1. Corto tiempo antes muri si Jesus, cosa le ya habla con el un criminal na costao de suyu? (Lucas 23:39-43)

 TA SUFRI si Jesus y el dos criminal na de suyu costao mientras ta sinti sila que pamurida ya sila. (Luc. 23:32, 33) Este dos criminal ya gangguia con Jesus y ta dale este mira que gendeh sila de suyu maga dicipulo. (Mat. 27:44; Mar. 15:32) Pero, el uno kanila ya cambia el custumbre. Ele ya habla: “Jesus, acorda conmigo cuando ay anda Uste na de Uste Reino.” Si Jesus ya contesta: “Ta asegura yo contigo: . . . Ay esta tu na Paraiso junto comigo.” (Le con el Lucas 23:39-43.) Nuay evidencia que este criminal ya acepta con el mensaje que ya predica si Jesus acerca “el Reino del Cielo.” Y nuay tambien habla si Jesus que ese gente hay queda parte na Reino na cielo. (Mat. 4:17) Sino, ta converza si Jesus acerca con el Paraiso na tierra na futuro. Porque se kita puede habla?

2. Cosa ta dale mira que un Judio el criminal quien ya arripinti?

² Grande el posibilidad que un Judio el criminal quien ya arripinti. Ese criminal ya habla con el otro criminal: “Noay ba tu miedo con Dios?” (Luc. 23:40) El maga Judio ta adora un Dios pero el maga gente del maga nacion ta creé na manada dios. (Ex. 20:2, 3; 1 Cor. 8:5, 6) Si aquel maga criminal estaba na maga nacion, el de suyu pregunta era amo, “Nuay ba tu miedo con el maga dios?” Mas pa, ya imbia con Jesus, gendeh para con el maga gente del maga nacion, sino para “con el maga carnero perdido del casa de Israel.” (Mat. 15:24) Ya revela el Dios con el maga Israelita que hay resucita le con el maga muerto. Posible que sabe acerca con este el criminal quien ya arripinti y el de suyu maga palabra ta dale mira que  ta creé le que si Jehova hay resucita con Jesus para rula na Reino del Dios. Grande el posibilidad que ese gente ta esperanza que el Dios hay resucita tambien con ele.

3. Cosa posible ya pensa el criminal cuando ya menciona si Jesus acerca con el Paraiso? Explica. (Genesis 2:15)

³ Como un Judio, sabe el criminal acerca con Adan y Eva y con el Paraiso onde kanila ya pone si Jehova. Poreso, posible que ta creé el criminal que el Paraiso que ya menciona si Jesus amo un bonito jardin aqui na tierra.—Le con el Genesis 2:15.

4. Cosa debe manda move kanaton para hace el cosa ya habla si Jesus na uno del maga criminal?

⁴ El maga palabra de Jesus con el criminal debe manda move kanaton para imagina si cosa el diaton vida na Paraiso. Tiene kita cosa puede aprende acerca na Paraiso na rulanza de Rey Solomon. El Biblia ta habla que si Jesus mas pa con Solomon. Puede kita expecta que si Jesus hay trabaja junto con aquellos quien rula junto con ele para hace un bonito paraiso con el tierra. (Mat. 12:42) Claro que el “otro maga carnero” debe queda interesao si cosa sila necesita hace para queda cualificao que vivi hasta para cuando na Paraiso.—Juan 10:16.

