ARTICULO 1
“No Man Lingasa cay Iyo el De Tuyu Dios”
“No tiene miedo cay junto yo contigo. No man lingasa cay iyo el de tuyu Dios. Hace yo fuerte contigo, si, ayuda yo contigo.”—ISA. 41:10.
CANCION 7 Jehovah, Our Strength
PREVIEW *
1-2. (a) Paquemodo ya puede ayuda el Isaias 41:10 con Hermana Yoshiko? (b) Quien puede beneficia con el mensaje que ya manda escribi si Jehova na Isaias 41:10?
EL UN fiel hermana, si Yoshiko, ya ricibi mal noticia. Ya habla con ele el de suyu doctor que tiene ya lang le cuanto meses para vivi. Cosa de suyu reaccion? Ya acorda le con el de suyu favorito texto, el Isaias 41:10 (Le.) Despues, calmao le ya habla con el de suyu doctor que gendeh le ta tiene miedo cay si Jehova ta agarra de suyu mano. * Este texto ya puede dale comforta con el diaton hermana y ya ayuda con ele confia con Jehova. Puede tambien este texto ayuda kanaton esta calmao si ta enfrenta kita maga grabe probanza. Para entende si paquemodo, examina kita una si porque el Dios ya dale ese mensaje con Isaias.
2 Del primero, ya manda si Jehova escribi con ese maga palabra para dale comforta con el maga Judio quien hay queda maga destierro na Babilonia. Pero ya preserva si Jehova con ese mensaje gendeh lang para kanila sino para beneficia el todo de suyu maga siervo hasta na diaton tiempo. (Isa. 40:8; Rom. 15:4) Ahora, ta vivi kita na tiempo que “el situacion . . . bien dificil” poreso mas necesita kita el comforta que escribido na libro de Isaias.—2 Tim. 3:1, El Nuevo Testamento.
3. (a) Cosa maga promesa el puede kita incuntra na Isaias 41:10? (b) Porque kita necesita el maga asiguranza estaba na este maga promesa?
3 Na este articulo, man focus kita na tres promesa de Jehova na Isaias 41:10, el yeartext de 2019, que puede hace fuerte con el diaton fe: (1) si Jehova hay man junto kanaton, (2) ele el diaton Dios y (3) hay ayuda le kanaton. Necesita kita este maga asiguranza * cay igual con Yoshiko, ta enfrenta tambien kita maga probanza na diaton vida. Ta experiencia tambien kita maga dificultad por causa na maga mal cosas que ta sucede na mundo. Gane, cuanto kanaton ta enfrenta maga persecucion estaba na maga gobierno. Considera kita cada uno de este maga promesa.
“JUNTO YO CONTIGO”
4. (a) Cosa el primer asiguranza que considera kita? (Mira tambien con el footnote.) (b) Paquemodo si Jehova ya habla el de suyu sentido para kanaton? (c) Cosa el efecto contigo del cosa ya habla si Jehova?
4 Una, ta asigura kanaton si Jehova por medio na maga palabra: “No tiene miedo cay junto yo contigo.” * Ta dale mira si Jehova que junto le kanaton por medio del atencion y amor que ta dale le. Nota si paquemodo le ya habla de suyu sentido para kanaton. “Ya queda tu precioso na de mio ojos,” ya habla si Jehova. “Ya honra contigo y ya ama yo contigo.” (Isa. 43:4) Nuay maskin cosa na universo el puede causa para gendeh mas ama si Jehova con aquellos quien ta sirvi con ele; ta esta le leal kanaton. (Isa. 54:10) El de suyu amor y amistad hay dale kanaton coraje. Hay protege le kanaton igual si paquemodo le ya protege con el de suyu amigo, si Abram (Abraham). Si Jehova ya habla con ele: “No tiene miedo, Abram. Un defensa yo para contigo.”—Gen. 15:1.
Na ayuda de Jehova, puede kita tiene coraje y aguanta maga probanza, maskin igual este como avenida y fuego (Mira con el parapo 5-6) *
5-6. (a) Porque kita sabe que quierre si Jehova ayuda kanaton si ta experiencia kita maga probanza? (b) Cosa leccion kita puede aprende na ejemplo de Yoshiko?
