1-2. Como cosa ya dale mira na experiencia de Angelito, cosa debe hace el cada uno kanaton?

TESTIGO de Jehova ba el de tuyu mayores? Acorda que gendeh tu puede tiene personal relacion con Jehova por causa lang kanila. Ta sirvi man el diaton mayores con Dios o gendeh, cada uno kanaton debe hace manera para tiene buen amistad con Jehova.

² Considera el experiencia del un hermano, si Angelito. Testigo de Jehova el de suyu entero familia. Pero cuando joven pa le, nuay le sinti que cerca le con Dios. Ele ya admiti, “Ta sirvi lang yo con Jehova cay quierre yo hace el cosa ta hace el diamon familia.” Pero, ya decidi si Angelito que dale mas grande tiempo para na lehida del Palabra del Dios y medita con ese. Ya principia tambien le reza mas manada beses con Jehova. Cosa el resulta? Si Angelito ya habla, “Ya aprende yo que el solamente manera para queda yo cerca con el de mio amable Tata, si Jehova, amo si iyo mismo conoce con ele.” El experiencia de Angelito ta manda pensa kanaton este maga importante pregunta: Cosa el diferencia del conoce lang con Jehova y bien conoce con ele? Y cosa kita hace para conoce gayot con Jehova?

3. Cosa el diferencia del conoce lang con Jehova y bien conoce con ele?

³ Puede kita habla que el un persona conoce con Jehova si sabe le el nombre del Dios o si sabe le el cuanto del cosa Le ya  habla y ya hace. Pero, mas pa con ese el necesita para conoce gayot con Jehova. Necesita kita dale tiempo para aprende acerca con Jehova y con el de suyu maga bonito calidad. Na ese manera lang kita puede principia entende si porque le ta habla o ta hace con el un cosa. Ayuda este para sabe kita si ta aproba ba le con el diaton maga opinion, decision y accion. Si sabe ya kita si cosa el querrer de Jehova para kanaton, necesita kita hace con el cosa kita ya aprende.

4. Na cosa manera puede ayuda kanaton si considera kita con el maga ejemplo na Biblia?

⁴ Posible que el cuanto maga gente hay gangguia kanaton cay quierre kita sirvi con Jehova. Y baka mas man contra sila kanaton si principia kita atende maga miting. Pero si confia kita con Jehova, gendeh gayot le deja kanaton. Hay principia kita tiene buen amistad con Dios que hay esta hasta para cuando. Puede ba gayot kita conoce con Jehova na ansina manera? Si, puede! El ejemplo del maga imperfecto gente igual con Moises y Rey David ta dale prueba que posible se. Mientras considera kita con el cosa sila ya hace, hay contesta kita con el dos pregunta: Paquemodo sila ya conoce con Jehova? Y cosa maga leccion kita puede aprende na diila maga ejemplo?

5. Cosa si Moises ya iscuji hace?

⁵ Ya hace si Moises con el cosa le ya aprende. Cuando maga 40 año si Moises, ya iscuji le que man junto con el maga siervo del Dios, el maga Hebreo, contra queda conocido como el “anak del anak mujer del Faraon.” (Heb. 11:24) Ya deja si Moises con el de suyu prominente posicion. Cuando ya suporta le con el maga Israelita, sabe le que hay queda bien rabiao el Faraon. Este rey bien poderoso y ta mira con ele el otro como un dios. Bien grande el fe de Moises! Ya confia le con Jehova. Y ese confianza amo el ya hace posible para tiene buen amistad si Moises con Jehova.​—Prov. 3:5.

6. Cosa kita puede aprende na ejemplo de Moises?

⁶ Cosa el leccion para kanaton? Igual con Moises, todo kita necesita hace decision: Iscuji ba kita sirvi con Dios y man junto con el de suyu maga siervo? Posible, necesita kita hace maga sacrificio para sirvi con Dios y baka man contra kanaton aquellos quien no conoce con Jehova. Pero si ta confia kita con el diaton Tata na cielo, asigurao kita que suporta le kanaton.

7-8. Cosa ya continua aprende si Moises?

⁷ Si Moises ya continua aprende acerca na maga calidad de Jehova y ya hace De Suyu voluntad. Por ejemplo, cuando ya habla con Moises que guia le con el maga Israelita pasalida na Egipto, falta le confianza y cuanto beses ya habla con Jehova que gendeh le cualificao. Con compasion con ele ya contesta el Dios y ya ayuda con ele. (Ex. 4:10-16) Como resulta, ya puede habla si Moises el juzgamiento del Dios con el Faraon. Ya puede mira si Moises si paquemodo ya usa si Jehova con el De Suyu poder cuando ya salva Le con el maga Israelita pero ya destroza con el Faraon y con el de suyu maga soldao na Colorao Mar.​—Ex. 14:26-31; Sal. 136:15.

⁸ Despues sale na Egipto el maga Israelita, pirmi sila ta reclama con Moises. Maskin pa ansina, ya mira si Moises si paquemodo de grande el paciencia de Jehova con el de suyu maga siervo cuando ya libra Le kanila. (Sal. 78:40-43) Ya puede tambien mira si Moises con el humildad de Jehova cuando nuay Le destroza con el maga Israelita cay amo se el ya pidi pabor si Moises.​—Ex. 32:9-14.

