1-2. Cosa el bonito esperanza del maga siervo de Jehova?

BIEN importante que tiene kita esperanza. El cuanto maga gente ta esperanza que hay tiene sila un alegre matrimonio, tiene buen salud el diila maga anak o queda sila bueno na diila enfermedad. Maskin kita maga Cristiano, posible ta esperanza tambien con ese. Pero gendeh lang ese el cosa kita ta esperanza. Ta esperanza kita que vivi hasta para cuando y vivi otravez el diaton familia, amigo y amiga quien ya muri.

² Si apostol Pablo ya habla: “Tiene tamen yo el mismo esperanza que . . . el maga gente bueno y el maga pecador ay resucita.” (Act. 24:15) Gendeh si Pablo el primer persona quien yan cuento acerca na esperanza de resureccion. El patriarca que si Job tambien. Ta confia le que el Dios hay acorda con ele y hace con ele vivi otravez.​—Job 14:7-10, 12-15.

3. Porque puede ayuda kanaton el 1 Corinto capitulo 15?

³ “El resureccion del maga muerto” amo parte del “primero maga leccion” del todo enseñanza del maga Cristiano. (Heb. 6:1, 2) El maga cosas que ya discuti si Pablo acerca na resureccion puede incuntra na 1 Corinto capitulo 15. Asigurao que el cosa le ya escribi ya puede gayot anima con el maga Cristiano del primer siglo. Y ese capitulo puede anima kanaton y hace fuerte con el diaton esperanza que posible ya dura ya kita ta espera.

4. Porque kita puede asigura que hay resucita con aquellos con quien kita ta ama?

⁴ El resureccion de Jesucristo ta asigura kanaton que si muri aquellos con quien kita ta ama, hay resucita kanila. Parte este del “Buen Noticia” que ya predica si Pablo na maga de Corinto. (1 Cor. 15:1, 2) Gane, ya habla le que si el un Cristiano gendeh ta creé na resureccion, el de suyu fe hay queda no vale  nada. (1 Cor. 15:17) El resureccion de Jesus amo el razon si porque kita puede creé que hay resucita tambien con otro.

5-6. Cosa quierre decir para kanaton del cosa ta menciona na 1 Corinto 15:3, 4?

⁵ Cuando ya principia discuti si Pablo acerca na resureccion, ya menciona le tres verdad. Este amo (1) “si Jesucristo ya muri por causa del diaton maga pecado.” (2) “Ya enterra” con ele. (3) “Na ica-tres dia ya resucita Le asegun na Escritura.”​—Le con el 1 Corinto 15:3, 4.

⁶ Cosa quierre decir para kanaton del muerte, intierro y resureccion de Jesus? Si profeta Isaias ya predicta que hay “quita con [el Mesias] na tierra del maga vivo” y hay “dale con ele sepultura junto con el maga malo.” Pero tiene pa otro cosa sucede. Ya habla tambien si Isaias que el Mesias hay ‘carga con el pecado del manada gente.’ Ya hace este si Jesus cuando ya dale le el de suyu vida como un rescate. (Isa. 53:8, 9, 12; Mat. 20:28; Roma 5:8) Poreso, el muerte, intierro y resureccion de Jesus ta hace fuerte con el diaton confianza que hay libra kanaton na pecado y muerte y man junto kita otravez con aquellos con quien kita ta ama quien ya muri.

7-8. Cosa ya dale asiguranza con el maga Cristiano que ya resucita con Jesus?

⁷ El diaton esperanza de resureccion conectao na resureccion de Jesus, poreso necesita kita queda convincido que ya resucita con ele. Porque kita puede asigura que ya hace vivi otravez si Jehova con Jesus?

⁸ Manada el quien ya puede mira que ya resucita con Jesus y ya habla tambien se sila con otro. (1 Cor. 15:5-7) El primer testigo na lista de Pablo amo si apostol Pedro (Cefas). Un grupo de maga dicipulo el ya confirma que si Pedro ya mira con Jesus despues este resucita. (Luc. 24:33, 34) Omento pa, el doce maga apostoles ya mira tambien con ele. Despues, “ya aparece [el Cristo] con mas de quinientos del maga hermano y hermana na un tiempo lang,” posible na un miting na Galilea que ya menciona na Mateo 28:16-20. Mas pa, “ya aparece Le con Santiago” que posible el de suyu hermano na nana quien gendeh ta creé del una que ele el Mesias. (Juan 7:5) Despues mira con Jesus, ya queda convincido si Santiago. Del maga 55 C.E. cuando ya escribi si Pablo con este carta, vivo pa el manada del maga quien ya mira con Jesus despues este resucita. Poreso, el maga quien tan duda puede kanila pregunta.

9. Asegun na Maga Actividad 9:3-5, porque si Pablo puede dale evidencia que ya resucita con Jesus?

⁹ Nuay dura, ya aparece si Jesus con Pablo mismo. (1 Cor. 15:8) Para na Damasco si Pablo (Saul) cuando ya puede le oi con el voz de Jesus y ya mira con ele na cielo por medio na un vision. (Le con el Maga Actividad 9:3-5.) El cosa ya experiencia si Pablo ta hace mas fuerte con el evidencia que el resureccion de Jesus deverasan.​—Act. 26:12-15.

