Ya anima si Jehova con el maga Israelita que queda sagrao. Para puede ayuda kanila queda sagrao, ya habla le kanila: “No anda hace calayat maga falso acusacion. No pone na peligro el vida del de tuyu projimo. Iyo si Jehova.”—Lev. 19:2, 16.

El original Hebreo palabra que yan translate “pone na peligro” puede tambien man translate como “levanta contra.” Cosa este quierre decir? El un libro de Judaismo acerca na Levitico ta habla: “Este parte del versiculo amo . . . tormento para entende cay dificil para sabe si cosa quierre decir del Hebreo expresion que literal quierre decir ‘no para enfrente, adelante, cerca.’”

El cuanto scholar ta pensa que este maga frase conectao na versiculo 15 que ta habla: “No juzga con injusticia. No man afavor con el pobre o man afavor con el rico. Juzga con el de tuyu projimo con justicia.” (Lev. 19:15) Si ansina, este mandato que puede incuntra na versiculo 16 que no “pone na peligro” con otro posible quierre decir que el maga Israelita gendeh debe hace maga injusticia na corte, na negocio o na familia. Y gendeh tambien sila debe hace maga deshonesto cosas para na beneficio del diila mismo cuerpo. Deverasan, gendeh kita debe hace con ese maga cosas pero tiene pa mas buen manera para entende con este frase na versiculo 16.

Considera con el primer parte del versiculo. Ya manda el Dios con el de suyu maga siervo que no hace calayat maga falso acusacion. Deverasan que si el un persona ta man chismis acerca con otro, puede ele causa maga problema. Pero si el un persona falso ta acusa con otro, mas grabe este. (Prov. 10:19; Ecl. 10:12-14; 1 Tim. 5:11-15; Sant. 3:6) Mas manada, el un persona quien ta hace maga falso acusacion intencional con ese ta hace para hace malo con el reputacion del otro. Ese persona posible hay dale falso testimonia maskin pa hay causa este muerte con el persona con quien le ya hace malo. Acorda que el maga gente quien falso ya acusa con Nabot amo el razon si porque con ele ya guerria piedra hasta ya muri. (1 Rey 21:8-13) Si, el un persona quien ta hace maga falso acusacion puede pone na peligro con el vida del otro gente, como cosa ya menciona na segundo parte del Levitico 19:16.

Mas pa, el un persona posible falso acusa con otro cay ta odia le con este. Na 1 San Juan 3:15, puede kita le: “Si tiene ta odia con su hermano o hermana, ele un criminal y sabe ya ustedes que el criminal noay Vida Eterno adentro con ele.” Y despues habla el Dios el maga palabra que puede incuntra na versiculo 16, ya omenta le: “Gendeh tu debe odia con el de tuyu hermano na de tuyu corazon.”—Lev. 19:17.

Entonces, el mandato na Levitico 19:16 ta dale fuerte consejo na maga Cristiano. Debe kita resisti con el maga negativo pensamiento y falso acusa con otro persona. Si ta “pone [kita] na peligro” con otro por medio na maga falso acusacion que ta habla kita contra con ele cay no quierre kita o ta envidia kita con ele, posible ta dale este prueba que ta odia kita con ele. El maga Cristiano debe gayot evita con ese.—Mat. 12:36, 37.