1. Paquemodo si Jehova ta contesta con el maga rezo del de suyu maga siervo?

 SABE ba tu que puede contigo usa si Jehova para contesta con el sincero rezo del otro? Puede tu ayuda—anciano man tu, siervo ministerial, pioneer o publisher na congregacion. Deverasan tambien se maskin joven man tu, de edad, hermano o hermana. Si ya pidi ayuda con Jehova el un persona quien ta ama con ele, el diaton Dios ta usa con el maga anciano y con otro maga fiel siervo para dale comforta con ese persona. (Col. 4:11) Un privilegio gayot que sirvi con Jehova y con el diaton maga hermano na ansina manera! Puede se kita hace si tiene epidemia, calamidad o persecucion.

2. Porque posible dificil ayuda con otro si tiene epidemia?

² Si tiene epidemia, posible dificil para kanaton que ayuda con uno y otro. Por ejemplo, quierre kita visita con el diaton maga amigo pero gendeh safe que hace con ese. Posible, quierre kita invita come con aquellos quien tan dificil na financial pero gendeh tambien posible hace con ese. Quierre kita ayuda con otro pero posible dificil con ese hace si ta sufri el diaton mismo familia. Maskin pa ansina, quierre siempre kita ayuda con el diaton maga hermano y alegre si Jehova si ta hace kita el cosa kita puede hace para ayuda kanila. (Prov. 3:27; 19:17) Cosa kita puede hace?

3. Cosa kita puede aprende na ejemplo del maga anciano na congregacion de kanda Desi? (Jeremias 23:4)

³ Si cosa puede hace el maga anciano. Si un anciano tu, conoce con el maga hermano y hermana. (Le con el Jeremias 23:4.) Si Desi, un hermana que ya menciona del ya pasa articulo, ya habla, “De antes, el maga anciano na diamon service group tan junto conmigo y con otro na ministerio y na otro pa  maga tiempo.” b Por causa con ese, mas facil para con este maga anciano que ayuda con Desi cuando ya sucede el COVID-19 pandemic y ya muri el cuanto del de suyu familia na virus.

4. Porque el maga anciano ya puede ayuda con Desi y cosa el leccion?

⁴ Si Desi ya habla, “Cay amigo ya de mio el maga anciano, facil para conmigo que habla kanila si cosa yo ta sinti y si cosa el de mio maga lingasa.” Cosa el leccion para na maga anciano? Cuida con el maga hermano y hermana antes pa llega el maga dificultad. Queda un amigo kanila. Si gendeh tu puede personal visita kanila por causa na epidemia, busca otro manera para puede man cuento kanila. “Tiene maga tiempo que otro-otro anciano el ya llama y ya imbia message na igual dia,” ya habla si Desi. “Ya afecta gayot conmigo el maga texto que ya dale sila, maskin pa bien familiar ya yo con aquel maga texto.”

5. Paquemodo el maga anciano puede sabe si cosa necesita el maga hermano y hermana, y ayuda kanila?

⁵ El un manera que puede tu sabe si cosa necesita el diaton maga hermano y hermana amo si pregunta tu kanila na manera que gendeh sila sinti huya. (Prov. 20:5) Tiene ba sila bastante comida, medicina y otro pa maga cosas que necesita sila? Tiene ba posibilidad que perde el diila trabajo o nuay sila bastante sen para paga con el diila renta? Necesita ba sila asistencia para puede pidi ayuda na gobierno? Si Desi ya ricibi material ayuda na maga hermano y hermana. Pero, el emocional y espiritual suporta estaba na maga anciano el ya puede gayot ayuda con ele para puede enfrenta con el de suyu maga probanza. Ele ya habla: “El maga anciano ya reza junto conmigo. Gendeh yo ta acorda si cosa sila exacto ya habla pero ta puede yo acorda si cosa yo ya sinti aquel tiempo. Dol aquel ta habla conmigo si Jehova, ‘Gendeh tu solo.’”—Isa. 41:10, 13.