10. Cosa ya hace si Pablo cay ta creé le que ya resucita con Jesus na muerte?

¹⁰ El cuanto maga gente posible hay queda gayot bien interesao na cosa ya habla si Pablo cay antes con ele aparece si Jesus, ta persigui le con el maga Cristiano del una. Despues queda convincido que ya resucita con Jesus, ya hace esfuerzo si Pablo para convinci con otro na este verdad. Ya latiga con ele, ya hace preso y ya experiencia que ya sumi el barco mientras ta predica le con el verdad que si Jesus ya muri pero ya vivi otravez. (1 Cor. 15:9-11; 2 Cor. 11:23-27) Bien convincido gayot si Pablo que ya resucita con Jesus na muerte cay preparao le muri para defende con el cosa  le ta creé. Gendeh ba ta convinci contigo este evidencia del maga Cristiano del primer siglo que ya resucita con Jesus na muerte? Y gendeh ba este ta hace fuerte con el de tuyu creencia na resureccion?

11. Porque posible el cuanto na Corinto tiene gendeh justo mirada acerca na resureccion?

¹¹ El cuanto na Griego ciudad de Corinto tiene gendeh justo mirada acerca na resureccion. Gane, el cuanto kanila ta habla que “el maga muerto gendeh dao ay resucita.” Porque? (1 Cor. 15:12) El cuanto maga gente que educao na filosofia na otro Griego ciudad na Atenas ta gangguia con el idea que ya resucita con Jesus. Posible, ese creencia ya afecta con el cuanto na Corinto. (Act. 17:18, 31, 32) El otro posible ta pensa que gendeh literal el resureccion​—quierre decir, “muerto” el un persona cay pecador le pero ya queda le “vivo” cuando ya queda le un Cristiano. Maskin cosa pa el diila razon, envano lang el diila fe cay gendeh sila ta creé na resureccion. Si el Dios nuay resucita con Jesus, nuay rescate y gendeh puede perdona con el diaton maga pecado. Poreso, nuay esperanza aquellos quien gendeh ta creé na resureccion.​—1 Cor. 15:13-19; Heb. 9:12, 14.

12. Uyun na 1 Pedro 3:18, 22, cosa el diferencia del resureccion de Jesus na resureccion de aquellos con quien ya resucita del antes?

¹² Sabe mismo si Pablo que el “Cristo ya resucita entre na maga muerto.” Ese resureccion mas bueno que con el resureccion de aquellos quien ya vivi otravez aqui na tierra pero ya muri lang otravez. Si Pablo ya habla que si Jesus amo “el primer fruta de todo aquellos quien ya muri.” Na cosa manera primer fruta si Jesus? Ele el primer persona con quien ya resucita como un espiritu creatura y el primer gente quien ya resucita para na cielo.​—1 Cor. 15:20; Act. 26:23; le con el 1 Pedro 3:18, 22.

13. Asegun con Pablo, cosa el diferencia de Adan con Jesus?

¹³ Paquemodo el muerte del un gente puede hace bira con el vida del millones? Si Pablo claro ya contesta con ese pregunta. Ya explica le si cosa el diferencia na cosa ya sucede na maga gente por causa na cosa ya hace si Adan y si cosa el ya queda posible por medio del Cristo. Acerca con Adan, si Pablo ya escribi: “El muerte ya entra na mundo por medio de un gente.” Cuando ya culpa si Adan, ya causa le con el de suyu mismo muerte y con el de suyu maga descendiente. Ta continua kita sufri por causa na efecto del de suyu desobediencia. Bien diferente gayot el resulta cay ya resucita el Dios con el de suyu Anak! “Por medio de un gente tamen [si Jesus] ya entra el resureccion del maga muerto. Igual como todo el maga gente ya muri na persona de Adan,” ya habla si Pablo, “ansina tamen todo sila ay vivi otra vez na persona de Cristo.”​—1 Cor. 15:21, 22.

14. Hay resucita ba con Adan? Explica.

¹⁴ Cosa quierre decir de Pablo cuando ya habla le que “todo el maga gente ya muri na persona de Adan”? Tan cuento si Pablo acerca na todo maga gente quien ya hereda con el pecado y imperfeccion estaba con Adan y por causa de ese todo hay muri. (Roma 5:12) Gendeh entrao si Adan con aquellos quien “ay vivi otra vez.” El rescate del Cristo gendeh puede tapa con el de suyu pecado, ciendo un perfecto gente si Adan quien intencional ya desobedece con Dios. El cosa ya sucede con Adan amo tambien el cosa sucede con aquellos con quien “el Anak del Gente” hay juzga como  “cabrito” que amo el “castigo eterno.”​—Mat. 25:31-33, 46; Heb. 5:9.

