1. Cosa ta sinti si David para con Jehova y cosa este ya manda move con ele para hace?

SI Rey David ya escribi: “Si Jehova incomparable y el quien conviene ricibi alabanza.” (Sal. 145:3) Ta ama le con Jehova y ese el ya manda move con ele para alaba con Dios “entre na congregacion.” (Sal. 22:22; 40:5) Asigurao, ta ama tu con Jehova y tan uyun tu na cosa ya habla si David: “Ojala hay alaba contigo hasta para cuando, O Jehova, el Dios de Israel el diamon tata.”​—1 Cron. 29:10-13.

2. (a) Paquemodo kita puede alaba con Jehova? (b) Cosa dificultad ta enfrenta el otro y cosa kita man repaso?

² El un manera para alaba con Jehova ahora amo por medio na diaton comento na miting. Pero el cuanto maga hermano y hermana tan dificil man comento. Quierre sila participa na miting pero ta sangga kanila el miedo. Cosa kanila puede ayuda para enfrenta con ese? Y cosa maga practical sugestion el puede ayuda para puede kita dale comento que ta anima con todo? Antes kita contesta con ese maga pregunta, man repaso kita con el cuatro importante razon si porque kita tan comento na miting.

3-5. (a) Como cosa ta dale mira na Maga Hebreo 13:15, porque kita tan comento na miting? (b) Igual-igual ba el clase de comento que debe kita dale? Explica.

³ Ya dale privilegio si Jehova kanaton todo para alaba con ele. (Sal. 119:108) El diaton maga comento na miting amo parte del diaton “sacrificio de alabanza” y nuay quien otro puede  hace se para kanaton. (Le con el Maga Hebreo 13:15.) Igual-igual ba el clase de sacrificio o comento que ta pidi si Jehova con el cada uno kanaton? Gendeh!

⁴ Sabe si Jehova que otro-otro el diaton abilidad y circumstancia y ta aprecia gayot le con el maga sacrificio que ta puede kita dale con ele. Considera con el clase de maga ofrecimiento que ya acepta le na maga Israelita. El cuanto maga Israelita ya puede ofrece carnero o cabrito. Pero el un pobre Israelita puede ofrece “dos tortola o dos pichon de paloma.” Si el un Israelita gendeh puede dale dos pajaro, ta acepta si Jehova “ika-diez parte de un efa de buen clase de harina.” (Lev. 5:7, 11) Mas barato el harina pero ta aprecia siempre si Jehova con ese ofrecimiento, basta ese “buen clase de harina.”

⁵ Ansina tambien ta sinti si Jehova ahora. Si ta dale kita comento, gendeh le ta expecta que todo kita queda igual de bueno converza con Apolo o Pablo. (Act. 18:24; 26:28) El cosa quierre si Jehova amo que dale kita el de con todo buen comento que puede kita dale. Acorda con el viuda quien ya dale dos sencillo que diutay el valor. Precioso le para con Jehova cay ya dale ele el cosa le puede dale.​—Luc. 21:1-4.

6. (a) Asegun na Maga Hebreo 10:24, 25, cosa el efecto kanaton del maga comento del otro? (b) Paquemodo tu dale mira apreciacion na maga comento del otro?

⁶ Ta anima kita con uno’y otro por medio na diaton comento. (Le con el Maga Hebreo 10:24, 25.) Ta aprecia kita con el clase-clase de comento na diaton miting. Alegre kita oi con el maga simple pero con todo corazon comento del maga bata. Ta anima kanaton el comento del un hermano o hermana acerca na un verdad que nuevo lang le ya aprende. Y alegre tambien kita oi con aquellos tiene animo man comento maskin huyain o ta aprende pa lang el diaton lengguaje. (1 Tes. 2:2) Paquemodo kita dale mira apreciacion con el diila esfuerzo? Puede kita rindi gracias kanila despues del miting. El otro manera amo por medio del diaton mismo comento. Na ese manera, ta anima kita con uno’y otro na diaton miting.​—Rom. 1:11, 12.

7. Paquemodo kita ta beneficia si tan comento kita?

⁷ Ta beneficia kita mismo si tan comento  kita. (Isa. 48:17) Paquemodo? Una, si ta plaña kita man comento, mas quierre kita prepara enbuenamente para na miting. Si ta hace kita se, mas ta queda hondo el diaton entendimiento na Palabra del Dios. Como resulta, mas ta puede kita aplica el cosa kita ta aprende. Ika-dos, posible que mas man enjoy kita cay ta participa kita na miting. Ika-tres, ciendo necesita esfuerzo para man comento, mas ta acorda kita con el maga punto que yan comento kita.

