1-2. Cosa debe sinti el maga mayores si pregunta el diila anak acerca na maga enseñanza na Biblia?

 MANADA el ta creé que gendeh facil queda un mayores. Si tiene tu un joven anak, ta comenda kame contigo na de tuyu esfuerzo que ayuda con ele para tene fuerte fe. (Deut. 6:6, 7) Mientras ta engranda el de tuyu anak, posible principia le pregunta contigo maga cosas acerca na Biblia, incluido ya el maga principio de este.

² Posible man lingasa tu acerca na maga pregunta del de tuyu anak. Baka pensa tu que falta el de suyu fe con Dios y na Biblia. Pero el deverasan, mientras ta engranda, necesita el maga anak pregunta para queda fuerte el diila fe. (1 Cor. 13:11) Poreso, gendeh tu debe man lingasa. Sino, puede tu mira con este como un oportunidad para ayuda con el de tuyu anak que tene el abilidad para pensa y queda mas convincido na maga enseñanza na Biblia.

3. Cosa kita considera na este articulo?

³ Na este articulo, hay discuti kita si paquemodo el maga mayores puede ayuda con el diila maga anak que (1) queda convincido na Biblia, (2) tene apresacion na maga principio na Biblia y (3) defende con el diila creencia. Considera tambien kita si porque bueno si ta pregunta el maga anak y si cosa maga actividad puede hace el familia que puede dale oportunidad con el maga mayores que man cuento acerca na diila creencia.

AYUDA CON EL DE TUYU ANAK TENE FUERTE FE CON DIOS Y NA BIBLIA

4. Cosa maga pregunta posible tene el maga anak y porque?

⁴ Sabe el maga mayores que nuay sila nace que tiene dayun fe con Jehova. Y ansina tambien el diila maga anak. Poreso, posible  principia pregunta el de tuyu anak igual ansina: ‘Paquemodo yo puede asigura que tiene Dios? Puede ba gayot yo creé na cosa ta habla el Biblia?’ Ta anima kanaton el Biblia que usa con el diaton “abilidad para examina” y “examina gayot kita enbuenamente” con el todo cosas. (Roma 12:1, NWT; 1 Tes. 5:21) Paquemodo tu puede ayuda con el de tuyu anak que hace fuerte con el de suyu fe?

5. Cosa puede hace el maga mayores para ayuda con el diila anak que tene mas fuerte fe na Biblia? (Roma 12:2)

⁵ Anima con el de tuyu anak que examina con el maga prueba que deverasan el cosa ta habla na Biblia. (Le con el Roma 12:2.) Si tiene pregunta el de tuyu anak, dale mira con ele si paquemodo le puede incuntra con el maga contestacion usando el diaton maga research tool, igual na Watch Tower Publications Index y el Research Guide for Jehovah’s Witnesses. Na Research Guide, bajo na topico “The Bible,” puede le mira con el maga articulo bajo na subheading “Inspired by God.” Puede le mira alli el maga evidencia si porque el Biblia gendeh lang basta un libro que ya escribi el gente sino este “el palabra del Dios.” (1 Tes. 2:13) Por ejemplo, puede le man research acerca na Nineve que un ciudad del maga Asiriano. De antes, el cuanto scholar de Biblia ya clama que nuay existi el ciudad de Nineve. Pero del maga 1850, ya discubri el maga arqueologo que ta existi este ciudad de antes. Ta dale se mira que justo el cosa ta habla na Biblia. (Sof. 2:13-15) Mas pa, para puede le sabe si paquemodo el destrozo del Nineve ya cumpli con el un profecia na Biblia, puede le mira con el articulo “Sabe Ba Tu?” na Noviembre 2021 issue del El Torre de Guardia. Si compara le con el cosa le ya aprende na diaton maga publicacion na maga cosa ta enseña na encyclopedia y otro maga referencia, hay queda mas fuerte el fe del de tuyu anak na cosa ta habla el Biblia.

6. Paquemodo el maga mayores puede ayuda con el diila maga anak que usa con el abilidad para pensa? Dale un ejemplo. (Mira tambien con el letrato.)

