1-2. (a) Cosa ta mira si Jehova si tan junto-junto el millones de gente para na Cena del Señor? (Mira con el letrato na cover.) (b) Cosa kita considera na este articulo?

IMAGINA si cosa ta mira si Jehova si tan junto-junto el millones de maga gente na entero mundo para na Cena del Señor. Gendeh lang le ta mira con el entero grupo sino ta pone le atencion na cada individual que presente. Por ejemplo, ta mira le con aquellos quien ta atende cada año. Incluido aqui aquellos quien ta atende maskin ta enfrenta maga grabe persecucion. El otro, gendeh regular ta atende na maga miting cada semana pero ta considera sila como un importante obligacion el atendida na Comemoracion. Ta mira tambien si Jehova con aquellos quien ta atende con el Comemoracion por primer vez, posible cay curioso sila.

² Asigurao, alegre si Jehova mira que bien manada el ta atende con el Comemoracion. (Luc. 22:19) Pero, gendeh bien interesao si Jehova si cuanto el ta atende. Mas interesao le na razon si porque sila ta atende; importante con Jehova el diaton motivo. Na este articulo, considera kita un importante pregunta: Porque kita ta atende gendeh lang el Comemoracion cada año sino pati el maga miting cada semana que ya prepara si Jehova para con aquellos quien ta ama con ele?

3-4. (a) Porque kita ta atende maga miting? (b) Cosa el diaton atendida na maga miting ta revela acerca kanaton? (c) Base na cosa ta habla el 1 Corinto 11:23-26, porque kita debe atende con el Comemoracion?

³ El de con todo importante razon si porque kita ta atende maga miting na congregacion amo cay parte este del diaton adoranza. Ta atende tambien kita cay ta enseña kanaton si Jehova  na maga miting. El maga orgulloso gendeh ta creé que necesita kanila enseña. (3 Juan 9) Diferente kita kanila cay quierre kita que enseña kanaton si Jehova y el organizacion que ta usa le.​—Isa. 30:20; Juan 6:45.

⁴ Si ta atende kita maga miting, ta dale este mira que humilde kita y quierre kita que enseña kanaton. Ta atende kita el Comemoracion del muerte de Jesus gendeh lang cay obligao kita, sino con humildad kita ta obedece con el mandamiento de Jesus: “Hace ustedes este para acorda conmigo.” (Le con el 1 Corinto 11:23-26.) Este ocasion ta hace fuerte con el diaton esperanza para na futuro y ta hace acorda si paquemodo de grande el amor de Jehova para kanaton. Pero, sabe si Jehova que necesita kanaton anima y hace fuerte gendeh lang una vez el año. Poreso ya prepara le maga miting cada semana y ta anima le kanaton que atende con este. El humildad amo el manda move kanaton para obedece. Ta dale kita grande tiempo cada semana para prepara y atende con este maga miting.

5. Porque el maga humilde ta acepta el invitacion de Jehova?

⁵ Cada año, ta invita si Jehova maga gente para oi de suyu maga instruccion y manada maga humilde persona el ya acepta con este invitacion. (Isa. 50:4) Alegre sila atende con el Comemoracion y ya principia atende con el otro maga miting. (Zac. 8:20-23) Junto kanila, alegre kita ricibi el maga instruccion y guia de Jehova, “el quien ta ayuda y ta salva [kanaton].” (Sal. 40:17) Tiene pa ba mas bonito​—o mas importante​—contra acepta un invitacion para oi maga instruccion de Jehova y de Jesus?​—Mat. 17:5; 18:20; 28:20.

6. Paquemodo el humildad ya ayuda con el un hombre para atende con el Comemoracion?

⁶ Ta hace kita esfuerzo cada año para invita manada gente para atende el Comemoracion del muerte de Jesus. Manada humilde persona el ya beneficia cuando ya acepta sila este invitacion. Considera un ejemplo. Cuanto año ya el ya pasa, tiene un hombre quien ya ricibi un copia de invitacion para na Comemoracion, pero ya habla le con el hermano quien ya dale con ele invitacion que gendeh le puede atende. Pero na noche del Comemoracion, espantao el hermano cay ya abuya este hombre na Kingdom Hall. Ya aprecia gayot le si paquemodo con ele yan welcome el maga hermano. Poreso, ya principia le atende con el diaton maga miting cada semana. Gane, despues de aquel, tres beses lang le nuay puede atende na entero año. Cosa ya ayuda con ele para decidi atende todo miting? El hermano quien ya invita con ele ya habla, “Bien humilde le clase de persona.” El de suyu humildad ya manda move con ele para cambia de suyu pensamiento. Asigurao que ya guia si Jehova con este gente para adora con Ele y ahora bautizao ya le.​—2 Sam. 22:28; Juan 6:44.