8-9. (a) Como cosa ta revela el Malaquias 3:16, cosa ta sinti si Jehova na diaton maga comento? (b) Cosa dificultad el posible siempre ta enfrenta el cuanto?

⁸ Ta hace kita alegre con Jehova si ta converza kita acerca diaton fe. Puede kita asigura que ta oi kanaton si Jehova y ta aprecia gayot le con el diaton esfuerzo man comento na miting. (Le con el Malaquias 3:16.) Y para dale mira de suyu apreciacion na diaton esfuerzo hace alegre con ele, ta bendici le kanaton.​—Mal. 3:10.

⁹ Claro que tiene kita maga razon para man comento na miting. Pero el cuanto ta tiene siempre miedo alza mano. Si ese el cosa tu ta sinti, no man luya. Considera kita cuanto principio y ejemplo na Biblia y maga practical sugestion que puede ayuda kanaton para pricura mas man comento na miting.

10. (a) Porque kita ta tiene miedo man comento? (b) Si ta tiene tu miedo man comento, cosa calidad tu posible tiene?

¹⁰ Tan putuk-putuk ba tu cada vez tu ta pensa alza mano para man comento? Gendeh lang tu el ta experiencia ansina. El deverasan, mayoria kanaton ta nervia si tan comento. Antes tu puede con ese enfrenta, necesita tu anay sabe si porque tu ta tiene miedo man comento. Ta tiene ba tu miedo que baka ulvida tu el cosa tu quierre habla o baka mali el cosa tu habla? Tan lingasa ba tu que el de tuyu comento gendeh igual de bonito na comento del otro? El deverasan, ese ta dale mira que humilde tu  y ta mira tu con otro que mas alto contigo. Ta aprecia si Jehova ese calidad. (Sal. 138:6; Fil. 2:3) Pero, quierre tambien si Jehova que alaba tu con ele y anima tu con el de tuyu maga hermano y hermana na miting. (1 Tes. 5:11) Ta ama le contigo y dale le contigo coraje.

11. Cosa maga principio na Biblia el puede ayuda kanaton?

¹¹ Considera con el cuanto principio na Biblia. El Biblia ta habla que todo kita tan kamali na cosa kita ta habla y si paquemodo ta habla con ese. (Sant. 3:2) Gendeh ta expecta si Jehova que queda kita perfecto y ansina tambien diaton maga hermano y hermana. (Sal. 103:12-14) Sila el diaton espiritual familia y ta ama sila kanaton. (Mar. 10:29, 30; Juan 13:35) Ta entende sila que tiene vez otro el cosa kita ta puede habla na cosa kita quierre man comento.

12-13. Cosa kita puede aprende na ejemplo de kanda Nehemias y Jonas?

¹² Considera con el cuanto ejemplo na Biblia que puede ayuda contigo. Acorda con Nehemias. Ya sirvi le na palacio del un poderoso rey. Triste le cay ya puede le oi que destrozao el pader y grande puerta del Jerusalem. (Neh. 1:1-4) Imagina el de suyu miedo y nervios cuando ya pregunta con ele el rey si porque le triste! Ya reza dayun si Nehemias y despues, ya contesta. Como resulta, el rey ya ayuda con el maga siervo del Dios. (Neh. 2:1-8) Pensa tambien el ejemplo de Jonas. Cuando ya manda con ele si Jehova converza con el maga de Nineve, ya tiene gayot miedo si Jonas. Y por causa con ese, ya escapa le. (Jon. 1:1-3) Pero na ayuda de Jehova, ya puede cumpli si Jonas el de suyu assignment. Y ya tiene buen resulta el cosa le ya habla con el maga de Nineve. (Jon. 3:5-10) Ya puede kita aprende con Nehemias que importante reza antes de contesta. Ya aprende tambien kita con Jonas que puede kanaton ayuda si Jehova para sirvi con ele maskin tiene kita miedo. Tiene ba congregacion ahora que maka-miedo igual na Nineve?

¹³ Cosa maga practical sugestion el puede ayuda contigo para dale comento na miting que ta anima con otro? Considera kita cuanto de ese.

14. Porque kita debe prepara enbuenamente para na diaton miting y cuando se mas bueno hace?

¹⁴ Prepara para na cada miting. Si ta plaña tu adelantao y ta prepara enbuenamente, hay tiene tu mas confianza man comento. (Prov. 21:5) Siempre, otro-otro el diaton schedule. Si Eloise, un viuda que mas de 80 el edad, ta prepara ya para na Estudiada de El Torre de Guardia na principio pa lang del semana. Ya habla le, “Mas con gana yo na miting si ta estudia yo adelantao.” Si Joy que full-time ta trabaja, tan schedule estudia con El Torre de  Guardia na dia de Sabado. “Mas facil acorda si ta estudia yo na dia antes el miting,” ya habla le. Si Ike, un ocupao anciano y pioneer, ya habla, “Ya mira yo que mas bueno si hinay-hinay yo estudia na entero semana en vez de estudia por largo tiempo na un sintada lang.”