⁶ Ayuda con el de tuyu anak que usa con el de suyu abilidad para pensa. Manada maga oportunidad el maga mayores para puede man cuento con el diila anak acerca na Biblia o acerca na diila fe con Dios. Puede sila este hace durante el diila visitada na un museum, na botanical garden o na maga exhibit na branch office del maga Testigo de Jehova. Si man tour ustedes na un museum, na personal man o por medio na internet, puede tu dale mira con el de tuyu anak el cuanto artifact o letrato que acerca na maga suceso que ya menciona na Biblia. Puede este hace fuerte  con el de suyu confianza que deverasan el cosa ya menciona na Biblia. Por ejemplo, puede tu enseña con el de tuyu anak acerca na Moabite Stone. Tres mil año ya este piedra y escribido el nombre de Jehova alli. Puede mira con el actual Moabite Stone na Louvre Museum na Paris, France. Tiene tambien un replica de ese na “The Bible and the Divine Name” exhibit na World Headquarters del maga Testigo de Jehova na Warwick, New York. Puede tambien ustedes mira online o na diaton maga publicacion el letrato de ese piedra y del otro pa maga artifact. Puede le na Moabite Stone que si Rey Mesa de Moab yan rebelde contra na Israel. Ese tambien el cosa ya menciona na Biblia. (2 Rey 3:4, 5) Si el de tuyu anak ya puede mismo mira con el evidencia que deverasan y justo el cosa ta habla na Biblia, hay queda mas fuerte el de suyu fe.—Compara na 2 Cronicas 9:6.

7-8. (a) Cosa kita puede aprende na diseño del maga creacion? Dale un ejemplo. (Mira tambien con el letrato.) (b) Cosa pregunta puede ayuda con el de tuyu anak para queda mas asigurao que tiene Creador?

⁷ Anima con el de tuyu anak que pensa acerca na maga creacion. Mientras ta pasea ustedes na maga park o ta trabaja na jardin, ayuda con el de ustedes anak que nota con el maga pattern que puede mira na maga creacion. Puede este ayuda kanila para realiza que tiene quien ya diseña con el todo cosas. Por ejemplo, manada año ya ta estudia el maga cientista acerca na spiral pattern que puede mira na maga cosas alrededor. El un biophysicist que si Nicola Fameli ya habla que si cunta tu con el numero de spiral na un creacion, puede tu mira que tiene este pattern ta sigui. Ta llama con este Fibonacci sequence. Puede mira con este pattern na manada cosas igual na maga galaxy, shell, ojas del siembra y sunflower. a

⁸ Na escuela, posible que el de tuyu anak puede aprende acerca na otro pa maga pattern que comon na maga creacion. Por ejemplo, tiene pattern ta sigui el mayoria del maga pono. Na tronco, tiene ta crici maga grande rama. Y na ese rama, tiene ta crici maga diutay rama. Ta llama con ese fractal pattern. Puede tambien mira con ese pattern na otro maga creacion. Pero quien ya diseña con ese maga bonito pattern? Si mas ta pensa el de tuyu anak acerca con ese pregunta, hay mas queda le asigurao que ya crea el Dios con el todo las cosas. (Heb. 3:4) Mientras ta engranda le, puede tambien tu pregunta con ele, “Si ya crea el Dios kanaton, gendeh ba justo lang para pensa que mas sabe le si cosa kita debe hace para queda alegre?” Despues, puede tu explica con ele que na Biblia puede incuntra con ese guia.

 AYUDA CON EL DE TUYU ANAK QUE APRECIA CON EL MAGA PRINCIPIO NA BIBLIA

9. Cosa el razon si porque posible cuestiona el de tuyu anak con el maga principio na Biblia?

⁹ Si ya pregunta el de tuyu anak acerca na maga principio na Biblia y si porque importante que sigui con ese, pricura entende si porque le se ya pregunta. Gendeh ba gayot le tan uyun con ese principio o no sabe lang le si paquemodo se explica con otro? Maskin cosa man el de suyu razon, puede tu ayuda con ele que aprecia con el maga principio na Biblia si estudia ustedes junto con el libro Queda Alegre Hasta Para Cuando! b

