1-2. Porque debe queda interesao el todo Cristiano na resureccion para na cielo?

MAYORIA del maga gente quien ta sirvi con Jehova ahora ta esperanza que vivi hasta para cuando na tierra. Pero el cuanto maga Cristiano con quien ya iscuji si Jehova por medio del de suyu sagrao espiritu, ta esperanza que resucita para na cielo. Este maga iscujido bien interesao si cosa el diila vida na cielo pero quetal aquellos quien queda aqui na tierra? Como cosa kita hay discuti, el resureccion para na cielo hay lleva tambien bendicion para con aquellos quien ta esperanza que vivi hasta para cuando aqui na tierra. Poreso, maskin pa ta esperanza kita que vivi hasta para cuando na cielo o na tierra, debe kita queda interesao na resureccion para na cielo.

² Ya guia el Dios con el cuanto del maga dicipulo de Jesus del primer siglo para escribi acerca na esperanza na cielo. Si apostol Juan ya explica: “Kita maga anak ya del Dios. Pero noay pa dale mira el cosa kita ay queda. El sabe lang kita amo que, cuando ay aparece si Cristo, ay queda kita igual con Dios cay ay mira kita con Ele na disuyo mismo ichura.” (1 Juan 3:2) Poreso, no sabe el maga iscujido Cristiano si cosa el diila vida despues kanila resucita para na cielo. Pero hay mira sila con Jehova na tiempo que hay ricibi sila con el diila premio. Nuay revela el Biblia con el cada detalle acerca na resureccion para na cielo. Pero si apostol Pablo, ya dale cuanto  informacion acerca con ese. Junto el maga iscujido con el Cristo cuando hay “destroza [le] con todo el maga Principe, maga Fuerza, y maga Poder.” Incluido alli “el ultimo contrario . . . el Muerte.” Despues de ese todo, si Jesus, junto con el quien rula con ele​—hay somete con el diila mismo cuerpo y manda somete con el todo cosas con Jehova. (1 Cor. 15:24-28) Un bien bonito tiempo gayot se! *

3. Como cosa ya habla na 1 Corinto 15:30-32, cosa ya puede hace si Pablo cay ta creé le na resureccion?

³ Cay ta creé si Pablo na resureccion, ya ayuda este con ele para aguanta na manada probanza. (Le con el 1 Corinto 15:30-32.) Ya habla le con el maga de Corinto: “Todo el dia ta man atubang yo con el muerte.” Ya escribi tambien si Pablo: “Ya pelea yo con el maga animal del monte na Efeso.” Posible, tan cuento le acerca con el de suyu experiencia na maga real animal na Efeso. (2 Cor. 1:8; 4:10; 11:23) O posible, ta refiri le con el maga oposicion del maga Judio y del otro quien igual na “maga animal del monte.” (Act. 19:26-34; 1 Cor. 16:9) Maskin onde pa na este dos situacion, ya enfrenta maga peligro si Pablo. Pero, ya tiene siempre le positivo mirada na de suyu futuro.​—2 Cor. 4:16-18.

4. Na cosa manera el esperanza de resureccion ya hace fuerte con el maga Cristiano ahora? (Mira con el letrato na cover.)

⁴ Ta vivi kita ahora na tiempo que bien peligroso. El cuanto del diaton maga hermano ya queda victima del crimen. El otro ta queda na maga lugar que tiene guerra y gendeh sila ta sinti protegido. Maskin pa puede kanila hace preso o mata, el los demas ta sirvi con Jehova na maga lugar donde ya pone limitacion o ya prohibi con el diaton trabajo predicacion. Maskin pa ansina, todo este maga hermano y hermana ta continua adora con Jehova y maga buen ejemplo para kanaton. Gendeh sila ta tiene miedo cay sabe sila que maskin pa muri sila na presente tiempo, hay dale kanila si Jehova un mas buen clase de vida na futuro.

5. Cosa peligroso mirada el puede hace luya con el diaton fe na resureccion?

⁵ Ya dale aviso si Pablo con el de suyu maga hermano acerca na peligroso mirada que tiene el otro: “Si el maga muerto gendeh ay resucita, come y toma ya lang kita, cay mañana ay muri kita.” Este clase de mirada tiene ya antes na tiempo de Pablo. Posible ta refiri le con el Isaias 22:13, acerca na custumbre del maga Israelita. En vez de hace manera para queda cerca con Dios, mas interesao sila na alegria. El mirada del maga Israelita que “queda alegre ahora cay perde este mañana” comon siempre ahora. Pero, puede kita le na Biblia con el mal resulta del nacion de Israel.​—2 Cron. 36:15-20.