15. Paquemodo tu puede prepara enbuenamente para na miting?

¹⁵ Cosa el envuelto para puede prepara enbuenamente na miting? Antes de principia estudia, pidi el sagrao espiritu con Jehova. (Luc. 11:13; 1 Juan 5:14) Despues, dale cuanto minuto para mira con el leccion. Analiza con el titulo, maga subtitulo, ilustracion y cajon. Mientras ta estudia tu con el cada parapo, le con el todo texto que ya cita si posible. Medita con el informacion y dale atencion especialmente con el maga punto que quierre tu man comento. Si prepara tu mas enbuenamente, mas puede tu beneficia y mas facil tu puede man comento.​—2 Cor. 9:6.

16. Cosa maga electronic tool tiene y paquemodo tu usa con ese?

¹⁶ Si posible, usa con el maga electronic tool na lengguaje que sabe tu. Por medio na organizacion de Jehova, ta ayuda le kanaton para puede kita prepara para na miting. Na ayuda del JW Library^® app, puede kita man download maga publicacion na diaton gadget. Despues, puede kita estudia, le o oi con el publicacion maskin cuando y onde. El cuanto ta usa con este tool para estudia durante el lunch break na trabajo o na escuela o mientras tan viaje. Por medio na Watchtower Library y Watchtower ONLINE LIBRARY^™, mas facil kita man research con el maga punto que quierre pa kita estudia mas.

17. (a) Porque mas bueno prepara manada comento? (b) Cosa tu ya aprende na video Become Jehovah’s Friend​—Prepare Your Comment?

¹⁷ Si posible, prepara manada comento na cada articulo. Porque? Cay baka gendeh contigo pirmi puede llama si alza tu mano. Posible que alza tambien mano el otro y el conductor posible llama uno kanila. Para acaba na hora el miting, posible que cuanto comento lang puede llama el quien ta conduci. Poreso, no man sentimiento o man luya cay nuay contigo llama na principio del estudiada. Si prepara tu manada comento, tiene tu mas manada oportunidad para participa na discusion. Uno del maga comento que puede tu prepara amo el lehida de un texto. Si posible, puede tambien tu prepara comento na de tuyu mismo palabra. *

18. Porque mas bueno si corto el comento?

¹⁸ Dale corto comento. Mas mucho, el corto y simple comento amo el de con todo ta puede anima. Poreso, hace goal que dale corto  comento​—maga 30 segundo. (Prov. 10:19; 15:23) Si tan comento tu na miting por cuanto año ya, importante que puede tu dale buen ejemplo na dalida de corto comento. Si manada tu cosa ta discuti na de tuyu comento y ta alcanza cuanto minuto, posible man alang-alang alza mano el otro y pensa que gendeh sila puede dale comento igual de bueno contigo. Si corto el comento, mas manada el quien puede participa na miting. Hace simple y directa na punto el de tuyu comento, especialmente si contigo una ya llama. No hace acaba todo punto na parapo. Si ya puede ya saca el importante punto na parapo, puede tu man comento na otro punto.​—Mira con el cajon “ Cosa Yo Puede Man Comento?”

19. Paquemodo contigo puede ayuda el conductor pero cosa tu necesita hace?

¹⁹ Manda sabe con el conductor que quierre tu man comento na un especifico parapo. Si ta plaña tu este hace, debe tu atraca con el conductor antes de principia el miting. Si tiempo ya para man comento con ese parapo, alza dayun el mano aquel asigurao puede mira el conductor.

20. Na cosa manera el atendida na miting igual como ta come junto na maga amigo?

²⁰ Si ta atende tu miting na congregacion igual lang se como ta come tu junto na de tuyu maga amigo. Imagina que ya invita contigo na un ocasion y ya pidi contigo que lleva comida. Cosa tu hace? Posible que man lingasa tu un poco pero hay hace tu esfuerzo para lleva comida que gusta el todo. Si Jehova, el quien ya invita kanaton, ya prepara manada buen cosas para kanaton na miting. (Sal. 23:5; Mat. 24:45) Y alegre le si lleva kita un simple regalo, el de con todo bueno que puede kita dale. Poreso, prepara enbuenamente y no man alang-alang dale comento. Na ese manera, puera que beneficia tu na cosa ya prepara si Jehova, tiene tambien tu cosa dale na congregacion.