo: “El trabajador conviene recivi el disuyo pago.” (Luc. 10:7) Claro que si Jesus sabe trabaja enbuenamente.

12. Cosa texto ta dale mira si cosa ta habla el Biblia acerca na trabajo?

¹² Si apostol Pablo sabe tambien si paquemodo trabaja enbuenamente. El prioridad na de suyu vida amo predica con otro acerca con Jesus y con el de suyu mensaje. Pero, ya trabaja tambien si Pablo para puede suporta con el de suyu mismo cuerpo. Sabe el maga de Tesalonica que “ya trabaja [le] mucho y con cansancia de dia y de noche, para gendeh queda un cargo pesao” con maskin quien. (2 Tes. 3:8; Act. 20:34, 35) Posible, ta refiri si Pablo con el de suyu trabajo que ta hace tolda. Mientras na Corinto, ya esta le junto con Aquila y Priscila quien “ta hace maga tolda . . . y ya trabaja junto canila.” Cuando ya habla si Pablo que ya trabaja le “de dia y de noche,” gendeh se quierre decir que ya trabaja le sin descanzo. Ya descanza le trabaja igual na dia de Sabbath. Ese dia ya dale con ele oportunidad para predica con el maga Judio quien nuay tambien trabajo na ese dia.​—Act. 13:14-16, 42-44; 16:13; 18:1-4.

13. Cosa kita puede aprende na ejemplo de Pablo?

¹³ Ya dale mira buen ejemplo si apostol Pablo. Necesita le trabaja pero ya asigura le que puede le regular participa na “mission sagrao por medio del predicacion del Buen Noticia de Dios.” (Roma 15:16; 2 Cor. 11:23) Ya anima le con otro que hace tambien ansina. Gane, si Aquila y Priscila junto con Pablo na trabajo predicacion. (Roma 12:11; 16:3) Si Pablo ya anima con el maga de Corinto que “progresa firmi na [diila] trabajo por causa del Señor.” (1 Cor. 15:58; 2 Cor. 9:8) Si Jehova ya guia pa gane con apostol Pablo para escribi: “Si tiene quien no quiere trabaja, no dale con ele come.”​—2 Tes. 3:10.

14. Cosa quierre decir del cosa ya habla si Jesus na Juan 14:12?

¹⁴ El de con todo importante trabajo na este ultimo maga dia amo el predicacion y hacida de maga dicipulo. Gane, si Jesus ya habla que el de suyu maga dicipulo hay hace pa mas que con el cosa le ya hace! (Le con el Juan 14:12.) Gendeh se quierre decir que puede kita hace maga milagro igual con el cosa le ya hace. Sino, el de suyu maga siguidores hay predica y enseña na mas manada teritorio, na mas manada gente y na mas largo tiempo que con ele.

15. Cosa kita debe pregunta na diaton mismo cuerpo y porque?

¹⁵ Si ta trabaja tu, pregunta con el de tuyu mismo cuerpo: ‘Conocido ba conmigo como buen trabajador? Ta hace ba yo enbuenamente con el de mio trabajo y ta hace acaba con este na hora?’ Si positivo el de tuyu contestacion, grande el posibilidad que confia contigo el de tuyu amo. Y baka mas queda interesao na buen noticia el de tuyu maga uban na trabajo. Si acerca na trabajo predicacion y enseñada, pregunta con el de tuyu mismo cuerpo: ‘Conocido ba conmigo como activo na ministerio? Ta prepara ba yo enbuenamente antes predica? Ta bira ba yo dayun con el maga interesao? Y ta participa ba yo na diferente aspeto del ministerio?’ Si positivo el de tuyu contestacion, hay tiene tu alegria na ministerio.

16. Cosa el mirada de Jesus y del de suyu maga apostoles na descanzo y porque este diferente na mirada del manada gente ahora?

¹⁶ Sabe si Jesus que ele y el de suyu maga dicipulo necesita tiene vez descanza. Pero, manada del maga gente de antes y na diaton tiempo ahora el igual con el rico gente na ilustracion de Jesus. Ese gente ya habla na de suyu mismo cuerpo: “No tu man lingasa. Come, toma y man alegria.” (Luc. 12:19; 2 Tim. 3:4) Ta pensa le que el de con todo importante cosas na vida amo el descanzo y alegria. Pero, si Jesus y el de suyu maga apostoles nuay hace centro el diila vida na diila mismo alegria.

17. Paquemodo kita usa con el diaton tiempo si nuay kita na trabajo?

¹⁷ Ahora, ta pricura kita imita con Jesus. Si nuay kita na trabajo, gendeh lang kita ta descanza sino ta predica tambien con otro y ta atende na maga miting. Gane, ta mira kita con el hacida de dicipulo y atendida de miting como bien importante poreso ta pricura kita regular participa na este maga actividad. (Heb. 10:24, 25) Maskin na vacacion kita, ta atende kita miting y ta busca oportunidad para puede predica con el maga gente.​—2 Tim. 4:2.

18. Cosa quierre el diaton Rey, si Cristo Jesus, que hace kita?

¹⁸ Bien alegre kita cay el diaton Rey, si Cristo Jesus, gendeh ta expecta mas pa na cosa kita puede hace y ta ayuda kanaton para tiene balance mirada na trabajo y descanzo! (Heb. 4:15) Quierre le que tiene kita bastante descanzo. Quierre tambien le que trabaja kita enbuenamente para puede suporta con el diaton personal necesidad y para puede participa na hacida de maga dicipulo. Na siguiente articulo, hay discuti kita si cosa ya hace si Jesus para salva kanaton desde na pagka-esclavo.