6. Cosa puede hace el manada na congregacion para ayuda con otro? (Mira con el letrato.)

⁶ Si cosa puede hace el otro. Ta expecta kita que el maga anciano hay cuida con el maga hermano y hermana na congregacion. Pero, ta invita kanaton todo si Jehova para anima y ayuda con otro. (Gal. 6:10) Maskin pa diutay lang el cosa kita puede hace para ayuda con el un persona que enfermo, puede este tene grande efecto con ele. El un bata puede imbia card o drawing para anima con el un hermano. El un joven persona puede man compra o hace pa  otro cosa para con el un hermana. Puede ba kita prepara comida y deja con ese na casa del un persona quien enfermo? Siempre si tiene epidemia, todo na congregacion necesita que tiene quien anima kanila. Posible despues del maga miting, puede kita esta para man cuento con el maga hermano y hermana—na personal man o por medio na videoconference. Y el maga anciano necesita tambien oi maga buen palabra. El cuanto maga Testigo ta imbia thank-you note na maga anciano quien ta queda mas ocupao si tiene epidemia. Bonito gayot si hace kita el cosa kita puede hace para “dale animo con uno y otro, y man ayudajan para puede crici na fe”!—1 Tes. 5:11.

7. Cosa posible el dificultad despues del calamidad?

⁷ Puede lang dayun cambia el vida del un persona si experiencia le calamidad. Posible, ya perde con el cuanto el diila maga propiedad, casa, amigo o familia pa gane. Maskin el diaton maga hermano y hermana ta experiencia tambien con ese maga grabe tragedia. Cosa kita puede hace para ayuda?

8. Cosa puede hace el maga anciano y cabeza de familia antes sucede el maga calamidad?

⁸ Si cosa puede hace el maga anciano. Maga anciano, ayuda con el de ustedes maga hermano para queda preparao antes pa sucede el maga calamidad. Asigura que sabe el todo na congregacion si cosa sila necesita hace para esta safe y para puede man contact con el maga anciano. Si Hermana Margaret que ya menciona del ya pasa articulo ya habla: “Durante el parte na miting acerca na local necesidad, el diamon maga anciano ya dale kanamon aviso que posible siempre tene wildfire na diamon lugar. Ya habla sila que si manda kanamon evacua el maga autoridad o si queda peligroso el situacion, debe dayun kame sale.” Justo gayot na tiempo aquel informacion ciendo cinco semana despues, ya tiene bien peligroso wildfire na diila lugar. Durante el de familia adoranza, el maga cabeza de familia puede man repaso si cosa hace el cada miembro del familia. Si preparao tu y el de tuyu maga anak, grande el posibilidad que hay esta ustedes calmao si sucede el un calamidad.

9. Cosa puede hace el maga anciano antes y despues del calamidad?

⁹ Si un group overseer tu, no espera que ta sucede ya el calamidad antes pa tu saca con el justo contact number y address del todo na de ustedes field service group. Lista con ese y asigura que ese siempre el diila informacion. Como resulta si sucede el calamidad, puede tu man contact con el cada publisher para sabe si cosa le necesita. Habla dayun se con el coordinator del grupo del maga anciano quien hay man contact con el circuit overseer. Si man ayudajan este maga hermano, puede gayot sila ayuda na de con todo buen manera. Despues del quema, ya esta dispierto el circuit overseer de kanda Margaret por 36 hora cay ta organiza le con el trabajo del maga anciano mientras tan contact sila y ta cuida con el maga 450 hermano y hermana quien ya evacua. (2 Cor. 11:27) Como resulta, el todo quien ya evacua tiene lugar onde esta.

