1. Cosa el consejo que ya dale si apostol Pedro con el maga Cristiano y porque dol imposible aplica con ese?

NA CIELO man o na tierra el diaton esperanza, puede kita beneficia si considera kita con el consejo que ya dale si apostol Pedro con el maga iscujido Cristiano del primer siglo. Si Pedro ya escribi: “Igual con el Sagrao Dios quien ya llama con ustedes, queda ustedes sagrao na todo de ustedes conducta, cay este escribido: ‘Debe ustedes queda sagrao, cay iyo sagrao.’” (1 Ped. 1:15, 16, NWT) Na este maga palabra, ya aprende kita que puede kita imita con Jehova, el de con todo bueno ejemplo de pagka-sagrao. Puede kita y debe kita queda sagrao na diaton conducta. Dol imposible se cay imperfecto kita. Maskin si Pedro ya puede hace manada kamali pero el de suyu ejemplo ta dale mira que puede kita “queda sagrao.”

2. Cosa maga pregunta kita hay considera na este articulo?

² Na este articulo, hay considera kita con el siguiente pregunta: Cosa el pagka-sagrao? Cosa ta enseña el Biblia acerca na pagka-sagrao de Jehova? Paquemodo kita queda sagrao na diaton conducta? Y cosa el coneccion del pagka-sagrao na diaton relacion con Jehova?

3. Cosa ta pensa el manada gente acerca na sagrao persona pero onde kita puede incuntra justo informacion?

³ Si ta pensa el maga gente acerca na un persona que sagrao, manada el ta imagina con el un persona que gendeh ta re, ta visti maga religioso ropa y pirmi serioso el cara. Pero, gendeh ansina el maga sagrao gente. Maskin pa sagrao si Jehova, ya llama con ele como el “alegre Dios.” (1 Tim. 1:11, NWT) Aquellos quien ta adora con ele ya llama tambien como “alegre.” (Sal. 144:15) Ya condena si Jesus con aquellos quien ta visti maga  especial ropa y ta dale mira con el maga gente que recto sila. (Mat. 6:1; Mar. 12:38) Como maga Cristiano, sabe kita si cosa quierre decir del pagka-sagrao por causa na cosa ta habla el Biblia. Convincido kita que el diaton sagrao y amable Dios nunca kanaton dale mandamiento que gendeh kita puede obedece. Poreso, cuando ya habla kanaton si Jehova: “Debe ustedes queda sagrao,” asigurao kita que posible se kita hace. Siempre antes kita puede queda sagrao na diaton conducta, necesita kita entende si cosa quierre decir del pagka-sagrao.

4. Cosa quierre decir del maga palabra “sagrao” y “pagka-sagrao”?

⁴ Cosa el pagka-sagrao? Na Biblia, el maga palabra “sagrao” y “pagka-sagrao” ta refiri na pagka-limpio na moral y na espiritual. Este maga palabra quierre decir tambien que queda separtao para sirvi con Dios. Quierre decir, hay considera kanaton como sagrao si limpio kita na moral, si ta adora kita con Jehova na aceptable manera y si tiene kita cerca relacion con ele. Ta puede gayot afecta kanaton cay maskin maga imperfecto kita y sagrao si Jehova, quierre le siempre que tene kita personal relacion con ele.

5. Cosa kita puede aprende acerca con Jehova na maga fiel angel?

⁵ Puro y limpio si Jehova na todo cosas. Sabe kita este por causa na cosa ya habla el maga serafin—maga angel quien cerca na de suyu trono. El cuanto kanila ya proclama: “Sagrao, sagrao, sagrao si Jehova de maga soldao.” (Isa. 6:3) Siempre para tene cerca relacion con el diila sagrao Dios, el maga angel mismo debe queda sagrao—y ansina sila. Gane, el presencia pa lang del un angel de Jehova puede ya hace sagrao con el un lugar na tierra. Ese el cosa ya sucede cuando si Moises talla cerca na matunuk siembra que ta arde.—Ex. 3:2-5; Jos. 5:15.

6-7. (a) Asegun na Exodo 15:1, 11, paquemodo si Moises ya hace claro que sagrao el Dios? (b) Cosa ya hace acorda con el maga Israelita que sagrao el Dios? (Mira con el letrato na cover.)