5 Sabe kita que quierre si Jehova ayuda kanaton na diaton maga probanza cay ya promete le con el de suyu maga siervo: “Si pasa tu na agua, man junto yo contigo y si travesa tu na maga rio, gendeh tu man lumus. Si camina tu na fuego, gendeh tu hay quema, ni tiene tu maskin poco quemadura.” (Isa. 43:2) Cosa este quierre decir?
6 Gendeh si Jehova ta promete que quita le el maga probanza que ta hace lisud con el Isa. 41:13) Si Yoshiko, que ya menciona na primer parapo, ya puede experiencia que deverasan se. El de suyu anak mujer ya habla: “Bilib kame si paquemodo de calmao si Mamang. Ya puede gayot kame mira que ya dale con ele paz na pensamiento si Jehova. Hasta na dia que ya muri le, yan cuento le na maga nurse y paciente acerca con Jehova y de suyu maga promesa.” Cosa kita puede aprende na ejemplo de Yoshiko? Si ta confia kita na promesa del Dios “man junto yo contigo,” hay tiene tambien kita coraje y fuerza para enfrenta maga probanza.
diaton vida, pero gendeh le permiti que man lumus kita na “maga rio” de problema o tiene permanente mal efecto kanaton el “fuego” de maga probanza. Ta asigura le que man junto le kanaton y ayuda kanaton “pasa” na este maga dificultad. Cosa hace si Jehova? Hay ayuda le menora diaton miedo para puede kita mentena diaton integridad con ele maskin pa enfrenta kita muerte. (“IYO EL DE TUYU DIOS”
7-8. (a) Cosa el ika-dos asiguranza que hay considera kita y cosa este quierre decir? (b) Porque ya habla si Jehova con el maga Judio quien ya queda destierro: “No man lingasa”? (c) Cosa maga palabra na Isaias 46:3, 4 el posible ya puede ayuda con el maga siervo del Dios para gendeh tiene miedo?
7 Nota el ika-dos asiguranza que ya escribi si Isaias: “No man lingasa cay iyo el de tuyu Dios.” Cosa quierre decir del lingasa aqui na texto? El palabra que ya usa na original lengguaje para na “man lingasa” tiene idea que “pirmi mira na de tuyu atras por causa na miedo que tiene un cosa o gente que posible hace mal cosas contigo” o “queda alarmao.”
8 Porque si Jehova ya habla con el maga Judio quien hay queda maga destierro na Babilonia que “no man lingasa”? Cay sabe le que hay tiene miedo el maga ta queda na Babilonia. Porque? Cerca na fin del 70 año de pagka-destierro del maga Judio, hay ataca el maga soldao de Medo-Persia con el Babilonia. Hay usa si Jehova kanila para libra con el de suyu maga siervo desde na Babilonia. (Isa. 41:2-4) Cuando ya sabe el maga de Babilonia y aquellos de otro maga nacion que cerca ya el diila contrario, ya pricura sila mentena el diila coraje y ya habla sila na uno’y otro: “Tiene animo.” Ya hace tambien sila mas manada dios-dios cay ta esperanza sila que protege este kanila. (Isa. 41:5-7) Pero si Jehova ya asigura con el maga Judio quien ya queda destierro: “Etu, O Israel, [gendeh igual con el de tuyu maga vecinos] el de mio siervo . . . No man lingasa cay iyo el de tuyu Dios.” (Isa. 41:8-10) Nota que si Jehova ya habla: “Iyo el de tuyu Dios.” Por medio de este maga palabra, si Jehova ya asigura con el de suyu maga fiel siervo que nuay le ulvida kanila—ele siempre diila Dios y siervo siempre sila de suyu. Ya habla le kanila: “Hay carga . . . y salva yo con ustedes.” Este maga palabra ya puede gayot hace fuerte kanila.—Le con el Isaias 46:3, 4.
9-10. Porque gendeh kita necesita tiene miedo? Dale ilustracion.
9 Mas tan lingasa ahora el maga gente cay mas ta queda grabe el situacion del diaton mundo. Asigurao que maskin kita afectao tambien. Pero, gendeh kita necesita tiene miedo. Si Jehova ya habla kanaton: “Iyo el de tuyu Dios.” Porque este promesa puede gayot kanaton ayuda esta calmao?
10 Considera este ilustracion: Tan uyuk el eroplano onde ta munta kanda Jim y Ben por causa na fuerte viento. Mientras ta sucede se, ya oi sila este anuncio: “No quita de ustedes seat belt. Hay experiencia kita turbulence.” Ya queda bien malingasa si Jim. Pero ya habla el piloto: “No man lingasa. El piloto este de ustedes.”