10. Paquemodo tu puede ayuda con el de tuyu anak que aprecia con el de suyu relacion con Jehova?

¹⁰ Anima con el de tuyu anak que aprecia con el de suyu relacion con Jehova. Mientras ta estudia tu con el Biblia junto con el de tuyu anak, usa con el maga pregunta y ilustracion na libro Queda Alegre Hasta Para Cuando! para sabe si cosa le ta sinti acerca na un cosa. (Prov. 20:5) Por ejemplo, na leccion 8, ya compara con Jehova na un buen amigo quien ta dale kanaton maga consejo que puede protege kanaton. Despues discuti con el 1 San Juan 5:3, puede tu pregunta con ele, “Ciendo ya sabe kita que si Jehova un buen Amigo, cosa debe el diaton mirada na de suyu maga mandamiento?” Maskin pa dol simple pregunta lang se, puede se ayuda con el de tuyu anak que mira con el maga mandamiento del Dios como expresion del De Suyu amor.—Isa. 48:17, 18.

11. Paquemodo tu puede ayuda con el de tuyu anak que aprecia con el maga principio na Biblia? (Proverbio 2:10, 11)

¹¹ Discuti si paquemodo kita ta beneficia si ta aplica kita con el maga principio na Biblia. Si ta le ustedes con el Biblia o con el texto del dia, discuti si paquemodo ya ayuda con el de ustedes familia el maga principio na Biblia. Puede tu usa con ese tiempo para ayuda con el de tuyu anak que entende si porque bueno que trabaja enbuenamente y queda honesto. (Heb. 13:18) Puede tambien tu hace claro con ele si paquemodo el maga principio na Biblia puede protege kanaton na fisical y emocional. (Prov. 14:29, 30) Si hace tu se, puede se ayuda con el de tuyu anak que mas aprecia con el maga consejo na Biblia.—Le con el Proverbio 2:10, 11.

12. Paquemodo el un tata ya ayuda con el de suyu anak que aprecia con el maga principio na Biblia?

¹² El un tata na France que si Steve ya explica si paquemodo sila del de suyu mujer ya ayuda con el diila teenager anak que si Ethan que mira con el amor de Jehova na maga ley que ya dale Le. Ele ya habla: “Ta pregunta kame con ele, ‘Porque gaha si Jehova quierre que sigui kita con este principio? Paquemodo este ta dale mira que ta ama le kanaton? Cosa hay sucede si gendeh tu aplica con este principio?’” Por causa con ese, ya queda mas convincido si Ethan que sabe si Jehova si cosa el justo. Ya habla pa si Steve: “Goal diamon que ayuda con Ethan que mira que mas bueno el consejo del Biblia contra na consejo del maga gente.”

13. Paquemodo el maga mayores puede man train con el diila anak que aplica con el maga principio na Biblia? Dale un ejemplo.

¹³ Man train con el de tuyu anak que aplica con el maga principio na Biblia. Por ejemplo, posible tiene assignment na escuela el de tuyu anak que le con el un libro. Imoral y violente el maga caracter na ese libro. Y ta hace sale na istoria que dol gendeh quel malo. Puede tu anima con el de tuyu anak que pensa si uyun ba na principio na Biblia el cosa ta hace y ta habla ese  maga caracter. (Prov. 22:24, 25; 1 Cor. 15:33; Fil. 4:8) Puede se dale oportunidad con ele que predica con el de suyu maestra y maga classmate si discuti ya sila se na clase.

AYUDA CON EL DE TUYU ANAK DEFENDE CON EL DE SUYU CREENCIA

14. Cosa topico el posible man dificil explica el un joven Cristiano y porque?

¹⁴ Tiene vez, el maga joven Cristiano posible tan alang-alang defende con el diila creencia. Por ejemplo, si discuti ya na clase acerca na evolucion, baka tiene sila miedo explica si porque gendeh sila ta creé con ese. Porque? Cay posible enseña el diila maestra que deverasan gayot el evolucion y gendeh lang un teoria. Si un mayores tu, paquemodo tu puede ayuda con el de tuyu anak que queda convincido que verdad el cosa le ta creé?

