1-2. (a) Cosa ya manda con el tres apostoles de Jesus y cosa sila ya hace? (b) Cosa kita considera na este articulo?

DESPUES del Pascua del 32 C.E., si apostol Pedro, Santiago y Juan ya puede mira con el un bien bonito vision. Na un alto monte, posible na parte del Monte de Hermon, el ichura de Jesus ya cambia enfrente kanila. “Su cara ya queda brillante igual como el sol, y su ropa ya queda bien blanco igual como el luz.” (Mat. 17:1-4) Cerca na fin de ese vision, el maga apostoles ya oi con Dios que ya habla: “Este amo el dimio Anak con quien yo ta ama gayot. Bien alegre yo con Ele. Oi ustedes con Ele.” (Mat. 17:5) El tres apostoles ya dale mira por medio na diila manera de vida que ya oi sila con Jesus. Quierre kita imita con el diila ejemplo.

² Del ya pasa articulo, ya aprende kita que si ta oi kita con el voz de Jesus, gendeh kita ta hace con el cuanto cosas. Na este articulo, hay considera kita con el dos cosas que ya habla si Jesus que debe kita hace.

3. Asegun na Mateo 7:13, 14, cosa kita debe hace?

³ Le con el Mateo 7:13, 14. Nota que ya menciona si Jesus dos diferente puerta que ta guia na dos diferente camino—el “facil” camino y el “malisud” camino. Nuay ika-tres camino. Debe kita iscuji si onde camino kita pasa. Amo este el de con todo importante decision que hay hace kita cay el diaton vida hasta para cuando ta depende con ese.

4. Cosa tu puede habla acerca con el “facil” camino?

 ⁴ Necesita kita acorda si cosa el diferencia de ese dos camino. Manada el ta pasa na “facil” camino cay gendeh alli dificil viaja. Maka-triste, manada el ya iscuji que esta na ese camino y sigui con el maga gente quien ta viaja alli. Nuay sila realiza que si Satanas Diablo el quien quierre que pasa sila alli y el de suyu camino ta guia na muerte.—1 Cor. 6:9, 10; 1 Juan 5:19.

5. Cosa maga esfuerzo el ya hace el cuanto para incuntra con el “malisud” camino y principia viaja con ese?

⁵ Gendeh igual na “facil” camino, el otro camino “malisud” y ya habla si Jesus que poco lang el quien ta puede incuntra con ese. Porque? Maka-interes que na sunod versiculo, ya dale aviso si Jesus con el de suyu maga siguidores que tene cuidao contra na maga falso profeta. (Mat. 7:15) El cuanto gente ta habla que tiene miles de religion y mayoria kanila el ta clama que ta enseña el verdad. Millones del maga gente el tan luya o tan libug por causa con ese poreso gendeh mas sila ta pricura busca con el camino que ta guia para na vida. Pero, puede incuntra con ese camino. Si Jesus ya habla: “Si ay esta ustedes fiel na dimio Palabra, ay queda ustedes mi maga dicipulo, y ay sabe ustedes si cosa el verdad, y el verdad ay hace con ustedes libre.” (Juan 8:31, 32) Bonito gayot que nuay tu sigui con el mayoria del maga gente sino ya busca tu con el verdad. Ya principia tu estudia enbuenamente con el Palabra del Dios para aprende si cosa le ta pidi kanaton y ya oi tu con el maga enseñanza de Jesus. Ya aprende tambien tu que quierre si Jehova que gendeh tu acepta con el maga enseñanza del falso religion y descanza participa na maga celebracion que estaba na maga pagano. Ya sabe tambien tu que posible dificil hace con el cosa ta pidi contigo si Jehova y descanza participa na maga practica que gendeh ta hace alegre con ele. (Mat. 10:34-36) Posible, gendeh facil para contigo que hace con ese maga cambio. Maskin pa ansina, ya continua tu siempre hace con ese cay ta ama tu con el de tuyu Tata na cielo y quierre tu tene con el de suyu favor. Asigurao que bien alegre le contigo!—Prov. 27:11.

6. Asegun na Salmo 119:9, 10, 45, 133, cosa puede ayuda kanaton para esta na malisud camino?

⁶ Si ya principia ya kita viaja na malisud camino, cosa puede ayuda kanaton para esta alli? Considera con este ilustracion. El barandilla na urilla del diutay camino na monte ta sirvi como un proteccion para na driver y con el de suyu vehiculo. Ya diseña con el barandilla para protege con el maga driver—para ayuda kanila que gendeh anda bien cerca o man lampas na pangpang. Nuay driver el quien reclama que ese barandilla ta protege kanila! El maga principio de Jehova que puede incuntra na Biblia igual na ese barandilla. El de suyu maga principio ta ayuda kanaton para esta na malisud camino.—Le con el Salmo 119:9, 10, 45, 133.

