1-2. Cosa kita considera na este articulo?

TIENE vez, posible pensa kita si paquemodo de corto el diaton vida y “lleno de problema.” (Job 14:1) Poreso tiene vez, ta sinti kita luya. Manada del maga siervo de Jehova na tiempo del Biblia el ya sinti igual ansina. Gane el cuanto quierre que muri ya lang. (1 Rey 19:2-4; Job 3:1-3, 11; 7:15, 16) Pero si Jehova, el Dios con quien sila ta confia, pirmi kanila ta dale comforta y ta hace kanila fuerte. Ya escribi con el diila experiencia para dale kanaton comforta y enseña kanaton.​—Roma 15:4.

² Na este articulo, hay considera kita con el cuanto maga siervo de Jehova quien ya enfrenta maga probanza que ya hace kanila luya. Este amo kanda Jose, el anak de Jacob, el viuda que si Noemi y el de suyu hierna que si Rut, el Levita quien ya escribi con el Salmo 73 y si apostol Pedro. Paquemodo si Jehova ya hace fuerte kanila? Y cosa maga leccion kita puede aprende estaba na diila maga ejemplo? El contestacion de ese puede kanaton dale asiguranza que “cerca si Jehova con aquellos quien dolorido el corazon” y “ta salva le con aquellos tan luya.”​—Sal. 34:18, ftn.

3-4. Cosa ya sucede con Jose cuando joven pa le?

³ Maga 17 año si Jose cuando ya tiene le dos sueño estaba con Dios. Este sueño de Jose ta indica que un dia hay tiene le un alto posicion y respeta con ele el de suyu familia. (Gen. 37:5-10) Pero despues si Jose tiene ese maga sueño, derepente lang ya cambia el de suyu vida. Na ese tiempo, nuay con ele respeta el de suyu maga hermano. Poreso ya vende sila con ele y ya queda le esclavo. Ya sirvi le na casa del un Egipcio oficial que si Potifar. (Gen. 37:21-28) Ya cambia el vida de Jose estaba  na un anak con quien ta ama gayot el de suyu tata para na un esclavo na Egipto.​—Gen. 39:1.

⁴ Despues, ya queda pa mas grabe el situacion de Jose. Ya acusa con ele que ya pricura man rape con el mujer de Potifar. Ya pone con Jose na preso maskin nuay sabe si Potifar si cosa el deverasan y ya amarra con ele con cadena. (Gen. 39:14-20; Sal. 105:17, 18) Joven pa si Jose aquel tiempo. Poreso pensa si cosa le ya sinti cuando ya acusa con ele que yan rape le pero nuay le se hace. Y pensa el verguenza que ya lleva este acusacion na nombre de Jehova. Poreso tiene gayot razon si Jose para man luya.

5. Cosa ya hace si Jose para gendeh le man luya?

⁵ Cuando esclavo si Jose y ya pone con ele na preso, nuay le cosa puede hace para cambia con el de suyu situacion. Cosa ya ayuda con ele para esta positivo? Ya hace le con el trabajo que ya dale con ele, en vez de man focus na cosas que gendeh le puede hace. Pero el mas importante, pirmi tan focus si Jose si paquemodo le puede hace alegre con Jehova. Por causa con ese, ya bendici si Jehova con el todo cosa le ta hace.​—Gen. 39:21-23.

6. Paquemodo ya dale comforta con Jose el de suyu maga sueño?

⁶ Posible ya puede tambien anima con Jose si ta pensa le con el sueño que ya dale con ele si Jehova de antes. Ese sueño ta indica que puede le otravez mira con el de suyu familia y hay queda enbuenamente el de suyu situacion. Y ese el cosa ya sucede. Cuando maga 37 año si Jose, ya principia cumpli el de suyu maga sueño na manera que nuay le expecta!​—Gen. 37:7, 9, 10; 42:6, 9.

7. Asegun na 1 Pedro 5:10, cosa kanaton ayuda para puede enfrenta con el maga probanza?

⁷ Leccion para kanaton. El istoria de Jose ta hace acorda kanaton que este mundo lleno de maldad y el maga gente hay trata kanaton na gendeh justo manera. Maskin el diaton  maga hermano y hermana posible kanaton hace sinti duele. Pero si mira kita con Jehova como diaton Piedra o Refugio, gendeh kita man luya o descanza sirvi con ele. (Sal. 62:6, 7; le con el 1 Pedro 5:10.) Acorda tambien que cuando ya dale si Jehova con ele aquel maga sueño, posible maga 17 año pa lang si Jose. Este ta dale mira que tiene confianza si Jehova na de suyu maga joven siervo. Ahora, manada del maga jovenes el igual con Jose. Tiene tambien sila fe con Jehova. Ya hace pa gane preso con el cuanto kanila cay nuay sila man compromiso con el diila lealtad con Dios.​—Sal. 110:3.