7. Paquemodo puede ayuda kanaton queda humilde el maga cosas que ta aprende kita na miting y na diaton lehida de Biblia?

⁷ El maga cosas que ta aprende kita na miting y na diaton lehida de Biblia puede kanaton ayuda para queda humilde. Na maga semana antes el Comemoracion, el diaton maga miting tan focus na ejemplo de Jesus y el humildad que ya demonstra le cuando ya sacrificia le de suyu vida como rescate. Y na maga dia antes el Comemoracion, ta anima kanaton que le acerca na maga suceso del muerte y resureccion de Jesus. El maga cosas que ta aprende kita na miting y ta puede le na Biblia hay hace mas fuerte con el diaton apreciacion na sacrificio de Jesus para kanaton. Ta manda este move kanaton para imita con el de suyu humildad y hace el voluntad de Jehova, maskin dificil para kanaton.​—Luc. 22:41, 42.

8. Paquemodo ya demonstra coraje si Jesus?

⁸ Ta pricura tambien kita demonstra coraje igual con Jesus. Imagina el coraje que ya demonstra le cuanto dia antes de suyu muerte. Sabe le que gendeh mas tarda, hace con ele huya, gulpia y mata con ele el de suyu maga contrario. (Mat. 20:17-19) Maskin pa ansina, conforme le muri. Cuando ya llega ya el tiempo, ya habla le con el de suyu maga fiel apostoles quien junto con ele na Getsemani: “Levanta. Vene ya. Taqui ya el quien ay traiciona conmigo.” (Mat. 26:36, 46) Y cuando el armao grupo ya llega para arresta con ele, ya anda le adelante, ya manda conoce de suyu mismo cuerpo y ya manda con el maga soldao larga con el de suyu maga apostoles. (Juan 18:3-8) Bien grande el coraje que ya demonstra si Jesus! Ahora el maga iscujido Cristiano y aquellos maga otro carnero ta pricura imita con el coraje de Jesus. Paquemodo?

9. (a) Porque kita necesita coraje para regular atende na maga miting? (b) Paquemodo el diaton ejemplo puede tiene efecto con el diaton maga hermano na preso?

⁹ Para puede regular atende con el miting, posible que necesita kita demonstra coraje si ta enfrenta maga dificultad. Cuanto na diaton maga hermano y hermana ta atende miting maskin pa bien triste sila, tan luya o tiene enfermedad. El otro, con coraje ta atende maga miting maskin pa tan contra kanila diila familia o el gobierno. Pensa si cosa el efecto del diaton ejemplo na maga hermano que yan preso por causa na diila fe. (Heb. 13:3) Si ta sabe sila que ta sirvi kita con Jehova maskin tiene maga probanza, ta queda fuerte el diila determinacion mentena el diila fe, coraje y integridad. Ya sucede tambien se con Pablo. Cuando na preso le na Roma, alegre le si ta sabe le que fiel ta sirvi el de suyu maga hermano con Dios. (Fil. 1:3-5, 12-14) Corto tiempo antes o despues con ele libra, ya escribi le carta para na maga Hebreo. Na ese carta, ya anima le con el maga fiel Cristiano que “continua [sila] ama con uno y otro” y no falta na atendida de miting.​—Heb. 10:24, 25; 13:1.

10-11. (a) Con quien kita debe invita para na Comemoracion? (b) Base na Efeso 1:7, porque kita se ta hace?

¹⁰ Ta demonstra kita coraje si ta invita kita diaton familia, uban na trabajo y maga vecinos para na Comemoracion. Porque kita ta invita kanila? Grande gayot diaton apreciacion na cosa ya hace si Jehova y si Jesus para kanaton poreso bien quierre kita invita con otro para atende el Comemoracion. Quierre kita que aprende sila si paquemodo tambien sila beneficia na “gracia” o incomparable pagka-bueno de Jehova por medio del rescate.​—Le con el Efeso 1:7; Rev. 22:17.

¹¹ Si con coraje kita ta atende maga miting, ta demonstra tambien kita otro precioso calidad que ta demonstra si Jehova y si Jesus.