10. Porque importante para con el maga anciano que man shepherding? (Juan 21:15)

¹⁰ Parte del trabajo del maga anciano que dale espiritual y emocional suporta con el maga hermano. (1 Ped. 5:2) Si tiene calamidad, debe una asigura el maga anciano que safe el cada hermano y hermana y tiene comida, camisa y lugar onde esta. Pero despues del manada meses, posible que necesita siempre espiritual y emocional suporta el maga hermano. (Le con el Juan 21:15.) “Necesita tiempo para queda otravez enbuenamente el situacion,” ya  habla si Harold, quien ta sirvi na un Branch Committee y quien ya puede conoce manada maga hermano y hermana quien ya queda afectao na maga calamidad. “Posible que ta principia ya queda normal otravez el diila vida pero ta acorda siempre sila con el diila familia o amigo que ya muri, el un precioso cosa que ya perde o el peligroso situacion que ya experiencia sila. Por causa con este, posible ta queda sila triste otravez. Normal reaccion lang este del un gente y gendeh este quierre decir que falta sila fe.”

11. Cosa posible necesita el maga familia maskin despues del calamidad?

¹¹ El maga anciano ta aplica con el consejo que “llora junto con aquellos quien ta llora.” (Roma 12:15) Necesita asigura con el maga victima que ta ama siempre kanila si Jehova y el diila maga hermano y hermana. El maga anciano hay ayuda con el maga familia para mentena con el diila espiritual rutina, igual na rezo, estudiada, atendida na miting y participacion na trabajo predicacion. Puede tambien anima el maga anciano con el maga mayores que ayuda con el diila maga anak que man focus na maga cosas que gendeh puede destroza el maga calamidad. Maga mayores, hace acorda con el de ustedes maga anak que si Jehova pirmi hay queda el diila Amigo y pirmi le ayuda kanila. Y explica kanila que tiene sila maga hermano y hermana na entero mundo quien preparao ayuda kanila.—1 Ped. 2:17.

12. Cosa puede hace el otro para ayuda na disaster relief? (Mira con el letrato.)

¹² Si cosa puede hace el otro. Si tiene ya sucede calamidad cerca na de ustedes lugar, pregunta con el maga anciano si paquemodo tu puede ayuda. Baka puede tu manda esta temporario na de tuyu casa con aquellos quien ya evacua o aquellos quien tan voluntario na disaster relief. Puede tu man voluntario lleva maga comida y supply na maga publisher quien ta necesita con ese. Si ya sucede el calamidad na lugar que lejos con ustedes, puede siempre tu ayuda. Paquemodo? Si reza tu para con aquellos quien ya queda afectao. (2 Cor. 1:8-11) Puede tu suporta con el relief work si dona tu na worldwide work. (2 Cor. 8:2-5) Si puede tu anda na lugar onde ya sucede el calamidad, pregunta con el maga anciano si paquemodo tu puede ayuda. Si ya invita contigo para ayuda, posible hay ricibi tu cuanto training para puede usa contigo si onde contigo bien necesita.

13. Cosa el maga dificultad del maga hermano quien ta queda na maga lugar donde ta prohibi con el diaton trabajo?

¹³ Posible que mas dificil el vida del maga hermano quien ta queda na maga lugar donde ta prohibi con el diaton trabajo por causa na persecucion. El maga hermano alla ta enfrenta siempre maga problema na financial, enfermedad y muerte del diila familia y amigo. Pero por causa cay ya prohibi con el diaton trabajo alla, el maga anciano posible gendeh puede visita o anima con aquellos quien ta necesita con ese. Ese el cosa ya sucede con Andrei que ya menciona del ya pasa articulo. Yan dificil na financial el un hermana na diila field service group. Despues, ya accidenta este. Necesita con ele opera manada beses y no puede le trabaja. Maskin pa na maga restriccion y pandemia, sabe si Jehova si cosa ta sucede con el hermana y ya manda le move con el maga hermano para ayuda.

