Ya aprende si Jesus el maga calidad que ya ayuda con ele queda un buen ejemplo como un uban na trabajo con aquellos con quien ele yan junto aqui na tierra. Paquemodo kita puede beneficia na ejemplo de Jesus? Si examina kita enbuenamente con el de suyu ejemplo, puede kita mira tres principio que puede ayuda kanaton queda un buen uban na trabajo. Este maga principio hay ayuda kanaton queda mas unido na diaton maga hermano y hermana.

Humilde el un buen uban na trabajo. Ta pensa le que importante el de suyu maga uban y gendeh ta pricura saca el atencion del otro. Ya aprende si Jesus con ese calidad na de suyu Tata. Maskin pa con Jehova lang conviene llama Creador, quierre le manda sabe con otro acerca na importante trabajo que ya hace el de suyu Anak. Puede se kita mira na cosa ya habla el Dios: “Hace kita gente asegun na diaton imagen.” (Gen. 1:26) Posible, ya aprecia si Jesus con el humildad de Jehova cuando ya habla Le este maga palabra.—Sal. 18:35.

Cuando taqui na tierra, humilde tambien si Jesus. Cuando ya alaba con ele el maga gente na cosa le ya hace, ya dale le el alabanza con el quien conviene ricibi con ese. (Mar. 10:17, 18; Juan 7:15, 16) Ya hace esfuerzo si Jesus para mentena el paz na de suyu maga dicipulo y ya  trata kanila como maga amigo en vez maga esclavo. (Juan 15:15) Ya laba pa gane le con el diila pies para enseña kanila si paquemodo queda humilde. (Juan 13:5, 12-14) Igual con ele, debe kita honra con el diaton maga hermano y hermana en vez hace una el diaton personal interes contra diila. Si ta “respeta gayot [kita] con uno y otro” y gendeh tan lingasa acerca si quien ricibi el alabanza, mas manada kita cosa puede cumpli.—Roma 12:10.

El un humilde persona ta entende tambien que “tiene buen exito si manada el quien ta dale consejo.” (Prov. 15:22) Maskin pa na diaton experiencia o maga abilidad, debe kita acorda que nuay gente quien sabe el todo. Gane, maskin si Jesus ya habla que tiene maga cosas que no sabe le. (Mat. 24:36) Interesao tambien le si cosa sabe y ta pensa el de suyu maga imperfecto dicipulo. (Mat. 16:13-16) Poreso, gendeh maka-estraña si porque el de suyu maga uban ya sinti comfortable junto con ele! Na igual manera, si humilde kita acorda que no sabe kita el todo y si ta oi kita el opinion del otro, hay tene kita buen relacion kanila y “tiene buen exito.”

Importante este especialmente para na maga anciano que imita el humildad de Jesus mientras ta trabaja junto. Debe sila acorda que el sagrao espiritu puede influencia con el maskin quien anciano na grupo. Si el maga anciano ta pricura asigura que el todo comfortable habla si cosa sila ta pensa durante na diila maga miting, hay puede sila hace maga decision que puede beneficia el entero congregacion.

El un buen uban na trabajo razonable na de suyu maga uban. Sabe le man adjust. Asigurao, ya tiene manada oportunidad si Jesus para observa con el pagka-razonable del de suyu Tata. Por ejemplo, maskin pa conviene muri el maga gente, ya imbia si Jehova con Jesus para rescata kanila.—Juan 3:16.

Si Jesus tan adjust si necesita. Acorda si paquemodo le ya ayuda con el un mujer de Fenicia, maskin pa ya imbia con ele para na nacion de Israel. (Mat. 15:22-28) Razonable tambien le na cosa le ta expecta na de suyu maga dicipulo. Despues con ele nega na publico el de suyu cerca amigo que si Pedro, preparao si Jesus que perdona con ele. Na uliji, ya dale le con Pedro maga importante responsibilidad. (Luc. 22:32; Juan 21:17; Act. 2:14; 8:14-17; 10:44, 45) El ejemplo de Jesus claro ta dale mira que debe kita “dale mira el [diaton]  pagka-razonable na todo gente.” Puede se kita hace si sabe kita man adjust.—Fil. 4:5, NWT.