Pero falta confianza si Jim y ya habla, “No man lingasa?” Pero, ya nota le que gendeh tan lingasa si Ben. Ya pregunta le con Ben, “Porque tu bien calmao lang?” Yan smile si Ben y ya habla: “Cay bien conoce yo con el piloto. Tata se de mio!” Y despues ya habla si Ben: “Man cuento yo contigo acerca con ele. Asigurao hay queda tambien tu calmao si sabe tu si paquemodo le de buen piloto.”11. Cosa maga leccion kita puede aprende na ilustracion acerca na dos pasajero?
11 Cosa maga leccion kita puede aprende na este ilustracion? Igual con Ben, calmao kita cay bien conoce kita con el diaton Tata na cielo, si Jehova. Sabe kita que ayuda le kanaton para aguanta maskin maga bien dificil problema na este ultimo maga dia. (Isa. 35:4) Ta confia kita con Jehova poreso ta esta kita calmao maskin el otro sobra de miedo. (Isa. 30:15) Igual con Ben, ta habla tambien kita na maga gente el maga razon si porque kita tiene confianza con Dios. Y sila tambien hay queda asigurao que maskin cosa dificultad sila enfrenta, hay ayuda kanila si Jehova.
“HACE YO FUERTE CONTIGO [Y] AYUDA YO CONTIGO”
12. (a) Cosa el ika-tres asiguranza que hay considera kita? (b) Cosa kanaton ta manda acorda el usada del expresion “brazo” de Jehova?
12 Considera el ika-tres asiguranza que ya escribi si Isaias: “Hace yo fuerte contigo, si, ayuda yo contigo.” Ya menciona si Isaias si paquemodo hace fuerte si Jehova con el de suyu maga siervo: “Si Jehova, el Soberano Dios, hay vene con poder y el de suyu brazo hay rula para con ele.” (Isa. 40:10) Na mucho situacion, el Biblia ta usa con el palabra “brazo” como simbolo de poder. Poreso, el cosa ya habla na texto que “de suyu brazo hay rula” ta manda kanaton acorda que si Jehova un poderoso Rey. Ya usa le el de suyu incomparable poder para suporta y defende con el de suyu maga siervo de antes y ta continua le hace fuerte y ta protege con aquellos quien ta confia con ele ahora.—Deut. 1:30, 31; Isa. 43:10, ftn.
Nuay armas el ganá contra na proteccion de Jehova (Mira con el parapo 12-16) *
13. (a) Cuando especialmente si Jehova ta cumpli de suyu promesa que hace fuerte kanaton? (b) Cosa garantia el ta dale kanaton fuerza y confianza?
13 Ta cumpli si Jehova con el de suyu promesa “hace yo fuerte contigo,” especialmente si ta persigui kanaton. Na cuanto maga nacion ahora, el diaton maga contrario ta pricura hace descanza con el diaton predicacion o prohibi con el diaton organizacion. Maskin pa de ese, gendeh kita sobra de malingasa. Tiene kita fuerza y confianza cay ya dale kanaton si Jehova este garantia: “Maskin cosa armas hace contra contigo gendeh tiene buen exito.” (Isa. 54:17) Este ta manda kanaton acorda tres importante punto.
14. Porque kita gendeh ta estraña que el maga enemigo del Dios tan contra kanaton?
14 Una, como maga siguidores de Jesus, ta expecta kita que odia kanaton. (Mat. 10:22) Si Jesus ya predicta que hay persigui gayot con el de suyu maga dicipulo na ultimo maga dia. (Mat. 24:9; Juan 15:20) Ika-dos, el profecia de Isaias ta indica que gendeh lang kanaton odia diaton maga contrario, sino hay usa sila maga armas contra kanaton. Cuanto na de este maga armas amo el maga imbusterias y brutal persecucion. (Mat. 5:11) Gendeh kanila sangga si Jehova que usa este maga cosas contra kanaton. (Ef. 6:12; Rev. 12:17) Pero gendeh kita debe tiene miedo. Porque?
15-16. (a) Cosa el ika-tres punto que necesita kita acorda y paquemodo el Isaias 25:4, 5 ta suporta con este? (b) Cosa el Isaias 41:11, 12 ta habla acerca si cosa sucede con aquellos quien tan contra kanaton?