7. Cosa debe el mirada del maga jovenes na malisud camino?

⁷ Maga jovenes, ta sinti ba ustedes tiene vez que bien istricto el maga principio de Jehova? Amo se el cosa quierre si Satanas que pensa ustedes. Quierre ele que man focus ustedes na cosa ta hace aquellos quien ta viaja na facil camino, cay dol bien alegre sila na cosa sila ta hace. Posible, hay usa le con el cosa ta hace el de ustedes maga uban na escuela o cosa ustedes ta puede mira na Internet para manda sinti con ustedes que gendeh ustedes igual de alegre kanila. Quierre manda pensa con ustedes si Satanas que por causa na maga  principio de Jehova, gendeh ustedes tanto tan enjoy na vida. * Pero, acorda este: No quierre manda mira si Satanas con aquellos quien ta viaja na de suyu camino si cosa el na fin de ese camino. Pero, si Jehova ya dale con ustedes claro idea si cosa ta espera con aquellos quien ta esta na camino para na vida.—Sal. 37:29; Isa. 35:5, 6; 65:21-23.

8. Cosa puede aprende el maga jovenes na ejemplo de Olaf?

⁸ Considera si cosa tu puede aprende na experiencia del un joven hermano que si Olaf. * El de suyu maga classmate yan pressure con ele que comete sexual imoralidad junto kanila. Cuando ya explica le que el maga Testigo de Jehova ta vivi harmonia na maga alto principio na moral del Biblia, el cuanto mujer na de suyu clase mas ya pricura pa man pressure con ele que man sex junto kanila.  Pero, ya hace si Olaf si cosa el justo. Y gendeh lang se el pressure que ya enfrenta le. Si Olaf ya habla: “El de mio maga maestra ya pricura convinci conmigo que saca mas alto educacion para respeta conmigo el maga gente. Ya habla sila conmigo que si nuay este, gendeh yo hay tene buen exito na vida.” Cosa ya ayuda con Olaf para resisti con ese pressure? Ya menciona le: “Ya pricura yo queda mas cerca con aquellos na diamon congregacion. Ya queda sila igual na un familia para conmigo. Ya principia tambien yo mas serioso estudia con el Biblia. Cuando mas ya estudia yo, mas ya queda yo convincido que amo este el verdad. Como resulta, determinao yo sirvi con Jehova.”

9. Cosa debe hace aquellos quien quierre esta na malisud camino?

⁹ Quierre si Satanas que sale tu na camino que ta guia para na vida. Quierre le que sigui tu con el mayoria del maga gente na facil camino que ta guia “para na destruccion.” (Mat. 7:13) Pero, hay esta kita na malisud camino si continua kita oi con Jesus y mira con ese camino como un proteccion. Ahora, considera kita con el otro pa cosa que ya habla si Jesus que debe kita hace.

10. Asegun na Mateo 5:23, 24, cosa ya habla si Jesus que debe kita hace?

¹⁰ Le con el Mateo 5:23, 24. Ya menciona si Jesus acerca na un suceso que bien importante para na maga Judio quien ta oi con ele. Imagina con el un persona na templo quien preparao ya dale con el de suyu sacrificio de animal con el un sacerdote. Si na ese tiempo ya acorda el persona que el de suyu hermano tiene un cosa que contra con ele, necesita le deja con el sacrificio. Porque? Tiene pa ba cosa mas importante que con el de suyu sacrificio para con Jehova? Si Jesus claro ya habla: “Anda una hace paz con tu hermano.”

11. Cosa ya hace si Jacob para tene paz con Esau?

¹¹ Puede kita aprende maga importante leccion acerca si paquemodo tene paz si examina kita un suceso na vida de patriarca Jacob. Despues sale si Jacob na lugar onde le ya engranda por maga 20 año, ya manda con ele el Dios por medio na un angel que bira alla. (Gen. 31:11, 13, 38) Pero, tiene problema. El de suyu mayor hermano, si Esau, quierre mata con ele. (Gen. 27:41) “Ya tiene gayot miedo si Jacob y yan lingasa” cay baka tiene siempre agrabio con ele el de suyu hermano. (Gen. 32:7) Cosa ya hace si Jacob para tene paz na de suyu hermano? Una, sincero le ya reza con Jehova acerca con ese. Despues, ya imbia le manada regalo con Esau. (Gen. 32:9-15) Na uliji cuando yan mirajan ya el man hermano, ya dale mira honor si Jacob con Esau. Ya hinca le adelante de Esau—gendeh lang una vez o dos beses sino siete beses! Si Jacob humilde ya dale mira respeto con Esau y ya pricura tene paz con el de suyu hermano.—Gen. 33:3, 4.

