Ya puede ba tu le con el maga articulo na El Torre de Guardia de este año? Mira si puede tu contesta con el siguiente pregunta:

Cosa asiguranza ta dale el Santiago 5:11 que si Jehova “bien cariñoso” y “lastimoso”?

Por causa na lastima de Jehova, ta perdona le con el diaton maga pecado. El Santiago 5:11 ta asigura tambien kanaton que pirmi le preparao ayuda kanaton. Bueno que imita kita con ele.—w21.01, p. 21.

Porque ya dale autoridad si Jehova con el cuanto?

Ya hace le se por causa na de suyu amor. Este arreglamiento ya hace posible para tiene paz y orden el de suyu leal familia. El cada miembro de familia quien ta sigui con ese arreglamiento sabe si quien debe hace el ultimo decision y si quien el debe cumpli con ese.—w21.02, p. 3.

Porque debe con cuidao el maga Cristiano si ta usa con el maga electronic messaging app?

Si el un persona hay decidi que usa con ese maga app, necesita le iscuji enbuenamente si con quien le asocia. Mas dificil ese si tan message le na maga grande grupo de maga gente. (1 Tim. 5:13) Tiene tambien este maga peligro que hace calayat maga gendeh confirmao istoria y man message con el maga Witness para vende, cumpra y introduci con el diila maga producto.—w21.03, p. 31.

Cosa el cuanto razon si porque el Dios ya permiti con Jesus que sufri y muri?

Cay ya hace bitay con Jesus na estaca, puede libra con el maga Judio desde na un maldicion. (Gal. 3:10, 13) El segundo amo yan train si Jehova con Jesus para na de suyu papel como el Alto Sacerdote. Y el ika-tres amo que el lealtad de Jesus hasta na muerte ta dale prueba que el maga gente puede esta fiel maskin pa na maga grabe probanza. (Job 1:9-11)—w21.04, p. 16-17.

Cosa tu puede hace si dificil incuntra con el maga gente na ministerio?

Pruba predica na hora que posible na casa sila. Puede tambien tu predica na diferente lugar. Y puede tu pruba predica na diferente manera, igual como escribi carta.—w21.05, p. 15-16.

Cosa quierre decir de apostol Pablo cuando ya habla le: “Por causa del Ley muerto ya yo na Ley”? (Gal. 2:19)

El Ley de Moises ya hace claro con el imperfeccion del maga gente y ya guia con el Israel para con el Cristo. (Gal. 3:19, 24) Este ya manda move con Pablo para acepta con el Cristo. Por causa con ese, si Pablo ya queda “muerto . . . na Ley”; gendeh mas le bajo con ese.—w21.06, p. 31.

Cosa ejemplo ya dale mira si Jehova kanaton si paquemodo aguanta?

Ya aguanta si Jehova con el insulto na de suyu nombre, oposicion na de suyu soberania, rebelion del cuanto del de suyu maga anak, maga imbusterias de Satanas, sufrimiento del de suyu maga siervo, queda separtao na de suyu maga amigo quien ya muri, maltratamiento con el maga gente y el destrozo del de suyu maga creacion.—w21.07, p. 9-12.

Paquemodo si Jose ya dale mira buen ejemplo de paciencia?

Ya aguanta le maltratamiento estaba na de suyu maga hermano. Por causa con ese, falso ya acusa con ele y ya hace preso por manada año na Egipto.—w21.08, p. 12.

Cosa clase de uyuk el ya predicta na Haggeo 2:6-9, 20-22?

El maga nacion ya tiene negativo reaccion na predicacion acerca del Reino pero manada gente el ya guinda na verdad. Gendeh mas dura, hay hace uyuk con el maga nacion si hay destroza ya con este.—w21.09, p. 15-19.

Porque gendeh kita debe descanza na diaton ministerio?

Ta mira si Jehova con el diaton maga esfuerzo y alegre le con ese. Si gendeh kita descanza, hay obtene kita vida hasta para cuando.—w21.10, p. 25-26.

Paquemodo puede ayuda kanaton el Levitico capitulo 19 para aplica con el consejo: “Queda ustedes sagrao na todo de ustedes conducta”? (1 Ped. 1:15, NWT)

Ese versiculo posible estaba na Levitico 19:2. El capitulo 19 ta dale kanaton manada ejemplo si paquemodo aplica con el 1 Pedro 1:15 na diaton vida.—w21.12, p. 3-4.