9. Asegun na Maga Hebreo 11:27, paquemodo de cerca el relacion de Moises y de Jehova?

 ⁹ Despues sale el maga Israelita na Egipto, mas ya queda cerca el relacion de Moises con Jehova que dol ta puede ya le mira con el de suyu Tata na cielo. (Le con el Maga Hebreo 11:27.) Gane para dale mira si paquemodo de cerca el diila relacion, el Biblia ya habla: “Si Jehova cara-cara yan cuento con Moises, igual si paquemodo el un gente tan cuento na otro gente.”​—Ex. 33:11.

10. Para conoce gayot con Jehova, cosa kita debe hace?

¹⁰ Cosa el leccion para kanaton? Para conoce gayot con Jehova, gendeh lang kita debe aprende acerca con el de suyu maga calidad. Sino, debe tambien kita hace con el de suyu voluntad. El voluntad de Jehova ahora amo que “todo el maga gente ay salva y ay alcanza el completo conocimiento del verdad.” (1 Tim. 2:3, 4) Un manera que ta hace kita con el voluntad del Dios amo si ta enseña kita con otro acerca con Jehova.

11. Mientras ta enseña kita con otro acerca con Jehova, na cosa manera mas ta puede kita conoce con ele?

¹¹ Si ta enseña kita con otro acerca con Jehova, mas ta puede kita conoce con ele. Por ejemplo, ta puede kita mira con el compasion de Jehova si ta ayuda le kanaton busca con aquellos quien tiene justo condicion de corazon. (Juan 6:44; Act. 13:48) Ta puede kita mira con el poder del Palabra del Dios si ta observa kita que el diaton maga Bible study ya descanza ya na maga mal practica y ta principia hace cambio na diila personalidad. (Col. 3:9, 10) Y ta puede kita mira el paciencia del Dios cay ta dale le manada oportunidad con el maga gente para aprende acerca con ele y para salva.​—Roma 10:13-15.

12. Como cosa ya dale mira na Exodo 33:13, cosa ya pidi si Moises y porque?

¹² Si Moises nuay hace no vale nada el de suyu relacion con Jehova. Maskin pa ya usa con ele si Jehova para hace maga milagro, ya pidi le siempre que ayuda con ele conoce pa mas con Jehova. (Le con el Exodo 33:13.) Mas de 80 año ya si Moises cuando ya pidi le este con Jehova, pero sabe le que bien manada pa le cosa debe aprende acerca con el de suyu amable Tata na cielo.

13. Cosa el un manera que puede kita dale mira que valoroso kanaton el diaton buen amistad con Dios?

¹³ Cosa el leccion para kanaton? Maskin pa ya dura ya kita ta sirvi con Jehova, gendeh kita debe hace no vale nada el diaton relacion con ele. Un manera que puede kita dale mira que valoroso kanaton el diaton buen amistad con ele amo si tan cuento kita con ele por medio na rezo.

14. Porque bien importante el rezo para puede kita aprende mas acerca con Dios?

¹⁴ Si quierre tu queda cerca con el un persona, necesita tu pirmi man cuento con ele. Poreso para tiene cerca relacion con Dios, reza con ele pirmi y no tiene miedo habla con ele si cosa tu ta pensa y ta sinti. (Ef. 6:18) Si Krista, quien ta queda na Turkey, ya habla: “Mas ta queda grande el de mio amor y confianza con Jehova cada vez ta reza yo y ta mira que ta ayuda le conmigo. Si ta mira yo si paquemodo le ta contesta con el de mio rezo, ta ayuda este para mira yo con Jehova como un Tata y Amigo.”

15. Cosa ya habla si Jehova acerca con David?

¹⁵ Cuando ya nace si Rey David, el de suyu mayores y todo alrededor con ele ta adora con Jehova. Pero, nuay lang basta sigui si David si cosa ta hace el de suyu familia. Ele mismo ya hace manera para tiene buen amistad con Dios y si Jehova ya ama gayot con ele. Si Jehova mismo ya habla que “ya gusta gayot” le con  David. (Act. 13:22) Na cosa manera si David ya tiene bien cerca relacion con Jehova?

16. Cosa ya aprende si David cuando ya observa le con el maga creacion?

¹⁶ Ya aprende si David acerca con Jehova na maga creacion. Cuando joven si David, manada hora le apuera del casa y ta vicia con el maga carnero del de suyu tata. Posible, este el tiempo que ya principia le medita acerca na maga cosas que ya crea si Jehova. Por ejemplo, si ta mira si David con el cielo durante el noche, gendeh lang le ta mira con el bien manada estrellas. Sino, ta puede le mira con el maga calidad del quien ya crea con ese. Poreso, si David ya escribi: “El cielo ta declara con el gloria del Dios; el universo ta proclama con el trabajo del de suyu mano.” (Sal. 19:1, 2) Cuando ya pensa si David si paquemodo ya hace con el maga gente, ya puede le mira si paquemodo de sabio si Jehova. (Sal. 139:14) Mientras ta medita si David con el maga cosa ya hace si Jehova, ya puede le realiza si paquemodo le de diutay si compara con Dios.​—Sal. 139:6.