15. Quien el incluido na “todo” quien “ay vivi otra vez”?

¹⁵ Nota que ya habla si Pablo que “todo sila ay vivi otra vez na persona de Cristo.” (1 Cor. 15:22) Si Pablo ya escribi con el de suyu carta para na maga iscujido Cristiano na Corinto quien hay resucita para na cielo. “Ya santifica y ya hace unido con Cristo Jesus, ya llama para queda maga sagrao” con este maga Cristiano. Y ya menciona si Pablo con “aquellos quien ya muri unido con Cristo.” (1 Cor. 1:2, NWT; 15:18; 2 Cor. 5:17) Na otro inspirao carta de Pablo, ele ya escribi que aquellos “unido con Cristo por medio de un muerte semejante con el disuyo muerte, ay queda . . . unido con Ele por medio de un Resureccion semejante con el disuyo resureccion.” (Roma 6:3-5) Ya resucita con Jesus como un espiritu persona y despues ya subi na cielo. Poreso, amo tambien se el cosa sucede con el todo “unido con Cristo,” que amo el todo iscujido Cristiano.

16. Cosa quierre decir de Pablo cuando ya llama le con Jesus como “el primer fruta”?

¹⁶ Si Pablo ya escribi que ya resucita con el Cristo como “el primer fruta de todo aquellos quien ya muri.” Acorda que ya resucita tambien con el otro aqui na tierra igual con Lazaro, pero si Jesus amo el primero con quien ya resucita como un espiritu y ya ricibi vida hasta para cuando. Puede con ele compara na maga primer fruta del cosecha que ya ofrece el maga Israelita con Dios. Mas pa, ciendo ya llama le con Jesus como “el primer fruta,” ta habla si Pablo que tiene tambien man sunod con quien hay resucita para na cielo. El maga apostoles y el otro “unido con Cristo” hay man sunod con Jesus. Na justo tiempo, hay experiencia sila con el resureccion que semejante con el de Jesus.

17. Cuando ricibi aquellos “unido con Cristo” con el diila premio na cielo?

¹⁷ El resureccion de aquellos “unido con Cristo” para na cielo nuay principia na tiempo cuando ya escribi si Pablo con el maga de Corinto. Sino, ya indica si Pablo que hay sucede este na futuro: “Cada y cual asegun na disuyo rango: Una con todo si Cristo y despues, na dia del disuyo llegada, aquellos quien [de] Cristo.” (1 Cor. 15:23; 1 Tes. 4:15, 16) Ahora, ta vivi kita na tiempo del “llegada” o presencia del Cristo. El maga apostoles y el otro maga iscujido Cristiano quien ya muri necesita espera con ese tiempo para ricibi con el diila premio na cielo y ‘queda unido con Jesus  por medio de un resureccion semejante con el disuyo resureccion.’

18. (a) Porque kita puede habla que tiene resureccion man sunod despues del resureccion para na cielo? (b) Asegun na 1 Corinto 15:24-26, cosa hay sucede na cielo?

¹⁸ Pero quetal el todo leal Cristiano quien nuay esperanza vivi na cielo junto con el Cristo? Tiene tambien sila el esperanza de resureccion. El Biblia ya habla que si Pablo y el otro quien subi na cielo hay ricibi con el “primero resurreccion.” (Rev. 20:6) Gendeh ba ta dale este mira que tiene otro resureccion que man sunod con ese? Harmonia se na cosa ya habla si Job acerca na de suyu futuro. (Job 14:15) “Na dia del disuyo llegada, aquellos [de] Cristo” junto ya con Jesus na cielo na tiempo que hay destroza le con el todo gobierno, autoridad y poder. Maskin “el ultimo contrario . . . el Muerte,” hay perde ya. Asigurao todo aquellos con quien ya resucita para na cielo nunca mas hay muri. Pero quetal el otro?​—Le con el 1 Corinto 15:24-26.

19. Cosa puede expecta aquellos quien tiene esperanza aqui na tierra?

¹⁹ Cosa puede expecta aquellos quien tiene esperanza aqui na tierra? Tiene sila esperanza base na cosa ya habla si Pablo: “Tiene tamen yo el mismo esperanza que . . . el maga gente bueno y el maga pecador [“gendeh recto,” NWT] ay resucita.” (Act. 24:15) Asigurao, nuay gendeh recto persona el puede anda na cielo, poreso este maga palabra ta dale mira que tiene otro resureccion aqui na tierra na futuro.

20. Na cosa manera mas ya queda fuerte el de tuyu confianza que hay tiene resureccion?

²⁰ Sin duda, “el maga gente . . . ay resucita”! Aquellos quien hay vivi otravez aqui na tierra tiene el esperanza que vivi hasta para cuando. Puede tu confia con ese promesa. Ese esperanza puede contigo dale comforta acerca con el de tuyu familia, amigo y amiga quien ya muri. Puede sila vivi otravez na tiempo cuando el Cristo y el otro “ay reina . . . por un mil año.” (Rev. 20:6) Puede tambien tu asigura que si hay muri tu antes principia el Milenio, asigurao hay resucita contigo. Este “esperanza gendeh ay falla canaton.” (Roma 5:5) Puede este hace fuerte contigo ahora y omenta na de tuyu alegria mientras ta sirvi con Dios. Pero tiene pa kita cosa puede aprende na 1 Corinto capitulo 15, como cosa hay discuti na siguiente capitulo.