1. Cosa el mirada del cuanto na largor del vida?

 MANADA gente el con cuidao na cosa sila ta come y ta pricura regular man ejercicio para tene buen salud. Maskin pa ansina, gendeh sila ta expecta que vivi sila hasta para cuando. Para kanila, imposible se. Pero, si Jesus ya habla que puede kita tene “Vida hasta para cuando,” como cosa ya menciona na Juan 3:16 y 5:24.

2. Cosa si Jesus ya habla na Juan 6:39, 40?

² Un dia, ya hace milagro si Jesus para dale come con el miles de maga gente. a Maka-bilib gayot quel! Pero pagka-alamañana, tiene pa le cosa ya habla que posible nuay sila expecta. Cuando ya sigui sila con ele para na Capernaum, cerca na aplaya de Galilea, ya habla le kanila que puede resucita con el maga gente y vivi sila hasta para cuando. (Le con el Juan 6:39, 40, NWT.) Pensa con aquellos con quien tu ta ama quien ya muri. El maga palabra de Jesus ta dale asiguranza que puede resucita kanila y igual ustedes puede tene vida hasta para cuando. Pero, manada el quien yan dificil  entende con el cosa sunod ya habla si Jesus na Juan capitulo 6. Examina kita con ese.

3. Cosa ya habla si Jesus na Juan 6:51?

³ Despues si Jesus dale pan con el maga gente, ya puede sila pensa acerca con el mana que ya dale si Jehova con el diila maga tatarabuelo. Gane, el Escritura ya llama con el mana como “pan del cielo.” (Juan 6:31; Sal. 105:40) Ya usa si Jesus con el mana para enseña kanila un cosa que bien importante. Ya habla le que ele el “deverasan pan del cielo,” “pan del Dios” y el “pan de Vida.” (Juan 6:32, 33, 35) Ya hace le claro que diferente le compara na provision de mana. Maskin pa un milagro el provision de mana, aquellos quien ya come con ese ya muri siempre na uliji. (Juan 6:49) Pero, si Jesus ya habla: “Yo amo el Pan Vivo que ya abaja del cielo. Si quien ta come de este Pan ay vivi hasta para cuando.” (Le con el Juan 6:51.) Yan libug el maga Judio na cosa le ya habla. Gendeh sila ta entende si paquemodo si Jesus ya abaja estaba na cielo y ya queda el “pan” que mas pa na mana. Para ayuda kanila entende, si Jesus ya habla: “El Pan que ay dale yo amo el dimio Cuerpo.” Cosa gaha le quierre decir? Quierre kita se sabe cay el contestacion de ese puede ayuda kanaton para entende si paquemodo kita y aquellos con quien kita ta ama puede tene vida hasta para cuando.

EL DE SUYU SANGRE Y LAMAN

4. Porque ya espanta el cuanto na cosa ya habla si Jesus?

⁴ Ya espanta el cuanto cuando ya habla si Jesus que hay ‘dale le el de suyu cuerpo para del mundo.’ Ya pensa gaha sila que literal si Jesus dale come kanila el de suyu laman? Posible. (Juan 6:52) Pero, mas ya espanta sila cuando ya habla si Jesus: “Si gendeh ustedes ay come el cuerpo del Anak del Gente y ay toma disuyo sangre, gendeh gayot ustedes ay tene vida.”—Juan 6:53.

5. Porque kita puede habla que gendeh literal el cosa ya habla si Jesus na maga Judio?

⁵ Na tiempo de Noe, ya habla el Dios con el maga gente que no come sangre. (Gen. 9:3, 4) Despues, ya dale tambien si Jehova con ese ley na maga Israelita. Ele ya habla: “Si tiene maskin quien come sangre, debe con ele mata.” (Lev. 7:27) Ya enseña si Jesus con el maga Judio que obedece con el Ley. (Mat. 5:17-19) Entonces, imposible que manda le con el maga Judio que literal come con el de suyu laman o toma con el de suyu sangre. Sino, quierre lang si Jesus que enseña kanila si paquemodo obtene vida—el “vida hasta para cuando.”—Juan 6:54.