8. Cosa ya sucede con Noemi y Rut?

⁸ Por causa na grabe hambre, si Noemi y el de suyu familia ya sale na Juda y ya esta como estranjero na Moab. Alla ya muri el marido de Noemi, si Elimelec y ele ya lang el quien cuida con el diila dos anak. Nuay dura, el de suyu dos anak ya casa maga Moabita mujer que si Rut y Orpa. Maga diez año despues, ya muri el maga anak de Noemi y ciendo nuay sila tiene maga anak, solo ya lang tambien el diila mujer. (Rut 1:1-5) Imagina si paquemodo de triste este tres mujer! Siempre, puede casa otravez kanda Rut y Orpa. Pero quien cuida con Noemi quien ta queda ya de edad? Ya queda bien depress si Noemi que ya llega na punto ya habla le: “No llama conmigo Noemi. Llama conmigo Mara cay ya permiti el Todopoderoso que queda mapait el de mio vida.” Despues de este maka-triste experiencia, ya decidi si Noemi que bira na Betlehem y ya sigui con ele si Rut.​—Rut 1:7, 18-20.

9. Asegun na Rut 1:16, 17, 22, paquemodo si Rut ya anima con Noemi?

⁹ Cosa el ya puede ayuda con Noemi? El amor leal. Por ejemplo, ya dale mira amor leal si Rut con Noemi cuando ya esta le junto con ele. (Le con el Rut 1:16, 17, 22.) Na Betlehem, ya trabaja si Rut para ajunta maga cebada para diila dos de Noemi. Como resulta, ya tiene buen reputacion si Rut.​—Rut 3:11; 4:15.

10. Na cosa manera ya dale mira amor si Jehova con el maga pobre igual con Noemi y Rut?

¹⁰ Ya dale ley si Jehova con el maga Israelita que ta dale mira con el de suyu compasion para na maga pobre igual kanda Noemi y Rut. Ya habla le con el de suyu maga siervo que si na tiempo de cosecha, gendeh sila hace acaba cosecha con el urilla parte del simentera para tiene cosa puede saca el maga pobre. (Lev. 19:9, 10) Poreso, puede obtene comida si Rut y Noemi que gendeh necesita pidi con ese.

11-12. Paquemodo si Boaz ya hace alegre con Rut y Noemi?

¹¹ El dueño del simentera onde ta pipina cebada si Rut amo el un rico gente que si Boaz. Bilib gayot le na lealtad de Rut con Noemi y si paquemodo este ta ama con ele. Poreso na uliji, ya casa le con Rut y ya compra con el tierra de kanda Noemi de antes para puede hereda el maga anak de Rut. (Rut 4:9-13) El man maridable ya tiene un anak que el nombre Obed, el quien ya queda aguelo de Rey David.​—Rut 4:17.

¹² Imagina si paquemodo de alegre si Noemi mientras ta carga le con Obed y ya rindi gracias con Jehova por medio na rezo. Pero queda pa mas alegre si Noemi y Rut si resucita sila y sabe que si Obed ya queda el tatarabuelo del Mesias, si Jesucristo!

13. Cosa maga importante leccion kita puede aprende na experiencia de Noemi y Rut?

¹³ Leccion para kanaton. Tan luya kita si ta enfrenta kita maga probanza. Posible ta sinti kita que dol nuay solucion el diaton maga problema. Na ese maga tiempo, debe kita  confia con el diaton Tata na cielo y esta cerca na diaton maga hermano y hermana na fe. Deveras, si Jehova gendeh dayun tiene vez ta quita con el diaton maga problema. Por ejemplo, nuay le lleva otravez con Noemi con el de suyu marido y maga anak que ya muri. Pero hay ayuda le kanaton, posible por medio na amor leal que hay dale mira el diaton espiritual familia.​—Prov. 17:17.

14. Porque ya queda bien maluya el un Levita?

¹⁴ Un Levita el quien ya escribi con el Salmo 73. Tiene le el bonito privilegio que sirvi con Jehova na lugar de adoranza. Pero tiene tiempo na de suyu vida que yan luya le. Porque? Ya principia le envidia con el maga malo y arogante gendeh cay quierre le hace malo sino cay dol mas enbuenamente el diila vida contra con ele. (Sal. 73:2-9, 11-14) Dol tiene sila el todo cosas​—riqueza, buen vida y nuay maga lingasa. Cuando ya mira este el Levita, ya queda este bien maluya y ya habla: “Envano lang que ya esta limpio el de mio corazon y ya laba yo con el de mio maga mano para dale mira que nuay yo culpa.” Asigurao, puede este causa con ele para descanza sirvi con Jehova.

15. Asegun na Salmo 73:16-19, 22-25, cosa ya hace el Levita quien ya escribi con este salmo para gendeh mas le man luya?

¹⁵ Le con el Salmo 73:16-19, 22-25. El Levita ‘ya entra na sagrao santuario del Dios.’ Na casa del Dios, junto con el otro quien ta sirvi con Jehova, ya puede le queda calma, ya pensa enbuenamente y ya reza acerca na de suyu situacion. Como resulta, ya realiza le que gendeh le sabio y posible le hace perde con el de suyu buen amistad con Jehova. Ya entende tambien le que talli “na malanduk lugar” el maga malo y hay llega kanila el “terrible destrozo.” Necesita el Levita mira con el maga cosas asegun na mirada de Jehova para gendeh le man envidia y man luya. Cuando ya hace le se, ya tiene le otravez paz y ya queda alegre. Ele ya habla: “Puera [con Jehova], nuay mas yo cosa ta desea na tierra.”

