Gendeh. Valido y realistico el cosa ya escribi si David.

Considera si cosa le ya escribi na ese versiculo y na maga semejante texto: “Hay canta yo maga alabanza na de tuyu nombre hasta para cuando mientras ta cumpli yo con el de mio maga promesa cada dia.” “Ta alaba yo contigo, O Jehova de mio Dios, con todo corazon, y hay glorifica yo con el de tuyu nombre hasta para cuando.” “Alaba yo con el de uste nombre hasta para cuando.”—Sal. 61:8; 86:12; 145:1, 2.

Gendeh ta pensa si David que nunca le hay muri. Sabe le que ya declara si Jehova que el resulta del pecado del un gente amo el muerte. Y ya admiti tambien si David que un pecador le. (Gen. 3:3, 17-19; Sal. 51:4, 5) Sabe tambien le que ya muri maskin el maga fiel hombre, igual con Abraham, Isaac y Jacob. Y sabe tambien si David que algun dia, hay muri tambien le. (Sal. 37:25; 39:4) Pero el de suyu maga palabra na Salmo 61:8 ta reflecta el de suyu deseo y determinacion para alaba con Dios hasta para cuando—quierre decir, mientras ta vivi si David.—2 Sam. 7:12.

Tiene vez, ta escribi si David acerca con el de suyu mismo maga experiencia, como cosa kita puede mira na maga superscription del Salmo 18, 51 y 52. Na Salmo 23, ya refiri si David con Jehova como un pastor quien ta guia, ta refresca y ta protege con el de suyu maga siervo. Ansina tambien si David. Y quierre le sirvi con Dios ‘na de suyu entero vida.’—Sal. 23:6.

Acorda tambien que si Jehova el ya guia con David que escribi con el todo cosa le ya escribi. Incluido alli el maga profecia acerca na cosa sucede na futuro. Por ejemplo, na Salmo 110, si David ya escribi acerca na un tiempo cuando el de suyu Señor hay “sinta na . . . derecha” del Dios na cielo y ricibi grande poder. Para cosa? Para ganá contra con el maga enemigo del Dios y “sentencia . . . con el maga nacion” na tierra. Si David amo un tatarabuelo de Jesus que amo el Mesias. El Mesias hay rula na cielo y queda “un sacerdote hasta para cuando.” (Sal. 110:1-6) Ya confirma si Jesus que acerca con ele el profecia na Salmo 110 y que hay cumpli este na futuro.—Mat. 22:41-45.

Ya guia con David para escribi acerca na de suyu tiempo y na un tiempo na futuro cuando hay resucita le y puede alaba con Jehova hasta para cuando. Poreso, el Salmo 37:10, 11, 29 puede aplica na tiempo cuando ya escribi con este y na futuro. Este maga versiculo ya cumpli na Israel de antes y hay cumpli na futuro cuando hay sucede ya el maga promesa del Dios.—Mira con el parapo 8 del articulo “Ay Esta Tu na Paraiso Junto Comigo” na este issue.

Entonces, el Salmo 61:8 y el maga semejante versiculo ta dale mira que quierre si David glorifica con Jehova na Israel de antes mientras vivo le. Y ta indica este si cosa puede hace si David na futuro si hace vivi otravez con ele si Jehova.