COSA tu sinti si ta ricibi tu carta estaba na de tuyu amigo? El Cristiano dicipulo que si Timoteo ya ricibi ansina clase de carta estaba con apostol Pablo. Este carta amo el 2 Timoteo. Asigurao ya busca un silencio lugar si Timoteo para le con el carta estaba na de suyu amable amigo. Posible ya pensa si Timoteo: ‘Quetal gaha si Pablo? Tiene ba le consejo para puede conmigo ayuda na de mio assignment? Este ba carta puede ayuda conmigo para progresa na ministerio y ayuda con otro?’ Como cosa kita hay sabe ya incuntra si Timoteo con el contestacion de ese maga pregunta y el otro pa maga importante cosas. Na este articulo, hay discuti kita con el cuanto consejo que puede incuntra na este carta.

Cuando ya principia le si Timoteo con el carta, ya sinti dayun le que ta ama gayot con ele si Pablo. Gane, ya llama con ele si Pablo “mi estimao hijo na fe.” (2 Tim. 1:2, El Nuevo Testamento) Maga 65 C.E., ya ricibi si Timoteo con el carta y posible mas de 30 año ya le y un experienciao anciano ya. Mas de un decada ya le tan junto con Pablo na ministerio y manada ya le cosa ya aprende.

Asigurao, ya puede gayot anima con Timoteo cuando ya sabe le que ya esta fiel si Pablo mientras ta enfrenta persecucion. Preso si Pablo na Roma y cerca ya con ele mata. (2 Tim. 1:15, 16; 4:6-8) Ya puede habla si Timoteo que animoso este apostol cay si Pablo ya habla: “Ta aguanta yo este todo.” (2 Tim. 2:8-13) Igual con Timoteo, puede tambien hace fuerte kanaton el buen ejemplo de Pablo.

Ya anima si Pablo con Timoteo que mira con el de suyu assignment na servicio con Dios como un valoroso cosa. Quierre si Pablo que si Timoteo hay ‘hace vivi oleh el regalo espiritual que el Dios ya dale con ele.’ (2 Tim. 1:6) Ya usa si Pablo con el palabra khaʹri·sma para na “regalo.” Ese Griego palabra ta refiri na un libre y incomparable regalo. Ya ricibi si Timoteo con este regalo cuando ya iscuji con ele para sirvi na congregacion na un especial manera.​—1 Tim. 4:14.

 Cosa hace si Timoteo con este regalo? Mientras ta le ele con el expresion ‘hace vivi oleh,’ posible ta pensa le con el fuego que ta hace el maga gente na casa que tiene vez ta queda ya lang braza. Necesita hace suhnod con ese braza para arde y queda mas caliente. El un diccionario ya habla que el Griego termino (a·na·zo·py·reʹo) que ya usa si Pablo quierre decir “hace bira, hace vivi, hace arde.” Este quierre decir que “queda con gana y queda activo acerca na un trabajo.” Poreso, dol ta habla si Pablo con Timoteo: ‘Hace el todo na de tuyu assignment!’ Necesita tambien kita hace igual ansina ahora​—queda activo na diaton servicio.

Na carta de Pablo, tiene le otro cosa ya habla que puede ayuda na ministerio de Timoteo. Si Pablo ya escribi: “Cuida embuenamente el verdad ya confia contigo el Espiritu Santo quien ta esta adentro canaton.” (2 Tim. 1:14) Cosa el un precioso cosa que ya confia con Timoteo? Na versiculo antes con ese, ya refiri si Pablo con el “buen insiñanza,” el verdad que puede incuntra na Escritura. (2 Tim. 1:13) Como un Cristiano ministro, necesita predica si Timoteo con el verdad adentro y apuera del congregacion. (2 Tim. 4:1-5) Ya iscuji tambien con Timoteo como un anciano para cuida con el maga carnero del Dios. (1 Ped. 5:2) Puede si Timoteo cuida con el precioso cosa que ya dale con ele​—el verdad que necesita le enseña—​si confia le na sagrao espiritu de Jehova y na De Suyu Palabra.​—2 Tim. 3:14-17.

Ahora, ya dale tambien kanaton el verdad que ta enseña kita con otro. (Mat. 28:19, 20) Puede kita mentena con el diaton apresacion para con este valoroso verdad si continua kita reza y regular estudia con el Palabra del Dios. (Roma 12:11, 12; 1 Tim. 4:13, 15, 16) Posible tiene tambien kita omento assignment que sirvi igual como un anciano o full-time na ministerio. Este precioso assignment debe kanaton hace humilde y confia na ayuda del Dios. Poreso, puede kita cuida y protege con ese precioso cosas si dale kita valor y confia na ayuda de Jehova para cuida con ese.

Parte del assignment de Timoteo amo que man train con otro que hace con el trabajo que ta hace le. Poreso, ya anima si Pablo con Timoteo: “Ya puede tu oi todo el maga cosa-cosa que ya insiña yo. . . . Dale se con el maga gente de comfianza, para ay puede tamen sila insiña con otros.” (2 Tim. 2:2) Ya hace acorda si Pablo con Timoteo que enseña el todo cosas le ya aprende na otro maga hermano. Importante que el cada anciano na congregacion que pricura hace igual ansina. El un buen anciano gendeh ta esconde el cosa le sabe acerca na un assignment. Sino ta enseña le con otro para puede sila hace con ese trabajo. Gendeh le ta tiene miedo que baka mas manada sila cosa sabe o mas ma-abilidad sila que con ele. Poreso, gendeh lang le basta enseña con el maga simple cosa. Quierre le ayuda con el con quien le tan train que sabe si paquemodo hace buen decision para progresa na espiritual. Na ese manera, el “maga gente de comfianza” con quien le ya enseña mas puede ayuda con el congregacion.

Asigurao, ya aprecia gayot si Timoteo con el carta que ya ricibi le estaba con Pablo. Puede kita imagina que pirmi le ta le con ese valoroso consejo y ta pensa si paquemodo le mas puede aplica con ese na de suyu maga assignment.

Quierre tambien kita aplica con este consejo. Paquemodo? Puede kita hace esfuerzo para queda mas activo na diaton servicio, cuida enbuenamente con el verdad y enseña con otro el todo cosa kita sabe. Na ese manera, igual na cosa ya habla si Pablo con Timoteo, puede kita “hace gayot embuenamente el [diaton] servicio.”​—2 Tim. 4:5.