6. Porque kita puede habla que simbolico el cosa ya habla si Jesus na Juan 6:53?

⁶ Aquel tiempo, tan cuento si Jesus con el maga gente na simbolico manera igual na cosa le ya hace cuando yan cuento le na un Samaritana. Ele ya habla: “Aquel quien ay toma el agua que ay dale yo, . . . nunca ay man con sequia, cay el agua que ay dale yo con ele ay queda adentro na su corazon un tuburan que ay man tubud para na Vida Eterno.” (Juan 4:7, 14) b Cuando ya habla le quel con el Samaritana, gendeh quierre decir de Jesus que necesita el mujer toma un clase de literal agua para tene vida hasta para cuando. Na igual manera, cuando yan cuento le con el maga gente na Capernaum, gendeh quierre decir de Jesus que puede sila  obtene vida hasta para cuando si literal sila come con el de suyu laman y toma con el de suyu sangre.

SI PORQUE DIFERENTE EL DOS OCASION

7. Cosa ta clama el cuanto acerca na cosa ya habla si Jesus na Juan 6:53?

⁷ El cuanto maga religioso gente ta clama que el cosa ya habla si Jesus na Juan 6:53 amo el cosa debe hace el maga gente na Cena del Señor cay na aquel tiempo, ya usa le maga semejante palabra. (Mat. 26:26-28) Ta habla sila que el todo quien ta atende na Cena del Señor debe come con el pan y toma con el vino. Pero justo ba se? Importante sabe si cosa el contestacion de ese cay cada año, millones na entero mundo el tan junto kanaton na ese ocasion. Considera kita si na cosa maga manera diferente el cosa ya habla si Jesus na Juan 6:53 y durante el Cena del Señor.

8. Na cosa manera diferente el dos ocasion? (Mira tambien con el maga letrato.)

⁸ Una, considera si onde y cuando ya habla si Jesus con ese maga palabra na Juan 6:53-56. Ya habla le se na un grande grupo de maga Judio na Galilea del 32 C.E. Maga un año pa el ya pasa cuando ya hace le con el Cena del Señor na Jerusalem. Ika-dos, considera si con quien le tan cuento. Mayoria del maga gente quien ta oi con ele na Galilea mas interesao na diila fisical necesidad  contra na espiritual necesidad. (Juan 6:26) Gane, cuando yan dificil sila entende con el cosa ya habla si Jesus, nuay mas sila continua oi con ele. El cuanto del de suyu maga dicipulo ya descanza tambien sigui con ele. (Juan 6:14, 36, 42, 60, 64, 66) Bien diferente se na cosa ya sucede del 33 C.E. na Cena del Señor. Maskin pa nuay completamente entende el 11 fiel apostoles con el cosa si Jesus ya enseña kanila, ya esta sila leal con ele. Convincido sila que si Jesus el Anak del Dios quien estaba na cielo. (Mat. 16:16) Si Jesus ya habla kanila: “Ustedes amo el quien ya esta firmi junto conmigo na dimio maga sufrimiento.” (Luc. 22:28) Si considera kita con ese dos razon, claro que el cosa ya habla si Jesus na Juan 6:53 gendeh ta refiri na cosa debe hace durante el Cena del Señor. Pero tiene pa otro razon si porque se kita puede habla.

SI COSA TU NECESITA HACE

9. Quien lang el envuelto na contrata que ya menciona si Jesus durante el Cena del Señor?

⁹ Durante el Cena del Señor, ya hace pasa si Jesus con el de suyu maga apostoles el pan que nuay levadura y ya habla kanila que ta representa se con el de suyu cuerpo. Despues, ya hace le pasa kanila el vino y ya habla que ta representa se con el “Sangre del Contrata.” (Mar. 14:22-25; Luc. 22:20; 1 Cor. 11:24) Bien importante el cosa le ya habla acerca con ese contrata. El “maga gente de [espiritual] Israel” quien hay rula “na Reino del Dios” junto con Jesus amo lang el envuelto na ese contrata y gendeh el todo maga gente. (Heb. 8:6, 10; 9:15) Nuay entende el maga apostoles con el cosa le ya habla na aquel tiempo. Pero gendeh dura, hay iscuji kanila por medio del sagrao espiritu y hay queda sila parte de ese nuevo contrata y hay tene sila un lugar na cielo junto con Jesus.—Juan 14:2, 3.

10. Cosa pa el otro razon si porque diferente el cosa ya habla si Jesus na Galilea y na Cena del Señor? (Mira tambien con el letrato.)

