Ya escribi si apostol Pablo con Timoteo quien igual con ele ta sirvi tambien como un anciano. Ya habla le: “Adelante del Dios y de Jesucristo y del maga angel que Ele ya escuji, ta manda gayot yo contigo aplica este maga regulacion igual-igual con todo, y no hace favorito ni con [ningunos].”—1 Tim. 5:21.

Para sabe kita si quien este maga iscujido angel, discuti anay kita si quien el gendeh incluido na ese grupo. Asigurao que gendeh incluido alli el 144,000 cay cuando ya escribi si Pablo con Timoteo, nuay pa principia el resureccion del maga iscujido Cristiano para na cielo. Entonces, nuay pa queda maga espiritu creatura el maga apostoles y el otro maga iscujido Cristiano, poreso gendeh sila puede queda incluido na maga iscujido angel.—1 Cor. 15:50-54; 1 Tes. 4:13-17; 1 Juan 3:2.

Mas pa, gendeh puede queda incluido na ese grupo el maga angel quien ya queda desobediente na tiempo del Grande Avenida. Ese maga angel ya sigui na rebellon de Satanas y ya queda maga demonio. Y como resulta, ya queda sila maga enemigo de Jesus. (Gen. 6:2; Luc. 8:30, 31; 2 Ped. 2:4) Na futuro, hay hace preso kanila na hondura por 1,000 año y despues, hay destroza kanila junto con el Diablo.—Jud. 6; Rev. 20:1-3, 10.

Tiene grande posibilidad que el maga iscujido angel que ya menciona si Pablo amo el maga angel na cielo quien ta suporta con ‘Dios y con Jesucristo.’

Tiene bien manada fiel angel na cielo. (Heb. 12:22, 23) Puede kita habla que gendeh todo angel tiene igual assignment. (Rev. 14:17, 18) Por ejemplo, ya imbia si Jehova con el un angel para destroza con el 185,000 Asiriano soldao. (2 Rey 19:35) Posible que ya manda tambien con el cuanto maga angel que “arranca na . . . Reino con todo aquel quien ta causa con otros peca y con todo el quien ta hace malo.” (Mat. 13:39-41) Tiene tambien otro maga angel con quien posible ya manda “para ajunta con el . . . maga escujido” de Jesus. (Mat. 24:31) Puera con ese, ya manda tambien con otro maga angel que “guarda” kanaton.—Sal. 91:11; Mat. 18:10; compara na Mateo 4:11; Luc. 22:43.

Tiene grande posibilidad que el maga iscujido angel que ya menciona na 1 Timoteo 5:21 amo maga angel con quien ya dale responsibilidad para mira con el maga siervo del Dios. Asegun na contexto de este versiculo, ya conseja si Pablo con el congregacion que debe sila respeta con el maga anciano. Pero, ya dale tambien le consejo si paquemodo el maga anciano cumpli con el diila responsibilidad. Ya habla le que debe sila “aplica [con el] maga regulacion igual-igual con todo, y no hace favorito ni con [ningunos].” Mas pa, debe gendeh tambien sila basta lang hace maga decision. Debe sila sigui con el consejo de Pablo cay ta sirvi sila “adelante del Dios y de Jesucristo y del maga angel que Ele ya escuji.” Entonces, claro que tiene cuanto maga angel con quien ya iscuji para ayuda na congregacion—ta protege sila con el maga siervo del Dios, ta ayuda sila kanila na trabajo predicacion y ta anda sila reporta con Jehova si cosa sila ya puede observa.—Mat. 18:10; Rev. 14:6.