1-2. Cosa el cuanto razon si porque kita ta llura?

 TIENE gayot tiempo na diaton vida que ta llura kita. Tiene vez, ta llura el un persona por causa na alegria. Baka tiene cosa bonito ya sucede, igual como ya nace el de suyu anak. O gaha ya acorda le con el un bonito suceso na de suyu vida o ya puede le mira otravez con el de suyu amigo que ya dura ya le nuay puede mira.

² Pero mas mucho, ta llura kita por causa na tristeza. Por ejemplo, posible kita llura si tiene kanaton quien ya hace sinti duele, ta sufri kita na dolor por causa na un enfermedad o ya muri el diaton familia o amigo. Na ese maga tiempo, posible sinti kita igual na cosa ya sinti si Jeremias cuando ya destroza el maga de Babilonia con el Jerusalem. Ya habla si Jeremias: “Tan avenida de luha el de mio ojos . . . Gendeh ta descanza cae el [de mio] luha.”—Lam. 3:48, 49.

3. Cosa ta sinti si Jehova si ta sufri el de suyu maga siervo? (Isaias 63:9)

³ Sabe si Jehova si cuanto beses ya kita ya llura na diaton vida por causa na maga dificultad. Ta asigura kanaton el Biblia que sabe le si ta sufri el de suyu maga siervo y que ta oi le si ta pidi kita con ele ayuda. (Sal. 34:15) Pero, gendeh lang si Jehova basta ta mira y ta oi kanaton. Igual na un amable tata, ta sinti le triste si ta llura kita y quierre gayot le kanaton ayuda.—Le con el Isaias 63:9.

4. De quien maga ejemplo kita hay considera y cosa kita hay aprende acerca con Jehova?

 ⁴ Na de suyu Palabra, puede kita mira si cosa ya hace si Jehova cuando ya llura el cuanto siervo de suyu—igual con Ana, David y Rey Ezequias. Porque sila ya llura? Cosa ya hace si Jehova para ayuda kanila? Y paquemodo el diila ejemplo puede ayuda kanaton si ta sinti kita bien triste, ya traiciona kanaton o dol nuay mas kita esperanza?

SI BIEN TRISTE TU

5. Porque bien triste si Ana?

⁵ Manada razon si porque ya queda bien triste si Ana y ya llura. Una, tiene otro mujer el de suyu marido. Ese mujer que si Penina ta maltrata con ele. Puera con ese, baug si Ana pero si Penina tiene manada anak. (1 Sam. 1:1, 2) Pirmi tambien ta gangguia si Penina con Ana por causa con ese. Imagina si cosa ta sinti si Ana na aquel tiempo. “Triste gayot” le y gane, “ta llura le y gendeh ta come.”—1 Sam. 1:6, 7, 10.

6. Cosa ya hace si Ana para sinti alivio?

⁶ Cosa ya hace si Ana para sinti alivio? Uno na maga cosas que ya hace le amo que ya anda le na centro de verdadero adoranza de antes—el tabernaculo. Posible, talla le na entrada del patio del tabernaculo cuando “ya principia le reza con Jehova y ya llura por demas.” Ya habla le na de suyu rezo: “Pone . . . atencion con el sufrimiento del de tuyu siervo y acorda conmigo.” (1 Sam. 1:10b, 11) Ya habla si Ana con Jehova el todo cosa le ta sinti. Asigurao que duele para con Jehova que mira con ese de suyu precioso anak que ta llura!

7. Cosa ya sinti si Ana despues le reza con Jehova?

⁷ Despues reza si Ana, ya dale con ele asiguranza el alto sacerdote que si Eli que hay contesta si Jehova con el de suyu rezo. Cosa le ya sinti despues quel? Ya habla el Biblia: “Ya sale el mujer y ya come y el de suyu cara gendeh mas triste.” (1 Sam. 1:17, 18) Maskin nuay pa cambia el de suyu situacion, ya sinti ya alivio si Ana. Ya deja ya le na mano de Jehova el de suyu problema. Claro que ya mira si Jehova el de suyu sufrimiento y ya oi con el de suyu rezo. Na uliji, ya bendici con ele si Jehova y ya dale con ele maga anak.—1 Sam. 1:19, 20; 2:21.

8-9. Porque kita debe pricura anda na diaton maga miting? (Mira tambien con el letrato.)

⁸ Maga leccion. Ta enfrenta ba tu ahora un grabe problema que ta causa contigo para queda bien triste? Posible, tiene tu un familia o amigo quien ya muri. Na ansina maga situacion, normal lang que quierre kita man solo. Pero, puede kita acorda que ya sinti alivio y comforta si Ana cuando ya anda le na tabernaculo. Puede tambien tu sinti comforta si  atende tu na maga miting maskin pa nuay tu gana o triste tu. (Le con el Maga Hebreo 10:24, 25.) Na maga miting, ta puede kita ricibi comforta estaba na Biblia. Puede si Jehova usa con ese para quita con el diaton maga negativo sentido y queda positivo. Como resulta, puede kita controla con el diaton emocion maskin pa nuay cambia el diaton situacion.

