1. Paquemodo el luya posible afecta kanaton?

CADA dia ta enfrenta kita maga problema y ta hace kita el todo para solva con ese. Pero gendeh ba tu man uyun que ta puede kita mas enfrenta con el diaton maga problema si gendeh kita tan luya? Poreso, necesita kita mira con el luya como cosa que ta saca con el diaton confianza, coraje y alegria. El Proverbio 24:10 ta habla: “Si tan luya tu na tiempo de problema, hay menora el de tuyu fuerza.” Poreso si tan luya kita, ta queda tambien kita mahina y mas dificil para kanaton enfrenta con el diaton maga problema.

2. Cosa posible el razon si porque kita tan luya y cosa kita discuti na este articulo?

² Puede kita man luya por causa na manada razon. Posible incluido aqui el diaton imperfeccion, limitacion y problema na salud. Posible tambien cay nuay kita ricibi con el assignment que quierre kita na servicio con Jehova o ta predica kita na un teritorio que donde gendeh ta oi el mayoria del maga gente. Na este articulo, hay considera kita con el cuanto cosas que puede kita hace para ganá con el luya.

3. Cosa puede ayuda kanaton para tiene justo mirada na diaton imperfeccion?

³ Facil lang para kanaton que tiene gendeh justo mirada acerca na diaton imperfeccion y limitacion. Como resulta, posible kita pensa que gendeh kanaton ricibi si Jehova na nuevo mundo por causa na diaton maga kamali. Peligroso si pensa kita igual ansina. Paquemodo kita debe mira con el diaton imperfeccion? El Biblia ta habla que puera con Jesucristo, todo el maga gente “ya peca.” (Roma 3:23) Pero gendeh tan focus si Jehova na diaton maga kamali o ta expecta kanaton que  queda perfecto. Sino, ele un amable Tata quien quierre ayuda kanaton. Paciencioso tambien le. Sabe le si paquemodo de dificil para kanaton que hace si cosa el justo y quita con el gendeh balance mirada na diaton mismo cuerpo, y preparao le ayuda kanaton.​—Roma 7:18, 19.

4-5. Cosa ta habla el 1 San Juan 3:19, 20, que ya ayuda con el dos hermana para ganá contra na luya?

⁴ Considera con el ejemplo de kanda Deborah y Maria. * Cuando bata si Deborah, pirmi con ele ta trata na manera que ta manda con ele sinti huya. Ralo lang con ele ta comenda. Poreso, ya tiene le negativo mirada na de suyu mismo cuerpo. Si puede le hace diutay kamali, ta sinti le que gendeh mas le puede hace maskin cosa justo. Semejante con ese el problema de Maria. El de suyu maga pariente ya hace con ele huya. Como resulta, ta sinti le que nuay le valor. Maskin despues le guinda na verdad, ya sinti le que gendeh le conviene lleva el nombre del Dios!

⁵ Maskin pa ansina, este dos hermana nuay descanza sirvi con Jehova. Porque? El un razon amo cay ya buta sila con el diila pesades con Jehova por medio na rezo. (Sal. 55:22) Ya puede sila aprende que el diaton amable Tata na cielo sabe si paquemodo el diaton maga experiencia de antes y el diaton negativo pensamiento ya puede afecta kanaton. Pero ta mira tambien le con el cosa bueno na diaton corazon​—maga calidad que posible kita mismo gendeh ta puede mira.​—Le con el 1 San Juan 3:19, 20.

6. Cosa posible hace el un persona si ya puede le repiti con el kamali que ya puede hace de antes?

⁶ El un persona quien ya puede repiti con el de suyu kamali del antes, posible man luya. Siempre, normal lang que man conciencia kita si ya puede kita hace culpa. (2 Cor. 7:10) Pero, gendeh kita debe sinti sobra acerca na diaton kamali y pensa: ‘Ya falla gayot yo. Gendeh mas conmigo perdona si Jehova.’ Gendeh se deverasan y puede se causa kanaton para descanza sirvi con Jehova. Acorda con el cosa kita ya le na Proverbio 24:10​—hay menora el diaton fuerza si tan luya kita. Sino, “arregla kita el maga cosas entre kanaton” y con Jehova por medio na rezo y pidi con el de suyu perdon. (Isa. 1:18) Si mira si Jehova que deverasan tu ta arripinti, hay perdona le contigo. Omento pa, atraca na maga anciano. Con paciencia sila hay ayuda contigo para queda tu otravez bueno na espiritual.​—Sant. 5:14, 15.

