1. Cosa el un razon si porque posible ya compara si Jesus con el de suyu maga siguidores na maga carnero?

YA COMPARA si Jesus con el de suyu relacion na de suyu maga siguidores na relacion del un pastor na de suyu maga carnero. (Juan 10:14) Justo gayot se. Conoce el maga carnero con el diila pastor y ta oi sila con el de suyu voz. El un turista ya puede experiencia con ese mismo. Ele ya habla: “Quierre kame letrata con el cuanto carnero y pricura manda atraca kanila. Pero, nuay sila atraca kanamon cay no conoce sila con el diamon voz. Despues, ya llega el un bata pastor. Y cuando ya llama le kanila, ya sigui dayun sila con ele.”

2-3. (a) Paquemodo el maga siguidores de Jesus puede dale mira que ta oi sila con el de suyu voz? (b) Cosa kita considera na este articulo y na sunod?

² El experiencia del turista ta hace kanaton acorda con el palabra de Jesus acerca na de suyu maga carnero—el de suyu maga dicipulo. Ele ya habla: “Sila ay oi el dimio voz.” (Juan 10:16) Pero, na cielo si Jesus. Paquemodo kita puede habla que ta oi kita con ele? El un manera que puede kita dale mira que ta oi kita con el de suyu voz amo si aplica kita con el de suyu maga enseñanza na diaton vida.—Mat. 7:24, 25.

³ Na este articulo y na sunod, hay considera kita con el cuanto enseñanza de Jesus. Como cosa kita hay discuti, si Jesus ya enseña kanaton que gendeh kita debe hace el cuanto cosas y que debe kita hace con el otro cosas. Hay considera kita una con el dos cosas que ya habla el buen pastor que gendeh kita debe hace.

4. Asegun na Lucas 12:29, cosa puede causa kanaton para “vivi con ansias” o man lingasa?

⁴ Le con el Lucas 12:29. Ya anima si Jesus con el de suyu maga siguidores que “no vivi con ansias” acerca na diila maga material necesidad. Sabe kita que el consejo de Jesus pirmi justo. Quierre kita aplica con ese pero tiene vez, posible dificil se para hace. Porque?

5. Porque posible tan lingasa el cuanto acerca na diila maga material necesidad?

 ⁵ El cuanto posible tan lingasa acerca na diila maga material necesidad—comida, camisa y casa. Posible, ta queda sila na un nacion que dificil el economia. Posible, dificil para kanila tene bastante sen para cuida con el diila familia. O posible, ya muri el persona quien ta trabaja para na familia poreso nuay mas quien hay suporta na financial con el familia. Por causa na COVID-19 pandemic, posible manada el ya perde trabajo. (Ecl. 9:11) Si ya experiencia kita maskin uno de ese o otro pa maga dificultad, paquemodo kita puede sigui con el direccion de Jesus que no man lingasa?

6. Dale detalle si cosa ya sucede con apostol Pedro na un ocasion.

⁶ Na un ocasion, si apostol Pedro y el otro maga apostoles talli na bangca na Mar de Galilea durante el un fuerte tifun cuando ya puede sila mira con Jesus que ta camina encima del agua. Si Pedro ya habla: “Señor, si deverasan Uste se, manda conmigo anda con uste caminando incima del agua.” Despues con ele invita si Jesus que “vene,” si Pedro ya sale na bangca y “ya principia camina incima del agua para con Jesus.” Nota si cosa ya sucede despues. “Cuando ya mira le cay bien fuerte el viento, ya tene le miedo y ya principia le  sumi na agua y ya grita le: ‘Salva conmigo, Señor!’” Ya istira si Jesus con el de suyu mano y ya salva con ele. Importante que acorda kita que ya puede camina si Pedro encima del agua cuando ya continua le mira con Jesus. Pero cuando ya mira si Pedro con el tifun, ya tiene le miedo, yan duda y ya principia le sumi.—Mat. 14:24-31.

7. Cosa kita puede aprende na ejemplo de Pedro?

⁷ Tiene kita cosa puede aprende na ejemplo de Pedro. Cuando ya sale na bangca si Pedro para camina na agua, nuay le expecta que hay queda le malingasa acerca na tifun y principia sumi. Quierre le esta encima del agua hasta hay llega le con Jesus. Pero, nuay le se puede hace. Deverasan, gendeh kita puede camina encima del agua pero ta enfrenta kita maga probanza na fe. Si gendeh kita man focus con Jehova y na de suyu maga promesa, hay principia kita sumi na espiritual. Maskin cosa pa man figurativo tifun el llega na diaton vida, debe kita continua man focus con Jehova y na de suyu abilidad para ayuda kanaton. Paquemodo kita puede hace con ese?