17. Cosa kita puede aprende si medita kita con el maga creacion?

¹⁷ Cosa el leccion para kanaton? Queda interesao na maga creacion. No lang basta existi aqui na un bien bonito mundo que ya crea si Jehova. Dale tiempo para observa con ese. Cada dia, medita si cosa contigo ta enseña el maga creacion​—maga siembra, animal y gente—​acerca con Jehova. Como resulta, cada dia tiene tu cosa nuevo puede aprende acerca con el de tuyu amable Tata. (Roma 1:20) Y cada dia, puede tu sinti que mas ta queda hondo el de tuyu amor para con ele.

18. Como cosa ya dale mira na Salmo 18, cosa ya realiza si David?

¹⁸ Ya puede realiza si David que ta ayuda con ele si Jehova. Por ejemplo, cuando ya protege le con el carnero del de suyu tata contra na leon y oso, ya puede le mira que ya ayuda con ele si Jehova para mata con aquel maga animal. Cuando ya ganá le contra con el gigante soldao, si Goliat, claro ya puede mira si David que ta guia con ele si Jehova. (1 Sam. 17:37) Y cuando ya puede le escapa con Rey Saul, ya mira si David que si Jehova el ya salva con ele. (Sal. 18, superscription) El un orgulloso persona posible pensa que ya puede quel ele hace por causa na de suyu mismo cuerpo. Pero humilde si David poreso ya realiza le que ta ayuda con ele si Jehova.​—Sal. 138:6.

19. Cosa kita puede aprende na ejemplo de David?

¹⁹ Cosa el leccion para kanaton? Gendeh lang kita debe pidi con el ayuda de Jehova. Sino, debe tambien kita mira si cuando y paquemodo le ta ayuda kanaton. Si humilde kita y ta admiti con el diaton maga limitacion, claro kita puede mira que ta ayuda kanaton si Jehova para hace el maga cosas que no puede kita hace. Y cada vez ta mira kita que ta ayuda kanaton si Jehova, mas ta queda fuerte el diaton relacion con ele. Ya experiencia este el un hermano na Fiji, si Isaac, quien por cuanto año ya ta sirvi con Jehova. Ele ya habla: “Si ta acorda yo con el de mio maga pasada, ta puede yo mira si paquemodo ya ayuda conmigo si Jehova desde ya principia yo estudia con el Biblia hasta ahora. Como resulta, bien deverasan conmigo si Jehova.”

20. Cosa kita puede aprende na relacion de David con Dios?

²⁰ Ya imita si David con el maga calidad de Jehova. Ya crea kanaton si Jehova que tiene abilidad imita con el de suyu maga calidad. (Gen. 1:26) Si mas ta aprende kita acerca na personalidad de Jehova, mas puede kita imita con ele. Bien conoce si David con el de suyu Tata na cielo poreso ya puede le imita con  Ele na de suyu tratamiento con el otro maga gente. Considera kita un ejemplo. Maskin pa ya comete pecado si David contra con Jehova cuando ya comete le adulterio junto con Batseba y ya hace manera para muri el marido de este, ya dale mira lastima si Jehova con David. (2 Sam. 11:1-4, 15) Por causa este cay ya imita si David con Jehova y ya dale mira lastima con otro. Cay tiene buen relacion si David con Jehova, ya ama gayot con ele el maga Israelita y ya usa con ele si Jehova como ejemplo para na otro maga rey del Israel.​—1 Rey 15:11; 2 Rey 14:1-3.

21. Harmonia na Efeso 4:24 y 5:1, cosa el maga resulta si “imita [kita] con el Dios”?

²¹ Cosa el leccion para kanaton? Necesita kita “imita con el Dios.” Si hace kita se, hay beneficia kita y hay aprende pa mas acerca con ele. Si ta imita kita con el de suyu maga calidad, ta dale tambien kita mira que maga anak kita de suyu.​—Le con el Efeso 4:24; 5:1.

22-23. Cosa sucede si aplica kita con el cosa kita ya aprende acerca con Jehova?

²² Como cosa kita ya discuti, puede kita aprende acerca con Jehova por medio na de suyu maga creacion y de suyu Palabra, el Biblia. Lleno ese libro de maga ejemplo del maga fiel siervo del Dios con quien kita puede imita, igual con Moises y David. Ya hace ya si Jehova el de suyu parte. Necesita kita hace el diaton parte y hace el todo para aprende pa mas acerca con ele.

²³ Hay continua kita aprende acerca con Jehova. (Ecl. 3:11) Pero, gendeh importante si paquemodo de manada kita sabe acerca con ele sino si cosa kita hace con el cosa kita sabe. Si aplica kita con el cosa kita ya aprende y pricura imita con el diaton amable Tata, hay continua le queda cerca kanaton. (Sant. 4:8) Por medio na de suyu Palabra, ta asigura le kanaton que nunca le abandona con aquellos quien ta busca con ele.