6. Na cosa manera el diaton esperanza de resureccion debe afecta si con quien kita iscuji como maga amigo?

⁶ Ciendo hay resucita si Jehova con el maga muerto, debe se afecta si con quien kita iscuji como maga amigo. El maga hermano na Corinto, necesita vicia que gendeh man amigo con aquellos quien gendeh ta creé na resureccion. Tiene este leccion para kanaton ahora: Nuay buen resulta si pirmi kita man junto con aquellos quien interesao lang na alegria pero nuay queber na futuro. Si el un verdadero Cristiano man junto con ese clase de gente, hay puede le cambia con el de suyu buen custumbre. Gane, puede pa este causa con ele para hace el maga cosas  que ta odia el Dios. Poreso, ya dale si Pablo este consejo: “Tene ustedes buen juicio y no mas ustedes peca.”​—1 Cor. 15:33, 34.

7. Cosa posible ya pregunta el cuanto acerca na resureccion como cosa ta dale mira na 1 Corinto 15:35-38?

⁷ Le con el 1 Corinto 15:35-38. El un persona quien quierre que man duda el otro na resureccion posible ya pregunta: “Paquemodo el maga muerto ay resucita?” Bueno para kanaton que considera con el contestacion de Pablo, cay manada gente na diaton tiempo ahora tiene el diila mismo creencia acerca si cosa sucede con el un gente si muri este. Pero cosa ta enseña el Biblia?

8. Cosa ilustracion el puede ayuda kanaton para puede entende con el resureccion para na cielo?

⁸ Si ta muri el un persona, tan buluk el cuerpo de este. Pero, el quien ya crea con el universo puede resucita con ese persona y dale con ele un cuerpo. (Gen. 1:1; 2:7) Acerca na resureccion para na cielo, ya usa un ilustracion si Pablo para dale mira que gendeh necesita hace bira otravez el Dios con el cuerpo de ese gente de antes. Pensa con el un “grano” o un “similla” de siembra. Si siembra con el un similla na tierra, hay principia este crici y queda un nuevo siembra. Este nuevo siembra otro ya na diutay similla de antes. Ya usa si Pablo con este ilustracion para dale mira que el diaton Creador puede dale “ichura [“cuerpo,” NWT] que quiere Le.”

9. Cosa ya habla el 1 Corinto 15:39-41 acerca na diferente clase de maga cuerpo?

⁹ Le con el 1 Corinto 15:39-41. Ya nota si Pablo que otro-otro el creacion. Por ejemplo, otro-otro el cuerpo del vaca, pajaro y pescao. Ya habla le que na cielo ta puede kita mira con el diferencia del sol y del luna. Y ya nota le que “el luz de un estrellas diferente con el luz del otro maga estrellas.” Maskin pa gendeh kita ta puede mira el diferencia, el maga cientista ya habla que tiene diferente clase de maga estrellas. Tiene grande,  diutay, colorao, blanco y amarillo igual con el sol. Ya habla tambien si Pablo que “tiene maga cuerpo na cielo y tiene maga cuerpo na tierra.” Cosa le quierre decir? Aqui na tierra, tiene kita cuerpo de laman, pero na cielo, tiene cuerpo de espiritu igual con el cosa tiene el maga angel.

10. Cosa clase de cuerpo tiene aquellos quien hay resucita para na cielo?

¹⁰ Nota si cosa sunod ya habla si Pablo: “Ese amo ay sucede na resureccion del maga muerto. Ta siembra un cosa que ta man buluk, pero ta levanta un cosa que gendeh ta man buluk.” Siempre, si ta muri el un persona, tan buluk el cuerpo de este y ta bira na polvos. (Gen. 3:19) Poreso, paquemodo man que el cuerpo ta “levanta . . . que gendeh ta man buluk”? Si Pablo gendeh tan cuento acerca na un gente que ya resucita aqui na tierra igual con aquellos ya hace resucita kanda Elias, Eliseo y Jesus. Sino, ta refiri si Pablo con el un persona quien hay resucita que tiene un cuerpo que puede vivi na cielo que amo “un cuerpo espiritual.”​—1 Cor. 15:42-44.

11-12. Cosa cambio el ya experiencia si Jesus despues le resucita y na cosa manera puede experiencia igual ansina el maga iscujido?

¹¹ Cuando taqui si Jesus na tierra, tiene le cuerpo de laman. Pero cuando ya resucita con ele, “ya queda [le] un espiritu” y ya bira na cielo. Na igual manera, el maga iscujido Cristiano hay resucita como espiritu. Si Pablo ya explica: “Na mismo manera kita ya queda ichura del gente del tierra, ansina tamen kita ay queda ichura del gente del cielo.”​—1 Cor. 15:45-49.