Si razonable kita, puede tambien este manda move kanaton que man adjust para tene paz mientras ta trabaja junto na todo clase de gente. Enbuenamente gayot ya trata si Jesus con aquellos alrededor con ele poreso el de suyu maga celoso enemigo ya acusa con ele como un “amigo del maga colector de maga impuesto y maga pecador” quien ya oi con el de suyu mensaje. (Mat. 11:19) Igual con Jesus, puede ba tambien kita trabaja enbuenamente junto con otro quien diferente kanaton? Si Louis, un hermano quien ya sirvi na traveling work y na Bethel junto na maga individual quien tiene diferente background, ya habla: “Ya pricura yo compara con el cada grupo con quien yo junto ta trabaja igual como na un pader que ya levanta usando el diferente grandor de piedra. Si man adjust tu con el ponida del cuanto piedra, puede siempre tu hace un derecho pader. Ya pricura tambien yo man adjust para puede ayuda queda derecho el pader.” Un buen ejemplo gayot se!

Cuando kita puede demonstra el diaton pagka-razonable na congregacion? Puede se kita hace si junto kita na diaton field service group. Posible, man partner kita na maga publisher quien tiene diferente responsibilidad na familia o diferente el edad. Puede ba kita man adjust na diaton predicacion para puede sila mas man enjoy na diila ministerio?

El un buen uban na trabajo “con gana dale . . . ayuda” con otro. (1 Tim. 6:18) Mientras ta trabaja junto na de suyu Tata, asigurao ya puede nota si Jesus que nuay cosa ta esconde si Jehova. Cuando ya prepara si Jehova con el cielo, “talla” si Jesus y ya puede aprende con ele. (Prov. 8:27) Cuando na tierra si Jesus, alegre le ya habla con el de suyu maga dicipulo “todo el que ya oi” le estaba con el de suyu Tata. (Juan 15:15) Na igual manera, debe tambien kita queda preparao para habla si cosa kita sabe y ya experiencia na diaton maga hermano y hermana. Asigurao, el un buen uban na trabajo gendeh ta esconde informacion que necesita sabe o puede ayuda na de suyu maga uban para lang puede controla kanila. Alegre le habla con otro el maga buen cosas que ya aprende le.

Puede tambien kita anima con el diaton maga hermano y hermana. Si tiene quien ya nota con el diaton maga esfuerzo y ya rindi gracias kanaton, gendeh ba ta queda kita alegre? Ya dale tiempo si Jesus para habla con el de suyu maga dicipulo el maga buen cosas que ya mira le kanila. (Compara na Mateo 25:19-23; Lucas 10:17-20.) Ya habla pa gane le kanila que hay “hace [sila] mas grande pa trabajo” que con ele. (Juan 14:12) Na noche antes el de suyu muerte, ya comenda le con el de suyu maga fiel apostoles y ya habla: “Ustedes amo el quien ya esta firmi junto conmigo na dimio maga sufrimiento.” (Luc. 22:28) Asigurao, el de suyu maga palabra ya puede anima y ya manda move kanila para hace accion. Si ta dale tambien kita tiempo para comenda con el diaton maga hermano y hermana, asigurao hay queda sila mas alegre y posible sila queda mas productivo.

“El un buen uban na trabajo gendeh necesita queda perfecto,” ya habla el un hermano que si Kayode, “pero ta hace le alegre con el de suyu maga uban y ta hace liviano el trabajo para kanila.” Ansina ba tu clase de uban na trabajo? Porque gendeh pregunta con el cuanto Cristiano que uban de tuyu na trabajo para sabe si cosa sila ta pensa acerca contigo na este aspeto? Si alegre sila trabaja junto contigo, igual si paquemodo el maga dicipulo de Jesus alegre ya trabaja junto con ele, puede tu habla igual na cosa ya habla si apostol Pablo: “Ta trabaja lang came junto con ustedes para el de ustedes alegria.”—2 Cor. 1:24.