1. Na tiempo del Biblia, paquemodo de importante el pan para na maga gente?

 NA TIEMPO del Biblia, el pan amo uno na maga comon comida del maga gente. (Gen. 14:18; Luc. 4:4) Gane, el Biblia tiene vez ta usa con el palabra “pan” para refiri na comida. (Act. 20:7; Mat. 6:11) Ya usa si Jesus pan na de suyu dos conocido milagro. (Mat. 16:9, 10) Puede kita mira con el uno de ese na Juan capitulo 6. Mientras ta discuti kita con ese, mira kita con el maga leccion que puede kita aplica.

2. Porque yan lingasa el maga dicipulo acerca na comida cuando talla sila cerca na Betsaida?

² Despues predica el maga apostoles de Jesus, ya munta sila bangca junto con Jesus para anda descanza na otro lao parte del Mar de Galilea. (Mar. 6:7, 30-32; Luc. 9:10) Despues, ya llega sila na un silencio lugar cerca na Betsaida. Pero nuay dura, miles de maga gente el ya llega. Nuay si Jesus ignora kanila. Sino, ya dale le tiempo para enseña kanila acerca con el Reino y ya cura con el maga enfermo. Pero cuando cerca ya sumi el sol, yan lingasa el maga dicipulo si paquemodo este maga gente puede come. Siguro, el cuanto kanila tiene ta lleva poco comida pero el mayoria necesita pa anda na barrio para cumpra comida. (Mat. 14:15; Juan 6:4, 5) Cosa ya hace si Jesus?

 YA HACE SI JESUS PAN POR MEDIO NA MILAGRO

3. Cosa si Jesus ya manda hace con el de suyu maga apostoles? (Mira tambien con el letrato.)

³ Ya habla si Jesus con el de suyu maga apostoles: “Gendeh sila necesita volve. . . . Dale canila maskin cosa para come.” (Mat. 14:16) Pero dol imposible el cosa ta manda si Jesus cay maga 5,000 hombre el talla. Y si inclui con el maga mujer y con el maga bata, maga 15,000 gente sila necesita dale come. (Mat. 14:21) Si Andres ya habla: “Tiene aqui un bata ta lleva cinco bilog . . . pan pati dos bilog pescao. Pero falta gayot este para con todo este maga gente.” (Juan 6:9) Hacido de cebada aquel pan y comon comida este del maga gente de antes. Posible tambien que pescao seco aquel maga pescao. Pero, gendeh siempre quel bastante para puede come el todo quien talla.

4. Cosa kita puede aprende na Juan 6:11-13? (Mira tambien con el maga letrato.)

⁴ Quierre si Jesus queda hospitable na maga gente. Ya manda le kanila sinta na zacate grupo-grupo. (Mar. 6:39, 40; le con el Juan 6:11-13.) Despues, ya rindi gracias si Jesus con el de suyu Tata por el pan y pescao. Ya dale le mira que con Dios estaba aquel comida y que ta aprecia le con ese. Un bonito ejemplo se para kanaton. Necesita kita reza antes come, solo man kita o gendeh. Despues distribui el maga apostoles con el comida, ya come el maga gente y yan busug. Gane, manada pa sobra comida. No quierre si Jesus que man usik quel poreso ya manda le recuji con aquel para puede pa usa na sunod. Puede kita  imita con Jesus y no hace usik con el cosa kita tiene. Si tiene tu maga anak, puede tu discuti este istoria kanila y mira si cosa maga leccion el puede sila aprende acerca na rezo, pagka-hospitable y pagka-bondadoso.

5. Cosa quierre hace el maga gente con Jesus pero cosa le ya hace?

⁵ Yan bilib gayot el maga gente si paquemodo si Jesus ta enseña y ta hace maga milagro. Sabe sila que ya habla si Moises que el Dios hay imbia un especial profeta. Poreso, posible ya pensa sila que baka si Jesus ya quel. (Deut. 18:15-18) Para kanila, puede queda un buen lider si Jesus quien puede dale comida na entero nacion. Poreso, “quiere sila saca con [Jesus] . . . para proclama con Ele rey.” (Juan 6:14, 15) Si ya conforma si Jesus na cosa sila quierre, hay queda le envuelto na politica. Pero, nuay quel ele hace sino “ya anda Le otra vez na monte solo-solo.” Claro que maskin ya forza con ele el otro, nuay gayot le queda envuelto na politica. Un importante leccion se para kanaton!

6. Paquemodo kita puede dale mira que quierre kita sigui con el ejemplo de Jesus? (Mira tambien con el letrato.)

⁶ Siempre, gendeh kanaton manda el maga gente que hace milagro para dale kanila comida o cura con el maga enfermo. Y gendeh tambien sila pricura kanaton hace rey o lider de nacion. Pero posible, forza sila kanaton que vota o dale mira diaton suporta con el un politico  que ta mira sila hay queda un buen lider. Acorda con el ejemplo de Jesus. Nuay le conforma queda envuelto na politica. Gane, na uliji ya habla le: “El dimio Reino gendeh de este mundo.” (Juan 17:14; 18:36) El maga Cristiano ahora ta pricura pensa igual con Jesus y ta imita con el de suyu ejemplo. Ta suporta kita, ta predica y ta reza para na Reino del Dios. (Mat. 6:10) Ahora bira kita con el milagro ya hace si Jesus y considera si cosa pa kita puede aprende.