7. Porque gendeh kita debe man luya si tan dificil kita hace si cosa el justo?

⁷ Si Jean-Luc, un anciano na France, ya  habla con aquellos quien tan dificil hace si cosa el justo: “El un recto persona na vista de Jehova gendeh el persona quien gendeh tan kamali, sino el persona quien tan triste na cosa le ya puede hace y pirmi ta arripinti.” (Roma 7:21-25) Poreso, no condena con el de tuyu mismo cuerpo si tan dificil tu hace si cosa el justo. Cay todo kita tan kamali, todo kita necesita el incomparable pagka-bueno de Jehova que ya dale le por medio del rescate.​—Ef. 1:7; 1 Juan 4:10.

8. Si tan luya kita, con quien kita puede pidi ayuda?

⁸ El diaton maga hermano y hermana na congregacion puede anima kanaton! Puede sila oi kanaton si quierre kita man cuento y puede sila anima kanaton. (Prov. 12:25; 1 Tes. 5:14) Si Joy, un hermana na Nigeria, quien yan luya de antes ya habla: “Paquilaya ya lang yo si nuay el de mio maga hermano y hermana? Prueba sila que si Jehova ya contesta con el de mio maga rezo. Ya puede pa gane yo aprende kanila si paquemodo anima con otro quien tan luya.” Pero necesita kita acorda que el diaton maga hermano y hermana posible no sabe que ta necesita kita que tiene quien anima kanaton. Poreso, posible necesita kita atraca na un mature hermano o hermana y habla que necesita kita ayuda.

9. Paquemodo puede anima kanaton el Salmo 41:3 y 94:19?

⁹ Pidi ayuda con Jehova. Si malo kita ta sinti y especialmente si ya dura ya kita enfermo, posible man dificil kita queda positivo. Gendeh man kanaton cura si Jehova na milagroso manera ahora, pero puede le kanaton dale comforta y el fuerza que necesita para puede aguanta. (Le con el Salmo 41:3; 94:19.) Por ejemplo, puede le manda move con el diaton hermano o hermana para ayuda kanaton hace el diaton maga trabajo na casa o para ayuda kanaton man compra. Puede le manda move con el diaton maga hermano para reza junto kanaton. O puede le manda acorda kanaton maga texto que ta dale comforta, igual con el bonito esperanza que vivi na nuevo mundo con perfecto vida que nuay mas enfermedad y dolor.​—Roma 15:4.

10. Cosa ya puede ayuda con Isang para gendeh esta triste despues del de suyu accidente?

¹⁰ Si Isang, quien ta queda na Nigeria, ya queda paralisao despues le man accidente. El doctor ya habla con ele que gendeh mas le puede camina. “Dolorido el de mio corazon y ya queda yo bien triste,” si Isang ya habla. Pero ya esta ba le triste? Nuay! Cosa ya puede ayuda con ele? “Iyo pati de mio mujer, pirmi ta reza con Jehova y ta estudia con el de suyu Palabra,” ya explica si Isang. “Determinao tambien kame que aprecia con el diamon maga bendicion, incluido el diaton esperanza na nuevo mundo del Dios.”