⁹ Na diaton maga miting, ta puede tambien kita man junto con el diaton maga hermano y hermana quien ta puede anima y dale mira amor kanaton. (1 Tes. 5:11, 14) Considera con el experiencia del un special pioneer cuando ya muri el de suyu mujer. Ya habla le: “Ta llura siempre yo. Tiene vez, ta sinta lang yo na urilla y ta llura. Pero ta puede gayot conmigo anima el diaton maga miting. Ta puede conmigo dale comforta el maga palabra del maga hermano y hermana. Maskin bien malingasa yo antes yo anda na miting, ta queda yo alegre si talla yo.” Si talli kita na diaton maga miting, puede si Jehova usa con el diaton maga hermano y hermana para ayuda kanaton.

10. Paquemodo kita puede imita con el ejemplo de Ana si bien triste kita?

¹⁰ Ya sinti tambien comforta si Ana cuando ya habla le con Jehova na rezo el todo cosa le ta sinti. Igual con ele, puede tu ‘deja todo el de tuyu maga lingasa con Jehova’ y confia que oi Le contigo. (1 Ped. 5:7) Amo se el cosa ya hace el un hermana. Ya mata el maga ladron con el de suyu marido. Ele ya habla: “Aquel tiempo, dol ya machaca con el de mio corazon y dol gendeh mas yo queda alegre otravez. Pero si ta reza yo con el de mio amable Tata, si Jehova, ta sinti yo alivio. Tiene vez, dol no sabe yo si cosa yo habla. Pero, sabe yo que ta entende le conmigo. Si ta sinti yo bien triste, ta pidi yo con ele que dale conmigo paz. Ta puede se ayuda conmigo para queda calmao. Despues, ta puede ya yo hace con el cosa yo necesita hace.” Triste si Jehova si ta mira le contigo ta llura por causa na tristeza y ta entende le con el dolor que ta sinti tu. Maskin pa nuay perde el de tuyu problema, puede ayuda contigo si Jehova para tene paz y queda calmao. (Sal. 94:19; Fil. 4:6, 7) Mas pa, hay premia le contigo cay ta continua tu aguanta.—Heb. 11:6.

SI YA TRAICIONA CONTIGO

11. Cosa ya sinti si David por causa na maga dificil situacion que ya enfrenta le?

¹¹ Ya enfrenta si David manada dificil situacion que ya causa con ele para llura. Ya experiencia le oposicion y gane, ya traiciona con ele el cuanto persona con quien le ta confia. (1 Sam. 19:10, 11; 2 Sam. 15:10-14, 30) Durante na un dificil situacion na de suyu vida, ya escribi le: “Maluya ya yo por causa na de mio suspirada; entero noche ya muha yo de luha con el de mio cama; tan avenida de luha onde yo ta acusta.” Porque ya sinti ansina si David? “Por causa del todo quien ta ataca conmigo,” ya habla le. (Sal. 6:6, 7) Ya sinti gayot duele si David por causa na maltratamiento del otro con ele. Y por causa con ese, ya puede gayot le llura.

12. Asegun na Salmo 56:8, na cosa asigurao si David?

¹² Maskin ya enfrenta si David maga dificultad, convincido le que ta ama con ele si Jehova. Gane, ya escribi le: “Oi gayot si Jehova con el de mio llantos.” (Sal. 6:8) Na otro ocasion, ya escribi si David con el maga bonito palabra que puede kita mira na Salmo 56:8. (Le.) Ese texto ta dale mira si paquemodo de grande el amor de Jehova. Ya habla si David que dol ta colecta si Jehova con el de  suyu luha na un botella o ta escribi acerca con ese na un libro. Asigurao si David que ta nota si Jehova con el de suyu situacion. Pero mas pa con ese, convincido le que sabe si Jehova el dolor que ta sinti le y hay acorda gayot Le con ese.

13. Si desmayao kita por causa con otro, cosa kita debe acorda? (Mira tambien con el letrato.)

¹³ Maga leccion. Desmayao ba tu cay ya traiciona o ya hace sinti duele contigo el un persona con quien tu ta confia? Baka ya deja contigo el de tuyu novio o novia, o gaha el de tuyu marido o mujer. Posible tambien que ya descanza sirvi con Jehova el un persona con quien tu ta ama. Ya sucede se con el un hermano. Ya comete adulterio el de suyu mujer y ya abandona con ele. Ya habla el hermano: “Espantao gayot yo. Ya sinti yo triste, rabiao y dol nuay mas yo sirvi.” Si tiene quien ya traiciona contigo o ya queda tu desmayao na un persona, puede tu sinti comforta si acorda tu que nunca contigo abandona si Jehova. El hermano ya habla: “Ya puede yo realiza que el maga gente posible deja kanaton. Pero, si Jehova el diaton Piedra. Poreso maskin cosa man pasa, talli le pirmi. Gendeh gayot le deja con el de suyu maga leal siervo.” (Sal. 37:28) Acorda tambien que gendeh puede compara con el amor de Jehova na amor del gente. Posible que abandona contigo el otro pero gendeh se afecta con el amor Jehova para contigo. (Roma 8:38, 39) Acorda este: Maskin cosa pa el tratamiento del otro contigo, ta ama contigo el de tuyu Tata na cielo.