8. Cosa puede ayuda kanaton para evita queda sobra de malingasa acerca na diaton maga material necesidad?

⁸ En vez de queda malingasa acerca na diaton maga problema, necesita kita confia con Jehova. Acorda que el diaton amable Tata, si Jehova, ya promete que hay dale le con el diaton maga material necesidad si hay hace kita una con el maga espiritual cosas. (Mat. 6:32, 33) Pirmi le ta cumpli con ese promesa. (Deut. 8:4, 15, 16; Sal. 37:25) Si ya dale si Jehova el necesidad del maga pajaro y del maga flores, asigurao gendeh kita necesita man lingasa acerca si cosa kita hay come o visti! (Mat. 6:26-30; Fil. 4:6, 7) Igual si paquemodo el amor ta manda move con el amable mayores para dale el necesidad del diila maga anak, amor tambien el ta manda move con el diaton Tata na cielo para dale el material necesidad del de suyu maga siervo. Si, puede kita asigura que si Jehova hay cuida kanaton!

9. Cosa tu ya puede aprende na experiencia del un maridable?

⁹ Considera con el un experiencia que ta dale mira si paquemodo si Jehova puede dale con el diaton maga material necesidad. El un maridable quien ta sirvi full-time ya viaja por mas de un hora usando el diila daan coche para incuntra con el cuanto hermana quien ta queda na refugee center y lleva kanila na miting. El hermano ya explica: “Despues del miting, ya invita kame con el maga hermana para come pero ya realiza kame que nuay kame cosa para ofrece kanila.” Cosa ya hace el man maridable? El hermano ya continua: “Cuando ya llega kame na casa, tiene dos grande bag de comida na diamon puerta. No sabe kame si quien ya deja con aquel alla. Ya dale si Jehova el cosa kame necesita.” Despues del cuanto tiempo, ya queda malo el coche del maridable. Necesita sila con este para na ministerio pero nuay sila sen para compone con ese. Ya lleva sila con el coche na un repair shop para sabe si cuanto sila paga para compone con ese. Despues, tiene un hombre ya llega y ya pregunta: “De quien coche este?” El hermano ya habla que de suyu quel y necesita con aquel compone. El hombre ya habla: “Nuay se problema. El de mio mujer quierre ansina clase de coche y ese mismo color. Cuanto tu vende con ese?” Ya vende el hermano con el de suyu coche y ya tiene le bastante sen para cumpra otro coche. Ele ya habla: “Gendeh mas yo necesita explica si cosa kame ya sinti ese dia. Sabe kame que gendeh lang este basta ya sucede sino ayuda este de Jehova.”

10. Paquemodo el Salmo 37:5 ta anima kanaton que no man lingasa acerca na diaton maga material necesidad?

 ¹⁰ Si oi kita con el buen pastor y gendeh queda sobra de malingasa acerca na maga material necesidad, puede kita asigura que hay cuida kanaton si Jehova. (Le con el Salmo 37:5; 1 Ped. 5:7) Considera con el maga situacion que ya menciona na  parapo 5. Hasta este tiempo, posible ta usa si Jehova con el un cabeza de familia o un amo para ayuda kanaton dale el diaton necesidad de cada dia. Si gendeh mas se puede hace el un cabeza de familia o si ya perde el diaton trabajo, si Jehova hay cuida kanaton na otro manera. Puede kita asigura con ese. Considera kita ahora con el otro cosa que el buen pastor ta anima kanaton que no hace.

11. Asegun na Mateo 7:1, 2, cosa ya habla si Jesus que no kita hace y porque este dificil para hace?

¹¹ Le con el Mateo 7:1, 2. Sabe si Jesus que imperfecto el maga gente y tiene el tendencia que man focus na kamali del otro. Poreso ele ya habla: “No ustedes juzga con otros.” Posible, ta pricura kita que gendeh juzga con el diaton maga hermano y hermana. Pero, imperfecto kita todo. Si ta puede kita nota que tan focus kita na kamali del otro, cosa kita debe hace? Oi con Jesus y pricura no juzga con otro.

12-13. Paquemodo el ejemplo de Jehova puede ayuda kanaton que no juzga con otro?

¹² Puede kita beneficia si medita kita con el ejemplo de Jehova. Tan focus le si cosa el bueno na maga gente. Puede kita este mira si paquemodo le ya trata con Rey David, un gente quien ya hace maga serioso kamali. Por ejemplo, ya comete le adulterio junto con Batseba y ya manda pa gane le mata con el marido de este. (2 Sam. 11:2-4, 14, 15, 24) Como resulta, gendeh lang si David el ya sufri sino hasta el de suyu familia, incluido ya el de suyu otro maga mujer. (2 Sam. 12:10, 11) Na otro ocasion, nuay dale mira si David con el de suyu completo confianza con Jehova cuando ya manda le cunta con el maga soldao del Israel—un cosa que nuay con ele manda si Jehova. Posible, ya hace este si David por causa na de suyu orgullo y na de suyu confianza si paquemodo de manada el de suyu soldao. Cosa el resulta? Maga 70,000 Israelita el ya muri na epidemia!—2 Sam. 24:1-4, 10-15.