11. Cosa ya puede ayuda con Cindy para queda alegre maskin pa na de suyu enfermedad?

¹¹ Si Cindy, quien ta queda na Mexico, ya puede sabe que tiene le enfermedad que puede causa con el de suyu muerte. Paquemodo le ya puede enfrenta con ese? Mientras ta cura con ele, ya hace le goal que puede predica cada dia. Ele ya escribi: “Por causa de ese ya puede yo man focus con otro, en vez na de mio operacion, dolor o si paquemodo yo de enfermo. Este el cosa yo ta hace: Si tan cuento conmigo el doctor o nurse, hay pregunta yo si quetal el diila familia. Despues, hay pregunta yo si porque sila ya iscuji este clase de trabajo. Despues sila contesta, facil ya lang sabe si cosa topico el puede alcanza na diila corazon. Manada kanila ta habla que ralo lang na un paciente el ta pregunta kanila si quetal  sila. Y por causa con ese, manada el ta rindi gracias conmigo. Gane, el cuanto ya dale conmigo el diila adres o phone number. Poreso, na este dificil tiempo na de mio vida, si Jehova ya dale conmigo alegria que maskin iyo gendeh ta expecta!”​—Prov. 15:15.

12-13. Paquemodo el cuanto enfermo o maluya na fisical ya puede participa na ministerio y cosa el resulta?

¹² El un persona que enfermo o maluya na fisical posible man luya cay limitao ya el cosa sila ta puede hace na ministerio. Maskin pa ansina, manada el quien ya puede busca manera para continua predica. Na United States, el un hermana que el nombre Laurel, acustao na un machine que ta ayuda con ele para resulla adentro na 37 año! Ya tiene le cancer y enfermedad na pellejo y ya opera tambien con ele por cuanto beses. Pero este maga bien dificil situacion nuay con ele hace descanza predica. Ta predica le na maga nurse o otro quien ta anda na de suyu casa. Cosa el resulta? Ya puede le ayuda con el 17 persona para tiene justo saber na Biblia! *

¹³ Si Richard, un anciano na France, tiene un practical sugestion para con aquellos gendeh puede sale na casa o ta queda na un nursing home. “Mas bueno si hace sila un diutay literature display. Si pasa el maga gente, hay mira sila con ese y pregunta acerca con ese. Puede este anima con el diaton maga hermano y hermana quien no puede mas predica na casa en casa.” Aquellos quien no puede mas sale na casa puede tambien participa na ministerio por medio na escribida de carta y telefono.

14. Cosa buen ejemplo ya dale mira si Rey David para kanaton?

¹⁴ Por causa na edad, salud o otro pa maga razon, posible gendeh kita puede ricibi con el un assignment o privilegio na congregacion o na circuito. Si ansina el diaton situacion, puede kita aprende na ejemplo de Rey David. Cuando ya habla que nuay con ele iscuji para planta con el templo del Dios​—un cosa que quierre gayot hace si David—​ya dale le el de suyu suporta con aquel quien ya iscuji el Dios na este assignment. Ya dale pa gane grande contribucion si David para na este proyecto. Un buen ejemplo gayot si David para kanaton!​—2 Sam. 7:12, 13; 1 Cron. 29:1, 3-5.

15. Paquemodo si Hugues ya ganá contra con el luya?

¹⁵ Por causa na problema na salud, el un hermano na France que si Hugues, ya descanza sirvi como un anciano. Gane, gendeh mas le ta puede hace maga simple trabajo na casa. Ele ya escribi: “Del una, ya sinti yo que nuay yo valor y yan luya gayot yo. Pero despues  del cuanto tiempo, ya puede yo realiza que importante que acepta yo con el de mio limitacion y tiene alegria na cosa yo puede hace na servicio con Jehova. Determinao yo que continua. Igual con Gideon y de suyu 300 maga gente quien igual maga cansao​—gendeh yo descanza na servicio!”​—Juez 8:4.

16. Cosa kita puede aprende na ejemplo del maga angel?

¹⁶ Buen ejemplo el maga fiel angel. Durante el rulanza de Rey Ajab, si Jehova ya pidi sugestion con el maga angel si paquemodo engaña con aquel mal rey. El cuanto maga angel ya dale sugestion. Pero el Dios ya iscuji con el un angel y ya habla que el de suyu sugestion hay tiene buen exito. (1 Rey 22:19-22) Yan luya ba el otro maga fiel angel y ya pensa, ‘Porque pa yo ya cansa dale sugestion?’ Siempre nuay. Deverasan humilde el maga angel y quierre sila que el todo honor hay guinda con Jehova.​—Juez 13:16-18; Rev. 19:10.

