Ya manda si Jehova con el maga gente que “llena con el tierra y goza con este.” Este quierre decir que el entero mundo hay queda un paraiso. (Gen. 1:28) Aquellos quien hay vivi hasta para cuando debe obedece con ese mandamiento. Gendeh paraiso el tierra ciendo el jardin de Eden gendeh mas ta existi. Poreso despues del Armagedon, manada sila trabajo necesita hace para limpia con el maga parte del tierra que ya destroza. Asigurao, grande trabajo gayot se!

Ta manda este acorda kanaton el trabajo que ya hace el maga Israelita cuando ya bira sila na Jerusalem estaba na Babilonia. Nuay quien ya queda na diila lugar por 70 año. Pero, ya predicta si Isaias que na ayuda de Jehova, puede sila restora con este. El profecia ya habla: “Hay hace le igual na Eden el desierto de este y igual na jardin de Jehova el seco patag de este.” (Isa. 51:3) Ya puede se hace el maga Israelita. Na igual manera, na ayuda de Jehova, aquellos quien hay hereda con el tierra puede tambien hace bonito paraiso con este. Gane, puede ya tu  dale mira ahora que quierre tu participa na ese trabajo.

El un manera que puede tu hace con ese amo que mentena limpio y arreglao el de tuyu casa y el alrededor de este. Puede tu se hace maskin el de tuyu maga vecinos gendeh se ta hace. Puede tambien tu ayuda limpia y mentena con el de ustedes Kingdom Hall y Assembly Hall. Si ta permiti el de tuyu circumstancia, puede tambien tu man apply para man voluntario na disaster relief. Ta dale este mira que quierre tu ayuda con el de tuyu maga hermano y hermana si necesita sila. Pregunta na de tuyu mismo cuerpo, ‘Puede ba yo aprende cuanto skill que puede yo usa si permiti conmigo si Jehova que vivi na tierra hasta para cuando?’

Despues resucita con el anak mujer de Jairo, ya habla dayun si Jesus que dale come con el bata. (Mar. 5:42, 43) Posible, gendeh dificil que cuida con aquel 12 año bata. Pero, pensa si paquemodo de manada trabajo kita necesita hace si cumpli ya el promesa de Jesus que “todo el maga muerto ay oi el disuyo voz, y todo sila ay sale na diila maga sepultura.” (Juan 5:28, 29) Maskin nuay dale manada detalle el Biblia, puede kita imagina que el maga quien hay resucita necesita ayuda para tene comida, onde queda y si cosa visti. Puede ba tu dale mira que maskin ahora pa lang quierre ya tu ayuda? Considera con este cuanto pregunta.

Si ya anuncia na de ustedes congregacion que hay visita el circuit overseer, ta invita ba tu con ele para come junto? Si yan reassign na field con el un special full-time servant estaba na Bethel o si ya termina ya el servicio del un circuit overseer, puede ba tu ayuda con ele para busca onde esta? Si hace na de ustedes lugar el un asemblea de region o especial convencion, puede ba tu man voluntario antes o despues del convencion o man welcome con el maga delegate?

Por causa na cosa kita ya le na Maga Actividad 24:15, ta expecta kita que billones de maga gente hay resucita. Manada kanila el nuay puede tene el oportunidad para conoce con Jehova de antes. Pero, puede se sila hace si resucita ya kanila. a El maga fiel y experienciao siervo del Dios hay ayuda para enseña kanila. (Isa. 11:9) Ta esperanza con ese si Charlotte, quien ya predica na Europe, South America y Africa. Alegre le ya habla: “Ta esperanza yo que enseña con el maga gente despues kanila resucita. Si ta le yo acerca na un persona quien ya vivi de antes, pirmi yo ta pensa: ‘Si este persona ya conoce con Jehova, diferente gayot era el de suyu vida.’ Ta esperanza yo el tiempo que habla con el maga gente quien ya resucita acerca con Jehova y si cosa era el diila vida si ya sirvi sila con ele.”

Manada tambien cosa hay aprende maskin el maga fiel siervo de Jehova quien ya vivi antes llega si Jesus aqui na tierra. Imagina el grande alegria y privilegio que explica con Daniel el cumplimiento del maga profecia que ya escribi le pero nuay le entende. (Dan. 12:8) O ayuda con Rut y Noemi para aprende que incluido na diila descendiente el Mesias. Un grande alegria gayot que enseña con el maga gente na entero mundo donde nuay el pressure y sanggadura que presente na mal mundo ahora!

Paquemodo tu puede dale mira ahora que preparao tu participa na este enseñada? El un claro manera amo si pricura tu mejora con el de tuyu abilidad na enseñada y regular participa na trabajo predicacion na entero mundo ahora. (Mat. 24:14) Maskin pa el edad o otro maga circumstancia puede limita con el de tuyu maga actividad na este tiempo, el de tuyu maga esfuerzo puede dale mira que preparao gayot tu enseña con el maga quien hay resucita.

Bueno si pensa tu acerca con este maga importante pregunta: Ta esperanza ba gayot tu que hereda con el tierra? Preparao ba tu hace paraiso con el tierra y ayuda y enseña con el maga quien hay resucita? Puede tu dale mira que preparao tu si busca tu maga manera ahora para participa na trabajo que semejante na cosa tu hace si hay hereda ya tu con el tierra!