5. Cosa tu ta puede pensa si ta imagina con el vida na Paraiso?

⁵ Cosa tu ta puede pensa si ta imagina tu con el vida na Paraiso? Posible, ta puede tu pensa un bonito parque igual na jardin de Eden. (Gen. 2:7-9) Posible, ta acorda tu con el profecia que ya escribi si Miqueas que el cada uno del maga siervo del Dios hay sinta “abajo del de suyu pono de uvas y abajo del de suyu pono de higo.” (Miq. 4:3, 4) Baka ta puede tambien tu acorda que ya habla el Biblia que hay tene abundancia de comida. (Sal. 72:16; Isa. 65:21, 22) Poreso, posible ta imagina tu con el de tuyu mismo cuerpo na un bonito jardin y enfrente contigo el un mesa que lleno de maga sabroso comida. Posible, ta puede tu imagina que oloroso el de tuyu alrededor por causa na maga siembra y flores. Y despues, ta puede tu oi con el risas del de tuyu maga familia y amigo—incluido el maga ya resucita—mientras junto con uno y otro. Gendeh lang se un sueño. Puede kita asigura que hay sucede gayot este maga cosas aqui na tierra. Pero, tiene tambien kita trabajo que hace na Paraiso.

6. Cosa kita hace na Paraiso? (Mira con el letrato.)

⁶ Ya crea kanaton si Jehova que tiene el abilidad para queda alegre na diaton trabajo. (Ecl. 2:24) Hay queda kita mas ocupao durante el Un Mil Año Rulanza del Cristo. Necesita camisa, comida y lugar onde queda aquellos quien hay sobrevivi na grande tribulacion y el millones quien hay resucita. Para puede tene ese maga necesidad, manada kita trabajo  que necesita hace. Igual si paquemodo ya manda con Adan y Eva que cultiva con el jardin onde sila ta queda, tiene kita el privilegio que hace paraiso con el entero tierra. Imagina tambien si paquemodo de maka-alegre que enseña con el millones quien ya resucita quien no sabe acerca con Jehova y de suyu proposito, y ayuda con el maga fiel siervo quien ya vivi antes llega si Jesus que aprende mas.

7. Cosa kita puede asigura y porque?

⁷ Puede kita asigura que bien organizao y tiene paz y prosperidad el diaton vida na Paraiso na futuro. Porque? Cay si Jehova ya dale ya kanaton idea si cosa el vida bajo na rulanza del de suyu Anak. Puede se kita mira na rulanza de Rey Solomon.

8. Paquemodo ya cumpli el maga palabra na Salmo 37:10, 11, 29 despues con este escribi si Rey David? (Mira con el “Pregunta del Maga Quien Ta Le” na este issue.)

⁸ Ya guia con Rey David para escribi si cosa el vida si un sabio y fiel rey el rula na trono na futuro. (Le con el Salmo 37:10, 11, 29.) Ta le kita con el Salmo 37:11 con otro si ta discuti acerca na Paraiso tierra. Justo lang se ciendo ya coteja si Jesus con ese texto na de suyu Sermon na Monte que ta dale mira que hay cumpli este na futuro. (Mat. 5:5) Pero, el maga palabra de David ta revela tambien si cosa sucede durante el rulanza de Rey Solomon. Cuando ya rula si Solomon na Israel, el maga gente ya tiene mas paz y prosperidad na tierra que “abundancia de leche y miel.” El Dios ya habla: “Si continua ustedes sigui con el de mio maga ley . . . , hay lleva yo paz na tierra y hay acusta ustedes que nuay con quien ta tiene miedo.” (Lev. 20:24; 26:3, 6) Ya cumpli este maga promesa durante el rulanza de Solomon. (1 Cron. 22:9; 29:26-28) Y ya promete si Jehova que “gendeh mas existi” el maga mal gente. (Sal. 37:10) Poreso, el maga palabra na Salmo 37:10, 11, 29 ya cumpli de antes y hay cumpli tambien na futuro.

9. Cosa ya habla el reyna de Sheba acerca na rulanza de Rey Solomon?

⁹ Ya sabe el reyna de Sheba acerca con el  paz y prosperidad que tiene el maga Israelita bajo na rulanza de Solomon. Ya viaja le bien largo distancia para anda na Jerusalem para puede mira mismo con el situacion. (1 Rey 10:1) Despues mira con el reino de Solomon, ele ya habla: “Nuay pa ni media el cosa ya habla conmigo. . . . Alegre el de tuyu maga gente y alegre el de tuyu maga siervo quien pirmi junto contigo y ta oi con el de tuyu sabeduria!” (1 Rey 10:6-8) Pero, el situacion bajo na rulanza de Solomon un ejemplo lang del cosa hay hace si Jehova para con el maga gente bajo na rulanza del De Suyu Anak, si Jesus.

