Pregunta del Maga Quien Ta Le
El Biblia ya habla que necesita dos testigo o mas pa para resolve con el un asunto. (Num. 35:30; Deut. 17:6; 19:15; Mat. 18:16; 1 Tim. 5:19) Pero bajo na Ley, si el un hombre ya forza “apuera del ciudad” con el un mujer quien para casa ya y ya grita el mujer, nuay le comete adulterio pero el hombre ya comete con este. Si nuay mira el otro con el suceso, porque el mujer inocente pero e l hombre culpable?
El ley na Deuteronomio 22:25-27 amo gendeh para dale mira que culpable el hombre, ciendo claro ya que culpable le. Este ley tan focus na pagka-inocente del mujer. Nota con el contexto.
El maga una versiculo ta menciona acerca na un hombre quien yan sexo “na ciudad” con el un mujer quien para casa ya. Por causa con ese, el hombre ya comete adulterio ciendo ta mira con el mujer quien para casa ya como casao. Quetal el mujer? “Nuay le grita na ciudad.” Si ya grita era le, asigurao puede con ele oi el otro y ayuda con ele. Pero, nuay le grita. Poreso, ya comete le adulterio y sila dos culpable.—Deut. 22:23, 24.
Despues, el Ley ya menciona otro situacion: “Si el hombre ya mira apuera del ciudad con el mujer quien para casa ya y este hombre ya forza con ele, el hombre quien ya forza con el mujer amo lang muri y no hace cosa con el mujer. Nuay comete pecado el mujer y gendeh conviene muri. Semejante este caso na un hombre quien ya ataca y ya mata con el de suyu projimo. Cay ya mira con ele el hombre apuera del ciudad y ya grita el mujer quien para casa, pero nuay quien ya puede salva con ele.”—Deut. 22:25-27.
Na ese situacion, puede kita habla que el maga juez ya creé que “ya grita el mujer . . . pero nuay quien ya puede salva con ele.” Poreso, nuay le comete adulterio. Pero, el hombre culpable de rape y ya comete adulterio cay “ya forza” le con el mujer quien para casa ya.
Entonces, maskin pa este ley tan focus na pagka-inocente del mujer, el texto claro ta dale mira que el hombre culpable de rape y ya comete adulterio. Puede kita asigura que el maga juez hay “investiga con ese enbuenamente” y hace un decision que base na principio que claro ya habla el Dios y cuanto beses le ya repiti.—Deut. 13:14; 17:4; Ex. 20:14.