¹³ Si ya vivi tu na Israel na ese tiempo, cosa el de tuyu mirada con David? Hay juzga ba tu que gendeh con ele conviene dale mira lastima si Jehova? Gendeh ansina el mirada de Jehova. Yan focus le si paquemodo de fiel si David na de suyu entero vida y si paquemodo le de sincero ya arripinti. Como resulta, ya perdona si Jehova con el maga serioso culpa de David. Sabe si Jehova que ta ama gayot con ele si David y quierre hace si cosa el justo. Gendeh ba maka-alegre que el diaton Dios ta mira si cosa el bueno kanaton?—1 Rey 9:4; 1 Cron. 29:10, 17.

14. Cosa puede ayuda con el maga Cristiano para gendeh juzga con otro?

¹⁴ Cay gendeh kanaton ta expecta perfeccion si Jehova, gendeh tambien se kita debe expecta con otro y mira si cosa el bueno kanila. Deverasan, facil mira el imperfeccion del otro y juzga kanila. Pero el un persona quien ta imita con Jehova, ta puede siempre man junto con otro maskin pa na diila maga imperfeccion. Gendeh bonito mira con el un diamante que nuay pa forma pero sabe el un sabio persona que bien bonito este y precioso si ya forma ya con este y ya hace brilla. Igual con Jehova y Jesus, gendeh kita debe man  focus na imperfeccion del maga gente sino na diila maga bonito calidad.

15. Porque puede ayuda kanaton que gendeh juzga con otro si considera kita con el circumstancia del maga gente?

¹⁵ Puera que man focus na maga buen calidad del otro, cosa pa puede ayuda kanaton para gendeh juzga kanila? Pricura imagina con el diila circumstancia na vida. Considera con este ejemplo. Un dia na templo, ya mira si Jesus con el un pobre viuda que ta hace cae dos sencillo que diutay el valor na un cajon de contribucion. Nuay le pregunta: “Porque ese lang el cosa le ya hace cae?” En vez de man focus na cantidad que ya dale el viuda, si Jesus ya considera con el de suyu motivo y circumstancia y ya comenda cay ya hace le el todo cosa le puede hace.—Luc. 21:1-4.

16. Cosa tu puede aprende na experiencia de Veronica?

¹⁶ El experiencia del un hermana que si Veronica ta dale mira si porque importante que considera kita con el circumstancia del otro. Na congregacion onde le ta sirvi, tiene un solo nana que tiene un anak hombre. Si Veronica ya habla: “Para conmigo, dol gendeh sila tanto ta participa na maga actividad na congregacion. Por causa con ese, ya tiene yo negativo mirada kanila. Pero, yan junto yo con el nana na ministerio. Ya explica le el dificultad que ta enfrenta le cay ta cuida le con el de suyu anak que tiene enfermedad na pensamiento. Ta hace le el de suyu de con todo bueno  para dale el diila fisical y espiritual necesidad. Tiene vez por causa na salud del de suyu anak, na otro congregacion ya lang le ta atende miting.” Na uliji, si Veronica ya puede habla: “Nuay yo realiza que bien dificil gayot el de suyu vida. Ahora, ta aprecia y ta respeta gayot yo con este hermana na todo cosa le ta hace para sirvi con Jehova.”

17. Cosa kanaton ta manda hace el Santiago 2:8 y paquemodo kita con ese hace?

¹⁷ Cosa kita debe hace si ya realiza kita que ya juzga kita con el diaton hermano o hermana? Debe kita acorda que necesita kita ama kanila. (Le con el Santiago 2:8.) Debe tambien kita reza con todo corazon con Jehova y pidi con ele que ayuda kanaton que gendeh mas juzga. Puede kita actua harmonia na diaton maga rezo si dale kita tiempo para man cuento con el persona con quien kita ya juzga. Posible, hay permiti este kanaton que conoce pa mas con ele. Puede kita pidi con ele que sigui kanaton na ministerio o come junto kanaton. Mientras mas ta conoce kita con el diaton hermano, puede kita sigui con el ejemplo de Jehova y Jesus que mira si cosa el bueno con ele. Na este manera, ta dale kita mira que ta obedece kita con el mandamiento del buen pastor que no juzga.

18. Paquemodo kita puede dale mira que ta oi kita con el voz del buen pastor?

¹⁸ Igual si paquemodo el maga literal carnero ta oi con el voz del diila pastor, el maga siguidores de Jesus ta oi con el de suyu voz. Si hace kita esfuerzo que gendeh man lingasa acerca na diaton maga material necesidad y gendeh juzga con otro, hay bendici si Jehova y si Jesus con el diaton maga esfuerzo. Parte man kita del “diutay grupo” o del “otro maga carnero,” ojala continua kita oi con el voz del buen pastor. (Luc. 12:32, NWT; Juan 10:11, 14, 16) Na siguiente articulo, hay considera kita dos cosas que ya habla si Jesus na de suyu maga siguidores que debe sila hace.