10. Na cosa manera si Jesus mas pa gayot con Solomon?

¹⁰ Si Jesus mas pa gayot con Solomon na manada manera. Imperfecto si Solomon quien ya hace manada serioso kamali que ya resulta na manada problema para na maga siervo del Dios na uliji. Pero, si Jesus amo un perfecto Rey quien gendeh tan kamali. (Luc. 1:32; Heb. 4:14, 15) Ya puede esta fiel si Jesus maskin pa na maga bien dificil probanza que ya dale con ele si Satanas. Ya dale prueba el Cristo que nunca le comete culpa o hace maskin cosa que hay causa peligro con el maga leal quien bajo na de suyu rulanza. Un grande privilegio gayot que ele el diaton Rey.

11. Quien hay ayuda con Jesus?

¹¹ El 144,000 quien rula junto con Jesus hay ayuda con ele para cuida con el maga gente y cumpli con el proposito de Jehova para na tierra. (Rev. 14:1-3) Ya experiencia sila manada maga probanza y sufrimiento cuando taqui sila na tierra. Poreso, puede sila entende si cosa ta experiencia aquellos taqui na tierra. Cosa hace este maga uban del Cristo?

12. Cosa el trabajo que ya dale si Jehova con el 144,000?

¹² Mas pa el trabajo que ya dale con Jesus y con el de suyu maga uban contra na trabajo que ya dale con Solomon. Ese Israelita rey necesita cuida con el millones de maga gente na un nacion lang. Pero, aquellos quien ta rula na Reino del Dios necesita cuida con el billones de maga gente na entero parte del mundo. Si Jehova ya dale gayot un grande privilegio con el 144,000!

13. Cosa el especial responsibilidad del maga uban de Jesus?

¹³ Igual con Jesus, el 144,000 hay sirvi como maga rey y sacerdote. (Rev. 5:10) Bajo na Ley de Moises, responsibilidad del maga sacerdote que protege con el salud del maga gente y asigura que ta esta sila cerca con Jehova. El Ley amo “el sombra del maga cosa-cosa bueno que ta vene” poreso razonable para pensa que el maga uban de Jesus hay ayuda para puede dale el fisical y espiritual necesidad del maga siervo del Dios. (Heb. 10:1) No sabe pa kita si paquemodo este maga rey y sacerdote hay comunica con el maga gente aqui na tierra. Maskin cosa man el arreglamiento de Jehova, puede kita confia que na Paraiso, aquellos taqui na tierra hay ricibi el guia que necesita sila.—Rev. 21:3, 4.

14. Cosa el relacion del “otro maga carnero” na maga hermano del Cristo?

¹⁴ Ya llama si Jesus con aquellos quien hay rula junto con ele como el “diutay grupo.” (Luc. 12:32, NWT) Ya discuti tambien le acerca con el segundo grupo, con quien le ya llama como el “otro maga carnero.” Unido este dos grupo. (Juan 10:16) Tan ayudajan ya este dos grupo ahora y hay continua este si  queda ya paraiso el tierra. Siempre si llega ese tiempo, talla ya na cielo el “diutay grupo” y aquellos parte del “otro maga carnero” hay tene el esperanza que vivi hasta para cuando aqui na tierra. Pero, tiene maga cosas que necesita hace ahora el “otro maga carnero” para queda sila cualificao que vivi na Paraiso.

15. (a) Na cosa manera el “otro maga carnero” ta ayuda con el maga hermano del Cristo? (b) Paquemodo tu puede imita con el ejemplo del hermano? (Mira con el letrato.)

