Ya puede ba tu le con el maga articulo na El Torre de Guardia de este año? Mira si puede tu contesta con el siguiente pregunta:

Paquemodo si Jehova ta trata con el maga mujer?

Ta trata le con el maga mujer na imparcial manera y gendeh ta prefiri con el maga hombre contra kanila. Ta oi le kanila y interesao le na cosa sila tan lingasa y ta sinti. Mas pa, ta dale le kanila maga privilegio.—w24.01, p. 15-16.

Paquemodo kita puede aplica con el Efeso 5:7 donde ta habla: “No gayot . . . man junto kanila”?

Ya habla si apostol Pablo que no man junto con aquellos quien puede causa kanaton para man dificil sigui con el maga principio del Dios. Gendeh kita debe man junto kanila na personal o maskin na social media.—w24.03, p. 22-23.

Na cosa maga falso istoria kita debe queda con cuidao?

Necesita kita queda con cuidao na maga istoria que nuay puede confirma, maga email estaba con aquellos que no conoce kita y na maga apostata quien ta pretende que interesao na verdad.—w24.04, p. 12.

Cosa kita sabe y no sabe acerca na juzgamiento de Jehova con Solomon y con aquellos quien ya muri na Sodoma y Gomorra y na Grande Avenida?

No sabe kita si nuay mas ba sila esperanza de resureccion. Pero, sabe kita que sabe si Jehova el todo detalle acerca kanila y bien lastimoso le.—w24.05, p. 3-4.

Ciendo ya llama con Jehova “el Piedra,” cosa kita puede asigura? (Deut. 32:4)

Puede kita hace con Jehova como diaton refugio. Puede kita con ele confia cay pirmi le ta cumpli con el de suyu promesa. Puede tambien kita asigura que gendeh cambia el de suyu personalidad y proposito.—w24.06, p. 26-28.

Cosa puede ayuda contigo para man adjust na nuevo congregacion?

Confia con Jehova que ayuda le contigo igual con el de suyu maga siervo de antes. No compara con el de tuyu nuevo congregacion na de tuyu congregacion de antes. Participa na maga actividad na congregacion y busca maga nuevo amigo.—w24.07, p. 26-28.

Cosa el maga leccion na tres ilustracion na Mateo capitulo 25?

El ilustracion acerca na maga carnero y cabrito ta dale mira que debe kita esta fiel y leal. El ilustracion acerca na maga sabio y gendeh sabio dalaga ta hace claro que debe kita queda preparao y esta alerto. Y el ilustracion acerca na maga talento ta enseña que debe kita trabaja enbuenamente.—w24.09, p. 20-24.

Paquemodo de alto el veranda del templo de Solomon?

Na 2 Cronicas 3:4 na cuanto maga daan manuscrito, ya menciona que “120 codo” o 53 metro el altor del veranda. Pero asegun na otro maga manuscrito, “20 codo” o nueve metro el altor de este. Ta sale que mas exacto ese numero si considera con el gruesor del pader del templo.—w24.10, p. 31.

Cosa quierre decir que “debe uno lang el mujer” del siervo ministerial? (1 Tim. 3:12, NWT)

Este quierre decir que debe na un mujer lang le casao y gendeh le ta comete sexual imoralidad. Mas pa, gendeh le debe dale mira romantico atencion na otro mujer.—w24.11, p. 19.

Porque kita puede habla que gendeh debe man base el Cena del Señor na Juan 6:53?

Na Juan 6:53, ya habla si Jesus que necesita el maga gente come con el de suyu laman y toma con el de suyu sangre. Ya habla le se na Galilea del 32 C.E. na maga Judio quien necesita demonstra fe con ele. Pero, ya hace le con el Cena del Señor na Jerusalem un año pa despues de ese suceso na Galilea. Na ese tiempo, yan cuento le con aquellos lang quien hay rula junto con ele na cielo.—w24.12, p. 10-11.