Gendeh ese el punto de este versiculo. Sino, ta refiri este con el un persona quien ya tumba cay manada beses ya experiencia problema o dificultad y ya puede levanta cay ya puede aguanta con ese maga problema.

Considera con el contexto: “No espera cerca na casa del recto para hace con ele malo; no destroza con el de suyu casa. Cay el recto puede tumba siete beses y hay levanta le otravez, pero el malo hay man tisut por medio na calamidad. Si tumba el de tuyu enemigo, no queda alegre, y si man tisut le, gendeh debe queda alegre el de tuyu corazon.”​—Prov. 24:15-17.

Pero el otro ta creé que el versiculo 16 aplicable con el un persona quien ya comete pecado pero puede hace bira con el de suyu relacion con Dios. El dos clero de Britain ya escribi que “el maga predicador de antes y na moderno tiempo, ya usa con ese texto na ansina manera. El maga clero ya omenta que este quierre decir que “el un buen persona posible comete . . . maga serioso pecado pero gendeh ta perde el de suyu amor con Dios cay ta arripinti le.” Posible que hay gusta con este idea el un persona quien ta continua comete pecado. Posible le pensa que maskin cuanto beses le comete pecado hay perdona lang con ele pirmi el Dios.

Pero gendeh ese el cosa quierre decir del versiculo 16.

El Hebreo palabra que yan translate “tumba” na versiculo 16 y 17 puede usa na manada manera. Puede este quierre decir que el un toro ya tumba na camino, un persona ya cae na techo o un piedra que ya cae na tierra. (Deut. 22:4, 8; Amos 9:9) Puede tambien usa con este palabra na figurativo manera igual como el siguiente: “Ta guia si Jehova con el maga paso del un gente si ta gusta Le con el camino de este. Maskin pa tumba le, gendeh le man muhmuh, cay ta agarra si Jehova con el de suyu mano.”​—Sal. 37:23, 24; Prov. 11:5; 13:17; 17:20.

Pero nota con el cosa ya habla si Professor Edward H. Plumptre: “El Hebreo palabra para na [“tumba”] nuay gayot usa para refiri na pecado.” Poreso el otro scholar ya explica con el versiculo 16 na este manera: “Envano lang que maltrata con el maga siervo del Dios cay puede sila aguanta, pero el maga malo gendeh gayot!”

Poreso el Proverbio 24:16 gendeh ta refiri na pecado. Sino na maga problema o dificultad que posible manada beses ta experiencia el un persona. Na este presente mal mundo, el un recto persona posible enfrenta un problema na salud o otro pa. Posible pa gane le experiencia grabe persecucion estaba na gobierno. Pero, puede le confia que suporta con ele el Dios y ayuda con ele para puede le enfrenta con ese. Pregunta na de tuyu mismo cuerpo, ‘Gendeh ba ta puede yo mira si paquemodo el maga siervo del Dios pirmi ta tiene buen exito?’ Porque? Cay ya asigura kanaton que “ta suporta si Jehova con el todo quien ta tumba y ta hace levanta con el todo agachao.”​—Sal. 41:1-3; 145:14-19.

“El recto” gendeh alegre cay tiene problema el otro. Sino, ta puede con ele anima cay sabe le que “hay queda enbuenamente aquellos quien ta tiene miedo con el verdadero Dios, cay tiene sila miedo con ele.”​—Ecl. 8:11-13; Job 31:3-6; Sal. 27:5, 6.