¹⁰ Nota que durante el Cena del Señor, yan focus si Jesus con el “diutay grupo.” El de suyu maga fiel apostoles quien junto con ele na ese ocasion amo el primero ya queda incluido na ese grupo. (Luc. 12:32, NWT) Sila y el otro quien hay queda parte de ese grupo amo el debe come con el pan y toma con el vino. Sila el man junto con Jesus na cielo. Entonces, limitao lang el quien envuelto na cosa ya habla si Jesus na Cena del Señor. Pero, gendeh limitao el numero de aquellos quien hay beneficia na cosa le ya habla na Galilea.

11. Porque kita puede habla que el cosa ya habla si Jesus na Galilea gendeh ta refiri na un diutay grupo lang?

¹¹ Mayoria del maga gente con quien yan cuento si Jesus na Galilea quierre lang ricibi comida. Pero, ya ayuda kanila si Jesus para entende que tiene pa otro provision que mas importante que con el comida. Ese provision puede dale kanila vida hasta para cuando. Ya habla si Jesus que maskin aquellos quien ya muri puede resucita y vivi hasta para cuando. Gendeh ta refiri si Jesus na un diutay grupo lang sino ya hace le claro que el todo maga gente puede beneficia con ese bendicion. Gane, ya habla le: “Si quien ta come de este Pan ay vivi hasta para cuando . . . El Pan que ay dale yo amo el dimio Cuerpo para el vida del mundo.”—Juan 6:51. c

12. Cosa necesita hace el un persona para tene vida hasta para cuando?

 ¹² Quierre decir ba de Jesus que el todo gente hay tene vida hasta para cuando? Gendeh, sino ya habla le que aquellos lang quien hay ‘come con el pan.’ Quierre decir, aquellos lang quien demonstra fe con Jesus. Manada de aquellos quien ta clama como Cristiano el ta pensa que hay salva ya sila si “cree” lang sila con Jesus y acepta con ele como diila salvador. (Juan 6:29) Pero mas pa con ese el cosa sila necesita hace. Cay gane, manada de aquellos na Galilea quien ta creé con Jesus del una el ya abandona con ele. Porque quel sila ya hace?

13. Cosa kita necesita hace para queda deverasan dicipulo de Jesus?

¹³ Manada de aquellos na Galilea el alegre ya sigui con Jesus cay ta dale le kanila el cosa sila quierre. Quierre sila que cura le kanila, dale kanila comida y habla kanila el maga cosas que quierre sila oi. Pero, ya hace claro si Jesus que nuay le vene na tierra para lang dale kanila el cosa sila quierre. Ya vene le para enseña kanila si cosa sila necesita hace para queda de suyu deverasan siguidores. Necesita sila “atraca” con ele, quierre decir oi con ele y obedece con el todo cosa le ya enseña.—Juan 5:40; 6:44.

14. Cosa kita debe hace para beneficia na laman y sangre de Jesus?

¹⁴ Ya enseña si Jesus kanila que si sacrificia ya le con el de suyu laman y sangre, hay queda posible que tene vida hasta para cuando el maga gente. Necesita sila creé con ese verdad. Importante que demonstra fe  el maga Judio na rescate y ansina tambien ahora. (Juan 6:40) Necesita kita demonstra fe na rescate para puede beneficia na sangre y laman de Jesus como cosa ya menciona na Juan 6:53. Manada gente el quien puede ricibi con ese bendicion.—Ef. 1:7.

15-16. Cosa maga importante leccion kita ya aprende na Juan capitulo 6?

¹⁵ Manada kita ya aprende maga importante leccion na Juan capitulo 6. Ya puede kita mira alli que ta ama gayot si Jesus con el maga gente. Cuando na Galilea le, ya cura le con el maga enfermo, ya enseña acerca na Reino y ya dale come con el maga gente. (Luc. 9:11; Juan 6:2, 11, 12) Y el mas importante, ya enseña le kanila que ele el “Pan de Vida.”—Juan 6:35, 48.

¹⁶ Aquellos parte del “otro maga carnero” gendeh debe come con el pan y toma con el vino durante el Cena del Señor. (Juan 10:16) Pero, ta come siempre sila con el pan de vida na simbolico manera. Ta hace sila se si ta demonstra sila fe na rescate y na maga beneficio que ya queda posible por causa con ese. (Juan 6:53) Aquellos quien ta come y ta toma con el maga emblema ta dale mira que parte sila del nuevo contrata y tiene sila el esperanza que rula na Reino. Entonces, iscujido man kita o parte del otro maga carnero, bien importante para kanaton el maga leccion na Juan capitulo 6. Ta hace este claro que bien importante que demonstra fe para tene vida hasta para cuando.