Ya nace yo del 1927 na un diutay barrio cerca na Chicago, Illinois, U.S.A. Cinco kame man hermano y hermana—si Jetha, si Don, iyo, si Karl y si Joy. Determinao kame todo sirvi con Jehova con todo corazon. Ya queda estudiante si Jetha na segundo clase de Gilead del 1943. Si Don ya principia sirvi na Bethel na Brooklyn, New York, del 1944. Despues, si Karl del 1947 y si Joy del 1951. El buen ejemplo diila y del diamon mayores, ya tiene gayot grande efecto conmigo.

Quierre-quierre le Biblia si Papang y Mamang, y ta ama sila con Dios. Mientras ta engranda kame, ya enseña tambien sila kanamon que ama con Dios. Pero despues sirvi si Papang como soldao durante el Guerra Mundial I na Europe, ya perde el de suyu respeto na iglesia. Un dia, alegre gayot si Mamang cay ya puede bolbe otravez si Papang estaba na guerra. Poreso, ya convida le con Papang anda na iglesia. Ya contesta si Papang: “Hace lang yo contigo hatud alla pero gendeh yo entra.” Ya pregunta si Mamang si porque. Ya contesta si Papang: “Cuando na guerra yo, ta reza el maga clero para na maga soldao y ta bendici con el maga armas. Y amo tambien se ta hace el maga clero del diamon contrario pero igual lang man sila religion! Con quien ba gayot el Dios ta suporta?”

Un dia, cuando na iglesia si Mamang, tiene dos Testigo de Jehova quien ya anda na diamon casa. Ya ofrece sila con Papang el volume 1 y volume 2 del libro Light. Ta discuti este acerca con el libro de Revelacion. Ya queda interesao si Papang poreso ya acepta le con ese dos libro. Cuando ya mira si Mamang con ese maga libro, ya principia le dayun le con ese. Despues un dia, ya puede le mira na diario un invitacion para estudia con el Biblia usando el maga libro Light. Cuando ya anda le na lugar onde hace el estudiada, tiene un de edad mujer quien ya abri con el puerta. Ya dale mira si Mamang con el uno del maga libro y ya pregunta, “Aqui ba con este ta estudia?” Ya contesta el mujer, “Si, Neng. Entra tu.” Pagka-sunod semana, ya lleva kanamon si Mamang alla. Y despues quel, regular ya kame ta anda alla.

Durante na un miting, ya pidi conmigo el quien ta conduci que le con el Salmo 144:15, donde ta habla  que alegre aquellos quien ta sirvi con Jehova. Ya gusta gayot yo con aquel y con el otro pa dos texto—el 1 Timoteo 1:11, donde ta habla que un alegre Dios si Jehova y el Efeso 5:1 que ta anima kanaton que imita con Dios. Ya realiza yo que debe yo hace el todo para sirvi con el de mio Creador y rindi gracias con ele por causa con este privilegio. Ese el cosa yo ta pricura hace na de mio entero vida.

El de con todo cerca congregacion 32 kilometro de lejos kanamon. Maskin pa ansina, ya continua kame atende na maga miting. Como resulta, ya omenta el de mio saber na Biblia. Ta acorda yo un tiempo, ya llama con Jetha el quien ta conduci para man comento. Mientras tan comento le, ya pensa yo: ‘Sabe yo quel. Era ya alza tambien yo mano.’ Desde quel, ya principia yo prepara maga comento. Igual con el de mio maga hermano y hermana, ya progresa tambien yo na espiritual. Y del 1941, ya bautiza yo.

Gendeh gayot yo ta ulvida con el convencion del 1942 que ya hace na Cleveland, Ohio. Tiene maga hermano y hermana na mas de 50 ciudad na United States quien ta oi con el programa por medio na telefono. Kame del de mio familia, na maga tolda lang ta queda cerca na convention site y talla tambien el otro maga hermano y hermana. Aquel tiempo, ta continua pa el Guerra Mundial II y ta queda mas manada el maga tan contra con el maga Testigo de Jehova. Si denoche, tan park el maga hermano con el diila coche que pa-apuera el ngusu. Yan sabut sila que entero noche, tiene quien man relevajan vicia. Si mira sila que tiene maga gente quien ta plaña ataca, hay hace arde el maga hermano con el diila headlight para man silao aquel maga persona. Y despues, hay pita sila para puede dayun anda ayuda el otro. Ya puede yo pensa, ‘Preparao gayot el maga siervo de Jehova para na maskin cosa situacion!’ Poreso, ya puede lang yo durmi enbuenamente. Y nuay lang tambien cosa ya sucede malo na aquel tiempo.