⁶ Despues guia si Moises con el maga Israelita para travesa na Colorao Mar, ya hace le claro que sagrao el diila Dios, si Jehova. (Le con el Exodo 15:1, 11.) Gendeh sagrao el conducta del maga quien ta adora con el maga dios de Egipto. Ansina tambien aquellos quien ta adora con el maga dios de Canaan. El diila adoranza ta inclui que ofrece maga bata y ta hace maga maka-asco practica de sexo. (Lev. 18:3, 4, 21-24; Deut. 18:9, 10) Pero, si Jehova nuay gayot pidi con el de suyu maga siervo que hace maskin cosa que gendeh limpio. Bien sagrao le. Claro se puede mira na placa que hacido de oro na turban del alto sacerdote. Escribido na ese placa el maga palabra: “De Jehova el pagka-sagrao.”—Ex. 28:36-38.

⁷ El mensaje na ese placa hay dale asiguranza con el maskin quien ta mira con ese que deverasan sagrao si Jehova. Pero, quetal el un Israelita quien nuay puede mira con ese placa cay gendeh le puede atraca con el alto sacerdote? Hay sabe ba siempre le que sagrao si Jehova? Si! El cada Israelita ya oi con ese mensaje mientras ta le con el Ley enfrente del maga hombre, mujer y bata. (Deut. 31:9-12) Si talla tu presente, asigurao ya puede tu oi con este maga palabra: “Iyo si Jehova el de ustedes Dios, y debe ustedes . . . queda sagrao, cay iyo sagrao.” “Debe ustedes queda sagrao adelante conmigo, cay iyo, si Jehova, sagrao.”—Lev. 11:44, 45; 20:7, 26.

8. Cosa kita puede aprende na Levitico 19:2 y 1 Pedro 1:14-16?

⁸ Man focus kita ahora na maga palabra na Levitico 19:2 que ya le con el todo Israelita. Ya habla si Jehova con Moises: “Habla con el todo  Israelita, ‘Debe ustedes queda sagrao, cay iyo, si Jehova el de ustedes Dios, sagrao.’” Posible, alli estaba el cosa ya habla si Pedro cuando ya anima le con el maga Cristiano que ‘queda sagrao.’ (Le con el 1 Pedro 1:14-16, NWT.) Siempre, gendeh mas kita bajo na Ley de Moises. Maskin pa ansina, el cosa ya escribi si Pedro ta suporta con el cosa kita ya aprende na Levitico 19:2 que sagrao si Jehova y aquellos quien ta ama con ele debe pricura queda sagrao. Deverasan este, na cielo man o na tierra el diaton esperanza.—1 Ped. 1:4; 2 Ped. 3:13.

9. Paquemodo kita hay beneficia si considera kita con el Levitico capitulo 19?

⁹ Cay quierre kita hace alegre con el diaton sagrao Dios, quierre kita aprende si paquemodo kita puede queda sagrao. Si Jehova ta dale cuanto practical consejo si paquemodo kita puede hace con ese. Puede kita incuntra con ese consejo na Levitico capitulo 19. El un Hebreo scholar que si Marcus Kalisch ya escribi: “Este posible el de con todo importante capitulo na Levitico y na primer cinco libro del Biblia.” Acorda que el Levitico 19 ta principia na maga palabra: “Debe ustedes queda sagrao.” Hay discuti kita ahora cuanto versiculo na ese capitulo que ta enseña kanaton con el diferente manera si paquemodo kita queda sagrao na diaton vida.

10-11. Cosa ta habla el Levitico 19:3 que necesita kita hace y porque este importante?

¹⁰ Despues habla con el maga Israelita que debe sila queda sagrao, si Jehova ya omenta: “El cada uno de ustedes debe respeta con el de ustedes nana y tata . . . Iyo si Jehova el de ustedes Dios.”—Lev. 19:2, 3.

¹¹ Claro que bien importante que obedece con el direccion del Dios que honra con el diaton mayores. Acorda con el un tiempo cuando el un hombre ya pregunta con Jesus: “Cosa bueno el necesita yo hace para tene el Vida Eterno?” Parte del contestacion de Jesus que el hombre necesita honra con el de suyu tata y nana. (Mat. 19:16-19) Ya condena pa gane si Jesus con el maga Fariseo y escriba quien ta hace el todo para gendeh sila cuida con el diila mayores. Na ese manera, “ya nega [sila] el Palabra del Dios.” (Mat. 15:3-6) “El Palabra del Dios” ta inclui el ika-cinco na Diez Mandamiento  y el cosa kita puede le na Levitico 19:3. (Ex. 20:12) Acorda otravez que ya dale con el direccion que puede incuntra na Levitico 19:3—que respeta con el nana y tata—despues el maga palabra: “Debe ustedes queda sagrao, cay iyo, si Jehova el de ustedes Dios, sagrao.”