“NOAY SILA ENTENDE EL MILAGRO DEL PAN”

7. Cosa ya hace si Jesus y cosa el reaccion del maga apostoles? (Juan 6:16-20)

⁷ Despues dale come si Jesus con el maga gente, ya anda le na monte para evita que hace con ele rey el maga gente. Ya manda tambien le con el de suyu maga apostoles que bira para na Capernaum. (Le con el Juan 6:16-20.) Mientras ta viaja el maga apostoles na bangca, ya tiene un fuerte tifun. Bien fuerte el viento y grande el maga marijada. Despues, ya puede sila mira con Jesus que ta camina encima del agua y ya manda le con apostol Pedro que camina tambien na agua. (Mat. 14:22-31) Cuando ya llega si Jesus na bangca, ya calma el viento. Poreso, ya puede habla el maga dicipulo: “Deverasan gayot Anak Uste del Dios.” a (Mat. 14:33) Maka-estraña cay ahora lang se sila ya habla despues si Jesus camina na agua y gendeh cuando ya hace le milagro para na maga gente. Nota con este detalle que ya habla si Marcos: “Bien espantao gayot [el maga apostoles], cay noay sila entende el milagro del pan.” (Mar. 6:50-52) Claro que nuay el maga dicipulo entende si paquemodo de grande el poder que ya dale si Jehova con Jesus para hace maga milagro. Pero nuay dura, ya menciona si Jesus con el de suyu milagro acerca na pan y ya enseña un leccion.

8-9. Porque ya busca el maga gente con Jesus? (Juan 6:26, 27)

⁸ Alamañana, ya puede nota el maga gente que nuay mas alla si Jesus y de suyu maga apostoles. Poreso cuando ya llega el cuanto maga bangca estaba na Tiberias, ya munta sila alla para anda na Capernaum y busca con Jesus. (Juan 6:22-24) Ya hace ba quel sila cay quierre sila sabe pa mas acerca na Reino? Gendeh. Quierre lang sila que dale kanila comida si Jesus. Porque se kita puede habla?

⁹ Nota si cosa ya sucede cuando ya puede incuntra el maga gente con Jesus cerca na Capernaum. Franca si Jesus ya habla que ya busca lang sila con ele cay quierre sila comida. Maskin pa ‘ya puede sila come el pan y ya man busug,’ ya hace claro si Jesus que aquel comida “gendeh ta dura” o tan buluk lang. Poreso, ya anima le kanila que hace esfuerzo para obtene con el “comida que ta dura hasta na Vida Eterno.” (Le con el Juan 6:26, 27.) Cuando ya puede quel oi el maga gente, ya estraña gayot sila! Cosa gaha quel comida que puede dale vida eterna y paquemodo quel sila puede ricibi?

10. Cosa necesita hace el maga gente para tene vida hasta para cuando?

¹⁰ Quierre sabe aquel maga Judio si cosa sila debe hace para puede ricibi con aquel clase de comida. Posible ta pensa sila que necesita sila hace con el maga “trabajo” que ya menciona na Ley de Moises. Pero, ya habla kanila si Jesus: “El trabajo que Dios quiere para hace ustedes amo que tene fe con el quien [el] Dios ya manda aqui na mundo.” (Juan 6:28, 29, El Nuevo Testamento) Necesita sila demonstra fe con el persona con quien  ya imbia el Dios para puede “tene Vida hasta para cuando.” Gane, amo se el cosa ya explica si Jesus de antes. (Juan 3:16-18, 36) Ya menciona tambien le acerca con ese topico na otro ocasion.—Juan 17:3.

11. Paquemodo ya dale mira el maga Judio que na literal comida lang sila siempre interesao? (Salmo 78:24, 25)

¹¹ Aquel maga Judio nuay acepta con el cosa ya enseña si Jesus acerca na trabajo que necesita sila hace. Gane, ya pidi sila con Jesus que hace pa otro milagro y ya habla: “Cosa el señal ay dale Uste para puede came mira y cree con Uste?” (Juan 6:30) Despues, ya menciona sila que na tiempo de Moises, ya ricibi el maga gente comida que ta llama mana. (Neh. 9:15; le con el Salmo 78:24, 25.) Claro que interesao lang sila na literal comida. Gane, cuando yan cuento si Jesus acerca na “deverasan pan del cielo,” nuay sila pricura sabe pa mas acerca con ese maskin pa puede se dale kanila vida eterna, gendeh igual na mana. (Juan 6:32) Nuay sila oi con el cosa ta pricura enseña kanila si Jesus cay yan focus lang sila na diila fisical necesidad. Cosa kita puede aprende con este?