Cuanto año despues, si ta pensa yo con aquel convencion, ya puede yo realiza que nuay gayot man lingasa si Mamang o tene miedo na aquel tiempo. Ya confia gayot le con Jehova y na De Suyu organizacion. Nunca yo ulvida con el de suyu ejemplo.

Ya queda un regular pioneer si Mamang antes pa aquel convencion. Poreso, ya pone gayot le atencion con el maga talk na aquel convencion que ta discuti acerca na full-time service. Cuando pabolbida kame, ya habla le: “No quierre yo descanza na de mio pioneering pero man dificil yo si iyo lang hace con el todo trabajo na casa.” Despues ya pregunta le si puede ba kame ayuda con ele. Ya conforma kame, poreso ya dale le kanamon trabajo que limpia con el uno o dos cuarto antes almorza. Si ya sale ya kame para anda na escuela, ta chequia le si limpio ya el casa y despues, ta anda ya le na ministerio. Maskin pa bien ocupao si Mamang, ta dale gayot le tiempo kanamon man hermano y hermana. Si ta bolbe kame media dia y tarde, talli le pirmi para kanamon. Tiene vez, despues sale na escuela, ta sigui kame con ele na ministerio. Poreso ya puede kame mira, si cosa gayot el vida del un pioneer.

Ya principia yo man pioneer cuando 16 año yo. Maskin gendeh pa Testigo si Papang na aquel tiempo, interesao le acerca na de mio ministerio. Un noche, ya habla yo con ele que nuay pa yo Bible study, maskin pa ta pricura yo busca. Yan silencio yo unrato  y despues ya pregunta yo con ele, “Quierre tu queda de mio Bible study, Pang?” Ya pensa le con ese y despues ya contesta le, “Dol nuay man yo razon para gendeh man Bible study.” Poreso, si Papang el de mio primer Bible study. Y un privilegio gayot quel!

Ya usa kame con el libro “The Truth Shall Make You Free” na diamon estudiada. Ya realiza yo que mientras ta estudia kame, ta ayuda conmigo si Papang que queda mas buen estudiante del Biblia y queda efectivo na enseñada. Por ejemplo, un noche, despues kame le con el un parapo, ya habla le: “Ta entende yo si cosa ta habla na este libro pero paquemodo tu puede asigura que justo el cosa ta habla aqui?” Nuay yo expecta que pregunta le quel, poreso ya habla yo, “Gendeh yo se contigo puede contesta ahora, pero na diaton sunod estudiada hay contesta yo con ese.” Poreso na diamon sunod estudiada, ya dale yo con ele mira maga versiculo que ta dale prueba que justo el punto que ya discuti kame na libro. Despues quel, ya aprende yo man research para queda mas preparao na diamon estudiada. Por causa con ese, ya progresa yo na espiritual y si Papang tambien. Ya aplica le el maga cosa le ya aprende y del 1952 ya bautiza le.

Ya cambia yo lugar cuando 17 año yo. Si Jetha a ya queda un misionario y si Don ya queda un Bethelite. Alegre gayot sila na diila assignment y ya puede se anima conmigo. Poreso, yan apply yo na Bethel y na Gilead. Despues, ya espera yo si onde conmigo pone si Jehova. Del 1946, ya invita conmigo para sirvi na Bethel.

Adentro de 75 año que ta sirvi yo na Bethel, ya aprende yo manada nuevo cosas na diferente assignment que ya tiene yo. Ya aprende yo si paquemodo man accounting y si paquemodo man print maga libro. Ya aprende tambien yo si paquemodo cumpra maga cosas que necesita na Bethel y si paquemodo imbia maga importante cosas para na otro lugar. Pero mas pa con ese, ta gusta gayot yo con el maga espiritual provision na Bethel igual na morning worship y maga talk que base na Biblia.