15. Cosa puede ayuda con el un joven Cristiano que queda mas convincido na cosa le ta creé?

¹⁵ Ayuda con el de tuyu anak que queda mas convincido na cosa le ta creé. Gendeh debe tene huya el de tuyu anak que ta creé le que tiene Creador. (2 Tim. 1:8) Porque? Cay el deverasan, manada tambien maga cientista el ta creé que nuay lang basta abuya el maga cosas alrededor. Ciendo bien complicao el diseño del maga creacion, sabe sila que tiene un inteligente persona quien ya diseña con ese. Poreso, gendeh sila ta creé na evolucion maskin pa ta enseña con ese na maga escuela na entero mundo. El un cosa que puede tambien ayuda con el de tuyu anak para queda mas convincido amo si pricura le sabe si porque el otro maga hermano y hermana ta creé que tiene Creador. c

16. Paquemodo puede ayuda el maga mayores con el diila anak que defende con el de suyu creencia que tiene Creador? (1 Pedro 3:15) (Mira tambien con el letrato.)

¹⁶ Ayuda con el de tuyu anak que prepara para puede le defende con el de suyu creencia que tiene Creador. (Le con el 1 Pedro 3:15.) Puede ayuda si man repaso ustedes con el serie “Young People Ask—Creation or Evolution?” na jw.org. Despues, puede iscuji el de tuyu anak si cosa explanacion el puede ayuda con ele para explica con otro que tiene Creador. Puede ustedes junto man practice con ese. Hace acorda con ele que gendeh le necesita man debate na de suyu classmate. Anima con ele que usa maga simple explanacion si  conforme el persona que man cuento acerca con ese topico. Por ejemplo, posible tiene quien habla con ele: “Gendeh yo ta creé con Dios cay nuay pa yo mira con ele.” Puede contesta el un joven Cristiano: “Si ta camina tu na buuk y ya puede tu mira un pozo, hay habla ba tu que basta lang quel ya abuya? Asigurao, tiene gayot con aquel quien ya hace. Ansina tambien el diaton universo. Tiene gayot con este quien ya crea.”

17. Paquemodo puede anima el maga mayores con el diila anak que busca maga oportunidad para predica con otro? Ilustra.

¹⁷ Anima con el de tuyu anak que busca maga oportunidad para predica con otro. (Roma 10:10) Puede tu usa con este ilustracion: Si ta enseña kita con otro acerca na Biblia, dol aquel se ta tuca kita un instrumento. Si ta aprende pa lang kita, maga simple cancion lang kita ta tuca. Ansina tambien si ta predica kita con otro. El un joven puede principia predica na simple manera. Por ejemplo, puede le pregunta na de suyu classmate: “Sabe ba tu que manada engineer el ta copia con el maga diseño del maga creacion? Mira tu este un bonito video.” Despues dale mira un video estaba na serie Ya Diseña Ba con Este?, puede le habla: “Ta alaba con el maga engineer por causa na maga diseño que ya copia sila na maga creacion. Pero, con quien gaha kita debe alaba por causa na maga creacion?” Por medio con ese, posible queda interesao el de suyu classmate que aprende pa mas acerca con Jehova.

CONTINUA AYUDA CON EL DE TUYU ANAK QUE HACE FUERTE DE SUYU FE

18. Paquemodo el maga mayores puede continua ayuda con el diila maga anak que hace fuerte con el diila fe?

¹⁸ Manada gente na mundo el nuay fe con Jehova. (2 Ped. 3:3) Poreso, maga mayores, mientras ta estudia ustedes con el Biblia junto con el de ustedes anak, anima kanila que estudia maga topico que puede ayuda kanila que tene mas grande confianza na Palabra del Dios y na de suyu maga principio. Anima kanila que observa con el maga creacion de Jehova y usa con el diila abilidad para pensa. Ayuda kanila que aprecia con el maga profecia na Biblia que ya cumpli ya. Y el mas importante, reza junto con el de ustedes anak y reza para kanila. Si hace ustedes con ese, puede ustedes asigura que hay bendici si Jehova con el de ustedes esfuerzo que ayuda con el de ustedes maga anak que hace fuerte con el diila fe.—2 Cron. 15:7.