12. Harmonia na consejo na Levitico 19:3, cosa kita puede pregunta na diaton mismo cuerpo?

¹² Harmonia na consejo de Jehova que honra con el diaton mayores, puede kita pregunta na diaton mismo cuerpo, ‘Ta aplica ba yo con este?’ Si ta sinti tu que mas pa era el cosa tu ya hace de antes, puede tu decidi que hace maga cambio ahora. Gendeh mas tu puede cambia si cosa ya sucede de antes pero puede tu queda determinao ahora que hace mas para na de tuyu mayores. Posible, puede tu hace esfuerzo para dale mas grande tiempo para man junto kanila. O puede ba tu suporta kanila na material, espiritual o na emocional manera? Si hace tu se, ta obedece tu con el mandamiento na Levitico 19:3.

13. (a) Cosa pa el otro consejo que puede incuntra na Levitico 19:3? (b) Paquemodo kita ahora puede imita con el ejemplo de Jesus na Lucas 4:16-18?

¹³ El Levitico 19:3 ta enseña kanaton otro cosa acerca na pagka-sagrao. Ya menciona este que cumpli con el maga Sabbath. El maga Cristiano gendeh bajo na Ley poreso gendeh kita necesita cumpli con el Sabbath cada semana. Maskin pa ansina, manada kita cosa puede aprende si paquemodo el maga Israelita ya cumpli con el Sabbath y si cosa el maga beneficio cay ya hace sila con ese. El Sabbath amo el tiempo para descanza na trabajo y dale atencion na maga espiritual cosas. * Amo se el razon si porque na dia de Sabbath, si Jesus ta anda na sinagoga na lugar onde le ya engranda para le con el Palabra del Dios. (Ex. 31:12-15; le con el Lucas 4:16-18.) El mandamiento del Dios na Levitico 19:3 que “cumpli con el [de suyu] maga sabbath” debe manda move kanaton para dale tiempo cada dia para dale mas atencion na maga espiritual cosas. Ta sinti ba tu que debe tu hace cuanto cambio na este aspeto? Si regular tu dale tiempo para man focus na maga espiritual cosas, hay tene tu un personal relacion con Jehova que bien importante para queda sagrao.

14. Cosa importante verdad el ya hace claro na Levitico capitulo 19?

¹⁴ El Levitico capitulo 19 manada beses ya menciona con el un importante verdad que puede ayuda kanaton para esta sagrao. Na fin del versiculo 4, puede kita le con el maga palabra: “Iyo si Jehova el de ustedes Dios.” Ese frase o el maga semejante palabra puede incuntra 16 beses na este capitulo. Ta hace este kanaton acorda con el primer mandamiento: “Iyo si Jehova el de tuyu Dios . . . Gendeh tu debe adora na otro maga dios puera conmigo.” (Ex. 20:2, 3) El cada Cristiano quien quierre queda sagrao debe asigura que nuay maskin cosa o maskin quien el queda mas importante con ele contra na de suyu relacion con Dios. Y cay ta lleva kita con el nombre maga Testigo de Jehova, determinao kita que evita maskin cosa accion que posible lleva verguenza na de suyu nombre.—Lev. 19:12; Isa. 57:15.

15. El maga versiculo na Levitico capitulo 19 acerca maga sacrificio debe manda move kanaton para hace cosa?

¹⁵ Puede dale mira el maga Israelita que ta acepta sila con Jehova como el diila Dios si obedece sila con el de suyu maga ley. El Levitico 18:4 ta habla: “Debe ustedes cumpli con el  de mio maga judicial decision, y debe ustedes sigui con el de mio maga ley y vivi uyun con este. Iyo si Jehova el de ustedes Dios.” El capitulo 19 ta inclui el cuanto de ese “maga ley” para na Israel. Por ejemplo, el versiculo 5-8, 21, 22 ya menciona acerca na maga sacrificio de animal. Necesita con este ofrece na manera que ta “respeta con el un cosa que sagrao con Jehova.” Este maga versiculo debe manda move kanaton para tene el deseo que hace alegre con Jehova y ofrece con ele maga aceptable sacrificio de alabanza como cosa ta anima kanaton el Maga Hebreo 13:15.