Ya aprende tambien yo na de mio hermano menor que si Karl quien ya principia sirvi na Bethel del 1947. Un buen estudiante le del Biblia y efectivo na de suyu enseñada. Un tiempo, ya pidi yo ayuda con ele na de mio talk que yan assign conmigo para dale. Ya explica yo con Karl que manada gayot yo cosa yan research pero tan dificil yo si paquemodo yo usa con ese todo. El cosa le ya hace amo ya pregunta lang le conmigo, “Cosa ba el tema del de tuyu talk?” Ya puede dayun yo saca si cosa le quierre decir—aquel lang maga informacion que relatao na de mio tema el debe yo usa na de mio talk. Gendeh gayot yo ulvida con aquel.

Para queda alegre el un persona mientras ta sirvi na Bethel, necesita le queda activo na ministerio.  Si hace le se, hay tene le maga bonito experiencia. El un experiencia que ta acorda yo amo cuando na Bronx kame na New York City. Tiene un mujer alla quien ya acepta de antes con el maga magazine The Watchtower y Awake! Un noche, ya visita yo con ele junto con el un hermano. Ya habla kame con ele, “Ta visita kame ahora para ayuda con el maga gente que aprende maga bonito cosas estaba na Biblia.” Ya contesta el mujer, “Si acerca se na Biblia, quierre yo se. Entra ustedes.” Ya le kame y ya explica cuanto maga texto acerca na Reino del Dios y na nuevo mundo. Ya queda gayot le interesao. Gane, ya invita le con el cuanto del de suyu maga amiga y amigo para man junto kanamon na sunod semana. Na uliji, aquel mujer y el de suyu marido ya queda maga fiel siervo de Jehova.

Antes yo ya conoce con el de mio mujer, maga 10 año ya yo ta busca con quien casa. Cosa ya puede ayuda conmigo para incuntra un buen mujer? Ya reza yo acerca con ese y ya pensa si cosa yo quierre hace junto con el de mio mujer despues kame casa.

Del 1953 convencion na Yankee Stadium, ya conoce yo con el un hermana que si Mary Aniol. Junto sila del de mio hermana que si Jetha na ika-dos clase de Gilead y na diila assignment como maga misionario. Alegre si Mary ya cunta conmigo acerca el de suyu assignment como un misionario na Caribbean y el maga Bible study que ya tiene le adentro na aquel maga año. Mientras ta conoce kame con uno y otro, ya puede kame realiza que igual el diamon espiritual goal. Ya principia kame tene amor con uno y otro, y ya casa kame del Abril 1955. Ya puede yo mira que un regalo gayot si Mary estaba con Jehova y un buen ejemplo gayot le. Alegre le na maskin cosa assignment que tiene le. Ta hace le esfuerzo na de suyu maga assignment, interesao le na bien del otro y pirmi le ta hace una con el Reino. (Mat. 6:33) Ya sirvi kame na circuit work por tres año y del 1958, ya invita kanamon que sirvi na Bethel.

Manada yo cosa ya aprende con Mary. Por ejemplo, cuando nuevo pa lang kame casao, ya decidi kame que le maga 15 versiculo na Biblia cada dia. Despues, ta discuti kame con aquel maga versiculo y si paquemodo con ese aplica na diamon vida. Pirmi si Mary ta habla conmigo el maga cosa le ya aprende na Gilead y na de suyu assignment como un misionario. Ya puede quel ayuda conmigo para mejora con el de mio maga talk y sabe si paquemodo anima con el maga hermana.—Prov. 25:11.

Ya muri si Mary del 2013. Pero, ta esperanza gayot yo que man junto con ele otravez na nuevo mundo! Mientras tanto, determinao yo que continua aprende y confia con Jehova con todo de mio corazon. (Prov. 3:5, 6) Ta dale gayot conmigo comforta y alegria si ta pensa yo acerca si cosa hace el maga siervo de Jehova na nuevo mundo—hay aprende kita maga nuevo cosas estaba na diaton Marvelloso Instructor y conoce pa mas con ele! Ta rindi gayot yo gracias na todo cosas que ya enseña le conmigo y na de suyu incomparable pagka-bueno.