17. Cosa kita debe hace si tan luya cay nuay kita privilegio?

¹⁷ Acorda que el de con todo grande honor que puede kita tiene amo que lleva el nombre del Dios y predica acerca con el de suyu Reino. Posible kita tiene assignment o posible se perde kanaton, pero gendeh se amo el ta hace kanaton precioso con Dios. Si humilde kita, hay queda kita precioso con Jehova y con el diaton maga hermano y hermana. Poreso, pidi con Jehova que ayuda contigo esta humilde. Pensa con el maga buen ejemplo de aquellos quien ya esta humilde que puede incuntra na de suyu Palabra. Queda preparao sirvi con el de tuyu maga hermano na manera que puede tu.​—Sal. 138:6; 1 Ped. 5:5.

18-19. Paquemodo tu tiene alegria na de tuyu misterio maskin pa dol gendeh productivo el de ustedes teritorio?

¹⁸ Tan luya ba tu tiene vez cay dol gendeh productivo el de ustedes teritorio o cay poco lang gente que puede incuntra na casa? Na ese situacion, cosa kita puede hace para mentena o omenta con el diaton alegria? Puede incuntra con el cuanto practical sugestion na cajon “ Si Paquemodo Queda Alegre na Ministerio.” Importante tambien que tiene kita justo mirada na diaton ministerio. Cosa se quierre decir?

¹⁹ Man focus predica con el nombre del Dios y con el de suyu Reino. Si Jesus claro ya habla que poco lang el quien puede incuntra con el camino que ta guia para na vida. (Mat. 7: 13, 14) Si ta participa kita na ministerio, tiene kita el privilegio que trabaja junto con Jehova, con Jesus y con el maga angel. (Mat. 28:19, 20; 1 Cor. 3:9; Rev. 14:6, 7) Si Jehova ta guia para na de suyu organizacion con aquellos quien tiene justo condicion de corazon. (Juan 6:44) Poreso, si gendeh acepta el persona con el diaton mensaje, baka acepta le na otro tiempo.

20. Cosa ta enseña kanaton el Jeremias 20:8, 9 acerca si paquemodo ganá contra con el luya?

²⁰ Manada kita cosa puede aprende con profeta Jeremias. Yan assign con ele na un bien dificil teritorio. El maga gente ta insulta y ta gangguia con ele “entero dia.” (Le con el Jeremias 20:8, 9.) Ya queda le bien maluya que donde quierre ya era le descanza predica. Pero nuay le se hace. Porque? “El Palabra de Jehova” igual como un fuego adentro con Jeremias y no puede le con este sangga! Ansina tambien sucede kanaton si llena kita con el diaton pensamiento y corazon del Palabra del Dios. Un omento razon este para estudia con el Palabra del Dios cada dia y medita con este. Como resulta, hay continua omenta el diaton alegria y posible queda mas productivo el diaton ministerio.​—Jer. 15:16.

21. Paquemodo kita puede ganá contra con el luya, maskin cosa man el causa de este?

²¹ “Si Satanas ta usa con el luya como un armas contra kanaton,” ya habla si Deborah que ya menciona enante. Pero mas poderoso si Dios Jehova contra con Satanas y con el de suyu maga armas. Poreso, maskin cosa man el razon si porque tu tan luya, suplica con Jehova que ayuda contigo. Hay ayuda le contigo enfrenta con el de tuyu maga imperfeccion y limitacion. Hay suporta le contigo mientras enfermo tu. Hay ayuda le contigo mentena balance mirada na privilegio. Y hay ayuda le contigo queda positivo na de tuyu ministerio. Reza con el de tuyu Tata na cielo y habla con ele el cosa tu ta sinti. Na de suyu ayuda, puede tu ganá contra con el luya.