16. Cosa maga leccion kita puede aprende con el un Levita?

¹⁶ Leccion para kanaton. Gendeh kita debe  man envidia con el maga mal gente quien dol tiene alegre vida. Temporario lang el diila vida y gendeh sila vivi hasta para cuando. (Ecl. 8:12, 13) Si man envidia kita kanila, hay man luya kita y posible pa gane hay perde el diaton buen amistad con Jehova. Poreso, si ya principia tu sinti igual na cosa ya sinti el Levita, hace con el cosa le ya hace. Obedece con el amable consejo del Dios y asocia con otro quien ta hace con el voluntad de Jehova. Si mas ta ama tu con Jehova contra na otro cosas, hay tiene tu deverasan alegria. Y hay esta tu na camino para na “deverasan Vida.”​—1 Tim. 6:19.

17. Cosa el razon porque yan luya si Pedro?

¹⁷ Bien activo si apostol Pedro pero tiene vez, ta puede le habla o hace maga cosas que gendeh ta pensa. Como resulta, ta arripinti le con el cosa le ya habla o ya hace. Por ejemplo, cuando ya habla si Jesus con el de suyu maga apostoles que hay sufri le y muri, ya regaña con ele si Pedro y ya habla: “Gendeh este debe sucede con Uste!” (Mat. 16:21-23) Despues, ya corecta si Jesus con Pedro. Cuando ya llega el maga gente para arresta con Jesus, dayun-dayun ya actua si Pedro y ya tajia con el orejas del un esclavo del alto sacerdote. (Juan 18:10, 11) Ya corecta otravez si Jesus con el apostol. Omento pa, yan hambug si Pedro que maskin el otro maga apostoles posible deja con Jesus, ele gendeh gayot se hay hace! (Mat. 26:33) Pero el sobra confianza na cuerpo ya causa con Pedro para tiene miedo na gente y ya desconoce con Jesus tres beses. Yan luya gayot si Pedro, poreso “ya sale le afuera y ya llora.” (Mat. 26:69-75) Asigurao ya pensa le si puede pa ba perdona con ele si Jesus.

18. Paquemodo si Jesus ya ayuda con Pedro para gendeh mas man luya?

¹⁸ Pero nuay si Pedro deja con el de suyu luya para hace descanza con ele sirvi con Jehova. Despues hace con ese maga kamali, ya  continua le sirvi con Jehova junto con el otro maga apostoles. (Juan 21:1-3; Act. 1:15, 16) Cosa con ele ya ayuda para continua? Ya acorda si Pedro que ya reza si Jesus que gendeh perde el de suyu fe y ya anima con ele si Jesus que bira y hace fuerte con el maga hermano. Ya contesta si Jehova con ese rezo. Na uliji, personal ya aparece si Jesus con Pedro, posible para anima con ele. (Luc. 22:32; 24:33, 34; 1 Cor. 15:5) Ya aparece tambien si Jesus na todo maga apostoles despues sila pesca entero noche pero nuay sila cosa ya cuji. Na este ocasion, ya dale si Jesus con Pedro el oportunidad que dale mira otravez el de suyu amor para con ele. Ya perdona si Jesus con el de suyu amigo y ya dale pa con ele omento trabajo.​—Juan 21:15-17.

19. Cosa kanaton ta enseña el Salmo 103:13, 14 acerca si paquemodo si Jehova ta mira kanaton si ta culpa kita?

¹⁹ Leccion para kanaton. El manera si paquemodo si Jesus ya trata con Pedro ta dale mira que lastimoso le igual con el de suyu Tata. Poreso si ta puede kita hace kamali, gendeh kita debe pensa que gendeh mas kanaton puede perdona si Jehova. Debe kita acorda que amo se quierre si Satanas que sinti kita. Sino, pricura kita mira con el diaton mismo cuerpo y con aquellos quien ya culpa kanaton por medio na amable mirada del diaton Tata na cielo.​—Le con el Salmo 103:13, 14.

20. Cosa kita hay considera na siguiente articulo?

²⁰ El ejemplo de kanda Jose, Noemi y Rut, del Levita y de Pedro, ta dale kanaton asiguranza que “cerca si Jehova con aquellos quien dolorido el corazon.” (Sal. 34:18) Ta permiti le que experiencia kita maga probanza y sinti luya tiene vez. Pero si puede kita enfrenta con el maga probanza na ayuda de Jehova, hace este fuerte con el diaton fe. (1 Ped. 1:6, 7) Na siguiente articulo, hay considera kita mas si paquemodo si Jehova ta ayuda con el de suyu maga siervo quien yan luya posible por causa na diila imperfeccion o por causa cay ta enfrenta sila maga dificil situacion.