12. (a) Paquemodo el maga miting ta hace hondo con el diaton amor para con Jehova y con Jesus? (b) Cosa kanaton ta anima hace el 2 Corinto 5:14, 15 para imita con Jesus?

¹² El diaton amor para con Jehova y con  Jesus ta motiva kanaton para atende maga miting. Despues, el cosa kita ta aprende na maga miting ta hace hondo con el diaton amor para con Jehova y na de suyu Anak. Na maga miting, pirmi kanaton ta hace acorda si cosa sila ya hace para kanaton. (Rom. 5:8) Ta hace kanaton acorda, especialmente el Comemoracion, si paquemodo de hondo el diila amor, maskin con aquellos gendeh pa ta entende el importancia del rescate. Cay bien grande diaton apreciacion, ta pricura kita imita con Jesus si paquemodo kita ta vivi cada dia. (Le con el 2 Corinto 5:14, 15.) Puera con ese, el rescate que ya dale si Jehova ta motiva kanaton para alaba con ele. Un manera que puede kita alaba con ele amo por medio na diaton maga de con todo corazon comento na maga miting.

13. Paquemodo kita puede demonstra si paquemodo de hondo el diaton amor para con Jehova y de suyu Anak? Explica.

¹³ Puede kita dale mira si paquemodo de hondo el diaton amor para con Jehova y con Jesus si conforme kita hace maga sacrificio para kanila. Na manada situacion, necesita kita hace maga diferente clase de sacrificio para puede atende na diaton miting. Manada congregacion el ta hace diila miting despues el hora del trabajo, donde posible cansao ya el maga hermano. Y el otro miting ta hace cada Sabado o Domingo donde ta descanza el otro. Ta nota ba si Jehova que ta atende kita miting maskin pa cansao kita? Siempre! Si mas grande diaton sacrificio para atende, mas ta aprecia tambien si Jehova el amor que ta demonstra kita para con ele.—Mar. 12:41-44.

14. Paquemodo ya dale un buen ejemplo si Jesus si paquemodo demonstra amor que conforme hace sacrificio?

¹⁴ Un buen ejemplo kanaton si Jesus si paquemodo demonstra amor que conforme hace sacrificio. Gendeh lang le conforme sacrificia de suyu vida para na de suyu maga dicipulo, sino conforme tambien le firmi hace una el bien del otro contra de suyu mismo cuerpo. Por ejemplo, ya dale le tiempo con el de suyu maga siguidores maskin pa cansao le na fisical o ta sufri na emocional. (Luc. 22:39-46) Y yan focus le na cosa le puede dale na otro, gendeh na cosa le puede ricibi kanila. (Mat. 20:28) Si ansina de hondo el diaton amor para con Jehova y con el diaton maga hermano, hay hace kita el todo para puede atende na Cena del Señor y na maga miting na congregacion.

15. Con quien kita mas interesao ayuda?

¹⁵ Parte kita del solamente organizacion que  ta trata con uno’y otro como man hermano y hermana y alegre kita usa diaton tiempo para invita con otro que man junto kanaton. Pero, mas interesao kita ayuda “con el diaton maga hermano y hermana na fe” quien ya queda gendeh activo. (Gal. 6:10) Ta demonstra kita diaton amor si ta anima kita kanila atende diaton maga miting, especialmente el Comemoracion. Igual con Jehova y con Jesus, bien alegre kita si tiene un gendeh activo hermano el bira otravez con Jehova, el diaton amable Tata y Pastor.​—Mat. 18:14.

16. (a) Paquemodo kita puede anima con uno’y otro y paquemodo puede ayuda el maga miting kanaton? (b) Porque ahora el buen tiempo para acorda el maga palabra de Jesus na Juan 3:16?

¹⁶ Si posible, na maga semana que hay llega, invita kita mas manada gente para atende con el Comemoracion na Viernes denoche, Abril 19, 2019. (Mira con el cajon “ Invita Ba Tu Kanila?”) Ojala pirmi kita anima con uno’y otro por medio de atendida de todo maga miting que ya prepara si Jehova para kanaton. Mientras ta queda cerca el fin de este sistema, necesita kita diaton maga miting para ayuda kanaton queda humilde, amable y tiene coraje. (1 Tes. 5:8-11) Con todo corazon, demonstra kita si cosa kita ta sinti para con Jehova y con el de suyu Anak por el diila amor para kanaton!​—Le con el Juan 3:16.