Gendeh. El Biblia y historia nuay menciona que ya sucede se.

El manera si paquemodo yan translate con este texto na manada maga Biblia ta manda pensa con el cuanto que na tiempo de Pablo, tiene maga ya bautiza por parte de aquellos quien ya muri ya. Por ejemplo: “Si gendeh se deverasan, cosa ba ta esperanza gana aquellos quien ta bautiza para ayuda con el maga muerto?”—El Nuevo Testamento na Chavacano.

Pero nota con el comento del dos scholar del Biblia. Si Dr. Gregory Lockwood ya habla que el idea del bautismo que ta hace “por parte del maga persona quien ya muri ya” amo “un clase de bautismo que nuay prueba estaba na historia o na Biblia.” Na igual manera, si Professor Gordon D. Fee ya escribi: “Nuay ejemplo na historia o na Biblia de ese clase de bautismo. El Nuevo Testamento nuay tambien menciona acerca con este y nuay tambien prueba que ya practica este el maga Cristiano del primer siglo o na maga iglesia que ya forma despues muri el maga apostoles.”

El Biblia ta habla que el maga siguidores de Jesus debe “hace maga dicipulo con todo el maga gente: Bautiza canila . . . y insiña canila obedece todo el que ya manda” le kanila. (Mat. 28:19, 20) Antes el un persona queda un bautizao dicipulo, necesita le aprende, creé y obedece con Jehova y con el De Suyu Anak. Si el un persona muerto y na sepultura ya, gendeh mas le se puede hace ni el un vivo Cristiano hace se para con ele.—Ecl. 9:5, 10; Juan 4:1; 1 Cor. 1:14-16.

Entonces, cosa quierre decir de Pablo?

El cuanto na maga de Corinto gendeh ta creé na resureccion. (1 Cor. 15:12) Si Pablo ya dale mira kanila que gendeh este justo. Ele ya habla que “todo el dia ta man atubang [le] con el muerte.” Pero maskin ta enfrenta le maga peligro, ta confia le que si muri le, hay resucita con ele como un poderoso espiritu igual na cosa ya sucede con Jesus.—1 Cor. 15:30-32, 42-44.

Necesita realiza el maga de Corinto que el maga iscujido Cristiano hay enfrenta probanza cada dia y muri antes kanila hay resucita. Cuando “ya bautiza [kanila] na persona de Cristo, ya bautiza tamen [kanila] na disuyo muerte.” (Roma 6:3) Quierre decir de este que igual con Jesus, hay experiencia tambien sila maga probanza y muri para puede kanila resucita para na cielo.

Mas de dos año despues con Jesus bautiza na agua, ya habla le con el dos del de suyu apostoles: “Ay recivi tamen ustedes el bautismo que ay recivi Yo.” (Mar. 10:38, 39) Gendeh ta bautiza na agua con Jesus na ese tiempo. El cosa le ya habla quierre decir que el de suyu integridad con Dios hay resulta na de suyu mismo muerte. Si apostol Pablo ya escribi que el maga iscujido hay ‘participa na maga sufrimiento, para hay participa tambien sila na gloria.’ (Roma 8:16, 17; 2 Cor. 4:17) Poreso, necesita tambien sila muri para puede kanila resucita para na cielo.

Poreso, el cosa ya habla si Pablo puede man translate como: “Cay si gendeh este deverasan, cosa hace el maga ya bautiza para queda muerto? Si gendeh gayot resucita con el maga muerto, porque pa kanila ya bautiza para queda ansina?”