1. Cosa el efecto kanaton si medita kita con el promesa de Jehova de vida eterna?

 YA PROMETE si Jehova que aquellos quien ta obedece con ele hay tene “Vida eterno.” (Roma 6:23) Si medita kita acerca con ese, el diaton amor para con ele asigurao queda mas fuerte. Pensa este: Ta ama gayot kanaton el diaton Tata na cielo poreso ya dale le este regalo para nunca kita separta con ele.

2. Paquemodo el promesa de vida hasta para cuando ta puede ayuda kanaton?

² El promesa del Dios que vivi kita hasta para cuando ta ayuda kanaton para aguanta na diaton maga probanza ahora. Maskin pa el diaton maga enemigo hay amenaza que mata kanaton, gendeh gayot kita man compromiso. Porque? El un razon amo cay sabe kita que si esta kita fiel con Jehova hasta na muerte, hay resucita le kanaton y tene kita el esperanza que gendeh mas muri. (Juan 5:28, 29; 1 Cor. 15:55-58; Heb. 2:15) Porque kita puede asigura que posible para kanaton que vivi hasta para cuando? Considera con el siguiente maga razon.

3. Porque kita puede asigura que si Jehova puede kanaton dale el abilidad que vivi hasta para cuando? (Salmo 102:12, 24, 27)

³ Sabe kita que si Jehova puede kanaton dale el abilidad que vivi hasta para cuando cay ele el Tuburan del vida y ta vivi le hasta para cuando. (Sal. 36:9) Nota con el cuanto maga texto na Biblia que ta dale prueba que si Jehova pirmi ta existi y hay continua existi. El Salmo 90:2 ta habla que si Jehova estaba “na tiempo nuay principio hasta na tiempo nuay fin.” Ansina tambien el cosa ya menciona na Salmo 102. (Le con el Salmo 102:12, 24, 27.) Y si profeta Habacuc ya escribi acerca na diaton  Tata na cielo: “O Jehova, gendeh ba ta existi ya tu desde antes pa? O de mio Dios, de mio Sagrao Dios, gendeh tu ta muri.”—Hab. 1:12.

4. Debe ba kita man lingasa si dificil para entende el idea que ta existi ya si Jehova y hay continua existi? Explica.

⁴ Tan dificil ba tu entende el idea que si Jehova ya existi y hay existi “hasta para cuando”? (Isa. 40:28) Manada tambien el ya sinti ansina. Si Elihu ya habla acerca con Dios: “Nunca kita puede cunta con el numero del de suyu maga año.” (Job 36:26) Pero gendeh quierre decir que si gendeh kita ta entende con el un cosa, gendeh ya se deverasan. Por ejemplo, si gendeh kita ta entende si paquemodo ta tiene corriente, quierre decir ba de este que nuay corriente? Gendeh! Na igual manera, posible el maga gente gendeh puede entende completamente si na cosa manera si Jehova pirmi ta existi y hay continua existi. Pero, gendeh este quierre decir que el Dios gendeh hay existi hasta para cuando. El verdad acerca na Creador gendeh ta depende na cosa kita puede o gendeh puede entende. (Roma 11:33-36) Y ta existi ya le antes pa existi el maga cosas na universo—incluido el sol y maga estrellas. Asigurao kita que si Jehova “el Creador del tierra por medio del de suyu poder.” Si, ta existi ya le antes pa le “ya extende con el cielo.” (Jer. 51:15; Act. 17:24) Cosa el otro razon si porque kita puede asigura que posible para kanaton que vivi hasta para cuando?

5. Cosa esperanza tiene el primer maridable?

⁵ Ya crea si Jehova con el maga vivo creatura na tierra que limitao lang el vida, puera con el maga gente. Ya crea le kanila que tiene el esperanza que nunca muri. Pero, ya dale si Jehova este aviso con Adan: “Gendeh gayot tu debe come con el fruta del pono de saber del bueno y malo, cay na dia que come tu con este hay muri gayot tu.” (Gen. 2:17) Si ya obedece si Adan y Eva con Jehova, gendeh era sila muri. Razonable para creé que llega el tiempo, hay permiti kanila si Jehova que come con el fruta del “pono del vida.” Y hay dale este kanila asiguranza que sila hay “vivi hasta para cuando.” b—Gen. 3:22.

6-7. (a) Cosa el otro razon que ta dale mira que nuay crea con el maga gente para muri? (b) Cosa tu bien quierre hace na futuro? (Mira con el maga letrato.)