14. Cosa asiguranza ta dale kanaton el Salmo 34:18?

¹⁴ Puede tambien kanaton dale comforta el cosa ya habla si David na Salmo 34:18. (Le.) El un referencia ta habla que el expresion “aquellos bien triste” posible ta refiri con “aquellos quien nuay mas cosa bueno ta esperanza na futuro.” Ta ayuda si Jehova con aquellos quien ta sinti igual ansina. Paquemodo? Igual na un amable mayores quien ta abraza y ta dale comforta con el de suyu anak quien ta llura, “cerca” si Jehova kanaton—ta sinti le con el dolor que ta sinti kita. Quierre gayot le ayuda y dale comforta kanaton. Y ta dale le kanaton manada bonito cosas para esperanza que puede ayuda kanaton para aguanta na maga problema.—Isa. 65:17.

SI DOL NUAY MAS TU ESPERANZA

15. Porque ya queda bien triste y ya llura si Ezequias?

¹⁵ Cuando 39 año si Rey Ezequias, ya sabe le que tiene le grabe enfermedad. Por medio  con profeta Isaias, ya habla con ele si Jehova que muri le por causa na de suyu enfermedad. (2 Rey 20:1) Dol nuay mas esperanza el situacion de Ezequias. Por causa con aquel noticia, ya queda le bien triste y ya llura. Ya reza tambien le con Jehova con todo corazon.—2 Rey 20:2, 3.

16. Cosa ya hace si Jehova despues oi con el rezo de Ezequias?

¹⁶ Ya sinti compasion si Jehova con Ezequias y ya habla con ele: “Ya oi yo con el de tuyu rezo. Ya mira yo con el de tuyu maga luha. Hay cura yo contigo.” Ya promete si Jehova por medio con Isaias que hay extende Le con el vida de Ezequias y salva con el Jerusalem na mano de maga Asiriano.—2 Rey 20:4-6.

17. Paquemodo si Jehova puede ayuda kanaton si tiene kita grabe enfermedad? (Salmo 41:3) (Mira tambien con el letrato.)

¹⁷ Maga leccion. Tiene ba tu un grabe enfermedad que dol gendeh mas puede cura? Maskin pa ta llura tu, atraca con Jehova na rezo. El Biblia ta asigura kanaton que “el Tata de todo clase de lastima y el Dios de todo clase de consuelo” hay dale comforta kanaton maskin cosa probanza pa kita ta enfrenta. (2 Cor. 1:3, 4) Gendeh kita ta expecta que hay quita si Jehova con el todo diaton maga problema ahora. Pero, puede kita confia que ayuda gayot le kanaton. (Le con el Salmo 41:3.) Por medio na de suyu sagrao espiritu, ta dale si Jehova kanaton el fuerza, sabeduria y paz na pensamiento para puede kita aguanta. (Prov. 18:14; Fil. 4:13) Ta dale tambien le comforta kanaton por medio na esperanza na Biblia que na futuro, nuay mas ya quien hay enferma.—Isa. 33:24.

18. Cosa texto el ta puede ayuda contigo si ta enfrenta tu bien dificil situacion? (Mira con el cajon “ Maga Texto que Puede Dale Comforta.”)

¹⁸ Ya puede dale comforta con Ezequias el maga palabra de Jehova. El maga palabra del Dios na Biblia puede tambien dale kanaton comforta y ayuda kanaton queda calmao mientras ta enfrenta maga bien dificil situacion. (Roma 15:4) Cuando ya sabe el un hermana na West Africa que tiene le cancer, pirmi le ta llura. Ele ya habla: “Uno na maga texto que ya puede gayot dale comforta conmigo amo el Isaias 26:3. Mas mucho, gendeh kita puede cambia con el diaton situacion. Pero, este versiculo ya asigura conmigo que puede kanaton dale si Jehova el paz na pensamiento para puede kita esta calmao y aguanta na maskin cosa probanza.” Tiene ba texto que ta puede ayuda contigo si ta enfrenta tu grabe problema que dol nuay mas solucion?

19. Cosa kita puede esperanza na futuro?

 ¹⁹ Bien cerca ya el fin de este sistema. Poreso, puede kita expecta que queda pa mas manada el maga dificil situacion que puede causa kanaton para llura. Pero como cosa kita ya aprende na ejemplo de Ana, David y Rey Ezequias, ta nota si Jehova si ta llura kita y ta sinti tambien le triste. Precioso con Jehova el diaton maga luha. Poreso si ta enfrenta kita dificil situacion, gendeh kita debe man alang-alang habla con Jehova na rezo si cosa gayot kita ta sinti. Esta kita junto con el maga hermano y hermana na congregacion. Y continua kita le con el Biblia para ricibi comforta. Puede kita asigura que si aguanta kita hasta na fin, hay premia kanaton si Jehova. Ya promete le que llega el tiempo, nuay mas quien hay llura por causa na tristeza. (Rev. 21:4) Sino, hay llura lang kita por causa na alegria.