¹⁵ Ya muri el criminal antes pa le tene el oportunidad que dale mira el de suyu apresacion para con el Cristo. Pero, kita que parte del “otro maga carnero” tiene manada oportunidad ahora para dale mira si cosa kita ta sinti acerca con Jesus. Por ejemplo, ta dale kita mira el diaton amor con ele na manera si paquemodo kita ta trata con el de suyu maga hermano. Ya habla si Jesus que hay juzga le con el maga carnero base con ese. (Mat. 25:31-40) Puede kita suporta con el maga hermano del Cristo si activo kita ta ayuda kanila na trabajo predicacion y hacida de dicipulo. (Mat. 28:18-20) Poreso, quierre kita usa enbuenamente con el maga publicacion que ta usa para na Bible study que ya dale sila, igual como el libro Queda Alegre Hasta Para Cuando! Si gendeh tu ta conduci un Bible study, cosa gaha si hace tu goal que man offer Bible study con el mas manada gente?

16. Cosa kita puede hace ahora para queda preparao vivi bajo na Reino del Dios?

¹⁶ Gendeh necesita que espera kita el tiempo que na Paraiso ya kita antes kita queda el clase de persona que quierre si Jehova que queda alla. Ahora pa lang, puede ya kita hace esfuerzo que queda honesto na cosa kita ta habla y ta hace, y queda balance. Y puede kita queda leal con Jehova, con el diaton marido o mujer, y con el maga hermano y hermana. Si ta obedece kita con Jehova ahora na este mal mundo, mas facil para kanaton que obedece con ele na Paraiso. Puede tambien kita cultiva maga abilidad y custumbre que ta dale mira que ta prepara kita que vivi na ese tiempo. Mira con el articulo “Preparao Ba Tu Hereda con el Tierra?” que puede incuntra na este issue.

17. Debe ba kita man luya por causa na maga culpa que ya hace kita de antes? Explica.

 ¹⁷ Debe tambien kita hace esfuerzo que descanza sinti culpable por causa na maga serioso culpa que ya hace kita de antes. Siempre, gendeh kita ta considera con el rescate como un razon para “peca . . . kita intencionalmente.” (Heb. 10:26-31, El Nuevo Testamento) Si deverasan kita ya arripinti na serioso culpa que ya hace kita, ya pidi ayuda con Jehova y con el maga anciano, y ya cambia con el diaton conducta, puede kita asigura que ya perdona ya kanaton completamente. (Isa. 55:7; Act. 3:19) Acorda con el cosa ya habla si Jesus con el maga Fariseo: “Noay yo vene para llama con el maga noay culpa, sino con el maga pecador.” (Mat. 9:13) El rescate puede tapa con el todo diaton maga pecado.

18. Cosa tu quierre man cuento con el criminal quien ya muri na costao de Jesus?

¹⁸ Ta puede ba tu imagina con el de tuyu mismo cuerpo na Paraiso que tan cuento con el criminal quien ya arripinti? Asigurao, hay habla gayot ustedes dos si paquemodo de grande el de ustedes apresacion na sacrificio de Jesus. Posible, pidi tu con ele que habla contigo si cosa pa ya sucede na ultimo maga hora del vida de Jesus aqui na tierra y si cosa le ya sinti cuando ya contesta con ele si Jesus. Y posible tambien le pregunta contigo si cosa ya sucede durante el ultimo maga dia del sistema de Satanas. Un privilegio gayot que estudia con el Palabra del Dios junto con el maga gente igual con ele!—Ef. 4:22-24.

19. Porque gendeh boring el vida na Paraiso? (Mira con el letrato na cover.)

¹⁹ Gendeh gayot boring el vida na Paraiso. Tiene kita bonito trabajo que hace y pirmi kita tiene nuevo con quien puede conoce. Mas pa con ese, cada dia mas puede kita conoce con el diaton Tata na cielo y queda alegre na cosa le ya dale. Pirmi kita tiene cosa puede aprende acerca con ele y con el de suyu maga creacion. Mientras mas ta dura kita ta vivi aqui na tierra, mas ta queda hondo el diaton amor para con el diaton Dios. Ta rindi gayot kita gracias con Jehova y con Jesus cay ya promete sila que puede kita vivi hasta para cuando na Paraiso!