Puede ba tu contesta con este maga pregunta base na El Torre de Guardia de 2019?

Cosa quierre decir del promesa del Dios: “Maskin cosa armas hace contra contigo gendeh tiene buen exito”? (Isa. 54:17)

Puede kita confia que protege kanaton el Dios contra na “rabia de aquellos quien ta maltrata.” (Isa. 25:4, 5) El diaton maga enemigo gendeh puede hace cosas que tiene permanente mal efecto kanaton.​—w19.01, p. 6-7.

Na cosa manera ya dale mira justicia el Dios na de suyu tratamiento na maga Canaanita y na maga gendeh obediente Israelita?

Ya juzga el Dios con aquellos quien ya comete maga maka-asco acto de sexo o ya maltrata con el maga mujer y bata. Ya bendici le con el maga obediente y con aquellos quien ya trata con otro con justicia.​—w19.02, p. 22-23.

Cosa kita hace si talli kita na un situacion donde ta reza el maga gendeh siervo de Jehova?

Puede kita esta silencio y dale mira respeto pero gendeh kita habla “amen” o man agarrajan mano. Puede kita reza na diaton pensamiento.​—w19.03, p. 31.

Paquemodo de serioso el abuso na maga bata?

El abuso na maga bata un culpa contra na victima, na congregacion, na gobierno y con Dios. Ta obedece el maga anciano con el ley del gobierno que reporta si tiene quien ya abusa bata.​—w19.05, p. 9-10.

Cosa tu hace para cambia si paquemodo tu ta pensa?

El maga importante cosas amo: Reza con Jehova. Medita y examina con el de tuyu mismo cuerpo. Iscuji enbuenamente con el de tuyu maga amigo.​—w19.06, p. 11.

Cosa kita hace ahora para queda preparao na persecucion?

Necesita kita hace fuerte con el diaton relacion con Jehova. Queda convincido que ta ama y nunca le abandona kanaton. Le con el Biblia todo el dia y pirmi reza. Queda convincido que el maga bendicion del Reino hay cumpli. Man memorize texto y cancion que ta alaba con Jehova.​—w19.07, p. 2-4.

Cosa kita hace para ayuda con el diaton maga pariente para salva sila?

Importante que dale kita mira empatia, pagka-bueno y queda paciencioso.​—w19.08, p. 15-17.

Porque kita puede sinti alivio, igual na cosa ya promete si Jesus na Mateo 11:28?

Tiene kita maga amable overseer, maga buen amigo y el de con todo buen trabajo.​—w19.09, p. 23.

Paquemodo el Dios ta dale kanaton el deseo y fuerza para actua? (Fil. 2:13)

Si le kita con el Palabra del Dios y medita con ese, el Dios puede kanaton dale deseo para hace el de suyu voluntad y el fuerza para actua. El de suyu espiritu puede ayuda para progresa el diaton maga abilidad.​—w19.10, p. 21.

Cosa kita debe hace antes hace un serioso decision?

El cinco cosas amo: Man research enbuenamente. Reza para na sabeduria. Examina de tuyu motivo. Queda especifico. Queda realistico.​—w19.11, p. 27-29.

El idea que el alma gendeh ta muri ya principia ba na cosa ya habla si Satanas con Eva?

Gendeh. Si Satanas ya habla con Eva que gendeh le muri. Nuay le habla con Eva que dol muri lang le. Ya termina el todo falso religioso idea durante el Avenida. Poreso, el enseñanza acerca na alma que gendeh ta muri posible ya principia antes hace calayat el Dios con el maga gente quien ya planta con el torre de Babel.​—w19.12, p. 15.