¹² Importante que acorda kita que nuay resucita con Jesus que tiene cuerpo de gente. Cuando cerca ya acaba el discusion de Pablo, ele ya explica si porque cuando ya habla le: “Ni el carne, ni el sangre no puede hereda con el Reino del Dios.” (1 Cor. 15:50) Gendeh resucita con el maga apostoles y con el otro  maga iscujido para na cielo que tiene cuerpo de laman y sangre que tan buluk. Cuando kanila hay resucita? Ya hace claro si Pablo que hay resucita kanila na futuro y gendeh dayun despues sila muri. Cuando ya escribi si Pablo con el 1 Corinto, el cuanto del maga dicipulo “ya muri ya,” por ejemplo si apostol Santiago. (Act. 12:1, 2) El otro maga apostoles y maga iscujido hay muri pa.​—1 Cor. 15:6.

13. Cosa hay sucede durante el presencia de Jesus?

¹³ Si Jesus y Pablo ya predicta acerca na un importante tiempo que hay llega​—el presencia del Cristo. Na ese tiempo, hay tiene maga guerra, temblor, enfermedad y otro pa maga mal suceso na entero mundo. Ya puede kita mira que ya cumpli ese profecia na Biblia desde 1914. Tiene pa otro importante parte este señal. Ya habla si Jesus que el buen noticia que ta rula ya el Reino del Dios hay predica “na entero mundo, para man testigo con todo el maga nacion. Entonces ay llega ya el fin.” (Mat. 24:3, 7-14) Ya habla si Pablo que el “llegada” o presencia del Señor amo tambien el tiempo que hay resucita con el maga iscujido Cristiano “quien ya muri ya.”​—1 Tes. 4:14-16; 1 Cor. 15:23.

14. Cosa sucede con el maga iscujido Cristiano quien ya muri durante el presencia del Cristo?

¹⁴ El maga iscujido quien ya muri na diaton tiempo ahora hay resucita dayun para na cielo. Ya confirma se si Pablo cuando ya habla le na 1 Corinto 15:51, 52: “Gendeh kita todo ay muri; pero todo kita ay queda cambiao. Y este ay sucede na un momento lang, na un kisap lang del ojos, na sonor del ultimo trompeta.” Ta sucede ya ahora este cosa ya habla si Pablo. Despues del diila resureccion, este maga hermano del Cristo hay queda bien alegre  cay sila hay “esta junto con el Señor.”​—1 Tes. 4:17.

15. Cosa hace aquellos quien hay cambia “na un kisap lang del ojos”?

¹⁵ El Biblia ta habla si cosa hace na cielo el maga iscujido con quien hay resucita. Si Jesus ya habla kanila: “Con aquel quien ay sale victorioso y ay hace el dimio maga trabajo hasta fin, ay dale Yo el poder sobre con todo el maga nacion. Ay goberna le canila con baston de hierro y ay quebra le canila igual como un tinaja de lodo pandayan. Ese amo el mismo poder ya recivi Yo con el dimio Tata.” (Rev. 2:26-28) Hay sigui sila con el comandante y hay goberna con el maga nacion con baston de hierro.​—Rev. 19:11-15.

16. Na cosa manera hay queda victorioso el maga gente contra na muerte?

¹⁶ Claro que el maga iscujido hay queda victorioso contra na muerte. (1 Cor. 15:54-57) Despues del diila resureccion, hay ayuda sila quita con el todo maldad na entero mundo durante el Armagedon. Millones del maga Cristiano hombre y mujer hay “sale victorioso na grande persecucion [“grande tribulacion,” NWT]” y sobrevivi para na nuevo mundo. (Rev. 7:14) Aquellos quien sobrevivi aqui na tierra hay mira con el otro clase de victoria contra na muerte cuando el billones del maga gente quien ya muri de antes hay resucita. Imagina si paquemodo de alegre kita si sucede se! (Act. 24:15) Y todo aquellos quien leal con Jehova hay queda tambien victorioso contra na muerte que ya hereda con Adan. Hay vivi sila hasta para cuando.

17. Cosa kanaton ta anima hace el 1 Corinto 15:58?

¹⁷ El cada Cristiano que vivo ahora debe rindi gracias con el asiguranza que ya escribi si Pablo con el maga de Corinto acerca na resureccion. Tiene kita maga buen razon para sigui con el consejo de Pablo que hace el todo cosa kita puede hace ahora na “trabajo por causa del Señor.” (Le con el 1 Corinto 15:58.) Si leal kita y activo na ese trabajo, puede kita esperanza que hay tiene kita bien alegre vida na futuro. Mas bonito el diaton vida na futuro contra na cosa kita puede imagina. Claro ese dale mira que gendeh envano el diaton maga esfuerzo que ya hace para na Señor.