16. Cosa posible hace acorda kanaton acerca na diferencia de aquellos quien ta sirvi con Dios y aquellos gendeh ta sirvi con ele?

¹⁶ Para queda sagrao, debe kita queda diferente con otro. Posible, dificil con ese hace. Tiene vez, el diaton maga uban na escuela, na trabajo, maga pariente que gendeh Testigo y el otro posible man pressure kanaton que participa na maga actividad que hay sangga con el diaton adoranza. Si sucede se, necesita kita hace un importante decision. Cosa puede ayuda kanaton para hace justo decision? Considera con el un bonito principio que puede incuntra na ultimo parte del Levitico 19:19: “Gendeh ustedes debe visti ropa que hacido de dos clase de hilo.” Ese ley ya ayuda con el Israel para queda diferente na maga nacion alrededor kanila. Ahora, gendeh malo para kanaton que visti maga ropa que hacido de dos clase de material, igual como cotton y polyester. Pero, no quierre kita queda igual con el maga gente que el maga creencia y practica tan contra na cosa ta enseña el Biblia, maskin pa uban sila diaton na escuela, trabajo o pariente. Siempre, ta ama kita con el diaton maga pariente y con el diaton maga projimo. Pero si acerca na maga importante aspeto na diaton vida, quierre kita queda separtao como maga siervo de Jehova. Bien importante se cay si quierre kita queda sagrao, necesita kita queda separtao para sirvi con Dios.—2 Cor. 6:14-16; 1 Ped. 4:3, 4.

17-18. Cosa importante leccion kita puede aprende na Levitico 19:23-25?

¹⁷ El frase “iyo si Jehova el de ustedes Dios” debe ya hace acorda con el maga Israelita que hace prioridad con el diila relacion con Jehova. Paquemodo? El Levitico 19:23-25 ta revela un manera. (Le.) Considera si cosa quierre decir de este maga palabra para na maga Israelita despues sila entra na Tierra Prometido. Si el un gente ya siembra maga pono para tene comida, gendeh le debe come con el fruta de ese maga pono por tres año. Na ika-cuatro año, hay usa con el maga fruta na santuario del  Dios. Na ika-cinco año lang puede come el dueño con el fruta. Este ley ya ayuda con el maga Israelita para entende que gendeh debe hace una con el diila mismo interes. Necesita sila confia que si Jehova hay cuida kanila y necesita sila hace prioridad con el de suyu adoranza. Hay asigura le que tiene sila bastante comida. Y ya anima kanila el Dios que queda bondadoso y dale maga regalo na santuario, el centro del de suyu adoranza.

¹⁸ El ley na Levitico 19:23-25 ta hace acorda kanaton con el maga palabra de Jesus na Sermon na Monte. Ele ya habla: “No ustedes man lingasa por causa del comida que necesita ustedes para vivi.” Si Jesus ya continua: “El de ustedes Tata na cielo sabe ya cay necesita ustedes todo ese.” El Dios hay cuida kanaton igual con el cosa le ta hace na maga pajaro. (Mat. 6:25, 26, 32) Ta confia kita que dale si Jehova el diaton maga necesidad. Y ta hace kita manera para ayuda con aquellos quien ta necesita maskin gendeh se kita ta manda sabe con otro. Alegre tambien kita contribui para na maga gasto na congregacion. Ta nota si Jehova si bondadoso kita y hay bendici le kanaton. (Mat. 6:2-4) Si hace kita se, ta dale kita mira que ya entende kita con el maga leccion na Levitico 19:23-25.

19. Paquemodo tu ya beneficia na este porcion del Levitico?

¹⁹ Ya puede kita examina con el cuanto porcion del Levitico capitulo 19 y ya puede este ayuda kanaton para entende si paquemodo kita puede queda igual na diaton sagrao Dios. Si ta imita kita con ele, ta pricura kita ‘queda sagrao na todo diaton conducta.’ (1 Ped. 1:15, NWT) Manada de aquellos quien gendeh ta sirvi con Jehova el ya puede mira con el buen conducta del de suyu maga siervo. Gane, ya manda este move con el cuanto para dale gloria con Jehova. (1 Ped. 2:12) Pero, manada pa kita cosa puede aprende na Levitico capitulo 19. El siguiente articulo hay discuti con el otro pa maga versiculo na ese capitulo. Ayuda este para mira con el cuanto aspeto na diaton vida donde puede kita ‘queda sagrao’ como cosa ya anima si Pedro.