15 Considera el ika-tres punto que necesita kita acorda. Ya habla si Jehova que nuay “maskin cosa armas” que usa contra kanaton el “tiene buen exito.” Igual si paquemodo el un pader ta protege kanaton na bien fuerte ulan y viento, si Jehova hay protege kanaton contra na “rabia de aquellos quien ta maltrata.” Isaias 25:4, 5.) Nunca el diaton maga enemigo puede hace cosas que tiene permanente mal efecto kanaton.—Isa. 65:17.
(Le con el16 Ta hace tambien fuerte si Jehova con el diaton confianza con ele cuando ya dale le detalle si cosa sucede con aquellos “bien rabiao” kanaton. (Le con el Isaias 41:11, 12.) Maskin paquemodo pa de grabe el diila ataque contra kanaton, igual lang siempre el resulta: Todo enemigo del maga siervo del Dios “hay sale destrozao.”
SI PAQUEMODO HACE FUERTE DIATON CONFIANZA CON JEHOVA
Puede kita hace mas fuerte con el diaton confianza con Jehova si regular kita le acerca con ele na Biblia (Mira con el parapo 17-18) *
17-18. (a) Paquemodo el lehida de Biblia puede hace mas fuerte con el diaton confianza con Dios? Dale un ejemplo. (b) Paquemodo puede ayuda kanaton si medita kita con el yeartext de 2019?
17 Ta hace kita fuerte diaton confianza con Jehova si conoce pa kita mas con ele. Puede lang kita este hace si le kita con el Biblia y medita con el cosa kita ta le. El Biblia ta contene informacion si paquemodo si Jehova ya protege con el de suyu maga siervo de antes. Ta dale este kanaton confianza que cuida le kanaton ahora.
18 Considera con el bonito ilustracion que ya usa si Isaias para dale mira si paquemodo si Jehova ta protege kanaton. Ya refiri le con Jehova como un pastor y con el maga siervo del Dios como maga carnero. Acerca con Jehova, si Isaias ya habla: “Por medio na de suyu brazo hay ajunta le con el maga diutay carnero y na de suyu pecho hay carga le con esos.” (Isa. 40:11) Si ta sinti kita que junto kanaton si Jehova, ta sinti kita protegido y calmao. Para esta kita calmao maskin ta enfrenta kita maga dificultad, el fiel y sabio esclavo ya iscuji con el Isaias 41:10 como el yeartext para na año 2019, “No man lingasa cay iyo el de tuyu Dios.” Medita con ese maga palabra. Hay hace este contigo fuerte para enfrenta maga probanza na futuro.
CANCION 38 He Will Make You Strong
^ par. 5 El yeartext para na año 2019 ta dale kanaton tres razon para puede esta calmao maskin manada mal cosas ta sucede na mundo o na diaton personal vida. Este articulo hay examina con ese maga razon y ayuda kanaton menora diaton lingasa y mas confia con Jehova. Medita con el yeartext. Si posible, man memorize con este. Hace este fuerte contigo para enfrenta con el maga problema na futuro.
^ par. 1 Mira con el The Watchtower, Julio 2016, p. 18.
^ par. 3 SI COSA QUIERRE DECIR: El asiguranza amo un declaracion o un promesa que asigurao hay sucede el un cosa. El maga asiguranza que ta dale si Jehova kanaton puede menora diaton lingasa na maga problema que posible kita enfrenta.
^ par. 4 Tres beses ya menciona na Isaias 41:10, 13 y 14 el expresion “No tiene miedo.” Na este maga texto, pirmi ta usa el maga palabra “iyo” o “yo” (que ta refiri con Jehova). Porque si Jehova ya guia con Isaias para usa pirmi con ese maga palabra? Para hace claro el un importante punto—puede lang kita evita tiene sobra miedo si confia kita con Jehova.
^ par. 52 DETALLE DE LETRATO: El maga miembro de familia ta enfrenta maga probanza na trabajo, na diila salud, na ministerio y na escuela.
^ par. 54 DETALLE DE LETRATO: Yan raid el maga polis con el casa onde ta hace el miting del maga hermano y hermana, pero ya esta sila calmao.
^ par. 56 DETALLE DE LETRATO: El regular De Familia Adoranza ta hace fuerte kanaton para aguanta.