12. Cosa kita puede aprende na ejemplo de Jacob?

¹² Puede kita aprende un leccion acerca si paquemodo si Jacob ya prepara para man mirajan na de suyu hermano y si paquemodo le ya atraca con Esau. Humilde le ya pidi el ayuda de Jehova na rezo. Despues, ya actua le harmonia na de suyu rezo cuando ya hace le el todo para tene paz na de suyu hermano. Cuando yan mirajan sila, nuay mas discuti si Jacob con Esau si quien el justo y si quien el mali. El goal de Jacob amo que tene paz na de suyu hermano. Paquemodo kita puede imita con el ejemplo de Jacob?

13-14. Si ya puede kita hace sinti duele con el un hermano, cosa kita debe hace?

¹³ Si quierre kita viaja na camino que ta guia para na vida, debe kita tene buen relacion na diaton maga hermano. (Roma 12:18) Cosa kita debe hace si ya realiza kita que ya puede kita hace sinti duele con el un hermano? Igual con Jacob, debe kita sincero reza con Jehova. Puede kita pidi con ele que bendici con el diaton maga esfuerzo que pricura tene paz na diaton hermano.

¹⁴ Debe tambien kita dale tiempo para examina con el diaton mismo cuerpo. Puede kita pregunta na diaton mismo cuerpo igual como: ‘Preparao ba yo habla que mali yo, con humildad pidi despensa y hace paz con otro? Cosa sinti si Jehova y si Jesus si hace yo manera para tene paz na de mio hermano o hermana?’ El diaton maga contestacion puede motiva kanaton para oi con Jesus y con humildad atraca con el diaton hermano para tene paz con ele. Si hace kita este, puede kita sigui na ejemplo de Jacob.

15. Paquemodo el principio na Efeso 4:2, 3 puede ayuda kanaton para tene paz na diaton hermano?

¹⁵ Imagina si ya purpia si Jacob con el de suyu hermano si quien el justo y si quien el mali! Posible, bien diferente el cosa ya sucede. Si atraca kita con el diaton hermano para arregla el diaton diferencia con ele, necesita kita hace con ese con humildad. (Le con el Efeso 4:2, 3.) El Proverbio 18:19 ta habla: “El un hermano quien ya sinti duele mas duro pa que con el un protegido ciudad, y tiene purpiajan que igual na maga tranca del fortaleza.” Si humilde kita pidi despensa, puede este ayuda para puede kita entra na ese “fortaleza.”

16. Cosa kita debe pensa y porque?

¹⁶ Necesita tambien kita pensa enbuenamente si cosa kita habla na diaton hermano y si paquemodo kita habla con ese. Si preparao ya kita, debe kita atraca con ese hermano con intencion que hace bira con el diaton relacion con ele. Na primero, posible le habla maga cosas que puede hace sinti duele kanaton. Bien facil lang que rabia y pricura defende con el diaton mismo cuerpo pero puede ba se ayuda para bira el diaton amistad con ele? Gendeh. Acorda que mas importante que tene kita otravez paz na diaton hermano contra dale prueba si quien el justo y si quien el mali.—1 Cor. 6:7.

17. Cosa tu ya aprende na ejemplo de Gilbert?

 ¹⁷ El un hermano que si Gilbert ya pricura hace esfuerzo para tene paz con otro. Ele ya habla: “Tiene yo manada problema na un miembro de familia. Por mas de dos año, ya hace yo maga esfuerzo para converza con ele na enbuenamente manera para bira otravez el diamon buen relacion.” Cosa pa ya hace si Gilbert? “Antes converza con ele, ta reza yo y ta hace acorda con el de mio mismo cuerpo que no rabia si tiene le cosa habla gendeh bueno. Necesita yo queda preparao perdona. Ya aprende yo que gendeh yo debe pricura dale prueba que iyo el justo y ya entende yo que responsibilidad de mio que pricura tene paz con ele.” Cosa el resulta? Si Gilbert ya habla: “Ahora, tiene yo paz na pensamiento cay tiene ya yo buen relacion na todo miembro del de mio familia.”

18-19. Si ya puede kita hace sinti duele con otro, cosa kita debe determinao hace y porque?

¹⁸ Entonces, cosa debe el de tuyu determinacion si ya realiza tu que ya puede tu hace sinti duele con el un hermano o hermana? Sigui con el direccion de Jesus que pricura tene paz. Man cuento con Jehova y pidi con el de suyu sagrao espiritu que ayuda contigo para hace con ese. Si hace tu se, hay queda tu alegre y hay dale tu prueba que ta oi tu con Jesus.—Mat. 5:9.

¹⁹ Ta rindi gayot kita gracias cay si Jehova ya dale kanaton amable direccion por medio na cabeza del congregacion, si Jesucristo. (Ef. 5:23) Ojala, queda kita determinao que ‘oi con ele,’ igual con apostol Pedro, Santiago y Juan. (Mat. 17:5) Ya examina kita que puede kita hace con ese si pricura kita tene paz con el un hermano o hermana con quien kita ya puede hace sinti duele. Si hace kita con ese y esta na malisud camino que ta guia para vida, hay ricibi kita manada bendicion ahora y alegria hasta para cuando na futuro.