EL DIATON PRIORIDAD

12. Paquemodo ya dale mira si Jesus si cosa el mas importante?

¹² Este el importante leccion que puede kita aprende na Juan capitulo 6. Debe el diaton prioridad amo el diaton maga espiritual necesidad. Acorda que amo tambien se el cosa ya hace si Jesus cuando ya tenta con ele si Satanas. (Mat. 4:3, 4) Y na de suyu Sermon na Monte, ya hace le claro que necesita kita pensa con el diaton espiritual necesidad. (Mat. 5:3) Poreso, debe kita pregunta na diaton mismo cuerpo, ‘Ta dale ba yo mira que mas importante conmigo el de mio espiritual necesidad contra na maga cosas que quierre yo?’

13. (a) Porque gendeh malo que man enjoy come? (b) Na cosa kita debe queda con cuidao? (1 Corinto 10:6, 7, 11)

¹³ Gendeh malo que reza kita para na diaton maga fisical necesidad y man enjoy con ese maga cosas. (Luc. 11:3) El Biblia ta habla que bueno para na un gente que “come, toma y queda alegre na de suyu trabajo,” y que “estaba tambien este na mano del verdadero Dios.” (Ecl. 2:24; 8:15; Sant. 1:17) Pero, necesita kita queda con cuidao na diaton mirada na maga material cosas. Ese el cosa ya hace claro si apostol Pablo con el maga Cristiano de antes. Ya hace le acorda si cosa ya sucede con el maga Israelita cuando talla sila cerca na Monte de Sinai. Ya habla le con el maga Cristiano que debe “gendeh [sila] ay desea el maga cosa-cosa malo igual como . . . ya desea” el maga Israelita. (Le con el 1 Corinto 10:6, 7, 11.) Ya hace milagro si Jehova para dale comida con el maga Israelita. Pero por causa na diila sobra deseo para na comida, tiene mal cosas ya sucede kanila. (Num. 11:4-6, 31-34) Y cuando ya adora sila con el vaca de oro, ya dale mira el maga Israelita que mas importante kanila el comida, tomada y alegria contra obedece con Jehova. (Ex. 32:4-6) Ya usa si Pablo este maga ejemplo para dale aviso con el maga Cristiano quien ta vivi cuando cerca ya destroza con el Jerusalem. Ahora, cerca ya tambien destroza con el sistema de este mundo. Poreso, importante que sigui kita con el consejo de Pablo.

14. Cosa kita puede expecta acerca na comida na nuevo mundo?

¹⁴ Cuando ya enseña kanaton si Jesus que reza para na “comida que necesita” kita, ya enseña tambien le que reza para cumpli el voluntad del Dios ‘aqui na mundo igual na cielo.’ (Mat. 6:9-11) Cosa ya gaha el situacion si sucede se? El Biblia ta dale mira que incluido  na voluntad del Dios que tene sabroso comida el maga gente. El Isaias 25:6-8 ta habla que hay man enjoy kita con el manada sabroso comida bajo na rulanza del Reino de Jehova. Mas pa, el Salmo 72:16 ta habla: “Hay tene abundancia de grano na tierra; na arriba del monte este hay sobra.” Excited ya ba tu cuci con el de tuyu favorito comida o pruba cuci un nuevo potaje? Mas pa con ese, puede tambien tu man enjoy con el cosecha del cosa tu siembra. (Isa. 65:21, 22) Todo na entero mundo hay experiencia tambien con ese.

15. Cosa hay aprende aquellos con quien hay resucita? (Juan 6:35)

¹⁵ Le con el Juan 6:35. Pensa otravez con el maga gente quien ya come con el pan y pescao que ya dale si Jesus. Si sucede ya el resureccion, posible puede kita conoce con el cuanto kanila. Maskin pa nuay sila demonstra fe de antes, posible siempre kanila resucita. (Juan 5:28, 29) Pero, necesita sila aprende si cosa quierre decir de este maga palabra de Jesus: “Yo amo el Pan de Vida. Si quien ta anda conmigo gendeh mas gayot ay tene hambre.” Necesita sila demonstra fe na sacrificio que ya hace si Jesus para kanila. Na ese tiempo, hay enseña con aquellos con quien resucita y con el maga bata quien hay nace na nuevo mundo acerca con Jehova y na de suyu proposito. Asigurao queda gayot kita alegre enseña kanila! Mas man enjoy kita hace con ese maga espiritual cosas contra come con el maga sabroso comida na nuevo mundo.

16. Cosa kita hay considera na sunod?

¹⁶ Ya considera kita con el cuanto suceso na Juan capitulo 6 pero tiene pa cosa ya enseña si Jesus acerca na “Vida hasta para cuando.” Necesita oi enbuenamente el maga Judio con aquel cosa le ya habla y kita tambien ahora. Poreso, hay continua kita considera con el Juan capitulo 6 na sunod articulo.