⁶ Maka-interes cay el cuanto maga scientist ya puede incuntra maga evidencia que el diaton utuk tiene el capacidad para ajunta mas informacion contra na cosa kita ta puede ajunta na diaton entero vida. Del 2010, el un articulo na journal Scientific American Mind ya  habla que el diaton utuk tiene el capacidad para ajunta maga 2.5 millon gigabyte de informacion. Igual se de manada informacion na tres millon hora o mas de 300 año de programa na TV. Y posible pa gane que el diaton utuk tiene pa mas capacidad contra con ese. Ta dale este mira que si Jehova ya hace con el diaton utuk que puede ajunta mas manada informacion contra na cosa kita puede ajunta adentro na 70 o 80 año.—Sal. 90:10.

⁷ Ya crea tambien kanaton si Jehova que tiene el fuerte deseo que continua vivi. El Biblia ya habla acerca na maga gente que el Dios “ya pone . . . na diila corazon el eternidad.” (Ecl. 3:11) Amo se el un razon si porque ta mira kita con el muerte como un enemigo. (1 Cor. 15:26) Si tiene kita grabe enfermedad, ta acepta ya lang ba kita con el diaton condicion y ta espera muri? Gendeh. Mas mucho, ta anda kita na doctor y posible ta toma medicina para queda bueno. Gane, ta hace kita el todo que puede kita hace para gendeh muri. Y si ya muri el un persona con quien kita ta ama, joven man le o de edad, gendeh ba ta sinti kita triste por largo tiempo? (Juan 11:32, 33) Asigurao, el diaton amable Creador gendeh kanaton dale el deseo y el capacidad para continua vivi si gendeh proposito de suyu que el maga gente hay continua vivi. Pero, tiene kita otro pa maga razon para creé que puede kita vivi hasta para cuando. Considera kita con el cuanto cosas que ya hace si Jehova de antes y ahora que ta dale prueba que nuay cambia el de suyu original proposito.

8. Si acerca na proposito de Jehova para kanaton, cosa asiguranza kita puede saca na Isaias 55:11?

⁸ Maskin pa ya comete culpa si Adan y Eva y ya resulta este muerte para na diila maga  anak, nuay cambia el proposito de Jehova. (Le con el Isaias 55:11.) Proposito siempre de suyu que vivi hasta para cuando el maga fiel gente. Sabe se kita por causa na maga cosas que ya habla y ya hace si Jehova para cumpli el de suyu proposito.

9. Cosa ya promete el Dios? (Daniel 12:2, 13)

⁹ Ya promete si Jehova que hay resucita le con el maga muerto y dale kanila oportunidad que vivi hasta para cuando. (Act. 24:15; Tito 1:1, 2) El fiel hombre que si Job asigurao que si Jehova quierre gayot resucita con aquellos quien ya muri. (Job 14:14, 15) Si profeta Daniel sabe que el maga gente hay vivi otravez que tiene el oportunidad que vivi hasta para cuando. (Sal. 37:29; le con el Daniel 12:2, 13.) El maga Judio na tiempo de Jesus sabe tambien que si Jehova hay dale con el de suyu maga fiel siervo el “Vida Eterno.” (Luc. 10:25; 18:18) Manada beses ya menciona si Jesus con este promesa y con ele mismo ya resucita el de suyu Tata.—Mat. 19:29; 22:31, 32; Luc. 18:30; Juan 11:25.

10. Cosa ta dale prueba el maga resureccion de antes? (Mira con el letrato.)

¹⁰ Si Jehova el ta dale vida y tiene poder para hace vivi otravez con el maga gente. Ya dale le con profeta Elias el poder para resucita con el anak hombre del viuda de Sarepta. (1 Rey 17:21-23) Na uliji, na ayuda del Dios, si profeta Eliseo ya hace vivi otravez con el anak hombre del un Sunamita mujer. (2 Rey 4:18-20, 34-37) Ese y el otro pa resureccion ta dale prueba que si Jehova tiene el poder para hace vivi otravez con el maga gente. Cuando na tierra si Jesus, ya dale le prueba que el de suyu Tata ya dale con ele ese poder. (Juan 11:23-25, 43, 44) Ahora, na cielo ya si Jesus y ya dale con ele el “todo autoridad na cielo y na mundo.” Poreso, puede le cumpli con el promesa que hace vivi otravez con “todo aquellos na sepultura” con oportunidad que vivi hasta para cuando.—Mat. 28:18; Juan 5:25-29, NWT.

11. Paquemodo el rescate ya hace posible que vivi kita hasta para cuando?

¹¹ Porque si Jehova ya permiti que muri el de suyu Anak con quien gayot ele ta ama? Ya revela si Jesus con el razon cuando ya habla le: “Cay ansina gayot de grande el amor del Dios para con el mundo: que ya dale Le su Unico Anak para todo quien ta cree con Ele gendeh ay muri, sino ay tene Vida hasta para cuando.” (Juan 3:16) Por medio na rescate del de suyu Anak para tapa con el diaton maga pecado, el Dios ya hace posible para kanaton que vivi hasta para cuando. (Mat. 20:28) Si apostol Pablo ya explica con este importante parte del proposito del Dios cuando ya escribi le: “Cay si el muerte ya entra na mundo por medio de un gente, por medio de un gente tamen ya entra el resureccion del maga muerto. Igual como todo el maga gente ya muri na persona de Adan, ansina tamen todo sila ay vivi otra vez na persona de Cristo.”—1 Cor. 15:21, 22.