14. Paquemodo el maga anciano puede dale mira ejemplo que ta confia sila con Jehova?

¹⁴ Si cosa puede hace el maga anciano. Ya reza si Andrei y ya hace con el cosa le puede hace. Cosa ya hace si Jehova? Ya motiva le con el maga hermano y hermana quien puede hace manera para ayuda con el hermana. El cuanto ya lleva con ele na doctor. El otro ya dale sen para ayuda con ele. Ya motiva kanila si Jehova para hace si cosa sila puede y ya bendici le con el diila esfuerzo para ayuda con el hermana. (Heb. 13:16) Maga anciano, si tiene restriccion el diaton trabajo, pidi ayuda con otro. (Jer. 36:5, 6) Y mas pa con ese, confia con Jehova. Puede le ayuda con ustedes para cuida con el diaton maga hermano y hermana.

15. Cosa kita hace para puede preserva con el diaton unidad si ta persigui kanaton?

¹⁵ Si cosa puede hace el otro. Si prohibi con el diaton trabajo, posible diutay grupo ya lang del maga hermano el puede kita man junto. Poreso, bien importante que mentena paz con uno y otro. Si Satanas el contrario y gendeh el maga hermano y hermana. Ignora con el kamali del de tuyu maga hermano o pricura solva dayun con el maga problema. (Prov. 19:11; Ef. 4:26) Queda preparao que ayuda con uno y otro. (Tito 3:14) El ayuda que ya dale el otro con el hermana ya tiene positivo efecto na entero service group. Ya queda sila mas cerca como un familia.—Sal. 133:1.

16. Harmonia na Colosa 4:3, 18, paquemodo kita puede ayuda con el diaton maga hermano y hermana con quien ta persigui?

 ¹⁶ Miles del diaton maga hermano y hermana el ta sirvi con Jehova maskin pa tiene restriccion el gobierno. El cuanto kanila yan preso por causa na diila fe. Puede kita reza para kanila, para con el diila familia y para con aquellos quien ta pone na peligro con el diila mismo libertad para puede dale espiritual, fisical y legal suporta con este maga hermano y hermana. c (Le con el Colosa 4:3, 18.) No ulvida que el de tuyu maga rezo puede ayuda con el todo maga hermano y hermana!—2 Tes. 3:1, 2; 1 Tim. 2:1, 2.

17. Paquemodo tu puede prepara ahora para na persecucion?

¹⁷ Etu y el de tuyu familia puede prepara ahora para na persecucion. (Act. 14:22) No pricura imagina con el todo mal cosas que posible sucede. Sino, hace fuerte con el de tuyu amistad con Jehova y ayuda con el de tuyu maga anak que hace tambien con ese. Si tiene vez ta sinti tu lingasa, habla se con Dios. (Sal. 62:7, 8) Discuti junto como un familia el todo maga razon si porque ustedes puede confia con ele. d Igual si paquemodo puede ayuda con el de tuyu maga anak si prepara ustedes para na calamidad, puede tambien ayuda kanila si prepara ustedes para na persecucion. Hay tene sila coraje y paz cay ya enseña tu kanila que confia con Jehova.

18. Cosa kanaton ta espera na futuro?

¹⁸ Por causa na paz del Dios, ta sinti kita protegido. (Fil. 4:6, 7) Por medio con ese, si Jehova ta hace calma con el diaton corazon maskin pa na maga enfermedad, calamidad y persecucion que puede kita enfrenta ahora. Ta usa le con el maga amable anciano para cuida kanaton. Y ta dale le kanaton todo el privilegio que ayuda con uno y otro. El paz que tiene kita ahora hay puede ayuda kanaton para puede enfrenta con el maga mas dificil probanza na futuro, maskin con el “grande calamidad” o tribulacion. (Mat. 24:21) Na ese tiempo, necesita kita mentena con el diaton paz y ayuda con otro que hace tambien con ese. Pero despues de ese suceso, gendeh mas kita enfrenta maga grabe problema que hay hace kanaton lingasa. Hay tene ya kita el un cosa que quierre si Jehova que pirmi kita tene—el deverasan paz que hay esta hasta para cuando.—Isa. 26:3, 4.