Gendeh. Nuay habla el Diablo con Eva que si come le con el fruta que ya prohibi el Dios, dol muri lang le pero tiene parte del suyu cuerpo (que ta llama ahora el otro como el alma que gendeh ta muri) hay esta vivo na otro lugar. Por medio na culebra, si Satanas ya clama que si come si Eva con el fruta de aquel pono, ‘gendeh gayot le muri.’ Ya hace sale si Satanas que si Eva hay continua vivi y tiene mas alegre vida aqui na tierra que gendeh ta depende con Dios.​—Gen. 2:17; 3:3-5.

Si nuay origina na Eden el falso doctrina acerca na alma que gendeh ta muri, del cuando este ya principia? Gendeh kita puede habla si cuando gayot. Pero sabe kita que ya termina con el todo falso adoranza durante el Avenida na tiempo de Noe. Ya perde el todo falso religioso idea durante el Avenida ciendo si Noe y el de suyu familia lang​—quien ta adora con Dios—​el ya salva.

Poreso, el enseñanza acerca na alma que gendeh ta muri asigurao ya principia despues del Avenida. Cuando ya trambulica el Dios con el maga lengguaje na Babel y yan calayat el maga gente “na entero mundo,” asigurao que ya lleva sila con el falso idea que el gente tiene alma que gendeh ta muri. (Gen. 11:8, 9) Maskin cuando pa ya principia ese falso idea, puede kita asigura que estaba este con el “tata del imbusterias” que si Satanas Diablo y alegre le cay yan calayat este.—Juan 8:44.