12. Paquemodo el Reino puede ayuda para cumpli el proposito de Jehova para kanaton?

¹² Ya enseña si Jesus con el de suyu maga siguidores que reza que vene el Reino del Dios y que sucede el voluntad del Dios aqui na tierra. (Mat. 6:9, 10) Parte del proposito del Dios que el maga gente hay vivi hasta para cuando na tierra. Para sucede se, ya iscuji si Jehova con el de suyu Anak para queda Rey na Mesianico Reino. Ta ajunta el Dios con el 144,000 gente estaba na tierra para trabaja junto con Jesus y cumpli con el voluntad del Dios.—Rev. 5:9, 10.

13. Cosa si Jehova ta hace ahora y na cosa manera tu envuelto?

¹³ Ta ajunta si Jehova ahora con el grande grupo de maga gente y tan train kanila para vivi bajo na de suyu Reino. (Rev. 7:9, 10;  Sant. 2:8) Maskin pa dividido el mayoria del maga gente na este mundo por causa na rabia y guerra, aquellos parte del grande grupo ta hace esfuerzo para quita con el todo clase de rabia na diila mismo cuerpo. Na simbolico manera, ta hace ya sila pilo de arrao con el diila maga espada. (Miq. 4:3) En vez de participa na maga guerra que ta causa muerte del manada maga gente, ta ayuda sila con el maga gente que incuntra con “el deverasan Vida” por medio que ta enseña kanila acerca con el verdadero Dios y con el de suyu maga proposito. (1 Tim. 6:19) Posible, man contra kanila el diila familia o man dificil sila na financial cay ta suporta sila con el Reino del Dios. Pero, si Jehova ta asigura que tene sila el maga cosas que necesita sila. (Mat. 6:25, 30-33; Luc. 18:29, 30) Este maga cosas ta asigura kanaton que deverasan el Reino del Dios y hay continua se cumpli con el proposito de Jehova.

14-15. Paquemodo cumpli el promesa de Jehova que hay quita con el muerte hasta para cuando?

¹⁴ Rey ya ahora si Jesus na Reino del Dios na cielo y hay cumpli le con el todo maga promesa que ya hace si Jehova. (2 Cor. 1:20) Desde 1914, ta ganá ya si Jesus contra na de suyu maga enemigo. (Sal. 110:1, 2) Gendeh mas dura, ele y aquellos quien hay rula junto con ele hay destroza con el todo mal gente.—Rev. 6:2.

¹⁵ Durante el Un Mil Año Rulanza de Jesus, hay resucita con el maga muerto y el maga  obediente gente hay queda ya perfecto. Despues del ultimo probanza, aquellos con quien ya juzga si Jehova como maga recto “hay hereda con el tierra y hay esta sila alli hasta para cuando.” (Sal. 37:10, 11, 29) Gane, alegre kita que “el ultimo contrario que ay destroza . . . amo el Muerte.”—1 Cor. 15:26.

16. Cosa el diaton de con todo importante razon si porque kita ta sirvi con Jehova?

¹⁶ Ya mira kita na este articulo que el diaton esperanza que vivi hasta para cuando base gayot na Palabra del Dios. Este esperanza puede ayuda kanaton para esta leal durante na este ultimo maga dia. Pero para hace alegre con Jehova, ta esta kita leal gendeh lang por causa cay tiene kita el deseo para vivi. Sino, el de con todo importante razon si porque kita este ta hace amo cay ta ama gayot kita con Jehova y con Jesus. (2 Cor. 5:14, 15) Ese amor ta motiva kanaton para imita kanila y habla con otro acerca na esperanza que tiene kita. (Roma 10:13-15) Si ta aprende kita queda bondadoso y ta hace una el bien del otro, hay queda kita el clase de persona con quien quierre si Jehova que queda de suyu amigo hasta para cuando.—Heb. 13:16.

17. Cosa el responsibilidad del cada uno kanaton? (Mateo 7:13, 14)

¹⁷ Hay queda ba kita uno de aquellos quien hay obtene vida hasta para cuando? Ta dale kanaton si Jehova ese oportunidad. Ahora, ta depende ya kanaton si esta ba kita na camino que ta guia para na vida. (Le con el Mateo 7:13, 14.) Cosa el diaton vida si vivi ya kita hasta para cuando? Hay discuti kita con el contestacion na ese pregunta na siguiente articulo.